2 Coríntios 8 - Dupade Uruode

Páblo cho coríntogosode quique ujetiga ca ore chise deranone unerotiguérique

¹ Yijorane uaque á, e yipótago ujetiga yingongo ome uaque uje Dupade icaniratiguéode e chise Dupade anguresórone ore ajéode to iji Macedónia údode.

² Yirajágo uje cucha dacate gajnaréngone tṍraji dajñarenie ome ore to, mu que ore cho jṍro ome pininaquei ome Dupade adode. Jmataque ore, mu cho jetiga ugúcharã́que ore ome deranone cucha omío ome Dupade.

³ Yipañaite ore adode udore uje que ore chise deranone unerotiguérique, mu unéninga gatéo ome ore uje ore chisi Dupade iji deranone. Enga que ore chimo dagutúrigui iji deranone cucha ome Dupade.

⁴ Enga ore chijócha yocajéode údi ujetiga yijnójo ore gueranone cucha omío to ome yocujode Dupade anguresõre ore iji ore uniri Judéa. Chamáñaje ore chudute gu uje ore ujode Dupade anguresóño iji udore, udore ore isocai jé u uté to.

⁵ Yanguretágo ore ome ore guẽratígo cucha diríca. Mu ore sué yocanguretigade udore gai. Chamáñaje ore doi enga ore tẽra rángome Yocangarádejnai bajaque gu, enga jé u uje ore doi Dupade áyipie ome raque, enga ore chingo rángaja yoque to.

⁶ Yirajágo uje Títo e chingo judéagosode aja uaque to ica ujetiga amátayo uaquẽratígo cucha omío ome ore to. Jecute yirójopo Títo aja uaque rĩ ujetiga chimánaja jnumi dáyipiedie udire ome uaque. Chamáñaje cucha omi tu gu uje caniraque uágome uacojode Dupade anguresóño iji Judéa.

⁷ Yirajágo uje uacapijóchoji uacojode Dupade anguresóño ore ujade ome uacanguretigai iji Dupade. Yirajagópo to rĩ uje Dupade uruode acadisórone jiépisiji coríntogosode uaque ome diquidáyode uñane. Enga irajatáquedaté uágome Dupade uruode. Enga ijõripise uágaja Dupade adode. Enga pijoque uacajnoraquédatéi ome yoque to. Mu amiri turásu ujetiga boyo uaqueranone cucha uome údi aja judéagosode enga uacajuyápise to.

⁸ Ca ajoso ati yiroquei u uté ome uaque. Mu yingome macedóniagosode ore icaniratiguéode ome uaque gu ujetiga ejnáñopise uágaja uacacaniratiguéode to. Enga uacajnoraquei úringai ibijoque u jne ome erámi uje jé ũrepise uaque to.

⁹ Chamáñaje e uacarajáyo Yocangarádejnai Jesucrísto icaniratiguédatéode ome uaque gu. Uje que cuchárique chona nanique uje déji dayé gari. U mu chicai jnumi ga jmataguipísiji jnumi tudé. Chamáñaje chijnorapise uaque gu, enga gaidi tu ujetiga agutíñañopísome adode iji jnumi tudé to.

¹⁰ Chamáñaje yucuei tu uacomitigárique gu uje yingo yáyipiedie ome uaque ome uaquẽrapáidode cucha udore. Uerate uacasocade ome uaqueranone cucha ica iji sequeré bajé casica. Uaque u bajade ica ome uaquẽrapáidode cucha ome judéagosode ore. Ga que eso unerotiguérique ica.

¹¹ Jecute ca abéroyo uágome uaquẽrapáidode udore ome uacojode Dupade anguresóño. Uje que eso unerotiguérique nanique iji taninga casodica, enga jé ejnáñopise uágaja ujetiga jĩraque dimane. Jé beyoi uaquẽratígo ome: ujetiga garósi ga jé garósi. Ujetiga jiei ga jé jiei.

¹² Chamáñaje Dupade chimesẽripise uyoque uje que yico yoquẽrapáidode unerotiguérique. Ujetiga Dupade chimo uje caniraque yoque ome enga e que chachoque yoquẽrapáitique cucha go. Chamáñaje Dupade que jnari gu cucháringome re ujetiga ca déji gosi.

