2 Reyes 11 - Dupade Uruode

Iji judágosode ore uniri uté ga ore eduguéjna casé Ocozı́as daté Atalı́a uaté que chajirape cuchárique mu jı̃raque chayója dájnamone ore úringane chuque yui jnese, uje jnari dajnacari charidi ome re ome dáringa judágosode ore eduguejẽ́

¹ Uje Ocozı́as daté Atalı́a chudute dajnacari ujnomei uje ore chujé nanique, enga uaté jı̃raque chucué dajé noñaringuei ome dájnamone jeta chujé ore jnese. Uje uaté jnari rome dáringa ibijogue ga charatáyime ome Ocozı́as abode jeta uñeque chácariji dai casé jogadi iji ore uniri Judá uté.

² Mu gusu Ocozı́as ape parátagabi Joás uté uje chapı́dome uaté ijmongaquéode udore. Uje Ocozı́as abode jnese déji dáringane chuque ejode, mu ore dajnongaté Josaba torı́asia Joás uté iji dajorane ujade, ga pógusu doidábi suté disape nanique. Enga Ocozı́as nero tu Josaba uaté, uje judágosode ore eduguéjna casica Joram uro uaté nanique. Enga Josaba chijna Joás uté, jé aja añerato gapu uaté ga jno ore údi aja guiguı́jna cuchábi ajé uñai uje pañeracho colchone, pimochápiode ore guio iji jogadi uté gatuaque. Ga Josaba pógu ore iji uté jeta jé ca Atalı́a cháta dájnami Joás uté aja dejnane Ocozı́as abı́o uñane.

³ Uje Atalı́a uaté chácariji dáringa eduguejẽ́ iji judágosode ore uniri uté, mu Joás uté déji dáringai pipoguiete iji Pangarádejnai iguı́jna cuchábi uté, uje dajnongaté Josaba chañuru guio gatuaque. Enga Joás guejnanie siquerei 6 iji ore acoyapı́di uté.

E chise diri nanique ga sacerdóteode ore eduguéjnai Joiada pésu dáyipie tiji dajei ujetiga pésu disabi Joás uté ga basája dáringárique eduguéjna jne iji dai casica Ocozı́as charidi

⁴ Mu e chise siqueré gare iji tia uaté nanique uje Atalı́a chácariji dáringa eduguejẽ́, enga Pangarádejnai iroi sacerdote uje i tu Joiada tibidi soldádode ore eduguéjna gatéode udore ore uje ore chı̃́care capitán aja jnanione udore ore. Enga udore iroque dipeséode u peduguéjna cuchábode irodisórone uje ore irodique deduguéjnane ejode uje ore chojningame ore queretéode, jé aja pirodisórone soldate uñane to nanique rı̃. Ga Joiada chiroque capitanie jnese aja dari iji Pangarádejnai iguı́jna cuchábi ajei. Ga ore chacája "Témplo" uté ajei nanique ga Joiada chojningame ore: –Beyoi ga ası́ñome uacaru uréone ome yu ujetiga átayoja yu, ga jé ajóyo uágaja uacaruode udore iji Pangarádejnai iguı́jnai udé.– Ga ore chajnai uruode ga ore chojninga: –Ejẽ́, ejẽ́, ejẽ́, a yicoi jne, a yicoi jne.– Ore tṍrai dajñarenie ome uje ore chimesẽre Joiada uru quigode gu. Uje e Joiada, capitanie ore chisı́ome daru iyiejnane ome ñane, ga quene Joiada chingongara disabi suqué aja ore iji diri tuté nanique, uje Joás a u ore eduguéjnai jne.

⁵ Ga jé u uje Joiada chisı́ome daroquéode ome udore, ga chojningame capitanie udire: –Uacasocai a jé chorase udé jne: Ome uacague gadióguedie uje uacáringane iroditacho cuse iji sábado dirome, mu uacague chojmaráraque a chicáji peduguéjnane ore iguı́jnai jne ga arocho ejode jne.

⁶ Jé basa ga uacague uña a chicárasiji peduguéjna cuchábode iguı́jna piagoi jne uje i tu Sur Gajnei Piago. Jé basa ga uacague gadióguei uaté a déji piagoi uté iji soldádode ore iguı́jnai quigade jne. Enga a jé uacasocai u uté jne, puague gadióguedie uaque á, jeta ãrijı́naño uaquejode iji uacarodipı́dode udore. Enga a ca toguı́rase ujetiga cuchárique toria chise Pangarádejnai iguı́jnai bisideque jne.–

⁷ Mu Joiada qué jnopo daru quigode údi rı̃ ome capitanie uje ore irógode gajnepı́di tu Pangarádejnai iguı́jna cuchábi, ujetiga ore chirote ejode. Enga Joiada uté chojningame ore: –Mu uacague garedie uje ore irodique Pangarádejnai iguı́jnai iji sábado, a chisı́rase ore gajnepı́di guedé batiga jeta ore chécãre irodisõre bajátigo, mu yipota jeta jé ca ore básome dáringane añeratácho gotique jne, mu a ore cháta raja dajorane Pangarádejnai iguı́jnai irodisõre udore gu disabi suté úringamı́ pañerape.

