1 Timotéo 5 - Dupade Uruode

Páblo chacate yógome yoquisocárique ome yocujode Dupade anguresóño

¹ Jé ca barúrique dosója jnanírique, mu anejé jnanione údode. Enga cho jetiga bai u jnani tuté gosi. Adi jé u to ome bojode jnacáño. Ca barúrique dosója ore to, mu cho jetiga besaque ore.

² Ajusípise chequedíe guio to, enga cho jetiga baté ore. Enga ajusípise báyipiedie quigode guio ome gapudíe ore to enga cho jetiga bẽro ore jnese.

³ Ajusípise chequé ecadie guio to uje que ore chimo dagutíyamátique.

⁴ Mu ujetiga chequé ecáraque ujnacáningo cuse, jeoga ájnatigo cuse enga ujnacáningo, jeoga ájnatigo ore gajnei tu ujetiga ore susípise udire guio. Chamáñaje ore jogasu udire ore gu. Enga ore datedie, jé aja ore dacódedie ore imanique ore aja gaté nanique, jecute jé tiógara ujetiga ore ujnacáningo, ore ájnamone ore chijnóra ore enga ore chosõre ore to ome cuchade. Uerate pisocade udore gu arĩ́e, enga Dupade irasicho.

⁵ Mu ujetiga ca chequé ecárigui iguiotígo cus ujetiga ore cháta cuchárigo aja ore, enga udire ore urásu ujetiga Dupade anguresórone uyoque yosṍco ore ome cuchade. Udire ore u gu uje ore angureni tupúsu Dupade ome cuchade yúode, enga ore catecã́ri Dupade gatuaque iji dirode, dejade ore jnese.

⁶ Mu chequé ecárigui ujetiga ore gaidode u erámi jogosórone cucha, enga gajnareque ore adode. Uje ecápise ore iji erámi tuné uje ore jno dagaidode udore údi, mu Dupade e cho ayoré toguedie iji ore uje que ore chajire Dupade yúrique go.

⁷ Jecute opise Dupade anguresórone ore quique jnese ome cuchade udore ujetiga uerate ore adode, enga ca diquiyaque ore iyoguérique.

⁸ Chamáñaje ujetiga gosi ca chajire daguiotique yúrique, cuchiyi tupúsu dajogasui yúrique, enga cho jetiga ca changuretapise Dupade gotique. Enga gajnarenguipise uté adode enga sué Dupade guetesórone ore ate gajnaréngone gáyode.

⁹ Ujetiga purusãraque chequé ecadie íode enga jé ca átayo chequé ecáraque ujetiga cáma gatapise uaté goto. Gusu uacátapiedie urásu chequé ecárigui ujetiga ore guejnanie siqueré chajna 60 años enga ore amaníngo chojmára nanique.

¹⁰ Yojninganie u udire ore uje ujnomerẽ́ ore ome ore átegoningáne: udire ore uje que ore chuseque dabode, udire ore rĩ uje ore chijna ayoré díode aja daguíjnane, jé u udire ore rĩ uje que ore chuseque dojode Dupade anguresóño, jeoga ore chátaja darása ejnaretade, jeoga ore pésu dapesutígo cucha ueracho uñéngo to rĩ.

¹¹ Mu ca arúsãcho chequé eca gapudíe íode to. Chamáñaje gapu ore gu, enga a jĩrique ore potapo ore chisa damaníngo rĩ. Enga e que cucha Crísto iroquéode ome ore gotique.

¹² Enga gajnareque ujetiga chequé ecáraque doi enga chingo raja Dupade ujetiga doi iroquéode, mu quigade enga cha.

¹³ Ujetiga ore diguiji guidai údode bisideque, enga diga a ore cutapome dasagode cucha rĩ. Mu que gusu uje ore cuta, mu a jutaréguechoquí ore to rĩ, enga a ca ore susípise daruode guio gotique jne.

