1 Samuel 6 - Dupade Uruode

Filistéogosode ore chatire Dupade uruode pi cajo israélgosode ore gai

¹ Pangarádejnai Dupade uruode pi cajo uté e guejnane guedosi gare iji ti iji filistéogosode ore uniri uté nanique.

² Ga filistéogosode tibidi dangurenone dupa quedéjna adode júsorone, jé aja daijnane to. Ga ore chojninga: –¿Jé yoco ringome israélgosode ore angureni Dupa uruode pi cajo uté jne a? jeta yatirego aja jogadi. ¿Jé yoco ringome jne a?–

³ Daijnane, sacerdóteode ore chojningame filistéogosode: –Ujeta atireyo Pangarádejnai Dupade uruode pi uté israélgosode ore gai jne enga jé ca eduyo uté jne. Átayoja uaquẽratique cucha jne ome, ga ore angureni Dupa chicadígui uacadode jne. Uacagaidi u gu jeta cha cho dajuñame uaque. Ujeta ijõrápo uaque jne rĩ, enga a quene jogadi u jne jeta quene pijoque ome uaque jne uacabai ome israélgosode angureni Dupa uté uje uacaboyo pi cajo údi aja uacaniri diríca.–

⁴ Filistéogosode ore catecãrápoi daijnane udore rĩ ga ore chojninga: –¿Jé yoquẽrapáitique cucharase ome uté jeta ijõrápo yoque rĩ?– Ga sacerdóteode, daijnane ore chojninga: –Apéso óro petígo jeta chejna yijmanai ga jé chopise chigadíe udire uje chequésãre uaque. Ga apésopo pucúto orérigui to rĩ iji óro jeta chejna yijmanai to. Ga chejna yijmanai uacapesudedie udire jne gu uje filistéogosode uacasutedie jé upúsu udore uje ore chejna yijmanai to. Uje filistéogosode uaque, jé aja uacasutedie, uaquejnárecho uaque jnese ga jé gose uaque jnese gu ome uacasocabei uté uje uacoriayo israélgosode angureni dupa uruode pi cajo uté diríca.

⁵ Apéso yocojningane udore quigode jnese, chigadíe, pucútodie ore gajnunie udire. Yojninganie u pucútodie udire uje piéjna ore iji uacaniri údode ga ore u uje ore pésu ga ejnarétaque uaque. Enga oyo dupa cuchábiji israélgosode angureni. Jé socaseti cha cho dajuñame uaque jne, enga a jé ca chinguírapo uacangurenone dupa aja jnumone jne rĩ, enga ijõrápo uacaniri udé jne rĩ.

⁶ ¿Gotique gu a uje que ayáyo acusúyo uágome Dupade? Uje uacoyópise egíptogosode, Faraón ore, uje ore cusu rome Dupade to nanique. Ga Dupade jĩraque chijna cutejmai detotigué ome udore ore nanique, ga quene ore juéga doi ome israélgosode ore iji daniri uje quene ore chimo dógoro.–

⁷ Ga daijnane, sacerdóteode qué ore jnopo daruode údi rĩ ga ore chojninga: –Apésopo guebéquedatérique jne rĩ ujeta ichápise uté adode jnese jne. Enga adíyo aquirájna abechugué gárerigui aja uacapesudi uté jne uje quene chetingare guebéquedatéode úringane pujnucho to. Mu jé ca ajuécho jne jetiga udire abidie chajna to. Mu jé ore dóji dabié ajei jne.

⁸ Anícho Pangarádejnai Dupade uruode pi cajo uté aja uacapesudi guebéquedaté gai jne, ga átayo aja uaqueranenie óro jne uje uacapéso chiga gajnunie iji udire, jé aja pucútodie gajnunie diríca, ga aníchoja pírique cucha jne iji uté dosatique. Uje uaquẽchója israélgosode ore angureni Dupa gu jeta ajei cho sere ome uaque. Ujeta e amácho udore jnese jne enga jé dóji ga aquirájnanie jnome dajesui.

⁹ Mu adójnachopísa israélgosode angureni dupa uruode pi cajo uté to jne ujetiga cáputapísiji danirípisi ore idai Bet-semes jne enga a obiréjnapise jne uje israélgosode angureni Dupa u uje ujuyagaite yoque iji yocuniri tudé. Mu jetiga aquirájnanie udire chajniapója dabidie gai gajneri ga obiréjna uje que israélgosode angureni gotique u ujeta ujuyagaite yoque, mu cucha chungórone udore a jé garani tu yocuniri tudé gajneri.–

¹⁰ Jnanione udore ore doi darasade ore uru quigode udojo ga ore chadia aquirájna abechugué gáredie aja dapesudi guebéquedaté, ga jé basa ga ore suru abidie gai iji pié ajei.

¹¹ Ga ore chanire Pangarádejnai Dupade uruode pi cajo aja guebéquedatéi ajei, ga ore cháta deranone cucha aja jeta Dupade cha dájningai ome ore. Yojninganie u chigadíe, pucútodie ore gajnunie uje ore pésu iji óro.

