2 Coríntios 9 - Dupade Uruode

Páblo pota ujetiga coríntogosode dimane ome deranone ome judéagosode

¹ A ca yigotája yo uacaquique jne iji yurusarane ome uacamatade cucha ome uacojode Dupade anguresóño iji Judéa.

² Chamáñaje yiraja uje dimanepise uágome udore gu. Enga jecucha yuruode u udore ome yocujode Dupade anguresõre ore iji Macedónia uje acáyagosode dimane uaque to ica iji sequeré bajé casica ome uaqueranone cucha omío ome judéagosode ore. Enga uje yocujode Dupade anguresóño iji Macedónia ore chudute uacajnoméone enga ore jnusi rángome uaqueranone udore ujetiga ore chirate uágaja uacátegoningáne udore.

³ Jecute yiroque Títo ore aja uaque ujetiga ore cháta cuchade quitígo aja uaque ga dimane uaqueranone cucha. Yigaidi tu ujetiga ca yocujode Dupade anguresõre chotigase yojña casodé ome uaque, uje yojninga diríca: "E dimane ore gueranone cucha."

⁴ Jé socaseti yocujode Dupade anguresõre uñéngo iji Macedónia ore nóna yu aja uaque dirome ujetiga e yamátago uaqueranone cucha omío ome uacojode Dupade anguresõre iji Judéa. Enga yiríngo iji uaque enga cáma dimane uaquẽratígo ome judéagosode ore. Enga a anguírañorása pajegátigai aja yoque uje que yoquicotaquéode chajire re diríca ome uaque. Mu a ca gusúrasu pajegátigai ome yoque, a pajegátigai dérasi uaque to ome cuchade udore uje cáma dimane uaqueranone cucha omío gu.

⁵ Jecute omi tu diríca ome yu ujetiga yiroque Títo, jorane ore aja uaque bajaque. Ujetiga ore chingo uaque ome uaquerani casodé cucha omío ome judéagosode enga ore cháta rágaja uaque ujetiga amachopise uaqueranone aja ñane enga dimáneo ome yiríringai yui. Yigaidi tu gu ujetiga uacacaniratiguéode úringane ũréo pijógome ore jnese enga jé ca uñeque jos eti cachi yutaite uaque enga jecute amátayo uaqueranone udore aja ñane ome judéagosode.

⁶ Yipota ujetiga ajnusináño udore to: ujetiga gosi acatígo garósosi ga na ga jé garósi. Jé basa gosi acatígo jiei ga na ga ujuyápiso.

⁷ Jecute acueyoi uacáyipiedie ome uaqueranone cucha bajaque enga ujetiga amácho uacáyipiedie enga ca eso unerotiguérique uaqueranone. Chamáñaje Dupade ijnorai tu gosi uje irasique re aja deranone cucha. Jé basa gajnarei tu ujetiga uneroque gosi gueranone ome Dupade mu jé tẽríji. Enga cho ujetiga piroque gosi aja.

⁸ Chamáñaje Dupade a e chécãripise deranone cucha omío aja uaque jne. Gaidi tu gu ujetiga ca cuchárique chona uáguiji deréjnane jnese. Enga a sué uacabai jne. Enga jé basa uacasíyo uacojode ayoréo iji to. Enga a apéso pátegoningá ponáyone jnese jne ome ore.

⁹ Yirajágo uje ore urusarane Dupade urúo chósi te: Uje gosi que chacho dacaniratiguei ome jmatágode Enga que toc ujetiga Dupade chicadígui uté icaniratiguéode iji deréjnane jnese.

¹⁰ Yirajágo uje Dupade gueranei cucha ajñunie ujetiga pacai, enga gueranápo cucha pibosode rĩ. Enga a uté u jne ujetiga chisi ome cuchade udore ome uaque gatuaque. Gaidi u gu ujetiga ajnerañome uacojode ayoréo gatuaque to. Enga quigade ga uacátegoningáne jiépisi iji erámi.

¹¹ Jecute a arajáyo Dupade icaniratiguédatéode to jne ome uaque ujetiga sué uacabáyode. Ga cuchade a déji uaque jnese jne ujetiga asíyo uñane iji gaté. Enga ujetiga yimáco uaqueranone cucha omío aja judéagosode, enga jogadi a u jne ujetiga ore chacãripise Dupade gai.

¹² Yirajágo uje judéagosode ore chejnáreque dáringai jmataque ome cuchade. Mu ujetiga yiríngo uaqueranone údi iji ore dirome enga jogadi u jne ujetiga cucha chonángone udore e déji ore to. Mu que gusu udore go, mu cucha uñai u uje a ore chacãripise Dupade gai to jne.

¹³ Enga a ore chicotapise Dupade jne uje ore chimo uje jé ũrepise uágome uacanguretigai iji Yocangarádejnai Crísto. Enga a uacacaniratiguéode gajnesórone udore iji Judéa, jé iji ducuniri uñane a ore chicotapise Dupade to jne ome uaqueranone udore.

¹⁴ Enga a ore catecãrápoi Dupade ome uaque to jne rĩ. Chamáñaje a ore chimo gu uje Dupade angúroméone u uaque ome picaniratiguédatéi ome raque, enga a ore chijnorapise uaque to jne rĩ.

¹⁵ Dupade guerani ome yoque suépise dequeranone gáyode jnese ga que qué yirajágo yocuru quitíguiji rĩ. Jecute yicoi enga yacãcopise Dupade gai ome derani cuchadaté uté ome yoque.