2 Reyes 10 - Dupade Uruode

Jehú uté chujé Acab casicaite abode, ájnamone ore nanique, uje udore ore batigai u 70

¹ Eduguéjna cuchábi Acab casicaite ape disi ejo 70 ore nanique uje ore cho dedáji Samária uté. Enga Jehú pésu darusarane cárta uñane nanique iji dayaridi Jezreel uté, ga chiroque darusarane udore aja Samária uté eduguéjna ibijógode udore, jé aja pangaránone dai bajácho ore iji oridai uté. Mu Jehú que cãra darusarane ome ore, mu chirócapo darusarane aja Acab ape disi ejode añerasórone ore rı̃, uje udore ore gajnepı́di tu ujetiga ore pésu uté ape disi ejode udore aja gaté. Ga Jehú chósi tome darusarane cárta quigode:

² –Yurusarane quisórone u uaque gu uje eduguéjna cuchábi Acab casicaite ape disi ejode ore déji uacajade iji uaquedai uté. Jé upo rı̃ uje uacachidode guebéquedatéo déji uaque uje pocaningane gajnecho, jé aja uacachidode burica udore, ga a uacajuya uacõráchatígo cucha to iji uáguiji te. Jé upo rı̃ uje uacajuyaquéode chaparu uaquedai gai to uje qué etócho iji uacabai ga chãraque uágome cuchade yúode. Jecute jı̃raque beyoi yurusarane quigode ujetiga yicárta chise uaque.

³ Ga yuruode chósi tome uaque: "Acueyópisi uacajegaitı́guiji uacarósõri casica ujnacarode udore ujade jnese, enga achayo uté gosi aja dai charidi ome dáringai uaqueduguéjna. Enga a gosi urásu ujetiga sué dai casica ujnacarode ore gáyode jnese ome úringai irajataque, uajate ore. Mu apéso uágome pocaningai yúrique, uje a yı̃rı́ji uaque jne, ga a arotáyo uaqueduguéjna casé jogasúode, iguiosode ore jne ujetiga jé ũré enga uaqueduguéjna casé úringai eduguéjna jno dádi."–

⁴ Uje Jehú urusarane chise eduguéjnane udore iji Samária uté, ga ore chajire quigode mu ore tãrara uje a ore todópisa uté yui. Ga ore chojningame ñane: –¡Jé cajichope to! Uje eduguéjna cuchape gárode ore cháta raja ñane dirı́ca ga que ore cási Jehú uté ome cutejmai detotigué dirı́ca. Jétapũré uyoque uje cho ujetiga jé ca yugúcoji cuchárique ome udore ore.–

⁵ Ga jé u uje peduguéjnane iji Samária uté chamáta dáyipiedie aja ñane ome Jehú uté urusãráiso. Ga ore eduguéjna casé iguı́jna cuchábi irodisórone ore eduguéjnai u uñai, jé aja ujoi eduguéjna uje gajnepı́di u gobernador ome ore idai idaisórone, jé aja pangarate ibijógode rı̃, jé aja Acab ape disi ejode ore añerasõrı́so udore. Enga eduguéjnane udore chiroque datocaitique aja Jehú uté yui ujetiga chajnerame ore uruode ome uté. Ga pangaránone ore uruode quigode ome Jehú chósi te: –Jehú á, baroque uyoque jnese arı̃a. Ga a yipéco bajegaidode cucha jnese jne. Mu a jé ca yichago Acab uté ape disi ejode uñéngaja úringárique eduguéjna jne. U gu uje yocajiri tu ua ome cuchade ga a yiroco báyipiedie quitı́go jne.–

⁶ Uje Jehú uté chudute samáriagosode eduguéjnane uruode ome re, enga jé basa ga Jehú chorepoi darusarane iji eduguéjnane ore gaté rı̃, enga e gare urusarane ome ore, ga chósi tome ore iji darusarãque ejode udore: –Ujetiga jé ũré ga arotáyo yu ga apótayo jeta beyoi yuruode quigode, enga uacasocade a jé chorase udé: Ujetiga guedé e chise dabatigai udé dirome ga abáchoi yu iji yiyaridi Jezreel udé ga ajnócho uaqueduguéjna cásodicáite ape disi ejode tarode aja de dirome.– Enga Jehú ojningane Acab ape disi ejo udore uje ore batigai u 70 ga ore déji jnani ibijógode iguı́jnane iji ore idai Samária údode, uje jnani ibijógode udore añeraque ore ga qué ore ipesute ore aja gatéode.

