2 Coríntios 3 - Dupade Uruode

Páblo chatata Dupade áyipie ichadie quigode

¹ ¿Ga ajoso ati yicotágo yoque ome yocuruode udore a? ¿Jecute que eso yocunétique? ¿Ujetiga yijnángorása yocujode ayoré uñéngo urusãratígo iji yocadode, enga amesechórase yoque a ome purusarane udore? ¿Jeoga uacáyipiedie u to ujetiga yutágoi uacarusãratígo to iji yocadode enga yijnójo udore aja yocajesúode ujetiga pimeserãque yoque ome diquidai uñane? Chamáñaje uacacadisórone uñane ore isocai u uté to iji uacari.

² Mu que qui tu go. Chamáñaje yocadode ipijogúsorone u uaque ga uacagúsopísiji yocajéode. Enga uacajnúone jé upúsu purusãraque ugurúode ome yoque uje ore chajire jnese enga e pijoque yocadode.

³ Que potigayaquérique déji uje Crísto pésu cuchade quigode iji uaque. Enga cho ujetiga Crísto urusãraque uaque ome erámi ujetiga adode pijoguipísiji uaque. Jé basa ga Crísto angúroméone u yoque ome darusarane udore iji uaque. Jé basa Dupa uecai Ujopié Espíritu Sánto gajnua u tíntaraque uje Crísto angúrome tu ome darusarane. Crísto que churúsãre darusarane udore iji cucaranéraque gai go, mu urusãrapídi tu ayorei uyoque yocáyipie.

⁴ Ũrepise yógome yocuruode udojo enga que potigayaquérique déji yógome. Chamáñaje Jesucrísto ipesute yocanguretigai tome dayé Dupade uruode gu.

⁵ Yirajágo uje que toque cuchade ome ayoréode uyoque bisideque. Mu pirajatigai ome yoquisaque ponáyone jnese garani u Dupade ome yoque.

⁶ Uje Dupade chisi ome dáyipie ichadie ome yoque. Gaidi u gu ujetiga dicase yógome adode. Mu áyipie ichadie udire que chopo dáyipie bajedie rĩ uje purúsãrai nanique ome pijmainie, ujetiga gosi chajire nanique enga doi quigode. Que yibóco áyipie bajedie quigode nanique mu ejodie u uje yibóco quigode ome yoque. Chamáñaje Dupade Ujopié tu gu uje chécãre yocáyipiedie. Yirajágo uje Moisés urusarane cucha puyácho chijna yógaja pitoringai gu uje que yibóco. Jé basa Dupade Ujopié u uje chijna yógaja pucuecaringué eyúgojmai.

⁷ Yirajágo uje Dupade churúsãre dáyipie bajedie ome Moisés nanique enga churúsãre iji cucarané gai. Mu jõrai taja jnumi dírecaringuéque cuchape nanique. Enga nanganata Moisés edodie ome dírecaringuéi tuté. Jecute Moisés urasade israélgose que ore chimo edóraque ome úringai nanganatac. U mu quigade ga Moisés úringai nanganataque jé doi jnumi ga diga íjnonguiji. Cuchadaté Dupade isocade udore nanique ome dáyipie bajedie. U mu, u to uje chijna yógaja pitoringai.

⁸ Dupade ingoningájnai jõra áyipie bajedie udire nanique aja yoque mu chaquesu re jnaque. U mu, omipísi tu ingoningájnai tome áyipie ejodie udire ome yoque uje Ujopié Espíritu Sánto iríringui aja yoque.

⁹ Ueradei Dupade áyipie bajedie nanique mu que yibóco quigode ga e máraque yoque ome quigode. Jecute e yocajneque Dupade ujuyaquei nanique. Jé basa áyipie ejodie suépise áyipie bajedie gai ome dáringanie ueradéjnai. Chamáñaje Dupade e chingome yoque gu uje e que yoquibárique cuse gu.

¹⁰ A ueradei Dupade áyipie bajedie ome Moisés urasade ore nanique, mu ueratigai e dopísiji jnumi iji áyipie ejodie jmainie. Chamáñaje ejodie suépise gai gu.

¹¹ Yirajágo uje Dupade áyipiedie udire a ueradéjnapisi nanique, mu chaquesu re jnaque. Jé basa áyipie ejodie que toc ujetiga chaquesuapo re jnaque rĩ ome yoque. Jecute úringai ueradéjnai suépise bajedie gai.

¹² Jecute dicase yoque ome yocatatagode Dupade urúo. Chamáñaje yirajagopise uje Dupade áyipie ejodie udire a ca íjnongapo jne rĩ gu.

¹³ Mu que yocajnui tu Moisés go. Uje chaco borapei dedodie yui gai nanique ujetiga urasade ca chimo uje jé doi jnumi nanganataringuei iji ga diga íjnonguipísiji.

¹⁴ Mu Moisés urasade que ore chiraja uje e dírecaringuéi tuté e chaquesu re jnaque. Jecute judíode iji deréjnane udojo ore chajire Moisés urusarane Dupade áyipie bajedie mu que ore chiraja quigode. Enga cho ujetiga borapei tuté jé qué déji ome ore uje suru ore áyipiedie yui gai. U mu gusu Crísto ujetiga chajnangarase borapei tuté iji yocáyipiedie yúode ga guesája yocáyipiedie yúode to ome uruode.

¹⁵ Jé aja deréjnane udojo ujetiga ore chajire Moisés urusarane quigode, ga gajnui tu ujetiga ore suru dáyipiedie gai ome borapetique. Jecute que ore chiraja quitique.

¹⁶ Mu gosi ujetiga chajni Yocangarádejnai gai ga cho ujetiga borapei tuté e dajúguiji gosi áyipie yui gai. Ga quene u uje chiraja Dupade uruode quigode.

¹⁷ Enga yocojningai Yocangarádejna u Dupade Ujopié tuaté. Enga ujetiga yocangarádejnai Dupade Ujopié tuaté déji pijogatique enga jé u uje guesája cuchade yui jnese ome ore.

¹⁸ Jecute uje e yanguretágo Jesucrísto ga e que chopo rĩ ujetiga qué yacógo borapei tuté yoquedodie yui gai. Mu yocajnui tu ajicarani uje obiréjna Yocangarádejnai ingoningájnai tiji yoque. Jecute Yocangarádejnai uté jé chosi dangoningájnai tiji yoquíode iji dirode jnese. Jecute uté ingoningájnai chise yoque ga jé yoco uté ome ingoningájnai. Enga que yoquipesute udore go, mu Yocangarádejnai uje Dupade Ujopié jé upúsu uté ipesucho udore ome yoque.