1 Timotéo 4 - Dupade Uruode

Pacajnaqué tágode acadisórone ore cha Dupade uruode úringane pangarácho

¹ Dupade Ujopié Espíritu Sánto acajnaquéode choqui guesode ome yoque, uje chojninga: a chise dínique jne ujetiga jnanione uñane a ore cha changureta Dupade uru uréone, uje Dupade uru uréone udore u uje cho yoquiquique ome panguretigai ome Jesucrísto. Enga a udore ore tangaripísi pacajnaqué tátigo jne uje pacajnaquéode udore garani tupúsu Satanás irógode ore.

² Enga a ore tangári jnani urupatáquechoquíode jne uje jnanione udore que ore agutéraque chopo jora rĩ ome ore ipesudode cucha gajnarécho. Enga uje que ore tangárapoi dáyipiedie aquĩraquéode, enga gajnui u ujetiga guebeque dotãripísirique chejna ore áyipiedie ujetiga ca chaquĩ́rapo ore ome cuchárique rĩ.

³ Enga jnanione udore a ore chãraque diyequé pacotedie ome dacaditígo jne. Enga a ore charángapo cucha pibotígo ome ore jne rĩ. Mu Dupade pésu ore garéngone cucha piboso udore nanique gu ujetiga yajo. Jecute uyoque uje yanguretágo Dupade uru uréone, enga yanguretágopo Jesucrísto rĩ, yicoi enga yacãco Dupade gai bajaque ome yoquibosode, enga quigade enga yajo cuchade jnese.

⁴ Yirajágo uje Dupade ipesudode cucha ueracho jnese. Enga ca yicoi enga ca yoco cucha puyáguiji Dupade gueranone cucha pibose. Mu yicoi enga yacãco Dupade gai ome gueranone cucha jnese.

⁵ Chamáñaje ujetiga pujuegate cuchárique iji Dupade uruode, enga gosi doi enga chacãre Dupade gai ome cuchade udore bajaque enga jogadi u uté uje Dupade que chise unerotiguérique to.

Jesucrísto irasique darógode adode uje ore cho darasade quique ome cuchade

⁶ Ujetiga acate bojórigo Dupade anguresóño ome cuchade udore enga a Jesucrísto irasique ua ome bacajnaquérigo jne. Enga cucha omi u to ome Jesucrísto irógode ujetiga ore cho cucha pibotígo iji Dupade uruode, enga ore chejna rángaja panguretigai ome Jesucrísto. Enga jé badode u udore gatuaque to, Timotéo á.

⁷ Mu jé ca acunguésõri ore ojña bisidégode uje cachi udore ore garani u erámi uné. Mu jecucha etingare ua ome Dupade adode gatuaque. Bagaidi u gu ujetiga bajnoraquei ome Dupade quérã.

⁸ Ujetiga gosi chetingare re gatuaque enga chejna raja ujetiga etoque, enga a chise dáringárique etoque jne iji erámi tuné. Jé basa ujetiga gosi chetingare re gatuaque ome Dupade adode enga a chise dáringárique Dupade anguresõre etoque to jne, que gusu iji erámi tuné mu a jé chise Dupade idai to jne ome dáringárique ujñapetaguipise.

⁹ ¡Jé ũrepíso yuruode unojo enga jé tiógarapísa jeta yanguretágo enga yimeseco jnese!

¹⁰ Jecute yejnángo yógaja yoquisagode Dupade urúo. Ujetiga ore dojnóngaja yoque marínga, jé yejnángo yógaja. Chamáñaje yichago yocanguretigai aja Dupa uecai gu enga yanguretágopise ojningane cucha yúode jnese. Erámi unirisórone jnese ore iquetangóri urásu Dupade, mu iquetade upúsu danguresórone uyoque.

¹¹ Yajéode u ujetiga o bojode Dupade anguresõre ore quique ome cuchade unojo enga angome ore ujetiga ore dopísi udore quigode.

¹² Ajusípise badode guio jnese ujetiga ca ore dojnóngaja ua gu báringai jnacare. Mu ujetiga bojode Dupade anguresóño ore chimo bátegoningáne enga diga ore tangári ua gaté, enga ore chacãra raja ua jne ome batígo, barúrigo, jé ome bajnoraquei rĩ. Uje ore chimo uje bedu Crísto iji báyipiedie enga a ore chirate ua aja udore to. Uje ore chimo banguretigai ome Dupade enga a ore changureta Dupade gaté to rĩ. Jé cho ujetiga ore chimo uje bajusípise báyipiedie guio ome chequedíe, gapudíe ore, enga a ore susípise dáyipiedie guio to jne.

¹³ Uje cáma yĩri iji uaque enga ãraráraja Dupade uruode gai gatuaque iji uacáguedie. Enga acate ore ome ore urusarane Dupade urúo quigode, enga o ore quique ujetiga ore jnusi rángome Dupade adode.

¹⁴ Uje Jesús anguresórone ore angaránone ore chicha dajmainie aja babai nanique enga imoi tu uje Dupade ajegaite ua ome daroquéode. Enga jogadi u uté to, uje Dupade chisi ome pirajatigai ome ua ome daroquéode. Jecute ca o cucha bisidéguiji barajatigade udore, mu bangúroméone u udore gatuaque jne uje babé Dupade iroquéode.

¹⁵ Jé be Dupade ojningane unojo cucha, enga a ore chimo ua jne uje que o sebeque ome Dupade adode.

¹⁶ Enga ajuse badode, bacajnaquéode guio jnese. Enga adota ua iji bacajnaquéode. Chamáñaje ujetiga ejna unojo guesi enga a ese báringai piquetaque jne enga a aquetápo bangarásorone to jne rĩ.