⁷ Uje Jehú urusãraque ejode chise samáriagosode ore eduguéjnane, ga jé u uje ore dopı́si uté uruode quigode. Uje ore chisa Acab ape disi ejode udore uje ore batigai u 70, ga ore chujé ore jnese. Uje ore chaquesu ore etabı́dode enga ore na degode udore tarode aja ore oradie ijnacojoi ajéode jnese nanique. Ga jé u uje ore chiroque darógode aja ujetiga ore jno ijnacojodie udire údi aja Jehú iji ore idai uje i tu Jezreel.

⁸ Uje Acab ape disi ejode tarode jnungórone e ore chise Jezreel uté, mu samáriagosode eduguéjnane utocaidi cho gojñame Jehú uté bajaque, ga chósi tome Jehú uté: –E ore di eduguéjna cuchábi casicaite ape disi ejode tarode údi iji dé.– Ga Jehú chajnai uruode ga chojninga: –Ajnáño ore tarode aja ore idai udé ujuyaquéode piagoi ga ajéyo ore aja ñane gáyode jne iji jogate gáningo iji piagoi tiógareode ga a jé ore jogate aja durasé dirome.– Enga ore dopı́si Jehú uté uru quigode.

⁹ Enga chise dire uñai nanique ga ayorébui chise Acab ape disi ejode gatode dipesedie nanique iji ore idai ujuyaquéode piagoi ejode. Ga Jehú doi guesi tiji daguı́jnai uté, ga basája ayorébui udore ore iquei. Enga narare ga chósi tome idaité ore: –A jé ca uacabai u cucha dacadi udé arı̃a.– Ga Jehú qué jnopo daruode údi gaté rı̃ ome ore ga chojninga: –Adójnachopı́sa uje uyu upúsu uje yipésu yáyipiedie ome yeduguéjna cuchábi Joram úringai chuque yui, ga yujépise dirı́ca. ¿Mu ome uacajéode ga gosi yuque jnanione udojo jnese a?–

¹⁰ Enga Jehú qué nararápo gaté rı̃ ga chojninga: –Adójnachopı́sa uje que toc ujetiga pejnaque Acab ape disi ejode ore bisideque. Mu pijoque uje pejnaque ore gu uje Pangarádejnai jé urúo ome daroi proféta Elı́as uté nanique, uje Elı́as uté chajnerame ome ore nanique. Uje chise dı́nique jne ga pejnaque Acab ape disi ejode ore jnese. Jecute cuchade udore tocade gu uje que toc ujetiga Pangarádejnai uruode toja gotique.–

¹¹ Uje Jehú chejna daruode aja guesi enga jé u uje doi Acab iguiosode amirone jnese iji ore idai Jezreel uté, ga chimate ore aja jnumi jnese. Mu que gusu iguiosode nanique mu pejnaque Acab iroque ibijógode ore jnese rı̃. Jehú uté dopoi Acab jorámeone udore ore rı̃ ga chujé ore. Ga dopoi Acab irógode sacerdote tácho ore ga chejnápo ore to rı̃. Enga que udore uñeque chapı́diji dı́nique nanique.

Jehú uté chujé judágosode ore eduguéjna casica Ocozı́as iguiosode udore to nanique

¹² Cucha dacadode udojo quigade ga Jehú jnoji ore idai Jezreel uté nanique, ga chicáji Samária uté yui. Mu Jehú qué déji dajeque pajei nanique ga chise áyasadie irodisórone ajminémei uje i tu Bet-equed.

¹³ Enga Jehú tuangóa dei casé judágosode ore eduguéjnai Ocozı́as iguiosode uñane ore iji uté. Ga Jehú catecã́ri ore ga chojningame ore: –¿Ama jé uaque gosode a?– Ga Ocozı́as iguiosode ore chajnai uruode ga ore chósi tome Jehú uté: –Ocozı́as iguiosode u uyoque arı̃a, ga yoquigaidi tu ujetiga qué yaquicóji israélgosode uaqueduguéjna casica ape disi ejode ore iji dojo, jé aja eduguejẽ́ Jezabel casica ape disi ejode ore to jeta yisı́gome yoquirasitigade ome ore.–

