1 Samuel 8 - Dupade Uruode

Israélgosode ore chutai deduguéjna cuchátique iji dangaráni Samuel nanique

¹ Uje jé choquíjna Samuel nanique ga pésu dabode ore úringáringo eduguéjna jeta ore chajire darasade israélgoso ore adode aja quigode to.

² Samuel ape bajai uje i tu Joel, jé aja ape bajai quigaminóri Abías ore chajire cuchade aja quigode iji ore idai Beerséba.

³ Mu Samuel ujnacarode que ore cho dai gotique ome úringai ũré gotique. Ga que ũré ore gotique ome dadode. Ga ore pésu jeta ore chutai darasade ore iplátadie ome raque enga jé basa ga jĩraque ore pógu udore isoca gajnaréngone nanique uje ore cho ore oré gu.

^4-5 Mu chise diri uje israélgosode ore dayode jnese ore chimáta rágaja ñane nanique jetiga ore tibágui Samuel iji idai Ramá. Uje ore chise ore idai uté ga ore catecã́ri Samuel enga ore chojningame: "E choquíjna ua ga que yipótago jeta pitoringai sué babai jne enga babode ore chácariji bajogadi uje que ore cho bátegoningáne gu uje bagaidi u jeta areque yóguiji yocuniri udé údode jnese. Uje cáma atoi ga apésu israélgosode yoqueduguéjnarique jeta déji yoque, ga yocopise yoqueduguéjnai iji uté jnese iji yoquidáyode udojo údode. Enga a jé yocopise purása ponáyone ore to jne rĩ iji erámi údode, uje ore eduguéjna cuchábode cuse iji ore unirone jnese."

⁶ Jé ũré uje Samuel que chise darasade ore áyipiedie unétique gotique uje que déji pajénique gu jeta israélgosode eduguéjna cuchátique cuse. Enga jé uje Samuel catecã́ri Pangarádejnai Dupade ga chingo jeta jé arégome Dupade uté ujetiga israélgosode eduguéjna cuchátique cuse to.

⁷ Ga Pangarádejnai Dupade chojningame Samuel: "Be ga angári barasade ga jé ore doi dajequitígo iji daniri tudé. Ca ajos eti ore ichietabáidi tu ua, mu ore ichietabáidi u yu. Enga que ore chise yunétique jeta ore cho deduguéjna cuchábi iji yu.

⁸ Iji diri uté nanique uje yijnime israélgosode iji egíptogosode jmainie, jé aja deréjnane unojo to, ga jé ore isoca uje ore chetaque yu ome raque, ga adi jé u uje ore chetaque ua to iji deréjnai tudé. Chamáñaje jĩraque ore cha yadode nanique enga ore doi dupa quedéjnane adode gatuaque to nanique."

⁹ Dupade chojningápome Samuel rĩ: "Jecute be ga angári barasade enga apésu ore eduguéjna cuchátique ome ore. Mu o barasade ore quique bajaque enga ósi tome ore: "Ajusopise uaqueo ome uaqueduguéjna cuchábi uté gosi jne, uje eduguéjna cuchábode ore gajnei tu gu jeta ore doi dajegaitígo ome darásarigo. Enga a uté gosi chijna cutejmai damenuringuejna ome uaque jne, enga a jé ca toque jeta ca gosi doi deduguéjna cuchábi uté uru quitígo ome re jne."

¹⁰ Enga Samuel chatata Pangarádejnai Dupade uru quigode gaté ome darasade ore jnese uje ore chutai deduguéjna cuchátiguiji Samuel.

¹¹ Samuel chojninga: –A israélgosode uaqueduguéjna cuchátique déji jne enga a isocade u udojo ome uaque jne iji uacaniri tudé. A chutai uacajnacarode jne ome pocaningane yúode enga a ca toc jeta uacuñeque chetaque uaqueduguéjna cuchábi uté uru quitígo. A uacabode uñéngo choru uté gachidode guebéquedatéo jne aja pocaningane yúode, jé basa ga uñane a choru buricade jne, jé uñane diguiji jnumi aja dagaidi pocaninga yui. Jé basa ga uñane a ore chácariji eduguéjna cuchábi uté dosadode jne jeta ore chajire yui ome cuchade.

