1 Timotéo 1 - Dupade Uruode

¹ Páblo uyu enga yurúsãre yurusarane ome ua, Timotéo á. Bamo uje Jesucrísto iroguipísode apóstol uñai u yu. Chamáñaje yoquiquetangóri Dupade, yocanguretigai gajnesṍri Jesucrísto ore ajéode u unojo gu ome yu.

² Bamo uje yopise yabi iji ua nanique uje yimanique ua aja panguretigai ome Jesucrísto. Enga yajéode e u ujetiga Yocai Dupade, Yocangarádejnai Jesucrísto ore chátaja ua, enga ore chosõre ua enga ore chisi ome pajesereringai ome ua.

Páblo chingome Timotéo ujetiga ca ore tangári jnani táquechoquíode iji dajade

³ Yijócha bajei údi ica ujetiga ayáji ore idai Éfeso uje qué yicáji ore uniri Macedónia. Yaquĩ́ra ua iji gu ujetiga etaque jnanione udore ore ome ore acajnaquéode uje que ũréo go. Enga jé bo baquĩraquéode udore údi ome ore jne iji bayaridi Éfeso uté.

⁴ Enga aquĩ́ra ore ome ore acajnaqué bisidégode ome yocai cásodicáite ojña bisidégode, jé ome ore ibotaquéode ome jnani bajade ore íode rĩ. Uje que toc ujetiga ore chise dabotaquéode udore eruénique gu. Enga que cuchárique tṍraji udore ome yoque. Uje pibotaquéode udore que chatapísaja yoque ujetiga yirajágo Dupade áyipiedie quigode ome yoque. Mu panguretigai u uje chátaja yoque.

⁵ Yiroque ua aja udore gu ujetiga pijnoraquei dépoji uyoque ome ñane rĩ. Ujetiga yoquijnoraquéode udore garani u yocáyipie ichadie ome ñane. U to ujetiga yujuco yocadode guio enga yocáyipiedie ca pésu yoquejóporinguérique rĩ. Ujetiga yocanguretigai déji yoque enga que taque yoque. Jogadi u uté gu ujetiga yoquijnoraquei quítequiguíji yocuéchai ome ñane.

⁶ Mu jnanione uñane e ore cho caru iji danguretigai ome Jesucrísto, enga e ore chejna rángaja pibotaqué bisidégode gatuaque.

⁷ Ore pota raque ome dáringane pacadisõre, ujetiga ore cho quique dojode ayoréo ome Dupade adode. Enga que ore chagutu rágome dacajnaquéode. Mu que ore chirajapise cucha uréone quigode.

⁸ E yirajágo Moisés urusarane úringane cucha pagutíyabácho. Mu cucha amiri tu ujetiga yirajágo ujetiga yajome udore quigode jnese.

⁹ Uje que Moisés churúsãre Dupade guetégode cucha ome ayoré ate ujñapetade go. Mu purusãracho ome sijnángone ore. Jé ome Dupade guetesórone ore rĩ uje ore tagu Dupade uruode aja. Jé ome angoninguite parigode, ome pisijnaringuéone ipesungórone ore rĩ uje ore chetaque Dupade adode, uruode ore. Jé u to ome ore uje ore chetaque dayode enga ore pota chutígome ore. Jé u to ome ayoré yungórone ore rĩ.

¹⁰ Jé u ome udore ore to uje ore tungarája gapu quedéjnanie, jé u ome chequedíe to rĩ uje ore moji jnani quedéjnane gari. Jé u to ome jnanione ore uje ore tungarája dojode jnanío. Jé upo ome ayoré isangórone ore rĩ uje ore pógu dasagode dojode ayoréo, jé aja ujetiga urasade cho oré isangórone udore. Jé upo ome urupatáquechoquíode, dara ijnimisórone ore jnese to rĩ. Jé upo rĩ ome cucha dacate gajnaréngone jnese uje unejángome pacajnaqué uréone quigode.

¹¹ Enga yojningai pacajnaqué ũréo unojo jé upúsu Pujnomé Ueradi uté quigode. Uje Yoquidupa Ingoningarãi uté áyipie omenie quique ueradéjnane u uje chuchẽ́riji guesode enga chutṍri yu ujetiga yiji údi aja erámi.

Páblo chacãre Dupade gai ome icaniratiguei

¹² Yacaranguipise ome Yocangarádejnai Jesucrísto uje chisi ome petotiguei ome yu ome unojo. Yacaranguipise to uje cho daroque ujñapetáguiji yu to enga chiroque yu aja daroquéode nanique.

¹³ Gajnarenguipise yadode ome Jesús nanique marínga, jé ajegaite yu ome daroquéode. Gajnareque yuruode ome nanique enga gajnareque yadode ome anguresórone to nanique uje yumajo ore. Mu Dupade chosõre yu. Que yiraja cuchárique nanique gu uje cáma yangureta Jesús nanique.

¹⁴ Jecute cuchadatépise ome yu Yocangarádejnai cutejmai icaniratigué uje chingongarája yu. Enga oidi tupo panguretigai, pijnoraquei ore ome yu rĩ, uje yocajneque udojo uje yitojmárangoji Jesucrísto.

¹⁵ Jé ũrepíso yuruode unojo enga jé tiógarapísa jeta yanguretágo enga yimeseco jnese: uje Jesucrísto chise jnumi nanique ujetiga chiqueta sijnángone ore ome ore ate gajnaréngone. Enga pisijnaringuéone ipesungore obiréjnai tu yu ome ore jnese nanique.

¹⁶ Mu jé ũré yu uje Dupade chosõripise yu nanique. Gaidi u gu ujetiga Jesucrísto chejna dáringai piquetangore aja yu enga chiqueta yu to, uje yujnué ore gáyode jnese nanique ome yúringai sijnanguipise. Enga a uyu urásu ujetiga pisijnaringuéone ipesungórone uñane ore chirate yu aja Dupade úringai pangurete ujetiga pucuecaringué eyúgojmai déji ore to.

¹⁷ Jecute yajéode u ujetiga yicoi ga yicotágo Dupa ugurui iji deréjnane jnese ome úringai eduguéjna eyúgojma, ome úringai togójma, ome úringai pimojma, ome úringai áyipierã́quedaté rĩ. ¡Qui jé upúsu! ¡Amén!

¹⁸ Yabi á, Timotéo á, yijíome yiroquéode udore iji bari gu ujetiga apésupúsu aja quigode uje babé Dupade iroquéode, uje bajnui tu jõcaratáguebei gu uje chirajapise pocaningane adode. Yiroquéode udore quigode u ujetiga anguretapise Dupade enga upo rĩ ujetiga ca bagutéraque cho jora ome bapesutique cucha gajnareque. Enga ajnusinapísa Dupade uruode atatasórone ore uruode quigode uje ore chingo ua aja Dupade nanique.

¹⁹ Jnanione uñane ore áyipiedie chaquĩ́ra ore ome dapesute gajnaréngone iji taningai, mu que ore tangári dáyipiedie quigode ica. Jecute ore ipesute gajnaréngone chĩropise ore anguretigade.

²⁰ Adi jé u to ome Himenéo, Alejándro ore. Jecute yisíome ore ome Satanás ujetiga uté doi dasocáringome ore jne. Enga a ore chiraja jne uje que pidojnóngamáte Dupade go.