2 Coríntios 1 - Dupade Uruode

¹ Páblo uyu uje yiroque yurusarane aja Dupade anguresórone uáguiji uacaniri Acáya údode jnese. Mu yoquijorane Dupade anguresõre uaque iji Corínto, uacajnenguipíso yurusarane udojo. Uacarajáyo uje Jesucrísto iroguipísode apóstol ore jõra yu. Uje Dupade jé áyipie gu ome yu ujeta utocaite yu. Enga yijõrai jé u Timotéo iji de uje yurúsãre ome uaque.

² Yajéode u ujetiga uacajneque Yocai Dupade, Yocangarádejnai Jesucrísto ore acacáninga omone to. Yajéode upo rĩ ujetiga ajnáño Yocangarádejnai Jesucrísto, dayé ore guerani pajesereringa to.

Páblo chatata dáringai ducañerájma

³ Beyoi ga yisigopise Yocangarádejnai Jesucrísto dayé gai uje Dupápisi u. Uje Yocai jé u to enga osõrataguipise ome dabode uyoque. Enga Yoquidupade u uté to rĩ enga nejé yocúdode enga cho yoquiquique rĩ ome cuchade.

⁴ Dupade u uje chosõre yóguiji yocajnéone páyuguhebátiga jnese. Gaidi tu gu ujetiga yicoi enga yijnángo uté osõraquei tuté ome yocujode Dupade anguresóño to iji ore gajnetígo páyuguhebátigadaté.

⁵ Adi jé u uje yoco yoquiba Yocangarádejnai Jesucrísto adode to enga yejnárejopise yocúringane ducañerájma, mu a jé adi u Jesucrísto to jne ujetiga chatapísaja yóguiji yocúringáringo ducañerájma jmainie to, ujetiga tijode cho jnángome yoque to.

⁶ Jecute ducañerájma yoque mu yoquigaidi tu ujetiga Dupade chosõre uaque enga eso uacáringane piquetaque to. Ujetiga yocajnenie pujurei chise uaque to jne ga ajnusináño jne uje Dupade u uje chatapísaja yóguiji yocajnenie pujurei enga chijnime yóguiji udire jmainie. Jecute adotáyo uáguiji uacajnenie pujurei jmainie to uje Dupade a chátaja uaque to jne iji udire jmainie.

⁷ Yocanguretigai jiépisi ome uaque. Yirajágo gu uje jé yocajné pijosipiedie jnese ga a yocajneque Dupade osõraquédatéi jnese to jne.

⁸ Yijorane uaque á, yipótago ujetiga yingongo yocúringane ducañerájma ome uaque uje yugúcoji ore uniri Ásia ica. Uje yocajnéone petingaquéo etócho ica aja yoque enga cho ujetiga ca yico uécharique ica. Que yichajópo yógaja uecárique rĩ.

⁹ Enga cho jetiga e yoquiqui tu pitoringai yui ica. Mu Dupade etingaquéo udore ome yoque ica. Gaidi tu gu ujetiga ca yichago yocanguretigai aja yoque, mu yichago yocanguretigai aja Dupade, uje uté u gu uje chiqueta togode.

¹⁰ Mu Dupade gãreque yoque ica iji yocajnei pocaninga uje ore chujérase yoque. Enga a adi jé u uté jne iji yocajnéringui pijosipiei jnese jne iji yoquiquei. Enga e yanguretágo Dupade ujetiga jé jno dasocade udore údi jne ome yoque, ujetiga chiqueta yoque gatuaque.

¹¹ Mu átayoja yoque to ujetiga acatecãchoi Dupade ome yoque. Ujetiga jiei uaque ujetiga acatecãchoi Dupade ome yoque, enga a Dupade chatapísaja yoque jne. Enga a jogadi u jne ujetiga jiei ore ujetiga ore chacãre Dupade gai ome icaniratiguédatéi ome yoque.

