1 Timotéo 6 - Dupade Uruode

¹ Pirógode, ayoré pisagode ore gajnepídi u ujetiga ore tangaripísi darósorone, dasasórone ore. Ore gaidi tu gu ujetiga jnanione chimo ore ate omone udore enga ca ore dojnóngaja Dupade, enga ca ore dojnóngapója yocacajnaquéode rĩ.

² Jé socaseti ayoré pisagode uñane isasónique changureta Jesús to. Jé ca udore ore doi enga ore cha tangári dasasṍri uté. Mu ore tangaripísi gaté. Chamáñaje ore ujo Jesús anguresõre uté gu. Enga cucha ueradi upúsu ujetiga yijnórango yocujode Jesús anguresórone enga yocujode Jesús anguresórone ore chagutíñame yoque. Be enga acate ore ome cuchade udore enga opise ore quique gatuaque.

Dupade anguresórone uyoque u uje ataguipísode u yoque iji erámi uné

³ Obiréjnapise uje dicotárechoquí jnanione udore ore jnese uje ore chacate darasade ome dacajnaqué tágode, uje pacajnaquéode udore que cunguésõri Yocangarádejnai Jesucrísto acajnaqué uréone gotique, enga unejángome yoquigaidode Dupade acho.

⁴ Enga pacadisórone udore que ore chirajapise cuchárique go. Mu ore áyipie gajnarénguenie jno ore údi aja pibotaqué bisidégode ome puruode quitígo. Jecute ore ududisórone pota sué ñane gáyode to ome dabotaquéode enga ore charatáyime cuchade ome ñane, ore dojnóngapo aja ñane rĩ, enga ore chotigase ñane to rĩ. Enga diga ore chajuque ñane ajéode gatuaque.

⁵ Jecute que ore ibotaquéode eruénique cuse ome dojode ayoréo. Chamáñaje ore áyipiedie gajnarénguei gu. Jecute que ore chirajápo cucha uréone iji cucha tágode ujáningo. Chiese ore gaidode u Dupade adode, mu ore gaidi tupúsu dáringárique ayoré ataque. Jecute ajusípise beo ome jnanione ore jnese uje ore adode u udore. Enga angara baquigode ome ore.

⁶ Que potigayaquérique déji uje ayoré ataguipísode u Dupade adode gaisórone. Mu que quigode u ujeta ugúcharã́que ore, mu qui tu uje ore nína rángome daríjogonórone cucha: ujetiga jiei, jeoga garósi gajnéone cucha, mu jé irasique re ome.

⁷ Jé ũré uje yacágoja erámi tuné nanique iji taningai enga que yijnángo yocugúcharigaja guetique. Adi jé upo rĩ, ujetiga yicopóji erámi tuné rĩ, enga a ca yijnójo cuchárique.

⁸ Jecute ujetiga yoquibosode cuse, jé aja ujetiga yoquiguidedie cuse iji erámi tuné, enga yicoi enga yinínango yógome udore.

⁹ Mu udore ore uje ore pota dáringane ayoré ugúcharã́cho, enga que ore chajire gaté ome Satanás aringaquéode. Enga ore ipotiguéode ome cucha bisidégode, cucha gajnaréngone ore iji erámi tuné jno ore údi aja pisijnaringuéone. Enga e que toque guetique ome ore, mu ore quique obiréjnai tu Dupade ujuyaquédatéi.

¹⁰ Yirajágo uje pisijnaringué ponáyone jnese ore ero tu pláta pijnoranie. Jecute pláta docoidedie e jno yocuñane údi enga ore chicai quedéjnane ome Dupade adode enga ore anguretigai chicapísiji jnumi. Jecute cucha dacate gajnaréngone yore ore gai, enga e que ore chirajapise dasocáringome raque.

Páblo chingo yoquisocáringome yoque ujetiga yejnángo yógaja yocajnéone Dupade iroquéo

¹¹ Mu Dupade iroi tu ua, jecute etaque pisoca gajnaréngone udore jnese. Enga bagaidi u báringárique ujñapetaque ome Dupade. Jecute be Dupade adode gatuaque; anguretápo Dupade gatuaque rĩ. Enga ajnorapise Dupade to. Enga adota ua ome bajnéone cucha dacacho jnese, enga paraguipise ua ome bojode ayoréo ore jnese rĩ.