¹⁴ Uje Jehú chudute Ocozı́as iguiosode ore uruode, ga jı̃raque chinguı́ra dabijnani aja darógode soldácho iji dejode, enga chojninga: –¡Asayo ore pórecajna!– Ga jı̃raque Jehú isoldádode ore chisa Ocozı́as iguiosode ore pórecajna ga ore jno ore údi nanique aja ejóraque uje déji ore ajminémei Bet-equed uté ejoi nanique. Ga quene ore chicha Ocozı́as iguiosode udore cachodi aja uté. Ga ore yugode batigai chise 42 nanique. Ore chejnápise ore iji uté ga que uñeque chapite iji dı́nique nanique.

Jehú uté chejna Acab iguiosode amirone udore ore jnese nanique

¹⁵ Cucha dacadode udojo quigade uje pejnaque Ocozı́as iguiosode, ga Jehú, isoldádode ore jnopo rı̃ ome daqui Samária uté yui. Mu Jehú tuangóa jnani iji dajeque pajei uje i tu Jonadab ga uté dayé i tu Recab. Enga Jonadab uté ucuei tu Jehú nanique, mu tṍrapı́siji dacuei uté iji dajeque pajei nanique. Ga Jehú chisi ome darasitigade ome Jonadab uté ga chojningame: –¿Ama ueradéjna báyipiedie ome yu a? uje bacuei yu iji dojo. Uje yáyipiedie ueradéjna ome ua.– Ga Jonadab chajnai uruode ga chojninga: –Ejẽ́. Ueradéjna yáyipiedie ome ua arı̃a.– Jecute Jehú chósi tome Jonadab uté: –Ujetiga jé ũré, ga be ga asa yijmanai.– Enga Jonadab uté chisa Jehú jmanai, ga quigade ga Jehú nejéna uté aja doruti guebéquedaté ajei.

¹⁶ Enga Jehú chósi tome Jonadab: –Be ga ajı́na yu ga a amo jne uje yejna yu aja Pangarádejnai úringai pajnaque iji jnumone.– Ga jé u uje Jehú pésu ga Jonadab choru gachidi guebéquedatéi ga nóna Jehú aja ajesui.

¹⁷ Ga quene ore chise daqui Samária uté enga jı̃raque Jehú pésu pocaningai ome Acab jogasúode amirone ore jnese iji uté nanique, enga chejnápise ore ¡pógopógo! Ga cucha dacate tocachugode udore jé péropı́siji Pangarádejnai uruode uje chatatame proféta Elı́as nanique.

Jehú uté chiroque darógode aja ayoré gajnui Baal anguresórone udore úringáringo chuque yui nanique

¹⁸ Udojo quigade nanique ga Jehú chamáta Samária idaisórone ore aja ñane jnese, ga chojningame ore: –Uje Acab uquécasicá qué eca ica, mu que urénga chejna raja dangureni Baal ojningane cucha, gusu doi ujade. Mu ome Jehú uyu gajiné, ga a yujnué uté gai jne uje a yejnápise yu aja Baal adode jne.

¹⁹ Uje a yẽra yẽrapáidode cucha ome Baal uté jne, ga cuchadaté jne. Jecute abichoi Baal irógode proféta jnese, jé aja Baal uté icotasórone ore jnese, jé aja sacerdóteode ore jnese uje ore dopı́si dangureni Baal adode. Arócho udore ore aja de jnese, ga jé ca uñeque chijna riji. Ujetiga Baal uté anguresónique uñeque ca dorási yibijnane, ga a chuque gosi jne.– Uje Jehú uruode u udore ome ayoré gajnui Baal ajnangórone ore, mu cachi Jehú aringaquéo ome ore. Uje gaidi tu ujetiga chejnápise ore jnese ujetiga ore chise uté.

²⁰ Quigade ga Jehú chósi tome daru quigode ome ore: –Apéso dire puyátique ujetiga yipéco yocuáguedaté ga yedugo Baal úringai pisı́gai iji dire puyai uté.– Enga jé u uje ore chı̃́care féchai nanique ujetiga tocade jne.

