2 Coríntios 12 - Dupade Uruode

Páblo chatata dajnéone penomicho ome re

¹ Que cuchárique tṍraji ujetiga ayorérique chisi dabánique. Jecute ca oyo dicotárechoquíji yu ome yojñane udojo jne. Uje que toc ujetiga ca yatata Yocangarádejnai gueranone yenomicho ome yu uje chingopísa cuchade quigode aja yu.

² Yimo jnanione uñai to uje changureta Yocangarádejnai Crísto. E sequeredie gagájni iji yirídai iji quigade uje Dupade jno jnani udé údi aja gatajnoquei uéchai. Que yimo ujetiga jno uté ao ayorei údi, jeoga ca jno aoi údi. Mu Dupade u uje chiraja.

³ Que yimo ujetiga jnani uté jé chise Dupade idai tome daoi, jeoga ca ao ayorei nóna to. Mu Dupade u uje chiraja.

⁴ Gusu yirajai tu uje Dupade jno údi aja dedai ijõri. Enga uje déji uta enga Dupade chingo daru dapoguiédode aja uje que juéga ome ayoré uñeque ujetiga doi ga chatata.

⁵ Jé tiógarapisarása yicotaquérigo ome jnani tuté. Mu que dicotare yu ome yu go, enga que yisi yibánique ome cuchárique. Mu gusu yajnéone cucha uje sué yibai ujetiga yicota yu ome udore.

⁶ A yisírase yibai mu a jé tiógarapisarása. Chamáñaje jé ũrepise yatatagode yacho gu. Enga a ca yorase dicotárechoquíode uñane uje ore chicota re bisidec iji dore. Mu que yicota yu go. Yipota ujetiga pimo yipesudode bajaque enga pududicho yacajnaquéode bajaque rĩ. Enga jogadi u jne ujetiga gosi pésu dáyipierigui ome yu. Que yipota ujetiga uñeque chajnerame dacotaquédatérigo ome yu ujetiga jé yigarabío gu.

⁷ Yenomicho udore ga cucha pitijabácho. Enga cho ujetiga cuchadatépise yu ome Dupade uje chingo cucha pitijabádode udore ome yu. U mu Dupade que pota jetiga dicotaripise yu ome udore. Jecute Dupade juéga yu ome Satanás ujetiga Satanás cho dajosipié ome yu. Enga uté josipiedie dosopísaja yu enga gajnui u ojnatique ujetiga chichagu yútique.

⁸ Ga gadioque uje yicatecã́ri Yocangarádejnai ome yu ujetiga chijócãrape Satanás josipié dosóguedie iji yu.

⁹ Mu Yocangarádejnai chojningame yu: "Bajnei tu yijnoraquei tome ua. Enga jé gusu. Enga que cuchárique chonapo ua gotique rĩ. Yujopié etotiguei pijoguipise aja guesode iji udore ore uje ore chejnáreque re gatuaque." Jecute yirasique yu uje yejnáreque yu. Yipotigádi u gu ujetiga pijoguipise Yocangarádejnai Crísto ujopié taja guesi tiji yu.

¹⁰ Jecute yachietáji yu uje cuchade udore chinguíra yu aja jnumone. Uje ore uruode gajnarenguipíso ome yu, jé u to uje cuchade chona yu, jé u to uje ore cho damajo yu, jé upo cucha gajnaréngone jnese rĩ uje tṍraji yu uje yatata Yocangarádejnai Crísto adode. Uje cucha gajnaréngone udore chinguíra yu aja jnumi enga yetotiguei garósipise, mu jogadi upo rĩ uje Dupade chorei detotiguei iji yu enga yúringai etoguipise jogadi e u ome Dupade adode.

Páblo áyuguhebátigadatéi gajnengórone u coríntogosode

¹¹ Yo ũrusode uje yicota yu ome yate omone udore. Uaque urásu ujetiga uacarúrigo omío ome yisagode cucha ome Dupade. Mu uje que uacarúrique omaja yipesudode udore, enga gusu yu ujetiga yatata quigode. Yiraja uje que yugúsiji cuchárique ome uaque, mu uyu u uje yujnuépise uacajnane udore uje ore cho Dupade iroguipísode iji re.