¹² Cho ujetiga agúsiji pigajñúraque gai enga pucuecaringué eyúgojmai déji baquei iji bagajñua eruei. Jecute ejna ua aja banguretigai ome Dupade, chamáñaje pucuecaringué eyúgojmai déji baquei gu. Enga Dupade ajegaite ua nanique gu udore uje bango banguretigai aja ore nanique iji taningai. Enga jiei ore nanique uje ore chudute baruode udore.

¹³ Yurúo unojo ome ua iji Dupade iquei uje guẽrate pucuecaringuei tome cuchade jnese. Jé iji Jesucrísto iquei rĩ uje chatata dáringai eduguéjna cuchape ome eduguéjnai Póncio Piláto to nanique enga que chagutu re ome.

¹⁴ Enga yuruode u ujetiga apésupúsu yojningane cucha jnese, enga jé ca écãre udore uñeque quitique. Enga a ca diquiyaque bayoguérique jne jé aja deréjnai uté ujetiga Yocangarádejnai Jesucrísto diapo jne rĩ.

¹⁵ Ujetiga chise Dupade ojningai dire uté, enga a chiroque Jesucrísto aja yoque. Chamáñaje Dupa ugurui u Dupade gu, enga pininaquei guẽrasṍri tu Dupa ujopíerãi tuté rĩ. Eduguéjna cuchape to enga sué eduguéjnane gáyode jnese iji erámi tuné. Pangarádejna to enga sué pangarádejnane jnese gáyode to rĩ iji erámi údode.

¹⁶ Gusu Yoquidupade uté u uje que chimo pitoringai ome re. Enga déji dírecaringué cuchábi ajei, jecute que toque ujetiga gosi doi enga chirõre jogadi uté. Enga que ayorérique dépoji rĩ ujetiga chimo Dupade ome dedodie nanique, enga a jé ate udore jne iji deréjnane jnese uje a ca toque jne ome ayorérique ujetiga chimópise Dupade ome dedodie. Uté gajnei tu ujetiga picotaque ome uyoque jnese, enga ujopiédaté a ca eruénique cuse jne iji deréjnane jnese. Amén.

¹⁷ O ugucharane ore quique ujetiga ca ore cho dicotare iji re. Enga jé ca ore áyipieraque chejna raja dagúchade udore. Bamo uje cuchade unojo iji erámi tuné jĩrique íjnoque gu. Mu ueradi tu ujetiga ore changureta Dupa uecai. Dupa uecai uté u gu uje chisi ome cucha íbojnane ome yoque iji erámi tuné ujetiga yagutíñangome.

¹⁸ Enga angome ore ujetiga ore pésu cucha arégode gatuaque. Enga ca ore chajire re ome dacaniratiguéode uje ore chajuguína dagúchade ome dojode ayoréo.

¹⁹ Ujetiga ore pésu udore enga a cho ujetiga e ore chamáta dagúchade iji gaté to. Enga yirajágo uje que cuchárique chósi ti iji cuchárique iji gaté. Enga a dimáneo ore gajnetígo cucha ome ore jne ujetiga diga ore chise pucuecaringuepísi iji gaté.

Páblo cho Timotéo quique iji darusarane eruei

²⁰ Timotéo á, ajusípise beo ome báringai Dupade iroque. Chamáñaje Dupade changuretapise ua ome udore nanique gu. Enga jé ca áta ua aja pibotaquérique uje cachi cucha bisidécho ore ibotaquéode gu. Chiese irajataque ore ome dojode ayoréo, mu cachi ore irajatigade udore garani upúsu erámi tuné arĩ́e.

²¹ Mu uñane uje ore gaidode u pirajatíga jnutiminórone udore, e ore cho caru iji danguretigai ome Jesucrísto. Yajéode u ome ua ujetiga Dupade chatapísaja ua gatuaque. Amén.