²¹ Ga Jehú chiroque datocaitı́go aja ore uniri Israel údode jnese ujetiga ore tibidi ayoréode uje ore angureni u Baal. Uje ore tibáguirási Jehú iji ore idai Samária uté ome ipesudi pininaqué yui uje tẽrája ore angureni iji uté jne. Ga jé u nanique uje Baal icotasórone ore jnese tṍraji dajñarenie ome dangureni Baal uté, ga que chonatique déji ore. Jiépisi ore ga ore chacája Baal uté gajnei guiguı́jna nanique, mu ore chipédugu guijnatajei ga que ore edóraque cuse. Ore chigasipise uñane gu uje ore irágu ajei.

²² Ga Jehú catecã́ri jnani uté uje gajnepı́di tu jeta chañuru Baal icotasórone gajnenie piguidé ueradei guio, ga chósi tome uté: –Be Baal icotasórone ore pijogútodie daguidei, ga asi ome ore jnese jeta ore chigui jnese.– Ga piguidedie añerasṍri uté doi nanique ga Baal icotasórone ore chigui daguidé ueradedie udire jnese.

²³ Enga Jehú chacája ore angureni dupa quedéjna Baal iguı́jna cuchábi ajei to, ga nóna Recab ujnacari Jonadab uté aja guijnatajei. Enga Jehú chojningame gáguedaté uaté: –Ajichopise uacajade ga adójnacho ujetiga jé ca Pangarádejnai anguresónique chimere riji uáguiji guijnatajei udé to, mu gusúpusu Baal anguresórone uáguiji guijnatajei.–

²⁴ Enga jé u nanique uje e Baal icotasórone jnese déji uñane gari iji dangureni Baal iguı́jnai, ujetiga ore tẽra dẽrapáidode cuchiso ome dangureni uté uje ore chãru udore gai ome uté, jé aja ore guẽrapáidode cucha uñane. Iji cucha dacadode udore údi mu e dimane Jehú isoldádode iji dayaridode iji guesi ome dáringane iroditaque, enga ore batigai chise 80. Ga ore gajnepı́di u ujetiga ore chãraque guesi ome Baal anguresórone udore iji guijnatajei. Enga Jehú e chaquı̃́ra ore que ujetiga jé ca ore juseque uñeque jne. Uje uru quigode chósi te ome ore que: –Jé ca ajuécho guesi tome ayoré gajnui Baal icotasónique jne. Ujetiga uñeque jno gajiné ga a yaguhéta uaque gosi gai jne ga a chuque uaque gosi iji jusétique uté charidi jne.–

²⁵ Uje e pẽrapáicho Baal anguresórone ore guẽrapáidode cuchiso uje ore chãru udore gáyode ome dangureni Baal uté, enga jı̃raque Jehú catecã́ri dasoldádode, dacasutedie jé aja isoldádode udore uje ore chirote ayoré gajnui iguı́jnai ejode. Ga Jehú chojninga: –¡Acáyoja ajei ga ajéyo Baal anguresórone ore jnese jne, ga jé ca ajuécho guesi ome uñeque jeta uñeque doi guesi!– Enga Jehú isoldádode udore chacája ajei ga ore chinguı́ra daqueségodogóde aja ore nanique uje ore chujé ayoré gajnui Baal uté anguresórone jnese uje qué ore chisi dangureni uté gai. Que uñeque chapite. Quigade enga Jehú isoldádode ore tṍra degode udore aja guesi ¡chac! ¡chaque! nanique. Ga udojo quigade ga Jehú isoldate dacasutéisi jé aja isoldádode udore uje ore chirote ayoré gajnui iguı́jnai ejode, ore chacája Baal iguı́jna ajé puyai uté nanique.

²⁶ Ga ore doi cutadé puyedie udire iji Baal iguı́jna ajé puyai uté uje pipesudei ore iji pore pajéode ga jé ore tṍraja guesode ga ore chãru udire gáyode.

²⁷ Que gusu uté, mu ore chajnangarase ayoré gajnui Baal oré uje déji ajé puyai uté to. Enga Jehú isoldádode ore chatapója Baal gajnei guiguı́jna rı̃ uje ore chajnangarásaja dejode to nanique rı̃. Ga ore cho dacháquepié iji ayoré gajnui uté gajnei casé guiguı́jna jogadi uté uje ore terı́ji pucháquepié uaté nanique, ga jé ore cho pucháquepiéji jogadi uté iji deréjnane udojo to.

²⁸ Ga Jehú jé isoca uté nanique uje chinoningasipise ayoré gajnui Baal anguresórone ore jnese iji daniri údode jnese, jé aja Baal gajnéone cucha jnese nanique.

