2 Coríntios 10 - Dupade Uruode

Páblo narare dáringai Dupade iroque apóstol gai ome coríntogosode

¹ Páblo jé uyu uje yijna Crísto isocade aja uaque. Uje que yujuseque uaque enga osõrataguipise yu ome uaque. Jecute yijócha uacajéode údi ujetiga angachopísi yu. Uje yudute ore ojñane ome yu uje chiese yugúsiji uacari ga paraguipise yu iji uacari. U mu chiese yiji iji uacari ga idája yu iji uaque, ga chiese yécãre yisocade ga e josipíerãque yu.

² Jecute uacuñéngo chuse dáyipierigui guio ome yu. Enga ore cha chaguhéta cuchade yibai. Uje chiese yedu yáyipie ayoredie enga chiese cucha bisidéguei Dupade áyipiedie ome yu. Mu ujetiga ca ore cha dáyipiedie udire enga a yĩri jne enga a yingo yu aja ore jne enga a yĩrarare yibai jne. Enga a yo josipíeranguipísiji yu jne ome udore ore.

³ Jé ũré uje ayorepise yoque to, mu que yijnángo ayoréode jmapiedie ome yocajnéone pocaninga to iji Dupade iroquéode gai.

⁴ Chamáñaje yocõrachade que u ore õrachade go. Mu Dupade guẽrate yocõrachade ome yoque ome yocajnéone pocaninga. Jecute yocõrachade que cuchárique chisa dejórique ome. Enga yinoningáco Satanás josipiedie jnese ome yocõrachade udore.

⁵ Ujetiga pacajnaqué tátique déji, jeoga páyipie gajnarénguenie déji enga chãraque Dupade yui ome gosi mu yinoningáco udore ore to. Enga yujnuéngo páyipie ayoredie gáyode jnese ujetiga gusu pangaranei Crísto áyipiedie.

⁶ Enga e dimane yógome udore ore jnese uje angoninguite parique ore ome Dupade adode, ujetiga yoco ore quique. Mu cucha amiri tu ujetiga angáchoi yoque enga átayo uágaja yoque to ome yocaquĩraquéode ome udore ore, ga yinoningáco ore angoninguite paritigade jnese.

⁷ Cachi uacajirique pibai ayorei isocade gatuaque, mu que ajichopise gosi áyipieraque isocárigo. Ujetiga arajayopise uágome Crísto uje gajnenguipise uaque enga jé cho yoque to. Yanguretágopise yoque to ome yocúringáringo Crísto gajneque.

⁸ Que yajéngome yuruode go uje yingo yúringai Dupade utocaite aja uaque. Chamáñaje Yocangarádejnai guẽrate yocúringai pangarate ome yoque gu ujetiga angáchoi yoque. Gaidi u gu ujetiga yatatago uruode ome uaque ujetiga aquérañoji uruode. Que chiroque yógaja uaque gu ujetiga yoco yoquijosipié ome uaque enga ca atiócho yoquijosipiérigui.

⁹ Que yipotigádi tu to ujetiga yurusarane chajuque uacagutéraque.

¹⁰ Yiraja uje ore dojnóngaja yu enga ore chojninga: "Irajatáquedaté Páblo uté enga urusarane quigode etócho ome uaque. Mu a dirase ga a ajichósirase mu cucha bisidégape enga que bisitique pijoque ome darúrique."

¹¹ Mu uté gosi uje urúo udore ome yoque, ga yipótago ujetiga chiraja to uje yocurusarane quigode uje tṍraji quedéjnane ome uaque, a jé upúsu yocadode quigode jne ujetiga yugúcoji uacari.

¹² Que yoco áyipie catadéode udore ore uje ore chicotapise raque ome dadode uje chiese ore atígo omío. Enga ore chatingara rágaja dojode ayoréo. Chamáñaje que cucha onique tṍraji ore isocade udore gu. Yirajágo gu uje Dupade isocade u ujñapetade, jé basa ayoréode uyoque que yoquisocade ujñapecho go. Jecute que yatingaco yógaja yocujode ayoréo iji de jnumi.

¹³ Uyoque ujetiga yicórase enga yisigorase yoquibáyode ome cuchárique mu a jé yocajnenguipísirase cucha dacadi uté. Chamáñaje Dupade u gu uje chingo yoquisagode jogadode aja yoque. Enga Dupade u uje chiroque yógaja coríntogosode uaque to nanique.

¹⁴ Jecute que qui tu ore uruode gotique uje chiese ca yocajneque coríntogosode uaque to. Mu yocajneque uaque to uje Dupade ichajapite yógaja uaque nanique. Bajade u yoque nanique gu uje yatatago Crísto ujnomé ueradéjnane ome uaque.

¹⁵ Que yijnójo yógaja pisaque quedéjnarique go ujetiga ca yocajneque. Mu yiroco uaquei ujetiga uacanguretigade quérã gaté iji Dupade enga yicopo uaque jne rĩ, ga yátagopo cuchade aja uaque to jne rĩ. Mu u jne ujetiga Dupade jé ichajapite yógaja uaque.

¹⁶ Mu que gusu ujetiga yicórase uaque mu yiñóñangorásiji uaquéchai ujetiga yatatago Crísto adode ome diquidai uñane ujetiga Crísto chiqueta udore ore to. Mu que yocajéode u go ujetiga yimeco yógaja Dupade utocaitígo ujáningo uje Dupade e chicha ore iji diquidáyode udore gu.

¹⁷ Adójnacho Dupade uruode udojo uje purusãracho nanique, ga chósi te: Ujetiga unere picotaquérique yui ome uaque gosi ga jé ca chicota re, mu uté gosi doi enga chicota Yocangarádejnai.

¹⁸ Jé ũré uje que pijoque uté gosi ome Dupade gu uje chicotapise re. Mu ibijoi u uté gosi ome Dupade uje Yocangarádejnai chisipise gosi gai ome átegoningáne.