1 Timotéo 2 - Dupade Uruode

Páblo chacate Timotéo ome pisocárigo jeta ore catecã́ri Dupade

¹ Yacajnaqué bajade u ujetiga acatecãchoi Dupade ome uacojode ayoréo, enga acãcho gai ome ore jnese. Enga ajóchayo Dupade ajei údi ome ore uje uacatáyoi Dupade ome ore imeserane cucha to.

² Acatecãchoi Dupade to ome peduguéjnane, dacasutedie ore jnese rĩ ujetiga yocajéode cho sere ome ñane enga tijórigo cho pujnúringome yógome ñane rĩ. Enga yicoi enga yisíngome yógome Dupade, enga yujucópise yocadode guio ujetiga yocujode ayoréo tangári yoque to.

³ Ueracho pisocade unojo enga yoquiquetangóri Dupade irasicho.

⁴ Uje Dupade uté pota gu ujetiga erámi unirisórone ore jnese chise dáringane piquetaque. Enga pota to ujetiga ore chiraja uru uréone quigode jnese to rĩ.

⁵ Que Dupa uñeque cuse. Gusu Dupápisi. Enga que putocaitique uñeque cuse to rĩ ujetiga jno yocúdi aja Dupade ujetiga Dupade, uyoque yocajéode cho sere ome ñane. Gusu yocujoi erámi unirísõre Jesucrísto u ujetiga yutocoi ome yoque.

⁶ Jesucrísto tẽra re ome erámi unirisórone uyoque jnese nanique gu ujetiga cho yoquisijnaringuéone oré. Gaidi u gu ujetiga chiqueta yoque. Enga cuchade udore tocade jnese iji Dupade ojningai dire nanique ujetiga yirajágo Dupade áyipie omenie quigode.

⁷ Enga Dupade ajegaite yu ome yúringai Crísto apóstol to enga chiroque yu aja purása quedéjnane to ujetiga yacate ore ome Dupade uru uréone udore ujetiga ore changureta Jesucrísto to. Enga jé ũrepise yu ome udore enga que yo yurupatáringa.

⁸ Jecute yajéode u ujetiga Dupade anguresórone jnanío iji erámi jnese ore catecã́ri Dupade. Enga ore chejna daguesi ome dacatecãraitigade ujetiga ca cucha gajnarétique déji ore ajéode, enga ujetiga icha ore ajéode ome pibotaquéode, pajei dotáningane ore jnese.

⁹ Yajéode u to ome chequedíe, gapudíe ore rĩ ujetiga ca ore áyipiedie chejna rángaja dáringanie chequé ueradei, jeoga daguidé ueradéraque, dajnápeque ueratígo, jeoga ca ore chariguétapise dabánique. Mu omi tu ujeta ore cho chequé iji raque.

¹⁰ Mu omi tu ujetiga ore atígo omío jnese. Enga ore cho dojodie chequei uje ore chisi rágome Dupade nanique.

¹¹ Omi tupo rĩ ujetiga chequedíe tangári dacadisórone, enga ore cho paráguiji ore acajnaquéode údode. Ore gajnei tu gu ujetiga parague ore enga ca ore sosi rágaja gaté.

¹² Enga que yujuéga ujetiga chequedíe chacate ore iji yocuáguedie, enga que yujuéga rĩ ujetiga ore sué jnanione gai. Mu omi tu ujetiga ore chopise paraque.

¹³ Uje bamo uje Dupade pésu jnani Adán bajaque. Quigade enga pésu chequé Éva.

¹⁴ Bamo to uje que Satanás ãrai tu Adán go. Mu Satanás ãra tu chequé Éva. Enga unojo quigade u uje pisijnaringuéone chisa chequé Éva.

¹⁵ Mu Dupade jé ujuya chequedíe nanique ujetiga ore chejnáreque dabode achamitígo jne. E mu Dupade a chiqueta ore to jne, ujetiga ore changuretapise Dupade enga ore chedu Dupade iji dajéode. Jé u to ujetiga ore susípise dadode guio enga ore chijnóra dojode ayoréo to.