2 Pédro 2 - Dupade Uruode

A pacadisõre tágode chacája Dupade anguresórone ujade jne

¹ Que gusu udore Dupade uruode atatasõre uréone nanique mu jnanione déji israélgosode nanique to uje ore cho Dupade uruode atatasõre iji raque mu urupatáquechoquí ore. Adi jé u iji deréjnane udojo uje pacadisõre tágode déji uacajade to. Ore chacate dojode ayoréo ome dáyipie gajnarénguenie mu ore pógu dáringane táquechoquí ome dojode ayoréo. Enga ore chotigase daquetangóri, Yocangarádejnai Jesucrísto. Mu a ca ore chapite jne ome dasocade udore uje a jĩraque Dupade ujuyaquei chise ore jne.

² A uásejna ore jne ujetiga ore nóna ore enga ore chirate ore aja ore ate gajnaréngone. Mu uje Dupade uruode guetesórone ore chimo ore adode enga jĩraque ore chujñieta Dupade uru uréone uje chatata Jesús adode.

³ Jnanione udore ore gaidi tu gu ujetiga asíyo ore iji uacaplátadie uje ore chacate uágome dacajnaqué tágode. Mu a ca bisitique cuse ome udore ore uje Dupade a cho dajuñame ore jne. Uje dimane Dupade áyipiedie ome ore nanique ujetiga chujé ore jne.

⁴ Yirajágo uje Dupade que chĩro daroque gateminórone ore isijnaringuéone nanique. Mu tṍra ore aja gajño pioi. Enga noñome ore iji ijnangununie, enga chigaru ore ome ojnaquérodie enga suru ore gai iji te, jé aja ujetiga chajire ore adode aja quigode.

⁵ Adi jé u nanique uje Dupade que chĩro Noé urasade ore isijnaringuéone to nanique, mu chiroque gue dequejnangóri aja ore nanique uje sijnaque jnanione udore gu. Enga gusu Noé uje Dupade chiqueta nanique, jé aja jogasui ore uje gare ore iji yijmanuñai. Mu Noé jecucha chacate darasade nanique múñi ujetiga ore chécãre datígo enga ore doi Dupade adode to.

⁶ Adi jé u ome ore idáyode Sodóma, Gomórra ore to. Uje gajnareque ore adode, enga Dupade chiroque dajuyaquei pioque aja ore nanique. Jecute cho puchucurúode ore idáyode udore iji quigade. Jecute disi ejo sijnángone a ore chiraja to jne uje a Dupade isocai jé u uté jne ome ore to.

⁷ Yirajágo uje jnani bajai Lot déji Sodóma to nanique, mu Dupade chijnime nanique uje cáma ujuyaquei chise ore idai Sodóma. Chiraja gu uje jnani ate areque Lot nanique, enga chopise dáyugu darasade ore ate gajnarenguipísode.

⁸ Yirajágo Lot uje ate areque nanique. Jecute uje chudute jóroque darasade ore uru gajnaréngone, enga chimo jóroque ore ipesute gajnaréngone enga urõso jórogome iji dirode jnese. Mu uté áyipiedie ueradei.

⁹ Yimóngo uje Yocangarádejnai chiraja dasocáringome dajnorasórone ore ujetiga chiqueta ore iji cucha gajnaréngone jmainie. Jé basa chiraja dasocáringome ate gajnaréngone ore to. Enga ore gajnéone pujuyaquéo dimane ome ore yui ujetiga tocade ome ore iji diri tuté jne ujetiga chajire ore adode aja quigode iji.

¹⁰ A Dupade cho dajuñame pisijnaringuéone ipesungórone ore jnese jne. Mu cuchiyi tupúsu udore ore uje que ore áyipieraque jnoji punganingane, jé aja udore ore uje ore tagu Yocangarádejnai iroquéode aja. Udore ore uje que ore chajéngome cuchárique, mu ore chedu dasoca gajnaréngone. Uje que pisadodéringárique déji ore ome gaté jogonórone cucha mu ore uruode gajnarécho aja ore.

¹¹ Yirajágo uje Dupade iroque gateminórone ore sué jnanione udore ore gáyode ome dáringane cuchábio, mu pajei dotáningárique que déji ore ajénique go. Jecute uje ore chatata dojode gateminóño ore adode ome Dupade nanique, mu que ore dojnóngaja ore gotique.

¹² Yirajágo uje cuchisode que ore áyipieraque cuse enga ore ucuecaringuei gajnengórone u raque. Uje ore base iji datedie, mu ore quique obiréjnai u ujetiga pisaque ore enga chuque ore. Enga jnani sijnángone udore ore chopise cuchisode to. Uje ore uruode gajnarécho aja cuchade, mu que ore chiraja cuchade udore quitígo go. Enga a jé ore cho cuchisode udore jne, uje ore quique obiréjnai u ujetiga chuque ore to.

