2 Coríntios 11 - Dupade Uruode

Páblo chingo detétigai taja udore ore uje ore cho Dupade iroguipísiji re mu taque ore

¹ A jé yatata yadode ome uaque jne. Yiraja mu uje que cuchárique tṍraji yoquicotaquéode ome yoque. Mu adotáyo uacajéode ome yu jne.

² Chamáñaje yijnorapise uaque gu, enga yetaque ujetiga angáchoi pacadisõre unejátigo. Enga jecute yocãra uaque. Mu garani u Dupade uje yocãra uaque. Chamáñaje e yingome uágaja Crísto nanique gu ujetiga gajneque uaque to. Enga ujetiga eso jne enga uacajnua tu gapua uje chachai dajmasṍri. Jecute a gajnarenguipísirase ujetiga eso mu e uacagúsoji uñai gari.

³ Uacarajáyo uje Satanás chacája ugai nanique enga chãra yocaté bajé Éva nanique ome daringaquéode. Jecute yitodópisa udojo ome uaque ujetiga jnanione udore ore chãra uaque to ome dacajnaqué tátigo. Yiraja uje jé ũrepise uágome uacajnoraquei ica ome Crísto. Enga que uacáyipieraque déji cucha uñeque ica. Mu yitodópisa ujetiga e ecãcho uacáyipiedie quitígo enga angáchoi pacaditíga tágode udore, enga oyópise jmíti, jmíti ome Crísto.

⁴ Yiraja uje uacacadisõre tágode udore ore chacate uaque enga que arañíñome ore acajnaquéode quitique ome uaque. Ore chatata Jesús quedéjnarique atígo ome uaque, mu unejácho ome Yocangarádejnai Jesús adode uje yacaco uágome ica. Ujetiga amesecho udore ore acajnaquéode enga a pujopiéraque chisírase uaque, mu pujopié quedéjna enga que Dupade Ujopié Espíritu Sánto u go uje díji uaque ica. Chiese ore acajnaquéode u páyipie omenie quigode to, mu udire que cunguésõri uacadudi cásodicáite go uje piquetatoi páyipiedie udire nanique ome uaque.

⁵ A oyo cuchadatépisiji pacadisórone udore ore jõ. Enga a ajoso ati Dupade iroguipísode u udore ore to. Mu ome yajéode ga a ca udore ore sué yibai, uje uacoyo pangarádejnai iji ore múñi.

⁶ A ca yiraja puru unénique ome yacajnaquérique mu unérone upúsu yirajatigade quigode. Enga e uacapáñañoji yoquirajatigade quigode to gatuaque ica uje yugúcoji uacari.

⁷ Uacamóño uje yise uáguiji taningane ica enga yacate uágome Yoquiquetangóri adode ica enga que yutai uaque ome cuchárique ica. Enga yijmátapise aja yisagode iji uacajade ica. Mu que cucha gotique ome yu uje yigaidi tu gu ujetiga yijosi uáguiji gaté ome yadode udore. A ajoso ati yate gajnarécho udore jõ.

⁸ Mu yagutíñamáinone u yujode Dupade anguresõre iji diquidai uñane ica. Enga yibosode u ore gueranone cucha udore iji yisagode gáyode iji uacajade ica.

⁹ Uje cuchade chona yu iji uacajade, mu que yingo yu aja uacuñeque go. Yigaidi tu gu ujetiga ca arañíñome yu ome yutaitique cucha iji uaque. Mu udojo quigade ga yoquijorane Dupade anguresórone ore díji Macedónia ga udore ore u uje yagutíñame ore uje ore doi oré tome cuchade uje chona yu ica. Enga yadode u udore iji uacajade gatuaque ujetiga ca uñeque narañime yatique. Enga a jé yadi u yadi udé gatuaque jne uje que yipota ujetiga ẽcho cucháringome yu to.

¹⁰ Yirajapise uje Crísto ate uréone irajasṍripísi tu yu. Enga yirajapise to rĩ uje que togome uñeque ujetiga chĩro yirasitigai ome yisocade udore uje yacate uágome Crísto adode, mu que yutai uaque gotique.