⁸ Ga apéso odobe gajnúraque ome uacáguedatéraque jne ga disabi a déji uacajénique jne. Ga ajnáño uacõrachade jnese jne. Mu ujetiga ayorérique pota uacague ujetiga chacája ajei jne ga ajéyo gosi jne. Ga ajichopise disabi yúode jne ga ajı́naño aja ajesúrique jne.–

⁹ Ga jé u nanique uje capitanie udire uje ore irógode irodipı́di tu Pangarádejnai iguı́jnai, ore doi Joiada uru quigode jnese, ga ore jno darógode udore údi aja Pangarádejnai iroi sacerdote uté nanique uje uté i tu Joiada. Enga ore chapuse darógode udore ore aja jnese: udore ore uje ore gajnepı́di tu jeta ore chañuru Pangarádejnai iguı́jnai guio iji sábado uté, jé aja udore ore to uje a chisı́rase ore gajnepı́di guedé batiga jeta qué ore cha. Mu udore jé ore chorase ñane iji deréjnai uté uje que uñeque basirásome gotique.

¹⁰ Ga Joiada uté doi asórenie uje eduguéjna cuchábi David gajnecho nanique ga chátaja guebéode uje ore chicháji daróbedie yúode ome pocaningane ga chisı́ome capitanie ore ga ore chisı́ome daroque dipeséode, Pangarádejnai iguı́jnai irodisõre ore. Enga cõrachade udore u uje pañeraque udore guio iji Pangarádejnai Dupade iguı́jna cuchábi ajé uñai nanique.

¹¹ Ga jnanione udore uje ore irodique Pangarádejnai iguı́jna cuchábi ejode ore pésu dayoyade iji Pangarádejnai iguı́jnai iquei, uje uñane déji darodipı́dode iji Pangarádejnai iguı́jnai ãrachua qui, ga pirodisórone ore jochai uté chuságapoja arasé qui te rı̃. Ga ore chaparu Pangarádejnai gajnei gaserãte gai to rı̃. Ga dimane ore õrachade iji ore jmainie jnese uje ore chãraque deduguéjnami disape ejode ome eduguejẽ́ sijnangue Atalı́a uaté.

¹² Ga jé u nanique uje Pangarádejnai iroi sacerdote uté uje i tu Joiada di eduguéjna cuchábi casica abi Joás údi, ga doi gatoje nanganatagué ga chicháji disabi gatoi gai nanique. Ga chátaja aode uje Pangarádejnai ichagájade darúo déji aode udore, jé aja uru iyiejnane udore. Enga jé urásu jeta Joás uté chiraja dasocáringome dáringai eduguéjna ome Pangarádejnai uru quicho udore. Enga jé u uje ore cho deduguéjnai iji Joás uté nanique. Enga pojneque aseque puyai ójo gai nanique jeta uté pijógome dáringai judágosode ore eduguéjna, ga jé u uje ayorébujnane ore chujé dajmanáyone aja ñane ome darasitigai, ga ore chinguı́ra dabijnanone aja dejode uje ore chojninga: –¡Yipécopú ga yoqueduguéjnami suté ucuecaringuei umarejna gajiné, jõ!–

Quene eduguejẽ́ sijnangue Atalı́a uaté chise dagachodi nanique

¹³ Mu Atalı́a uaté chudute ore ichorájnai iji Pangarádejnai iguı́jna cuchábi ejode, uje Pangarádejnai iguı́jnai irodisórone, ayorébujna ore chinguı́ra dabijnanone aja dejode, ga Atalı́a uaté jı̃raque tibágui dagamini iji Pangarádejnai iguı́jnai uté.

