2 Pédro 3 - Dupade Uruode

Yocangarádejnai a di jne

¹ Yijorane uaque á, e gare yurusarane cárta ome uaque, ga ejoi u udé. Mu yo uacaquique iji yurusarane gare udojo jnese. Uje yigaidi u gu ujetiga uacáyipiedie dépisiji Dupade adode gatuaque.

² Ajnusináño Dupade uruode atatasórone, jnani bajácho ore urusarane qui cásodicáite uje jnanione udore ore chedu Dupade iji dajéode nanique. Enga ajnusináñopo Yocangarádejnai, Yoquiquetasṍri iroquei to rĩ uje iroguipísode apóstoles chacate uágome to icaite.

³ Adójningachopísa cuchade udojo to: a chise dirode udojo eruei yui jne enga jnanione uñéngo a ore chujñieta Dupade uruode. Enga a ca ore chucué cucha arégode jne, mu ore ucuegode u dapotiguéode ome cucha gajnaréngone gatuaque.

⁴ Enga jnanione udore a ore chujñieta Jesucrísto diringai yúode enga a ore chojningame uaque: "¿Jé cho rique Crísto diringai yui a? Uje jé urúo nanique múñi ujetiga diapo iji jnumi tudé rĩ. Que cuchárique chécãre re iji erámi tudé gotique arĩ́e. Mu jé cho yocai cásodicáite ore ucuecaringuei cásodicáite. Jé cho to erámi taningápisi uje quene pipesute cuchade nanique."

⁵ Mu udore ore que ore áyipieraque déji to uje Dupade pésu gatajnoquei nanique, erámi ore iji taningápisi. Uje yodi chaco erámi gai iji taningai nanique, mu Dupade jé urúo nanique enga jnumi chicáji gaté.

⁶ Mu udojo quigade enga Dupade chiroque gue dequejnangóri enga yodi chacopo erámi gai nanique rĩ.

⁷ Enga Dupade e pésu dáyipiedie ome yoquiyaridi jnupe udé, jé aja yocajiri tuté gatajnoqué. Ujetiga doi daruode quigode enga pioi a tagu erámi, jé aja gatajnoquei jne. Enga a cucha dacadode udore tocade jne ujetiga e chise diri ujetiga Dupade chajire erámi unirisórone ore adode aja quigode. Enga jogadi a u uté to ujetiga pujuyápise sijnángone ore jnese jne.

⁸ Yijorane uaque á, ca acadíchoi to uje Yocangarádejnai que jnátu cuchárique. Dire chojmarai gajnui u sequeredie uje mil años ome uté. Jé basa ga sequeredie ujetiga mil años, mu gajnui u dire chojmarai ome uté.

⁹ Chiese que jĩraque Yocangarádejnai doi daruode quigode ome otigayasórone udore. Mu que quigode u gotique. Mu Yocangarádejnai qué chirote yoqui jetiga yanguretágo to jnese. Que ajéode u gu ujetiga yocuñeque bijna ome. Mu ajéode u ujetiga yecãco yocadode jnese.

¹⁰ Ujetiga ore cha dangoroné ome, mu a chise diri ujetiga Yocangarádejnai e di. Enga gajnui u oriechoqui uje que puninamate iji dejátique. Mu ujetiga e chise Yocangarádejnai diringai dire enga a ore chudute cucha jocarã́quedatéi jne ujeta chajuque ore agutedie, enga jĩraque gatajnoquei, jogonórone cucha ore íjnoque. Jé aja erámi, jogosórone cucha ore. Pioi a chejna ore jnese.

¹¹ Yicoi enga yañuco yoquio, enga yoquijnoraquei ome Dupade tate to. Yirajágo gu uje Dupade ujuyaquei a jĩraque chejna cuchade jnese jne.

¹² Uje qué uacarocho Dupade diringai dire yui enga acueyoi uacasocáringome ujetiga amácho Dupade iroquéode aja quigode jnese. Jogadi u uté gu ujetiga diapo jne rĩ. Yirajágo uje pioi a chejna gatajnoquei jne iji diri tuté. Enga pioi a chãrei cuchade jnese jne iji jnumi, gaté ore enga nóña enga yote ome pioi dotáningai.

¹³ Mu Dupade anguresórone uyoque yiroco erãpe ichai yui, gatajnoqueque ichai yui rĩ. Uje Dupade jé urúo nanique gu ujetiga chisi ome yoque. Enga a ca cucha gajnarétique chacája erãpe ichai tuté. Gusu cucha omone iji.

¹⁴ Jecute, yijorane uaque á, uje qué uacarocho cucha dacadode udore yúode enga acueyoi uacasocáringome ujetiga gusu pajesereringane iji uacajéode. Uacagaidi u gu ujetiga diga Dupade chise uaque enga ueque uágome pisijnaringuéone jnese enga ca uacayoguérique cusipise go.

¹⁵ Yipota ujetiga arajáyo udojo quigode: uje Yocangarádejnai cáma di gu uje qué chirote yoqui ujetiga chiqueta yoque to. Yoquijõrai Páblo urusarane quigode jé u udore to. Enga yirajágo uje Dupade chisi ome payuquetotiguei ome Páblo uté to.

¹⁶ Enga Páblo churúsãre cucha dacadode udore quigode iji darusarane jnese ome uaque, mu uajácho ujetiga yirajágo purusarane udore uñane quigode. Jecute jnani ducusuréchoquíode uñane uje que ore chiraja cuchade, ore doi enga ore chécãre Páblo urusarane udore quigode. Enga jé ore adi u to ome ore urusarane Dupade urúo uñane, ore chécãre udore quigode to. Mu a ore cho daba damuchayade ome Dupade uruode enga a pujuya ore to.

¹⁷ Jecute yijorane uaque á, uje e uacarajáyo uje ore chumuchase Dupade uruode quigode, beyoi enga ajusópise uaqueo ujetiga ca pisijnaringuéone ajnangórone ore chãra uaque to ome dacajnaqué tágode. Uacagaidi u gu ujetiga ca acóraño enga ca bijna uacáringane Dupade anguresõre etoque ome uaque.

¹⁸ Yajéode u ome uaque ujetiga arajáyo gaté Yocangarádejnai, Yoquiquetangóri Jesucrísto ijnoraquédatéi ome uaque, enga aquéraño iji uté adode. ­¡Beyoi enga yicotágo Yocangarádejnai jé iji diri tudé, jé iji deréjnane jnese to! Amén.