¹² A uté pésu uacajnacarode uñéngo úringáringui pasuté to jne ga a ore chiroque dojórigo jnacare gaté jne. Ga dacasutépise uñanie ga ore gajnéone soldácho a chise 1.000 jne, jé basa uñane gajnéone soldácho a chise 50 jne, enga ore jõráringo jnacáño a ore chopise dasutedie iji ore jne. Jé basa ga a uaqueduguéjna cuchábi chiroque uacuñéngo aja dajutícabia jeta uacuñéngo tacãríji uté jutícabia. Jé basa ga a uté chiroque uacuñéngo aja põrachade úringáringo pipesucho jne ome pocaningai gaisórone ore jeta ore chijna udore. Jé basa ga a uacuñéngo pésu eduguéjna uté gachidode guebéquedatéo ome pocaningane yúode.

¹³ Enga a uté chirócapo uacarodie to jne rĩ iji daguíjna cuchábi ajei jeta uñanie pésu arurégode ome uté, jeoga uñanie ore chãrei eduguéjnai uté posode. Jé basa uñanie ore pésu cucha ai unérone ome uté.

¹⁴ A eduguéjna cuchábi uté chimo uacajnéone jnumi omitigade jne uje uacacade cucha potipícho ga a chutai jne iji uacari jeta cho dajnéngu udore, jé aja uacacárigui úvai, jé aja uacacadie pori uje ueradé udire adie ome aceite. Enga a chisi ome dojórigo eduguéjna ga ore cho dajnéngu udore to.

¹⁵ Eduguéjna cuchábi a chisecãru uacacade cucha udore, uacanucódedie jne, ga a uacanucódedie chejna yijmanáyone jne ga a gajnei garamia jogoto gatuaque iji siqueredie jnese. Ga a udore u jne jetiga eduguéjna cuchábi uté chimate dojode eduguéjna ore ome, jé aja iroguipísode uñane.

¹⁶ Eduguéjnai tuté a chimopo uacarótique jne jetiga adode ueracho ga a chijna iji uacari jne, ga cho daróguiji jne uacaroi uté, jé aja uacaróguedie, jé aja uacachidode cuchiso ore to. Enga a chijnapo uacachidode buey omone jne rĩ, jeta ore chijname dasatígo cucha pisacho, jé aja uacachidode burica quedéjnamio.

¹⁷ Jé adi u ome uacachidode cucha uñane jnese, uje eduguéjnai uté a chisecãru jne enga gajnei garamia jogoto gatuaque. Que gusu uacarógode jeta asíyo ore ome, mu a asíyo uágome uaqueduguéjna cuchábi to jne ujetiga dimane uágome iroquéode yúode to.

¹⁸ A chise deréjnarique jne jeta arañíño jórogome eduguéjna cuchábi uté josipiedie ome uaque jne ga a ojnicho jóroga jne ome Dupade: "Pangarádejná Dupá, ajnime israélgosode yocasuté uaté iji úringa eduguéjna," mu a jé ca Dupade tangári uacaru quitique jne.–

¹⁹ Mu ayorébui que ore tangári Samuel uru quigode gotique ga ore chojningame: –Que cucha gotique baru quigode udore, uje yipótago yoqueduguéjna cuchátique gu.

²⁰ Yocajéode u jetiga jé yoco purása quedéjnane ore isocade to, uje ore eduguéjna cuchábode déji ore unirone jnese gu, ga ore cho daparagádu udore. Yipótagopísa gu jeta yoqueduguéjna cuchátique déji ga sué yoquibai jnese, ga uté chirota yógome pocaningane ga pésu yocurasade jnacare ore ga uajate ore ome pocaningane yúode.–

²¹ Uje Samuel chudute ore uruode udore ga chatatapo darasade ore uru quigode gaté rĩ ome Pangarádejnai Dupade.

²² Mu Dupade chojningame Samuel: –Angári ore uru quigode ga acué ore eduguéjna cuchátique ome ore.– Enga Samuel chiroque israélgosode ore aja arorade jeta ore chajníja dedáyode ga ore chirote deduguéjna cuchábi yui iji dedáyode udore jnese.