Uerate uje Jehú chinoningasipise Baal anguresórone ore iji daniri Israel nanique, mu gajnarétigai u uje Jehú uté que chedu Pangarádejnai iji dáyipie gotique iji dáringai israélgosode ore eduguéjna

²⁹ Uje Jehú chı̃ro Baal isocade iji daniri uté, mu Jehú uté que chirame Nabat casicaite ujnacari Jeroboam jmapié gajnarénguenie udire gotique. Uje eduguéjnai Jeroboam uté inejerãte darasade israélgose ore aja pisijnaringuéone úringáringo pipesucho. Enga uté ipesudode aquirájna ape ucatócho uje pipesute ome óro nanique qué déji pidáyode udore uje ore ı́ode u Betel, Dan ore ome ore úringáringo pisı́gai, uje Jehú uté que chajnangarase ore gu.

³⁰ Enga Pangarádejnai catecã́ri Jehú iji cucha dacadode udojo quigade nanique ga chojningame uté: –Bajnimipise yojningane cucha ome Acab jogasúode ore ¡janipe! uje banoningasipise ore. Uje yajire badode enga yimesẽre bapesudode uje yajequigode jé upúsu gu ome Acab uté. Jecute a yipésu jne enga bape disi ejórigo uñane a ore basája báringai eduguéjna jogadi iji baquigade. Ga a gagájni ore jne jeta ore basája uñane quigade ome dáringáringo israélgosode ore eduguéjna. Enga a quene báringai eduguéjna eruei tu ome gagájnia tuaté jne.–

³¹ Mu Jehú uté que suse dadode guio, ga que áyipieraque chejna raja Moisés urusarane Pangarádejnai uru pirosobácho ujetiga dopı́si udore quigode, uje israélgosode ore angureni Dupa u uté mu. Enga Jehú uté que cha pésu Jeroboam jmapié gajnarénguenie udire quigode gotique. Uje Jeroboam uté inejerãte darasade israélgose ore aja pisijnaringuéone úringane pipesucho uje qué eca nanique.

Israélgosode ore umajosórone purása quedéjna chajnose ore ome dajnei israélgosode jnupe pei, péode, ga gose israélgosode ore angoninguite paritigade ome dangureni Dupade uté

^32-33 Iji deréjnane udore uje Jehú qué déji dáringai israélgosode ore eduguéjna, enga quene Pangarádejnai chajo ore uniri Israel uté aja ñane. Uje sı́riagosode ore eduguéjnai Hazael uté cugujnáji israélgosode ore iji tié Jordán uécha uñai iji guedé garani yui uté, ga cho dajnéngu ore gajnéone jnupe péode nanique iji ore uniri eruei uté jnese. Enga Hazael, isoldádode ore ajnoñane jnupe pecho u israélgosode ore achamini Galaad uté jnese. Enga pachamini uté achamisórone upúsu israélgosode ore uáguedie uje ore ı́ode u Gad, jé aja Rubén, jé aja manasésgosode ore uague pei uté to. Mu Hazael chajnosipise ore ome dajnéone jnumı́o nanique. Que gusu udore, mu uté chijnápo israélgosode ore uniri pei to nanique rı̃ iji ore idai Aroer uté iji umusoi garani yui, uje ore idai uté déji tuijnai ejoi uje i tu Arnón. Enga Hazael uté ijnimingone jnup unejácho udore jé chuságaja pachamini Basán uté jnese to.

Uje Jehú toi nanique ga ujnacari Joacaz basája charidi iji quigade

³⁴ Enga cucha dacate amirone jnese iji Jehú úringai israélgosode ore eduguéjna, jé aja ipesudode cucha udore jnese, jé aja etotiguei jnese, ga purusãracho jnese iji darujna aode uñane nanique uje ore churúsãre israélgosode ore eduguéjnane adode iji udore.

³⁵ Uje Jehú uté toi nanique ga ore chicha ode taja ore idáidatéi uté uje i tu Samária. Ga Jehú ujnacari uje i tu Joacaz basája charidi iji quigade nanique ome dáringai israélgosode ore eduguéjna.

³⁶ Enga Jehú uté guejnanie siquerei chise 28 años nanique ome dáringai israélgosode ore eduguéjna iji dedai Samária uté.