¹¹ ¿Ga ajoso yipojnaquéo ome yuruode udore a? ¿Jeoga ajoso ati yetaque uágome yuruode udore? Úngare. Dupade u uje chirajapise uje yijnorapise uaque.

¹² Mu a jé yiji yisocade udore údi ome uaque jne uje yacate uaque, mu que yutai uaque. Yigaidi tu gu ujetiga udore ore ca ore chiraja daru quitíguiji yu ujetiga ore chojninga: "Yoquirasique yoque to uje Páblo uyoque jé yoco ñane uje yajo uaqueranone cucha uje yacaco uaque."

¹³ Yirajágo uje pacadisõre tágode udore ore chopise Crísto iroguipísiji raque, mu taque ore. Ore gaidi tu paringaquéode ome uaque. Enga que Crísto iroguipísode jõra udore ore gotique.

¹⁴ Mu que gusu paringaquéode iji udore ore go ujetiga ore cho re iji cuchárique. Chamáñaje Satanás chiraja to gu ujetiga cho re iji cuchárique. Jecute cho Dupade iroguipísode uñai tiji re enga chopise udore ore uje ore jogadi u dírecaringuéi ajei.

¹⁵ Jecute Satanás ajnasórone udore ore gaidi u dangaráni tuté jmapié. Enga ore cho ate omíji raque iji uacajade. Mu a jé ore gajneque dapesudode udore jne ujetiga ore chise deruei.

Páblo chingo dáringai ducañerájma aja ore ujetiga ca potigayaquérique déji ome úringai Dupade iroguipise

¹⁶ A oyo ũruso iji yu, mu a qué yatatapo yadode ome uaque jne rĩ. Yiraja uje gajnareque ujetiga gosi chicota re, mu ujetiga ajoso ati yicotaquéo yuruode ome yu, mu a jé yatata yadode jne ome uaque. Chamáñaje yirasitigai déji yu gu ome yadode uñane.

¹⁷ Yocangarádejnai iroque yu jecute uté uruode u yatatagode. Mu a jé qué yijnimape yuru garósirigo to jne ome uaque uje yatata yadode ome uaque. A oyo dicotare iji yu, mu a yingome uaque jne cuchade uje pésu yúringai dicotare udé.

¹⁸ Yirajágo uje uásejna ore uje dicotare ore ome dapesudode cucha iji erámi tudé. Jecute a yingo yate bajade ome uaque to jne uje dicotare yu to nanique ome yadode udore.

¹⁹ Uje chiese irajatáquedaté uaque, mu adotáyo uágome ũrusórique ojñáringo ome uaque.

²⁰ Uje udore ore cho dajosipié ome uaque, mu jé uacadotáyo uágaja ome ore josipiedie udire. Udore cachi ore pose uaqueranone bisideque uje que ore isatique oréraque cuse. Enga ore cho dajnenguíji uaque. U mu que ore áyipieraque déji uacangoningárique ome uaque. Ujetiga ore chinguírarása dajmanocórodie aja uaquedodie, mu a jé boyórase uacajnoraquei tuté údi ome ore.

²¹ Ise enga pajegátigai déji uágome yoque uje que yicoi udore ore jmapié noñánguenie ome uaque. Jecute dicase udore ore ome dacotaquéode ome raque. Mu jé basa enga a yo dicase iji yu to jne ome yicotaquéode ome yu. Enga a yo áyipie eyúgode udore ore jne.

²² Ore cho judío iji raque, mu judíopise yu to. Chiese Israel gosipise ore, mu Israel gosipise yu to. Chiese ore gãrapi u yocai jnani bajai Abraham, u mu jé yãrapípise to.