¹² Ga jé u uje aquirájnanie udire ore jno ga ore chijnoque Dupade uruode pi cajo uté aja israélgosode ore idai Bet-semes ga ore poja dajei iji uté yui ga cho úhuhu, úhuhu aja dajei iji israélgosode ore idai uté yúode. Que cho cutúguiji israélgosode idai yui gotique ga cáputapísiji israélgosode ore idai ome dajnui guebéquedatéi uje Dupade uruode pi cajo déji ajei to. Filistéogosode ore diguíji guebéquedatéi quigade ga ore nóna guebéquedatéi aja dajei jé aja ore idai Bet-semes eruei.

¹³ Bet-semésgosode uñane qué ore narásu dacai trígo iji dajei dosadi uje déji pararinguei, mu ore chajire oroné gaté iji ta mu ore chimo Pangarádejnai Dupade uruode pi cajo ga jĩraque ore chachietáji uté.

¹⁴ Bet-semésgosode ore chajire guebéquedatéi urugúi uté mu que base gotique. Ga chijnare raja garai uje i tu Josué Gajnei Garai, uje uté dépisiji ore idai ejábi. Ga cucarané cucháberaque déji uté to. Enga guebéquedatéi chácare iji uté. Enga bet-semésgosode ore di ga jé u uje ore chajuque guebéquedatéi aja jnumi ga ore pésu pidode iji, ga ore chujé aquirájnanie uquidé ome Pangarádejnai Dupade uje chijnoque Dupade uruode pi cajo údi aja ore idai, ga ore chipotame aquirájnanie iji dapotai uté uje guebéquedatéi uqué pépitade u.

¹⁵ Ga levígosode uje ore gajneque jeta ore chajire Dupade iguíjnai gajnéone yui, ga ore chiramurase Dupade uruode pi iji guebéquedatéi gai ga ore chicháji cucarané cuchabé gai, jé aja filistéogosode gueranenie óro pi cajo ga ore chicháji cucarané cuchabé gai to. Iji deréjnai tuté nanique ga bet-semésgosode ore di deranone cucha údi to jeta ore tẽrája Dupade ome uruode pi cajo diringai uté dire. Ga jiépisi ore yugode dachite to iji uté.

¹⁶ Ga filistéogosode asutedie uje ore chejna yijmanai jé ore jogate guebéquedatéi uté quigade jeta ore chidójnanga cuchade iji udore. Uje ore chimo uje dipísiji israélgosode ore urasade uñane idai, ga ore pañapísiji ore isocade ome cuchade ga jé u uje ore chajnésarapo dedai te rĩ uje i tu Ecrón.

¹⁷ Uje filistéogosode ore toria Dupade uruode pi cajo ica enga Dupade cho dajuñame guidáidatéi idaisórone iji ore uniri uje guidáyode udore ore chejna yijmanai. Jecute ore guẽrapáidedie chigai uje ore pésu iji óro ga chejna yijmanai to. Yojningane udojo ore idáyo íode u udojo: Asdod, Gáza, Ascalón, Gat, Ecrón ore.

¹⁸ Pucútodie oredie uje pipesudei iji óro ga jé chopise filistéogosode ore asutedie idáyode udore to. Ga ore batigai jé chojmára uje chejna yijmanai jnese. Ore idáyode uñane pirape gáyo uje ore ujuyaquéode déji udore gai, jé basa ga uñane chiqueta raja dore. Cucarané cuchabe uaté iji Josué Gajnei Garai uje ore chicha Dupade uruode pi cajo aja uaté gai, qué déji dajogadi iji ore idai Bet-semes tiógarei iji dirode udojo.

¹⁹ Mu uje Dupade uruode pi cajo qué déji bet-semésgosode ore idai ga jnanione uñane ore pota jetiga ore chajire Pangarádejnai Dupade uruode pi uté ajei, mu uje ore pota chuchẽre gai, mu ore cachodi jé u ome Dupade. Chequésãre ore ¡paque! Ga Dupade equesarane udore ore chise 70 nanique uje ore cho daba jeta ore tajirome Dupade uruode pi nanique uje que pisoca jetiga ayorérique tajirome cuchade iji uté ajei nanique uje Dupade gajnecho ga puyaguipíso ome ayoréode uyoque jeta yitajicome bisidec. Ga jé u uje Bet-semes idaisórone ore poji darása togode udore ejode uje ore pota jeta ore tajirome Dupade uruode pi cajo ajei uje Dupade que juéga ga pésu ga ore toi ¡paque! nanique.

²⁰ Ga bet-semésgosode ore chojninga: "Urénga, Dupa cuchape uté israélgosode ore angureni ga que picasite ome ayorérique uyoque jeta yicoi ga yidotágo yóguiji iquénique. ¿Ga jé yoco píringome uruode pi uté cajo jne jeta yirójo aja sañeque?"

²¹ Enga ore chiroque darógode aja ore idai Quiriat-jearim yui jeta ore jno Pangarádejnai Dupade uruode pi cajo údi aja dedai ga ore chojninga: "Filistéogosode ore chatire Dupade uruode pi casica cajo yoquibai ga beyoi ga boyo údi aja uaquedai iji uáguiji te."