2 Coríntios 2 - Dupade Uruode

¹ Jecute que yisápo uaque diríca rĩ. Chamáñaje cachi yipésapo uacajnusiétigarique rĩ iji yiríringárique.

² Jecute a yipésu uacajnusiétigarique ga adi jé u yu, a jnusiétaguirase yu to. ¿Jé yorási ringome yu a? ujetiga jnusiétaque yu. Uje que yaquĩrasónique uñeque cuse, uje yangurenone urásu uaque ujetiga oyo yiquique iji yujnusiétigarigo ajénique. Mu a ca toguirásome uaque. Chamáñaje e yinguíra pujnusiétigai bajagája uaque gu.

³ Jecute yutṍri yurusarane ome uaque diríca ga que yisípise uaque. Chamáñaje cachi apéso yáyuguhebátigadatérique gu ujetiga yugúsiji uacari. Mu uaque a urásu jõ ujetiga apéso yininaquérique. Yiraja uje a yirasique yu ga a uacarasicho uaque to. Enga yipotigádi tu pininaquérique to ome yoque jnese.

⁴ Uacarajáyo uje yurúsãre yurusarane ome uaque diríca ga áyuguhebátaque yu aja, enga yitajíja yu aja, enga cási yibója. Mu que yiji jeta yinguíra páyuguhebátigadatérique aja uaque. Yigaidi tu ujetiga arajáyo to uje yijnoraquei uásejnapise ome uaque.

Páblo chaquĩ́ra coríntogosode ujetiga ore cha detétigade ome cucha gajnaréngone ipesungóri uté

⁵ Yingopome uaque rĩ ujetiga yoquijõrárique pésu cucha gajnarétique ga uté u uje ipesute yáyuguhebátigadatéi. Mu que gusu yu go. Pésu uacáyuguhebátigadatéode to. Mu que uaque jnese u go uje chinguíra páyuguhebátigade aja uaque.

⁶ Mu yo uacaquique ujetiga etácho uté ome uacáguedie diríca enga goñome uaquetétigade ome uté iji uacáguedie.

⁷ Enga beyoi uté ga anejecho údode ga oyo uté quique ga cha dáyuguhebátigade. Jé socaseti áyuguhebátigadatéi chinguírapísaja jnumi jne.

⁸ Jecute yingome uaque ujetiga beyoi uté ga anejecho údode ga angoño uacajnoraquédatéi aja.

⁹ E yurúsãre cuchade udojo quigode ome uaque ica ga yo quique cuchade udojo quigode ome uaque ica. Mu yetingarãque uaque ica ujetiga angáchoi yu, jeoga ca angáchoi yu.

¹⁰ Jecute ujetiga arajayópo uaquetei casé jne rĩ enga uacadi jé u yu, a yirajápo to jne rĩ. Que yajneque uté ipesudi cucha gajnareque, mu ujetiga yajnenguírase to ga a jé yirajápo cucha gajnaréngone ipesungóri uté to jne rĩ. Yucuei tu gu uacomitigárique ome ñane. Yucuei tupo yomitigárique to iji Crísto iquei gu.

¹¹ Uome ujetiga yipéco cuchade udore aja quigode. Ga a jé ca Satanás chimere re iji yocujade jne. Que yoco agúpuraníque ome Satanás josipiedie go.

Páblo que chise datijínaquérique iji Tróas idaisórone ore gari

¹² Yicáji Tróas diríca ujetiga yacate ore iji ome Yocangarádejnai Crísto adode enga yacajnaquéode que chajire danéningarique ome ore. Chamáñaje Yocangarádejnai ipesute yacajnaquéode unéningane gu ome ore.

¹³ Mu yáyipie jĩraque déji yijõrai Títo enga jnusiétaque yu ome uté. Jecute jĩraque yiji iji tróasgosode ore gari ga yicáji ore uniri Macedónia. Chamáñaje yipota gu ujetiga yimope yijõrai Títo to iji Macedónia.

Jesucrísto u uje jnuéngai cuchade jnese ga jé yocajnai u

¹⁴ Yacaranguipise ome Dupade uje Jesucrísto u uje jecucha jnuéngai cuchade enga yocajnai jé u uté. Enga Crísto Jesús chisite daruode aja erámi jnese, enga uruode atatasórone u uyoque. Ga uruode gajnui tu cucha ai unénique.

¹⁵ Yipijójome Dupade gu uje Crísto ai unéri chisa yoque to. A yipijójopome Dupade iquetade udore ore rĩ. Jé basa yipijójopome udore ore rĩ uje bijnaque ore ome Dupade.

¹⁶ Mu udore ore uje bijnaque ore ga cho ujetiga Jesucrísto ai chujé ore. Jé basa udore ore uje Jesucrísto iquetaque ore ga cho ujetiga uneripise ai tome ore enga ore chojare enga ore úringai piquetaque u iji deréjnane jnese. ¿Ma picasidirase ome uyoque jnese ujetiga yatatago Dupade uru iyiejnane udore quigode?

¹⁷ Uacamóño uje uásejna Dupade uruode atatasórone uje ore cho cucha bisidéguiji Dupade uruode enga ore tagu dacajnaquéode oredie. Mu que gusu udore go, jorane jé u uje ore chécãre Dupade uruode quigode. Mu que yoquisocai u udore ore isocade to go. Mu uyoque ga que paringaquérique déji yógome Dupade. Chamáñaje Dupade utocaite yoque gu enga Crísto iroguipise yoque rĩ.