¹⁴ Ga uaté chise Pangarádejnai iguı́jnai uté ga chajire mu ¡chimo jóroque re! uje disi eduguéjnami chaguesi iji Pangarádejnai iguı́jnai cutádedaté uaté ejoi, uje jecucha eduguéjnane ore isocabei u nanique. Ga uaté chimo capitanie ore iji eduguéjnami ejode, jé aja uñane uje ore chijna dabuchugode to iji disabi suté ejode. Ga Atalı́a chimo ayorébujnai uje ore tṍraji ore uniri Judá uté údode jnese, uje ore nı́na raque jnese iji deduguéjnami ejode, ga uñane chubúchu dabuchugode iji ejode rı̃. Ga jé u nanique uje Atalı́a uaté chajnangarase daguidedie iji dabai ome dáyuguhebátigai, ga tibite ore gai ga chósi te: –¡E uacayague yu que! ¡E uacarané yu que!–

¹⁵ Ga Pangarádejnai iroi sacerdote uje i tu Joiada que pota jeta ore chujé Atalı́a uaté iji Pangarádejnai iguı́jnai ajei, jecute jı̃raque chósi tome soldádode eduguéjna gatéode capitán ome daru quigode: –Asayo uaté ¡saque! jne, mu jé ca ajuécho ujetiga chugué uaté iji de. Beyoi ga apéso uacajochatique aja uacajesui enga achayo uaté aja uacajei jne enga boyo údi jne. Enga a uñeque chirota uaté jne enga achacho gosi jne ome uacaquesérique.–

¹⁶ Ga jé u uje soldádode eduguéjnane jı̃raque chisa Atalı́a uaté ¡saque! nanique ga ore jno uaté údi. Mu uje uaté chise soldádode orutode burica cacadi uté aja peduguéjnane iguı́jnai ejoi uté, enga quene ore chicha Atalı́a cachodi aja jogadi uté ome úringa chugué.

Judágosode ore chisiapome daru iyiejnane ome Pangarádejnai rı̃ jeta ore chedu uté, ga jé u uje ore chinoningase Baal gajnéone cucha iji daniri uté

¹⁷ Udojo quigade ga sacerdote Joiada chutṍri darasade judágose jnese jé aja eduguéjnai Joás ujetiga ore chisı́ome daru iyiejnane ome Pangarádejnai uté. Enga ore chajo raja daruode ome Pangarádejnai uté ujetiga ore susípise dáringane Pangarádejnai urása guio. Que gusu uté, mu Joiada pésu to ujetiga eduguéjnai Joás, urasade judágose ore chichagápo daru uréone aja ñane rı̃ jeta ore susípise dajnepı́dode guio ome ñane rı̃. Ga ore chajo raja daruode udore jnese ome ñane.

¹⁸ Quigade enga ayorébujnáiso uje ore tṍraji daniri Judá uté údode jnese, ore chicáji ayoré gajnui Baal iguı́jnai jnese ga ore chajnangarase iguı́jnai uté aja dejode. Ga ore chinoningase Baal oredie udire iji uté, jé aja uté gajnéone gaserãte udore nanique rı̃, ga urúpiso ore iji jnumi. Ga ore chujé dupa quedéjnai Baal iroi sacerdote nanique uje i tu Matán iji Baal gajnéone gaserãte iquei. Quigade ga sacerdote Joiada ichajapite daróquegatéode aja ore charidode ome Pangarádejnai iguı́jna cuchábi úringai pirodique nanique.

Quene tijode cho jnángome jerusaléngosode udore ore uje Atalı́a uaté toi, ga Joás chácariji dáringamı́ eduguéjna iji daniri Judá uté

¹⁹ Udojo quigade ga Joiada chamáta gáguedaté aja ñane nanique ujetiga ore jno disabi údi aja eduguéjnai iguı́jna cuchábi uté. Ga ore jnoji Pangarádejnai iguı́jnai ga ore chicáji eduguéjnai iguı́jnai uté yui jnese: ga soldádode eduguéjnane capitán ore déji jnese nanique, jé aja peduguéjna cuchábode ore irodisórone uje ore chojningame udore queretéode, jé aja Pangarádejnai iguı́jna cuchábi irodisórone ore jnese, jé aja ayorébujnane uje ore tṍraji daniri Judá údode jnese. Ga jé u uje ore jnosi deduguéjna disabi údi nanique aja eduguéjnai iguı́jnai. Ga ore chise joride uje soldádode jecucha ore chirote ejode ga jé u uje disabi chacája ajei nanique. Ga chise eduguéjnai iguı́jnai ajei nanique ga jé u uje Joás chácariji ore charipi ueradéjnai gai nanique.

²⁰ Enga jé u uje ore uáguedaté uaté uje tṍraji judágosode ore uniri údode jnese, ore nı́napúsu raque. Enga e tijode cho jnángome idaité ore iji Jerusalén uté, jé aja ore jnese iji ore uniri Judá uté nanique, uje e chugué ore eduguejẽ́ Atalı́a uaté gu, uje pichagué uaté ome queségodói iji peduguéjna cuchábode ore iguı́jna cuchábi uté ejoi.

²¹ Ga Joás guejnanie siquerei chise 7 años nanique uje quene basája dáringai judágosode ore eduguéjna nanique.