2 Reyes 12 - Dupade Uruode

Judágosode ore eduguéjna disi Joás uté pésu Pangarádejnai ajegaidode cucha uje sacerdote Joiada cho quique cuchade ome nanique gu

¹ Enga israélgosode ore eduguéjnai Jehú uté guejnanie siquerei gare iji ti nanique ome dáringai eduguéjna uje quene judágosode ore cho deduguéjnai iji Joás uté nanique. Enga Joás idai u Jerusalén nanique ga guejnanie siquerei chise 40 años nanique ome dáringai judágosode ore eduguéjna iji uté. Ga Joás uté daté i tu Sibia ga uaté idai u Beerséba nanique.

² Enga Joás uté pésu cucha arégode gatuaque iji Pangarádejnai edominone jé iji dirode udore jnese uje Pangarádejnai iroi sacerdote Joiada déji dayaridi ga cho Joás uté quique ome payuquetotiguei isocárigo nanique.

³ Mu cucha gajnareque chojmarai qué déji Joás uté, enga u uje que chejnápise ore aseradéjnane jogadébeode jnese gotique iji cucarãte umarone, orónenie iji daniri uté. Enga urasade judágose jecucha ijo ore aseranone udore ome dẽrapáidode cucha, jé aja uje ore chãru cucha ai unérone iji to, uje que ore isocade urásu mu. Nanique uje cáma eduguéjnai Salomón chimate Pangarádejnai iguíjna cuchábi uté, enga jecucha israélgosode ore chicha dẽrapáitigo cucha aja ore aseradéjnane jogadébeode iji cucarãte umarone, orónenie iji ore uniri uté. Mu uje Salomón e chimate dorai uté, enga urasade ore gajnepídi tu ujetiga ore chedurase Pangarádejnai uté iguíjnai iji Jerusalén ome dẽrapáitigo cucha udore jnese. Uje e puyágome Pangarádejnai ujetiga ore chapuse dẽrapáitigo cucha jogadode aja, mu uñane doi dáyipiedie ome cuchade udore.

Judágosode ore eduguéjnai Joás uté chiroque sacerdóteode aja Pangarádejnai iguı́jna cuchábi úringárique pipesudápo rı̃, uje e gajnareque gu

⁴ Enga chise dı́nique nanique ga Joás tibidi Pangarádejnai irógode sacerdote nanique ga chisı́ome daroquéode ome ore, ga chojninga: –Amátayo yocurasade gueranenie plátapı́sei aja ñane jnese, uje ore cho puyéji deranenie udire ga ore di údi iji Pangarádejnai iguı́jnai gatuaque. Yojninganie u ore gajnenie plátapı́sei uje ore cho doré ome, enga impuéstos gajnei udire. Jé upo ore gueranenie plátai rı̃ uje ore di údi gu uje e ore chajo raja daru iyiejnane ome Pangarádejnai ujetiga ore cho uté gajnéji deranenie udire. Enga yojninganie upo ore gueranenie plátai rı̃ uje que ore gajnepı́di tu jeta ore di údi gotique, mu ore potapı́sa jeta ore chisı́ome Pangarádejnai bisideque ome dáyipie ueradedie udire.

⁵ Uje uacarasade chisı́ome daplátadie udire ome sacerdote chojmara, chojmarane uaque jne ga asayo plátadie udire iji uacarajade uacarása ore jmainie. Ga beyoi cuchade oredie ome udire jne ome Pangarádejnai iguı́jnai uté úringárique pipesudápo yui rı̃. Uacamóño uje Pangarádejnai iguı́jnai e péroringane cuse gu.–

⁶ Mu uje Joás guejnanie siquerei e chise 23 años nanique ome dáringai eduguéjna nanique, mu chimo uje cáma Pangarádejnai irógode sacerdote ore doi uru quigode gotique ome Pangarádejnai iguı́jna cuchábi nanique jeta ore pésapo úringárique uerate rı̃.

⁷ Jecute ore eduguéjnai Joás tibidi Pangarádejnai iroi sacerdote nanique uje i tu Joiada, jé aja uté jorane sacerdóteo to, enga quı̃rique Joás uté dosója ore gu uje que ore úja nája ujetiga ore pésu Pangarádejnai iguı́jnai péroringáne jogadode. Enga Joás chojningame ore: –¿Jé gotique gu a uje cáma beyoi yuru cásodicáite ome Pangarádejnai iguı́jna cuchábi enga que apésopo cuchade uje gajnarécho iji uté rı̃? Jecute yósi tome uaque: Jé iji diri tudé, enga a jé ca sacerdóteode uaque asayópo uacarasade gueranenie pláta. Enga uacarasade gueranenie plátai udire uje qué déji uacajmainie, ga ası́ñome pajóningane ajirisórone udore. Enga a ore chinguı́ra plátadie udire aja Pangarádejnai iguı́jna cuchábi úringárique pipesudápo jne rı̃.–