¹³ Que yacajnaquéode qui tu go ujetiga uacuñeque jogasui uacajmátayopis ome cuchárique gu ome uaqueranone. Mu ujetiga cuchade déji uaque enga asíyo judéagosode ore iji to.

¹⁴ Uacarajáyo uje que cuchárique chona uáguiji deréjnane udojo. Jecute jé tiógarapísa ujetiga asi udore ore to iji uacagúchade uje ore jmátapísome cuchade. Jé socaseti ajmátayo to dirome. Ga jé basa ore chosõre uaque iji uacajmátaringuérique to. Ga jé u uje uacacaniratiguéode cho ñane iji jnumi ome ñane.

¹⁵ Yirajágo uje Dupade uruode chatata ore adode ome arureque quedéjnane maná nanique uje chojninga: "Gosi ujetiga amatade jiei enga doi ga chajuguína dajorane uje ore amatade garósi. Jecute que uté gosi iréraque cuse uje ujuya damatade mu. Jé basa uté jorane uje garósi ore amatade ga ore u uje ore icadie guejnapísi ome uté icaniratiguéode."

Páblo chingo coríntogosode uje a Títo ore chise ore jne

¹⁶ Yacaranguipise ome Dupade uje Títo jé cho yu uje que áyipieraque jnoji uaque to. Chamáñaje Dupade ipesute Títo ijnoraquédatéi ome uaque gu.

¹⁷ Uje yiroque Títo aja uaque ujetiga chamáta uaqueranone cucha omío diríca ga que chise unerotiguérique. Chamáñaje áyipie dépisiji uaque to gu. Jecute a jĩraque chise uaque jne rĩ.

¹⁸ Enga yirójo yoquijõrai uñai aja uaque rĩ ujetiga nóna Títo. Yocujode Dupade anguresõre iji de, jé iji diquidáyode uñane ore chiraja jnese uje adode omío ome datatagode Yoquiquetangóri Crísto acho.

¹⁹ Que gusu yu ome uje yajegaite, mu Dupade anguresórone ore iji quedéjnane ore ajegaite to ujetiga nóna yoque jne aja judéagosode ore ujetiga yijnójo uaqueranone cucha omío aja ore. Que yocucuei tu yocúringárique picotaque go ome judéagosode, mu yocucuei tupúsu ujetiga ore chacãre Yocangarádejnai gai ome yocosõraquéode. Yoquigaidi tupo rĩ ujetiga ore chiraja uje que agutúyo uágome uacosõraquédatéode.

²⁰ Que yipótago ujetiga uñeque chaguhéta poriquérique yoquibai. Jecute yipótago ujetiga uñéngo nóna yoque dirome ujetiga yijnójo uaqueranone ome judéagosode.

²¹ Yoquigaidi tu gu ujetiga Yocangarádejnai, jé aja yocujode ayoréo ca ore chimo detépitígo iji yocatígo.

²² Qué yirójopo yocujoi Dupade anguresõre uñai aja Títo ore quigade to rĩ. Enga yoquijõrai tuté que chise cuchárique unerotiguérique. Jétapũré uje chudute uacátegoningáne ga unéninga gaté uaquéode ome uté.

²³ Ujetiga gosi chirajaque Títo enga ojnichome jne: "Páblo jõrai tu uté erĩ́e iji dasagode Dupade iroquéo. Jecute chise yoque ga cháta cuchade aja yoque to." Jeoga ore chirajaque Títo jorane yocujode Dupade anguresóño rĩ enga ojnichome ore jne: "Yocujode Dupade anguresõre ore iroque ore aja yoque ujetiga ore chátaja yoque to. Enga ore ipesute dojode Dupade anguresõre ore ajéchietaringuéone to ome Crísto."

²⁴ Jecute ujetiga Títo, jorane ore chise uaque enga jé ca ajusécho ore jne. Enga a ore urasade ore chudute jne uje que ajusécho ore iji ore iríringai iji uaque, ga jogadi u jne ujetiga ore chachietápisiji uaque to. Chamáñaje a ore chimo jne uacajnoraquédatéi ome jnani díode udore ore gu. Enga a ore chojninga: "Jé ũrepise Páblo icotaquéode ome coríntogosode."