¹³ Enga jé tiógara ujetiga ore chejnáreque re jne. Chamáñaje ore bade u dajuyaquéode ome dojode ayoréo gu. Chiese pininaquéode irágu ore ajéode iji deréjnane udojo uje ore chejna rángaja erámi jogosórone cucha. Enga uje ore cháta raja uacagápidóde enga jé ate uje ore irasique raque iji uacajade, mu ore áyipie gajnarénguenie jé jogate ore uje ore chãra uaque. Enga gajnarenguipise uje uacajuécho uacáguedie ome udore, enga pajegátigai jogadi urásu ome uaque.

¹⁴ Que togome ore ujetiga ore chidota re ome chequé quedéjnanie. Que ore cho dajñare ome dapesudode cucha gajnarécho. Ore ucuegode u ore uje garósi ore anguretigai ujetiga ore chirate ore aja pisijnaringuéone to. Ore chirajapise dasocade to ujetiga ore chise dajegaidode cucha ome raque. Mu Dupade e cho darúja ore ome ore ate gajnaréngone udore.

¹⁵ Ore chiraja jóroque Dupade adode, mu ore chicai quedéjnane ome. Jecute ore cho ayoré edojíseode. Ore gajnui u jnani bajai Balaam to uje jnani bajai Beor ujnacare nanique. Uje jnani bajai tuté ijnoranie u dajegaidedie pláta bisidéguei nanique. Enga ajéode u ujetiga chijna ore iplátadie ome ipesudode cucha gajnarécho.

¹⁶ Burica quedéjnane que ore narare go, mu jnani bajai Balaam tuté gachidi burica quedéjna narare nanique enga chaquĩ́ra dachisṍri ome ate gajnaréngone. Enga uruode chopise ayoréode uruode uje narare. Jecute Balaam todo ujetiga jé jno daqui erãpe údi ome dãrusoringuéone.

¹⁷ Jnanione udore uje ore chacája uacajade ome daringaquéode ore gajnunie u gajñonie uje íjnoque yodi iji, enga cucha bisidéguei. Ore gajnunie upo gue abujadie rĩ uje que yotique tṍraji, mu ore déji gaté bisideque enga emi chubúchu ore aja quedéjnane. Mu Dupade e pésu jnanione udore qui enga ijnangunu cuchábedie u. Enga a ore charidi u uté jne iji deréjnane jnese.

¹⁸ Enga udore ore úringane dicotárechoquío, jé aja ore úringane áyipie eyúcho pijógome ore uruode quigode. Enga ore angúroméone u pipotigué ayoréode ome cuchade, jé aja cucha gajnaréngone uñane rĩ ujetiga ore pésu pisijnaringuéone unéningai ome Dupade anguresórone. Yojningane u ore uje Dupade e ijnimique ore iji ate gajnaréngone ore ajéode nanique.

¹⁹ Chiese ore gaidode u ujetiga ore chirame dacadigode iji cucha paréngone jmainie, uje chiese igarique ore. Mu cachi ore urúo. Uje igarigode u ore. Chamáñaje ore ipotiguéode igarique ore gu, enga e que toc ujetiga ca ore jno dasijnaringuéone údi. Chamáñaje cucha gajnarétique sué uñeque gai, enga e que toc ujetiga ca pésu.

²⁰ Ujetiga gosi chiraja Yocangarádejnai, Yoquiquetangóri Jesucrísto adode enga cho ujetiga cucha gajnaréngone e juseque gosi. Enga que doi enga chisápo erámi jogonórone cucha unétique rĩ. Mu ujetiga uté gosi chajni aja dayágode cucha gajnarécho, cho ujetiga cucha gajnaréngone udore isagapo uté gosi rĩ. Enga a doi datéringane ome date gajnareque bajade.

²¹ Cucha arei urásu ome uté gosi ujetiga ca chirajárase Dupade ajegaidode cucha ueracho ome yoque. Uje Dupade ujuyaquei a ca chajire re ome udore ore jne uje ore chiraja Dupade uru iyiejnane ujetiga ore doi quigode, mu ore chicai quedéjnane ome.

²² Jé ũré ore uruode uje ore chojninga: "Tamocoi u uje pogai, mu quigade ga tagúpo dapogaidode rĩ. Adi jé u ome yãcoré quedéjnaraque rĩ uje ore churu gai, mu tõrapo raja pacataringuéone rĩ enga chumuchase re iji pacataringuei." Ujetiga gosi chiraja Dupade uruode, mu chajnésaru daquigade enga ore gajnúone u tamocode, yãcoré quedéjnanie ore.