⁸ Ga jé u nanique uje Joás uté pijnángaidı́so sacerdote ore chimesẽre uté áyipiedie quigode, jeta jé ca ore chisapo darasade ore gueranenie plátai rı̃. Enga a jé ca ore gajnepı́di upórasu rı̃ ujetiga ore chajire Pangarádejnai iguı́jnai úringárique pipesute yui, mu uñéngo gajnepı́di tu jne.

⁹ Enga cucha dacadode udojo quigade ga sacerdóteode ore eduguéjnai Joiada uté doi cajórique uje pipesute iji táblade nanique. Enga chijnı́e bocate ajámatique to iji cajoi joride uaté ga chicha cajoi uté aja Pangarádejnai gajnei gaserãte ejoi. A gosi chacárasaja Pangarádejnai iguı́jna piagoi uté, mu cajoi uté dérasi gosi ãrachua quitique nanique. Ga e dimane cajoi uté ome judágosode ore yui ujetiga gosi di deranenie plátai údi aja Pangarádejnai iguı́jna cuchábi uté. Enga sacerdóteode uñane gajnepı́di tu ujetiga ore chirote Pangarádejnai iguı́jna piagoi ejode. Ga pajóningane jnese uje ore urasade judágose ore di údi gatuaque aja Pangarádejnai iguı́jnai, ga Pangarádejnai iguı́jna piagoi irodisórone udore jı̃raque nája cajoi uté bocate ajámami ajei nanique.

¹⁰ Uje ore chimo uje plátadie irágu cajoi uté ajei, ga jé adi tu uje eduguéjnai Joás iróquegatéi uté jé aja sacerdóteode ore eduguéjnai Joiada uté, ore nóna ñane aja Pangarádejnai iguı́jnai uté ujetiga ore chisecãru ore urasade gueranenie plátai. Ga Joás iróquegatéi uté uje nóna Joiada u uté uje jecucha churúsãre cuchade ome deduguéjnai uté. Enga ore jmapié tu ujetiga udore gare chijnime ore urasade gueranenie plátai uje déji cajoi uté ajei, ga ore nája bólsadie ajéode. Ga quigade enga ore chuguhese bólsadie udire ujetiga plátadie ikı́lode batigade pijoque.

¹¹ Ga jecucha ore churúsãre daguhéyadie plátai batigade gatuaque. Udojo quigade enga ore chisı́ome plátadie udire ome capatadie udire ujetiga ore cho oré itrabajasórone udore uje ore pésapo jogadode uje péro iji Pangarádejnai iguı́jna cuchábi rı̃. Ujetiga ore chimo cuchárique uje péro iji, enga ore pésu. Enga poridie irábesórone carpintéro u udore uñane uje capatadie cho ore oré, jé aja Pangarádejnai iguı́jna cuchábi orasórone ore.

¹² Que gusu udore, mu capatadie chimánapo albañiles rı̃, uje ore chirajapise ladrı́llode isocade, jé aja cucaranenie ipesungórone ore rı̃ uje ore chujé eruéode ga ueradéjna. Ga capatadie ore dopoi táblade oredie rı̃ ome Pangarádejnai iguı́jnai úringárique pipesute yui. Ore dopoi cucarãte uejade oredie to rı̃ uje tiroque eruéode. Enga que gusu udore, mu ore doi cuchade uñane oredie jnese ome ore urasade gueranenie plátai udire jeta ore pésu péroringáne iji Pangarádejnai iguı́jnai uté ga ueradápo rı̃.

¹³ Mu ore chedu Pangarádejnai iguı́jnai úringárique pipesudápo rı̃ ome judágosode ore gueranenie plátai udire jnese uje pijmáraja cajoi ajei uje ore di údi iji Pangarádejnai iguı́jna cuchábi. Jecute que ore chinguı́ra plátadie udire aja bajo tajégueguedie jeoga bajo ajenenie udire úringáringui pipesudei ome pláta gotique. Enga que ibioque quedéjnane isangurúone upo rı̃ uje ore chujnungu pioi ¡sere! ome udore. Jeoga ore ubuchutique trompéta u, jeoga Pangarádejnai iguı́jnai jogosórone cucha uñeque uje pipesute udore ome óro, pláta ore, mu que toc ujetiga ore chinguı́ra darasade gueranenie plátai aja udore. Uje que plátadie qui tu cuchade udore gu.