¹² Uje yugúsiji uacari ica ga que yujuseque uaque ica enga yinejepúsu uacádode ica. Yúringai Dupade iroguipise apóstol obiréjna gu yipesudode cucha pitijabácho iji uacajade. Jé basa a ca Dupade iroque yu ga a ca toguírase ome yu ujetiga yipésu yipesute cuchadatéode udore iji uacajade.

¹³ Que yécãre yijmapiéraque arĩ́e ome Dupade anguresórone uaque jnese go iji uaquedáyode jnese. Gusu uje yujode Dupade anguresõre uñane iji diquidáyode ore chosõre yu ome deranone cucha. Mu ujetiga uaquetépidi tu uté iji yu enga beyoi enga ayáyo jne.

¹⁴ Qué yipésu yu ome uaquei ujetiga yisápo uaque rĩ. Gadióguei a e udaque jne ujetiga yise uaque. Mu a ca yutai uágome cuchárique jne ujetiga yugúsiji uacajade. Chamáñaje que yucuegode u uaquẽratígo cucha ome yu go. Mu yucuegode upúsu uaque. Chamáñaje uacoyo yabode gu. Uacarajáyo uje jnanírique que agutíyamáite dababi go. Jé basa ababi agutíyamáini u dayé.

¹⁵ Yucuei tu uacangoningádatérique ome Dupade adode, ga que cho cuchárique ome yu ujetiga yejna yiplátarigui jnese iji uaque, jeoga eyuguipise yu iji Dupade iroquéode iji uacabáyode. Mu yo yáyugu yu uje cachi yijnoraquei quérã gaté ome uaque, mu ome yajéode, ga uacajnoraquei jé doi jnumi, jé doi jnumi ome yu jõ.

^16-17 Uacuñane chirajapise uje que yagu uaquẽratique cucha go uje yugúsiji uacari. Mu uacuñane chojninga: "Taque Páblo. Tagu uaqueranone cucha to erĩ́e. Jecute chiroque darógode udore uñane aja uaque ujetiga chamáta uaqueranone." Enga chiese yaringaquéode u udore ome uaque. ¿Enga ajoso ati yigaidi tu yaringaquérique ome uaque diríca ya? uje yiroque yirógode aja uaque diríca.

¹⁸ Jé ũré uje yingome Títo diríca ujetiga chajmita uaque. Enga yiroque yoquijõrai Dupade anguresõre uñai aja quigade diríca. ¿Ga Títo aringáca iji uacajade diríca ya? Úngare. ¿Ja ca ũré yu a? uje Títo uyoque jé yoco ñane ome yocáyipie omenie ome uaque, enga yujucópise yoquio jnese, uje yugúcoji uacajade.

¹⁹ A ajoso ati cachi yoquĩraraque yoquibai iji uacaquei, mu que qui u go. Mu yocuruode gajnesṍri upúsu Dupade uje chiraja uje Crísto iroguipíso yoque. Mu yijorane uaque á, yoquigaidi tupúsu ujetiga aquéraño iji uacanguretigai iji Dupade ome yocuruode udore.

²⁰ Yitodo ujetiga yico ñane, mu yocajéningo noñácho ome ñane atígo. Yitodopo rĩ ujetiga pibotaqué gajnarétigo déji uaque ome ñane, jé upo rĩ ujetiga aratáyiñome cuchade ome ñane, jé upo rĩ pájningáringo rĩ ome ñane, jé upo rĩ ujetiga uacuñéngo jnaripísi cuchade ome raque, jé upo dara pijnimingone rĩ ome ñane, jé upo piyoguéode ome ñane rĩ, jé upo uacajosipiedie ome ñane jne rĩ, jé upo rĩ ujetiga ca angachopísi ñane.

²¹ Yitodópisa ujetiga yise uaque ga pajegátigai déji yu ome Dupade ome uaque jne. Yitodopo rĩ ujetiga anguíraño pujnusiétigadatéi aja yu enga yibo jne. Yiraja gu uje diyajmaque uacuñane uje uacapéso cucha gajnaréngone nanique. Enga cáma ayáyo uacasoca gajnareque bajade ome punganingane. Enga uacasoca bajade udore jé aja uacasocade uñane qué catapísaja uaque.