1 Samuel 7 - Dupade Uruode

¹ Enga Quiriat-jearim idaisórone ore doi Pangarádejnai Dupade uruode pi cajo ga ore chijnóngaja dedai ga ore pusi jnani iguíjnai ome uje jnani uté i tu Abinadab. Ga uté iguíjnai déji edógai gaté. Ga ore doi uté abi uje i tu Eleazar ga ore catecã́ri Dupade iji uté gai jetiga chuse Pangarádejnai Dupade uruode pi cajo uté guio iji jogadi.

Samuel u uje chajire Israélgosode ore adode aja quigode nanique jé aja deruei

² Siqueredie chise 20 nanique uje Dupade uruode pi cajo chácariji israélgosode ore idáyode uñai uje i tu Quiriat-jearim uje que Pangarádejnai Dupade ojningai u ore idai uté mu jeta uruode pi cajo chácariji uté. Mu chise diri nanique uje israélgosode ore jnusina Pangarádejnai Dupade ga ore poji uté iquei. Ga ore chucué jeta chingopo raja ore rĩ.

³ Jecute Samuel chojningame israélgosode ore: "A Pangarádejnai Dupade dirase to jetiga asíyome uágome uté ga ejnáño uágaja ga jogadi urásu jeta diapo iji yoque rĩ. Enga órañopo uacajirigode purása quedéjnane angurenone dupa rĩ uje déji uacaguíjnane ajéode, enga jé ca oyópo Dupade iji udore rĩ. Ga ayayopúsu uacangurené uaté to uje i tu Astarté enga óraño aja guesode iji uacaguíjnane ga ca achayopóji uaquedomitique jne rĩ. Enga eduyo beyoi israélgosode yocangureni Dupapísi adode iji uacáguedie ga eduyo atatayo uté adode. Ga jé u jne jeta uté di ga chijna uáguiji filistéogosode ore jmainie."

⁴ Ga israélgosode ore tangári Samuel uru quigode ga jé u uje ore cha changureta dangurenone dupa quedéjna uje ore íode u Baal, Astarté ga ore tṍra udore oredie aja quedéjnane. Ga jé u uje ore chedu Pangarádejnai Dupade uruode quigode uje ore chatatame ñane ga ore doi uruode quigode gatuaque.

⁵ Enga Samuel chingome israélgosode jeta ore chicáji ore idai Mízpa jne ga chojningame ore: "Amátayo ñane aja ore idai Mízpa jne, ga jé u jne jeta yijócha Pangarádejnai Dupade ajei údi ome uaque ga a chijnime uáguiji filistéogosode ore josipiedie jmainie jne."

⁶ Ga israélgosode ore chimáta ñane aja ore idai uté, ga ore chijnime yodi iji ore erui ga ore chójneja jnumi iji Pangarádejnai Dupade iquei. Ga jé u uje ore cho dayágome re iji deréjnai údode. Uje ore chirajapise gu uje ore adode gajnarénguipísome Dupade, ga que ore pógu dasoca gajnaréngone gotique. Iji deréjnai tuté ga Samuel u uje chajire israélgosode ore adode aja quigode, ga ore cho dangaráni iji Samuel jnese.

⁷ Uje filistéogosode chimo israélgosode ore uje ore chimáta ñane aja ore idai Mízpa, ga filistéogosode asutedie jĩraque ore jnome israélgosode ore yui to jeta ore cho dajocaningame ore iji ore idai tuté. Uje israélgosode ore chiraja filistéogosode uje ore doi ore, ga ore agutedie cho tuc, tuc iji ore iquei.

⁸ Ga ore chojningame Samuel: "Ejna ua aja bacatecãraitigade jne ome Pangarádejnai Dupade jeta yocangureni uté jé ca juéga yógome filistéogosode ore jne."

⁹ Ga Samuel doi áyasa ababi ga chujési ga tẽrasía suté ome Dupade, ga chibore ome Dupade. Ga jé u uje Samuel chutṍri Pangarádejnai Dupade ome israélgosode ore enga Dupade tangári Samuel uru quigode.

¹⁰ Uje Samuel qué déji dacatecãraitigade gai ome Dupade, mu filistéogosode ore dorási ore jeta ore cho dajocaningame ore, mu Pangarádejnai Dupade chiroque gue usérere cuchabé aja filistéogosode ga chajuque udore ore agutedie. Uje filistéogosode udore que ore chirajápo dasocáringome raque rĩ uje sadodé ore gu, ga jé u uje israélgosode ore noñaji pocaningai ome filistéogosode udore ore ga ore sué filistéogosode ore gai.

¹¹ Ga israélgosode chucajningárome filistéogosode iji Mízpa ejode ga ore chosi ore iji ore idai Bet-car uéchai.

¹² Iji ore jocaningai quigade ga Samuel chisa cucarané ejnume ga chicháji gaté iji ore idáyode ujai uje íode u Mízpa, Sen ore. Enga chojninga: "Yicháji gai jeta jé ca yocáyipieraque jnoji Pangarádejnai Dupade adode udojo ome yoque jne, uje chisi ome yocúringai pujnuéngaisóño ome yoque. Ga yĩ́caco Eben-ezer aja jne. Uje i qui u 'Pangarádejnai Dupade atajaquéode ome yoque jé chuságaja deréjnane udojo.'

¹³ Que toc jeta filistéogosode dopoi pocaningai jne rĩ ome israélgosode. Uje Samuel qué eca iji ore ujade ga Pangarádejnai Dupade déji ore ujade to ome cutejmai detotiguejna ome filistéogosode.

¹⁴ Enga israélgosode ore idáyode uje filistéogosode ore chijna iji ore gari nanique, ga ore dosóñime israélgosode ga ore jnoji dedáyode udore, ga israélgosode ore chopo dedai casodica rĩ iji udore uje ore íode u Ecrón, Gat ore, jé aja acorásedie iji ore idáyode udore ore ujai. Uje filistéogosode dosóñime israélgosode ore iji udore ga ore noñome israélgosode iji ore uniri casodica jeta ore chopo daniri iji uté údode jnese to rĩ. Ga jé adi u ome amorréogosode to uje ore déji israélgosode ore tiógarei mu que ore áyipieraque déji pocaningai ome israélgosode ore iji darosadode.

¹⁵ Samuel u uje chajire israélgosode ore adode aja quigode nanique jé aja deruei.

¹⁶ Ga Samuel jecucha ijo israélgosode ore idáidatéode iji siqueredie jnese nanique jeta chajire israélgosode ore yúode iji udore uje ore íode u Betel, Gilgal, Mízpa ore nanique.

¹⁷ Uje Samuel chajníji ore idáyode udore ga quítequiguíji dedáipisi uje i tu Ramá. Jecucha ga israélgosode asutedie ore chise Samuel iji ore idai Ramá jeta Samuel cho ore quigome cuchade yúode. Ga Samuel charidi u ore idai Ramá uté jetiga chajire israélgosode ore uniri yúode iji uté gatuaque. Samuel pésapo daseradéjnai iji dedai Ramá uté to rĩ ome Pangarádejnai Dupade ujeta chibore Dupade gajnéone cucha iji gai, daseradéjnai uté gai.