2 Juan 1 - Dupade Uruode

Juan chacate ore ome pijnoraquei, cucha uréone ore quigode

¹ Purusarane unojo urusãrasṍri u Juan uyu uje e choquíjna yu. Enga yurusarane unojo gajneto u ua uje Dupade ajegaidé ua. Jé aja babode to rĩ. Yijnorapise uaque, mu que gusu yu uje yijnóra uaque, mu Dupade uru uréone irajasórone ore chijnóra uaque to jnese.

² Yijnorapise uaque gu uje yujo Dupade uru uréone anguresórone u uaque. Enga yocanguretigai uné ome Dupade uru uréone a jé jogate yocáyipiedie jne iji deréjnane jnese.

³ Yiraja uje Yocai Dupade, Yocangarádejnai Jesucrísto uje Dupade Ape to a ore chatapísaja uaque jne. A ore chosõrapo uaque jne rĩ enga a ore chisi ome pajesereringane ome uaque jne. Enga a arajáyo cucha uréone jne uje Dupade chijnorapise uaque gu.

⁴ Yinínapúsu yu diríca uje yise babode uñane uje ore doi Dupade uru uréone quigode. Chamáñaje Dupade jé iroquéo ome yoque gu ujetiga yicoi uruode quigode.

⁵ Jecute yijócha bajei údi gajneri, yijõra, ujetiga yijnórango ñane. Que pacajnaqué icha uné gotique. Mu yocajnei piroqué jé u uné iji taninga cásodicáite.

⁶ Pijnoraquei ome Dupade, pangoninguite guesáringane ome uruode jé ore cho ñane. Enga e uacadúcho Dupade iroqué taninguíone to ica uje u ujetiga yijnórango ñane iji deréjnane.

Juan cho ore quique ujetiga ca ore timíninga aringacade

⁷ Uje uásejna aringacade iji erámone unojo uje ore chotigase uje Jesucrísto cho ayoré iji re nanique uje díji erámone icaite. Mu gosi ujetiga chotigase Jesucrísto enga obiréjna uje aringácachoquí uté gosi. Enga Crísto etésõre uté gosi.

⁸ Jecute ajusópise uaqueo ome aringacade udore ujetiga ca uacapesudode cucha orérigui bijna ome uaque jne. Mu jé ajóyo uágaja uacajnéone Dupade iroquéo enga a amóño orérigui jnese jne.

⁹ Uñeque ujetiga chajnerame cucha uñéngo iji Jesucrísto acajnaquéode iquei, que Dupade déji uté gosi gari. Mu gosi uje que chorei pacajnaquei uñeque iji Jesucrísto acajnaqué casodica iquei, Yocai Dupade déji uté gosi gari. Enga Dupade Ujnacari dépoji gari rĩ.

¹⁰ Ujetiga uñeque tibágui uaque enga chatata pacajnaqué unejátigo ome uaque ujetiga unejácho ome Dupade Abi acajnaquéode, enga ca eso uté gosi unétique, enga ca ajuécho uacaguíjnai ome. Enga jé ca acatecãchoi uté gosi to.

¹¹ Chamáñaje ujetiga acatecãchoi ore ome uacaru omone enga cho ujetiga átayo uágaja ore to uje ore pésu cucha gajnaréngone iji uacajade.

Juan urusãraque erueminórone u unojo

¹² Yacajnaquéode amirone qué uásejna ome uaque. Mu que yipota ujetiga yicháji yurusãratígo. Yipotigádi upúsu ujetiga yibaguipísabí uaque, enga yacate uaque ujetiga e yimóngo ñane. Yigaidi u gu ujetiga yinínangopúsu ñane jne.

¹³ Bajõra uje Dupade ajegaidé uaté to nanique uaté abode ore pota jeta yingo ua uje ore irasique bei to. Amén.