2 Coríntios 13 - Dupade Uruode

Páblo qué jno daquĩraquéode údi ome coríntogosode

¹ A e gadiogue udaque dirome ujetiga yise uaque. Enga ujetiga yĩri enga a jé yiji Dupade uruode acajnaquéode aja quigode ome uaque jne. Uje Dupade uruode chósi te: "Quene pajire páyipierigui aja quitígo uje pududicho cucha dacadode quigode jnese ome pijogúsoningo jnanío, jeoga gare ore, jeoga gadioc ore."

² A e yaquĩ́rapo uaque jne rĩ. Enga yaquĩraquéode gajnengórone u udore ore uje ore pésu cucha gajnaréngone ica. Mu que gusu ore go. Jé yaquĩraquéode gajnengórone u uaque jnese. Enga yaquĩraquéode que cãra re ome yaquĩraqué casodica uje yugúsiji uacari ica. Enga yaquĩraquéode quigode u udojo: ujetiga jé uacate uje que angáchoi yu, ga a yĩriápo jne rĩ enga jogadi u jne ujetiga ca yagutu yurúrique ome uaque.

³ Yiraja uje uaquetingarãque yu ome yúringai Crísto utocaidipise. Mu a yise uaque dirome enga a ca potigayaquérique dépoji uágome yu dirome rĩ. Uje a Crísto chijnápisa yibijnani tome uaque dirome. Enga que cucha bisidégape Crísto go. Enga uté u uje chiraja dasocade ome uaque. Enga a chingo dáringai pujnuéngaisṍre aja uaque dirome.

⁴ Jé ũré enga ore cho cucha bisidéguiji Crísto nanique, enga ore chajo aja curesei gai. Mu Dupade chiringare ome dajopiédaté etogué enga ecáji deréjnane udojo. Uje ore cho cucha bisidéguiji yoque, mu jé yoco uté uje ore cho cucha bisidéguiji to nanique. Enga Dupade Ujopié tuaté u to uje dépisiji Crísto anguresórone yocari iji deréjnane udojo to. Enga Dupade Ujopié tuaté a jé jõrai u yu dirome aja uacajade.

⁵ Beyoi enga ajichopise uacadode aja quigode ujetiga etócho uáguiji uacanguretigai iji Dupade, jeoga ca etócho uacanguretigai iji. Jé etingachopise uaque. Ujetiga ca arajáyo uje Crísto dépisiji uacajéode enga imoi tu uje uacoyo udore ore uje ore cho Dupade anguresṍri iji re, mu Dupade que anguresõre ore go.

⁶ Mu yipotapísa ujetiga arajáyo to uje que taque yoque go ome yocanguretigai iji Dupade.

⁷ Yicatecãcoi Dupade ome uaque ujetiga ca apéso cucha gajnarétigo. Que yoquigaidi u go ujetiga ayorérique chojningame yoque: "Omío Páblo acadigode ore adode." Mu a unérirase ome yoque ujetiga beyoi pátegoningáringo ome uaque. Mu que cuchárique déji ujetiga ca picotaque yoque ome yoquisatígo iji uacajade.

⁸ Ujetiga ũré cuchárique enga que toc ujetiga pumuchayaque. Jé basa enga pocojña omone gãrapié u cucha ũré tuté ujetiga pangurete ome uñane to.

⁹ Yoquirasiguipise yoque uje eyuque yoque iji yoquisagode gáyode, Dupade iroquéo, chamáñaje yocajegaidi u gu ujetiga yimóngo uacáringane Dupade anguresõre etoque. Jecute a jecucha yicatecãcoi Dupade ome uaque jne ujetiga eso uacáringane ujñapetácho to ome Dupade.

¹⁰ A yibágui uaque to jne mu qué yiroque yurusarane udojo aja uaque bajaque. Yigaidi u gu ujetiga angáchoi yaquĩraquéode bajaque ome uaque enga ayáyo uacate gajnaréngone udore. Enga yĩri jne, enga a ca yurúrique dosója uaque jne. Chamáñaje Yocangarádejnai ipesute yúringai pangarate gu ome uaque. Ipotigádi u ujetiga yijosi uáguiji gaté ujetiga aquéraño iji adode. Jé basa que ajéode u go ome yu ujetiga yijosi uáguiji jnumi.

¹¹ Yijorane uaque á, yajéode u ujetiga tijode cho jnángome uaque iji uacajesúode. Yajéode upo rĩ ujetiga uacacuegode u uacáringáringo ujñapetácho ome Dupade. Yajéode upo rĩ ujetiga uacajneque posõraquéode to. Yipotapísa to ujetiga jé ca etácho ñane, mu jé uac upúsu uñane enga pajesereringai déji uágome ñane. Enga pajesereringai, pijnoraquei guẽrasṍri Dupade a dépisi uacajade jne.

¹² Angoñopísa uacarasitígadatéi taja ñane, enga acho uñane uredie uje Dupade anguresõripísode u uaque gu.

¹³ Uacojode Dupade anguresõre ore iji de ore pota ujetiga yurúsarome uaque uje qué ore chiroque darasitígadatéi taja uaque to.

¹⁴ ¡Yipésupú ga Yocangarádejnai Jesucrísto chacacãre uaque jnese ome cucha omone jõ! Enga arajayórase ome uaque Dupade ijnoraquédatéi ome uaque, enga Dupade Ujopié Espíritu Sánto nónapísa uágaja quedéjnane jne jõ á. Amén.