1 Timotéo 3 - Dupade Uruode

Páblo cho ore quique ome ore úringáringo anciáno

¹ Jé ũré yu ome unojo: ujetiga gosi potapísa dáringárique Dupade anguresórone angarate, enga uerate uté gosi áyipiedie ome re.

² Mu ueradi tu ome Dupade anguresórone angarátique ujetiga ca dara quedéjnarique tagu ome ipesutique cucha gajnareque. Enga acotéraque jé chojmára. Uerate to ujetiga susípise dadode guio enga áyipierãque, enga gaidi tu ujetiga urásarigo ore tangári. Enga doi ga chijna ayoré dírigo aja daguíjnai gatuaque. Enga chóji gaté ome darásarigo ujetiga chacate ore ome Dupade uruode.

³ Mu jé ca áyipieraque déji yote pioi úringárique pijote. Ca áyipieraque dépoji pajei dotáningárique, pocaningárique ore rĩ, mu paraque enga ucuei tu pajesereringai gatuaque. Enga ca urénga áyipieraque déji pláta docoidéraque.

⁴ Omi tu ome uté gosi rĩ ujetiga susípise dacoté, dabode ore guio enga chacate ore ujetiga ore tangári, enga ore susípise dadode guio to.

⁵ Mu ujetiga Dupade anguresórone angarátique ca chiraja dasocárique ome dacoté, dabode ore enga a jé upome darodigode Dupade anguresóño ore rĩ. A ca chiraja dasocáringome udore ore to.

⁶ Jé ca oyo uacangaráni iji gosi ujetiga quene changureta Dupade. Socaseti chajni aja dáringárique ayoré dicotare, enga a cho Satanás jne uje dicotare enga Dupade cho dajuñame nanique.

⁷ Cucha omi tu to ujetiga uerate uacangarátique ujnomérique iji Dupade anguresórojmane ujade. Ujetiga gajnareque ujnomérique diga ore dojnóngaja uté gosi enga quigade enga cho caru iji danguretigai, enga Satanás sué gai enga jno údi aja pisijnaringuéone.

Páblo cho quique ore ome diáconone isocade

⁸ Adi jé u to ome diáconone. Omi tu to ujetiga uerate ore adode enga ũrepise ore gatuaque. Jé ca ore áyipieraque déji yote pioi úringárique pijote, enga jé ca ore áyipieraque dépoji pláta docoidé bisidégueraque rĩ.

⁹ Enga ore suse dadode guio enga ore áyipiedie ca pésu ore ejóporinguéone. Mu omi tu ujetiga ore áyipiedie dépisiji Dupade uruode úringane ũréo uje Dupade chingo udore quigode ome yoque nanique.

¹⁰ Mu etingacho jnanione udore bajaque ujetiga jé ũrepise ore ome daruode, enga jé u ujetiga atochoi ore ome cuchade iji uacáguedie.

¹¹ Adi jé u to ome chequedíe, uacatocaidode acotérigui, ujetiga ore susípise dadode guio to, enga jé ca ore cho dajutareque. Mu ũrepise ore, enga ore chidota re ome cuchade ujetiga ore ujode ayoré irasé ore to.

¹² Adi jé u to ome uacatocaidode diácono ujetiga ore acotéraque chojmára. Enga ore susípise dacoté, dabode ore guio ujetiga uerate ore adode to enga ore tangári ore.

¹³ Ujetiga uacatocaitique pésupúsu cuchade aja quigode enga jogadi tu uje ujode Dupade anguresóño ore tangaripísi. Enga a ca chagutu re ome uje chatata danguretigai ome Jesucrísto.

Cuchadatei u Dupade adode ome yoque

¹⁴ Yajéode u ujetiga jĩrique yibágui ua, mu jé yurúsãre yurusarane ome ua.

¹⁵ Ujetiga ca yise ua míraque marínga, a ajire yurusarane unojo enga a araja jne pisoca omone quigode ome Dupade jogasúode uyoque ujetiga yipéco aja quigode. Yojningai u Dupa uecai anguresórone uyoque. Uyoque u gu uje yanguretágo Dupade uru uréone enga yĩraraco gai iji erámi tuné.

¹⁶ Jé ũrepise yu uje cuchadatei u Dupade adode ome erámi unirisórone uyoque uje yanguretágo. Mu que pirajaque udore quigode ome ore jnese go. Mu quiguipísi tu unojo: Dupade pésu re enga ayoré to nanique enga chingo raja erámi unirisórone. Ujopié Espíritu Sánto chajo raja uje ũrepise uté. Dupade irógode gaté unirísoño ore chimópise adode to nanique. Ujnomei chubu erámi enga erámi unirisórone iji erámi údode ore changureta. Mu diga poite uté aja gatajnoquei enga e pijógapo cutejmai ingoningájna rĩ.