¹⁴ Mu qui tu ujetiga capatadie chimate itrabajate gaisórone ome plátadie udire, jé aja ujetiga ore doi cucha chonatı́go oredie ome jeta ore pésu Pangarádejnai iguı́jnai úringárique ueradápo rı̃ ome dagaidode cucha udore.

¹⁵ Uje plátadie irodisórone ore chicha plátadie aja capatadie jmainie nanique, enga ore gajnepı́di tu ujetiga ore chimate itrabajate gaisórone gaté uje ore pésapo Pangarádejnai iguı́jnai rı̃. Mu que plátadie irodisṍriso udore chutai gotique ujetiga capatadie udire chatatapo dasocáringome ore gaté rı̃. Uje ũrepı́so capatadie udire gu.

¹⁶ Mu judágosode ore gueranenie plátai uje ore di údi iji Pangarádejnai iguı́jnai ome úringárique poraque yui jé ca chacája quique uñeque gotique, mu ore chedu Pangarádejnai iguı́jnai uté ipéroringane ome ore gueranenie udire. Jecute que sacerdóteode chagutı́yame darasade gueranenie plátai udire. Jé basa ga ore urasade guẽrapáidode cucha uñane oredie u uje sacerdóteode ore gajnei tu ujetiga ore chagutı́yame oredie udire: Ujetiga gosi cho doré ome dasijnaringuéone ome Pangarádejnai uté, jeoga úringai máraque cuse gu uje gajnareque adode ome ujórique ayoré ga gosi cho doré, mu cucha pẽrapáidode udore u uje sacerdóteode ore gajnepı́di tu jeta ore chagutı́yame.

Sı́riagosode ore eduguéjnai Hazael pota pésu dajocaningai ome judágosode ore idai Jerusalén uté, mu Joás cho oré ga Hazael jno

¹⁷ Iji dirode udore nanique uje qué pipesudápo Pangarádejnai iguı́jnai rı̃, enga sı́riagosode ore eduguéjnai Hazael cugujnáji judágosode ore idai Gat nanique, ga sué ore gai ga cho dajnéngu ore idai uté nanique. Quigade enga Hazael pota jeta dopoi dajmapié uaté rı̃ ome Joás idai Jerusalén ujetiga cugujnáji to.

¹⁸ Jecute judágosode ore eduguéjnai Joás uté chucué dasocáringome re ujetiga Hazael uté charásu ore unerai. Enga jé u uje Joás chamáta dai bajade ore guẽrapáidode cucha oreránguejna aja ñane, uje ore cho cucha puyáchoji udore ome Pangarádejnai uté nanique. Enga Joás dai bajade udore u Josafat, Joram, Ocozı́as ore, judágosode ore eduguéjna cásodicáite. Que gusu ore guẽrapáidode udore, mu jé chátaja deranone cucha orerã́cho to ome Pangarádejnai uté. Enga Joás uté chase daguı́jna cuchábi ajei to ome órodie jnese nanique iji dañerane cucha oreránguejna jogadode udore. Ga jé isocai tupo rı̃ uje chucué órodie jnese iji Pangarádejnai iguı́jnai cuchábi añerane cucha oreránguejna jogadode. Quigade enga Joás chiroque cucha oreránguejnane udore jnese aja sı́riagosode ore eduguéjna cuchábi Hazael uté. Ga jé u uje ore eduguéjnai uté cha pocaningai unerai, ga jnoji Jerusalén nanique.

Judágosode ore eduguéjnai Joás chise dagachodi nanique, ga ujnacari Aması́as basája charidi nanique

¹⁹ Enga cucha dacate amirone jnese iji Joás uté úringai eduguéjna, jé aja ipesudode cucha jnese, ga purusãracho jnese iji darujna aode uñane nanique uje ore churúsãre judágosode ore eduguéjnane adode iji udore.

²⁰ Joás uté iróquegatéode ore pésu dáyipie ome ñane nanique jeta ore chujé deduguéjnai uté. Ga ore chimate uté aja jnumi nanique iji Joás iguı́jna uñai uje déji ore ajminémei uté uje i tu Mílo. Enga iguı́jnai uté déji ore ajnai dajeque uje i tu Síla.

²¹ Enga Joás uté yungórone u daróquegatéode nanique ga ore ı́ode u udojo: uñai i tu Josacar, ga uté dai i tu Simeat; jé basa ga uñai i tu Jozabad ga uté dai i tu Somer. Ga pijóchõre Joás uté iji dáquiode ódedie jogadi nanique iji David Idai Jerusalén uté. Ga Joás uté ujnacari chácariji charidi nanique uje i tu Aması́as.