2 Coríntios 6 - Dupade Uruode

¹ Jecute yijorane uyoque iji Dupade iroquéode, yijóchago uacajéode údi ujetiga ca oyo cucha bisidéguiji uacajnéone Dupade icaniratiguédatéo ome uaque.

² Uje Dupade chósi te nanique iji ore urusarane uté urúo: "E yico deréjnai ujetiga yangári ua. Chamáñaje e yimate cuchade aja quigode gu ujetiga piquetaque ua iji." Enga e yico Dupade ojningai uté dire ujetiga chiqueta yóguiji.

³ Que yipéco Dupade uruode unerotiguérique ome uacuñeque ome yoquipesutique cucha gajnareque. Chamáñaje que yipótago gu ujetiga uñeque dojnóngaja yógome yocatatagode Dupade urúo.

⁴ Jecute yoquipotigádi tu ujetiga yipijójopis ome uaque uje Dupade iroguipísode jõra yoque. Jecute petingaquéode chise yoque ga yidotágo yógaja. U to ujetiga cuchade chona yoque mu yidotágo yógaja. Uje cucha gajnaréngone udojo péro yoquibai mu jé yidotágo yógaja ome cuchade udore, ga yipijójo uje Dupade iroguipísode jõra yoque.

⁵ Uacamóño uje yijorane uyoque yoquibade u Dupade uruode. Ga ore chaquesu yocúdode enga ore suruápo yoquibáyode rĩ. Enga ore chamáta ñane ome yoque ome daru gajnaréngone. Enga eyuguipise yógaja yoquisagode Dupade iroquéo. Ducado uña enga moi yuguipise yoque. Enga yejnárejopise chaguhei ome yoque rĩ iji ujade.

⁶ Que gusu ujetiga yipijójo ome cucha dacadode udore. Yipijójo to gu uje yujuco yoquio ome erámi unirisórone ore isoca gajnaréngone. Enga pirajatigai déji yógome Dupade uru uréone. Enga yidotágo yóguiji jnumi ome cuchade jnese. Enga caniraque yógome yocujode ayoréo. Chamáñaje yocátajasṍri tu Dupade Ujopié Espíritu Sánto uje déji yoque gu. Enga ũrepise yógome yoquijnoraquéode ome yocujode ayoréo.

⁷ Enga yipijójopo to rĩ uje Dupade iroguipísode jõra yoque uje uté uru uréone jnungórone u yoque. Enga yocaríjogoto u Dupade Ujopié etogue. Ujetiga uñeque pota cho dajocaninga ome yoque mu yocõráchaque ugurui u yocúringai ayoré añerataque ome Dupade. A yugúcoji erãpe noñátique marínga, jeoga yugúcoji erãpe onique mu jé yocõráchai chojmára enga yocõráchai tudé u yocúringai añerataque.

⁸ Yocajneque picotaquéode iji ujade. Jé basa ore chinguíra pajegátigai aja yoque iji ujade. Ore uruode omío ome yoque iji ujade, jé basa ore uruode noñácho ome yóguiji ujade. Ore cho urupatáquechoquí iji yoque iji ujade, jé basa ore cho ũréji yoque iji ujade.

⁹ Ore cho jetiga ore chirajaque yoque iji ujade, jé basa que ore chuseque yóguiji ujade. Yajníngo chuque ejode iji ujade, mu jé yidotágo yógome yoquiquei. Ore cho dajuñame yoque mu cáma ore chimate yógaja jnumi.

¹⁰ Áyuguhebátaquedaté yoque iji ujade mu yoquininaquei ome Dupade que íjnonguiji yoque go. Yijmátago, mu uásejna ayoréode uje ore agutíñamáite yoque. Chamáñaje orerã́cho yocatatagode Dupade urúo ome ore gu. Ujetiga yijmátagopísa ome cuchade jnese marínga, cho ujetiga yocajneque cuchade jnese to rĩ.

¹¹ Yijorane coríntogose uaque á, uacamóño uje que yipójo yocurúrique ome uaque. Enga yuchẽcopísi yocáyipiedie quigode iji guesode ome uaque.

¹² Que qué yoquijmaritique cucha déji yocajénique go. Mu uaque u uje a qué uacajmaritígo déji uacajéode ome yoque.

¹³ Yinejé uacádode ga yajnui tu jnanírique ome uaque uje nejé dabi údode. Yinejequéode u ujetiga angáchoi yu ga achẽcho uacáyipiedie gáyode to ome yu. Angoño uacáyipiedie quitígo ome yu, adi tu yu uje yingo yáyipiedie quigode ome uaque to.

Dupápisi iguíjnai u danguresórone uyoque

¹⁴ Jé ca átayo uágaja udore ore uje que ore changureta Dupade to. Uacarajáyo uje que pisocai u gotique ujetiga pátapi buricárique aja tórorique ujetiga pirañaque jnumi ome udore. Enga udore gajnui jé u ome Dupade anguresónique to ujetiga cháta raja Dupade anguresórojmárique ome datígo to. Yirajágo uje pate omone que atique cunguésõri pate gajnaréngone ome ñane. Yirajagópo to rĩ uje diri, dejai que ore cunguésõri ñane ome datique rĩ.

¹⁵ Adi jé u Satanás ome Crísto uje que ore adode cunguésõri uñane atique ome ñane. Jecute que omi tu ujetiga Dupade anguresónique doi ga cháta raja jnanírique ujetiga ca changureta Dupade.

¹⁶ Yirajágo uje cucha puyaguipísi u ujetiga pichajapite ayoré gajnúrique aja Dupade iguíjna cuchábi. Uacamóño uje Dupa uecai tuté cho daguíjnai iji uaque to. Jecute Dupade u uté to uje chojninga: A yugúsiji ore ujade jne enga a yijína ore aja quedéjnane jne. A ore cho dadupa iji yu jne. Enga a yo yurása iji udore ore jne.

¹⁷ Yocangarádejnai uté qué chojningápo rĩ: Ajoso ti ome udore ore uje que ore changureta yu, Enga angaráño uacajogatígo ome ñane. Enga ca ajocáso cucha gajnaréngone to. Enga jogadi tu jne ujetiga yimesẽre uaque.

¹⁸ Enga a oyo uacaji yu jne. Enga jé basa yo yujnacari iji jnanione uaque, enga a yopo yuro iji chequedíe uaque jne rĩ. Yocangarádejnai uruode u udore uje cuchade jnese jnuéngaisṍri tu.