²³ Ore cho Crísto iróguiji raque, mu uyu upúsu iroguipísi tome ore, enga yujnué udore ore gáyode. Mu gajnareque uje yisi yibai ome cuchade udore. Mu ũrepísi tu yu uje yisagode ome Crísto suépise udore ore isagode gáyode. Chamáñaje yo yiba adode gu. Yajnéone paquesupite sué udore ore gai. Adi jé u uje yúringai pujurúgai sué ore gai rĩ. Enga yajni chuque ejode to gatuaque rĩ.

²⁴ Yajnéone e chejna yijmanai uje judíode ore chisa yu, ga ore chaquesu yúdode. Enga ore inguirane u 39 aja yu.

²⁵ Gadioc uje ore chisa yu ga ore chinguíra pidode aja yúdode. Jé basa chojmára uje ore chimitingare yúdode ome cucaranenie uje ore gaidi u gu yúringai chuque. Ga gadioque uje yibíode cuco péro yúdi iji yote quedéjnai ajéode uje yiji Dupade uruode údi aja diquidáyode uñane. Iji udore uñai enga yoquibi cuco péroji yote quedéjnai ajei enga yejnai dire chojmara, dejaque chojmara rĩ iji yote quedéjnai ajei.

²⁶ Uásejna yiriguítigade uje yiji Dupade uruode údi aja quedéjnane. Enga yiraja uje cucha urõsode déji yiquéode. Socaseti yibasája yote quedéjnarique, jeoga oriechoquírigo toria yugúcharigo, jeoga yurasade ore cho damajo yu, jeoga purása quedéjnane ore cho damajo yu rĩ. Jeoga cucha dacate gajnarétigo tṍraji yu iji guidáidatéode uñéngo, jeoga tṍraji yu iji yiquitique erãpe, jeoga tṍraji yu iji yote quedéjnai ajénique. Jeoga uñéngo cho yocujode Dupade anguresõre iji re ga ore pésu yujurérigui.

²⁷ Yisagode suépise yibai iji ujade, enga chijna yu aja jnumi. Uásejna dejade uje que yimópo to rĩ enga yejnarenguipise moi isagode ome yu. Yejnarengápo chaguhei ome yu rĩ. Yejnarengápo yuyádode rĩ. Yopo yuyaque rĩ enga jiei dejade ome yu. Yejnarengápo tejnuringane ome yu rĩ. Yijmátapo rĩ ome piguidedie.

²⁸ Que gusu udore mu cucha uñane qué déji uje cáma yatata to. Mu cuchiyi tupúsu yáyuguhebátigadatéode ome yujode Dupade anguresõre uaque iji erámi. Enga yáyuguhebátigade udore chise yu iji deréjnane jnese.

²⁹ Ujetiga yujórique Dupade anguresõre uje garósi anguretigai pésu cucha gajnarétique enga chejnáreque re ome dapesudode udore enga yadi jé u. Yejnáreque yu to ome uté gosi ipesutígo. Ujetiga gosi chijna dajõrárique aja cucha gajnaréngone enga chinguíra pajegátigadatéi taja yu. Chinguírapo pajei dotáningai taja yu rĩ.

³⁰ Que yicota yu go ome yimanitígo cucha, mu yicota yu gu ome yajnéone cucha gajnareque ponáyone uje sué yibai.

³¹ Mu Yocangarádejnai Jesucrísto Dayé Dupade u uje jé tiógarapísa dáringai picotaque iji deréjnane jnese. Enga uté u uje chirajapise yu uje jé ũrepise yu ome yojñane udore ome uaque.

³² Qué yatatapo cucha uñeque ome uaque rĩ. Uje yugúsiji Damásco ica, enga eduguéjna cuchábi Arétas iroguipísi gobernador uté chiroque soldádode aja guidai ujuyaquéode piagode. Pota gu ujetiga ore chisa yu ga ore suru yibai.

³³ U mu yujode Dupade anguresõre ore chosõre yu ga ore jno yúdi aja ore ujuyaquéode piago catadei iji ójo. Enga ore na yu aja dora ijnacojo ajei, enga ore chigaru ducarigode aja dora eruéode enga jé u uje ore jno yúdi aja jnumi. Jecute yapídome eduguéjnai irógode udore ore.