¹⁴ Jecute yajéode u ujetiga chequé eca gapudíe ore chisapo damaníngo rĩ, ujetiga ore pésu datígo, enga ore chirote ore iji daguíjnane. Enga ca ore pésu cucha gajnarétique. Enga a ca Dupade uruode guetesórone dojnóngaja uyoque gu yocujodie Dupade anguresõre chequé eca ore.

¹⁵ Uacamóño uje chequé eca gapudíe uñanie e ore cha Dupade adode, enga Satanás e jno ore údi.

¹⁶ Ujetiga Dupade anguresónique iguiotóraque cuse uje chequé eca, enga uté gosi gajnei tu ujetiga suse daguioto uaté guio. Gaidi u gu ujetiga dojode Dupade anguresóño ore chedu chequé ecadie uñanie uje que ore chimo dagutíyamátique, enga ore átapiedie u udire gotodie.

¹⁷ Ujetiga Jesús anguresórone angarátique susípise dojode Jesús anguresóño guio iji uacáguedie, enga jé tiógara ujetiga angachopísi uté gosi enga caniranguipise uágome. Cuchiyi tupúsu uacangaránone udore uje ore chedu datatagode Dupade urúo, jeoga dacaditigade ome uaque.

¹⁸ Chamáñaje ore urusarane Dupade urúo déji uje chojninga: "Ca ãrácho chagúi ome aquirájnarique ujetiga chuchíe arroz aja jnumi, uje jé déji databidi tome acasṍri jetiga chijnime arroz adie." Enga Dupade uruode chojningápo rĩ: "Gosi uje doi Dupade iroquéode enga gajnei tu ujetiga pisi uté gosi."

¹⁹ Jé ca angáchoi dara pijnimitígo ome Dupade anguresórone angarátique anciáno ujetiga ca imósoningo ayoré gare, jeoga gadioque.

²⁰ Mu ujetiga jé ũré jetiga Dupade anguresórone angarátique pésu cucha gajnarétique, enga beyoi uté enga oyo quique jnese iji uacágueraque. Enga uacaruode dosója. Uacagaidi u gu ujetiga uñane todo pipojnaquérique yui enga jé ca ore chirate uté aja adode.

²¹ Yurúo unojo ome ua iji Dupade, Yocangarádejnai Jesucrísto, Dupade irógode gaté unirísoño ore iquei jnese: ujetiga jé ejna ua aja yacajnaquéode unojo. Jé ca jĩraque apésu báyipieraque ome gosi úringárique máraque, mu adójnangapísa cuchade bajaque. Enga jé ca angara basocárique ome barásarique jeoga bajõrárique. Mu o ore quique jnese.

²² Ca jĩrique aroque gosi aja Dupade iroquéode. Chamáñaje ujetiga baroi tuté gosi pésu dasijnaringuérique enga jé basijnaringuei urásu to. Chamáñaje que ajiripise adode aja quigode bajaque diríca uje baroque ome Dupade iroquéode gu. Jecute ajusípise badode guio to ujetiga ca piyaque pisijnaringuérique iji ua.

²³ Timotéo á, ujetiga urõso bejnarei tiji bajei enga be enga óji víno ajámatique enga jé ca edu yodipísi ujetiga óji.

²⁴ Obiréjnapise jnanione uñane ipesudode cucha gajnarécho iji deréjnane unojo, uje cáma ore chise deréjnai tuté ujetiga pajirique yocadode aja quigode iji. Jé basa ga a quene pirajaque jnanione uñane isijnaringuéone jne iji diri tuté dirome.

²⁵ Adi jé u udore to ome pátegoningáne. Jĩrique pirajaque uñane ate omone. Mu ujetiga ca pirajaque pátegoningáne uñane míraque, mu a chise dínique to jne ujetiga pirajaque jnese. Uje que toque gu ujetiga pipoguiécho pátegoningáringo iji deréjnane jnese.