Páblo chingo detépidi taja ore uje que chicai Corínto

¹² A yingo cuchárigaja uaque jne uje pésu yoquininaquei: u uje que yocagutéraque cho jora ome yoquipesutique cucha gajnarétique. Uje yujucópise yocadode guio iji erámi udé enga que paringaquérique déji yocajéode. Jétapũré uje yugúcoji uacajade. Que yocúringane ate uome garani u yoque go, mu garani u Dupade ome yoque. Chamáñaje ate uome gu uté ome yoque enga ecãraque yocadode enga imanique yógaja yocúringai ayoré uome.

¹³ Uacamóño uje que cucha uñeque chimesa yocurusãraque bajade ome uaque. Mu choqui guesode ujetiga ajicho ga jĩraque arajáyo quitígo ome uaque. Enga yajéode jé upúsu ujetiga arajayopise quigode jnese.

¹⁴ Yiraja uje e uacarajáyo yocurusarane udore quigode ujade. Mu yigaidi urásu ujetiga arajayopise quigode jnese, enga uacarasicho uágome yu. Enga ujetiga Yocangarádejnai di jne enga yoquirasitígadatéode déji yógome ñane jne iji uté iquei.

¹⁵ Yangureta yurusarane udore diríca ujetiga unere yi ome uaque. Jecute yigaidi u ujetiga yisape uaque bajaque aja yajesui. Enga yipésabu uacaninaquérigo to, adi u yiríringa baja casica uje yipésu uacaninaquei ica.

¹⁶ Uje yicáji Macedónia diríca enga yajéode u ujetiga yise uaque bajaque. Ga yajniapórase jne rĩ enga yisáporase uaque jne rĩ. Jecute yanguretarase uágome yi ujetiga átayorásaja cuchárigo aja yu ome yiqui punire Judéa yui.

¹⁷ Jé ca ajoso ati cachi yurúo yuruode udore diríca uje que yiji yáyipiedie quigode. Enga ca ajoso ati yo jnanione udore ore rĩ uje que ore changureta Dupade. Uje jĩraque ore chĩro dáyipiedie quigode iji gu.

¹⁸ Mu Dupade u uje chiraja uje ũré yoque diríca. Enga chiraja to uje que cachi yocurúo yocuruode udore ome uaque ujetiga yico uaque.

¹⁹ Uacamóño uje yijorane Silváno, Timotéo uyoque yatatago Dupade abi Crísto Jesús adode ome uaque nanique. Enga yocajnai jé u Jesucrísto uté, uje que uté áyipieraque noña gotique to. Enga que urúrique toja gotique rĩ.

²⁰ Uacarajáyo uje Dupade chichaga dáyipiedie aja ayoréode nanique, mu áyipiedie jnese imaningóri u abi Jesucrísto. Jecute yisígo Dupade gai ga yojnijo: "Amén, ũrepise uje báyipiedie imaningóri tu Jesucrísto uté."

²¹ Dupade uté u uje imanique yógaja yocanguretigai ome Jesucrísto enga etoque yóguiji. Enga uté u to uje chicha dajmainie aja yoquibai ujetiga yicoi iroquéode.

²² Enga uté e urusãraque yoque. Enga e ajopie dajopié Espíritu Sánto aja yoque ujetiga ca potigayaquérique déji yoque ome ojningárique cucha.

²³ Que yise uaque iji Corínto gu uje cachi yinguíra pujnusiétigarigo aja uaque. Enga Dupade chiraja uje jé ũrepise yu ome udore. Mu ujetiga taque yu ga jé arec ujetiga Dupade chujé yu.

²⁴ Que yipótago ujetiga yipéco uacanguretigai unerotiguérique ome uaque. Chamáñaje yirajágo uje uacanguretigai etoque gu iji Dupade. Jé basa yoquigaidi tu ujetiga yátagoja uaque enga uacaninaquéode quérã to iji Dupade adode.