1 Samuel 4 - Dupade Uruode

¹ Ga Dupade chingo dáyipiedie aja Samuel iji uté nanique jetiga doi enga chajnerame ome darasade israélgose ore jnese. Chise diri uje filistéogosode ore doi pocaningai ome israélgosode ore. Israélgosode ore jno ga ore chirote filistéogosode ore yui iji pajmini uje i tu Eben-ezer. Ga ore pésu darengúi iji uté. Jé basa filistéogosode ore pésu darengúi iji ore idai uñai Afec ejoi.

Filistéogosode ore chijna Dupade uruode pi cajo iji israélgosode ore gari nanique

² Uje filistéogosode cho dajocaningame israélgosode ga ore yugode iji ore chise 4.000 iji israélgosode iji ore jocaninga bajai uté nanique.

³ Uje israélgosode ore chajníja darengúi ga ore chatatame dayode ga ore dayode chojninga: "¡Chimo jóroque re uje Dupade juéga yógome filistéogosode udore ore ga ore sué yoquibai! ¡Jé go uje que yicoi Dupade uruode pi cajo uje déji yoquidai Sílo ga yijnójo aja yoquijocaningai ga a chátaja yoque jne ome yocumajosórone udore ore!"

⁴ Enga jé u uje ore chiroque jnacarode uñane aja Sílo yui jeta ore jno Dupade uruode pi cajo údi aja ore irengúi. Ore gaidi u gu jeta Dupa togójmai nóna daruode pi uté aja quedéjnane. Uje Pangarádejnai Dupade cutejmai etotiguejna déji gu enga cho dayaripi iji daruode pi joride uté iji jogosórone gaté unirísõre ore ujai. Enga Elí ujnacarode ore nóna ore to aja ore irengúi, uje yojningane udore ore íode u Ófni, Finees ore.

⁵ Uje israélgosode ore chimo uje ore urasade e ore di Dupade uruode pi cajo údi ga ore chachietáji uté ga ore chẽráchu ome. Ga ore chinguíra dabijnanone aja dejode enga ore chachia jnumi edodie iji gaté.

⁶ Ga filistéogosode chudute israélgosode cutejmai ore ichora uje chise ore irengúi ga ore chojninga: "¿Hebréogosode jé ore chimo jóroque re ome cutejmai dachora uje chichagu gatajnoquei?" Uje ore chiraja uje israélgosode ore di Dupade uruode pi cajo údi aja darengúi ga jé u uje pisadodéringai chise filistéogosode ore jnese.

⁷ Ga ore chojninga: "¡Dupade a chise hebréogosode ore irengúi to ujetiga chátaja ore ome ore jocaningai ome yoque! Uje yicoi yoquijocaningane ome yocumajosórone gatuaque mu érãtique yicoi yoquijocaningárique ome udore anguretique dupa gotique." Ga ore tagu yamé uje ore chiraja gu uje que toque jetiga gosi doi ga cho dajocaningame Dupade.

⁸ Filistéogosode chojninga: "¿Ga jé yoco píringome yoque jne a? ujeta yijnángo yóguiji Dupa ujopíerãque cuchábi uté jmainie. Uje uté pésu egíptogosode cutejmane ore ejnarécho nanique uje israélgosode pota jóroga doi nanique iji Egípto ome pugóro cuchábedie uje chayúji ñane nanique, jé aja dequejnareque uñane jnese to.

⁹ Jecute filistéogosode uyoque yicoi ga yujnucoi yógome pocaningai ome israélgosode udore ore jeta jé ca ore cho daróguiji yoque jne iji dajade. Uje yoco yoquiróguiji ore bisideque to nanique iji yocujade."

¹⁰ Ga filistéogosode ore chachẽre israélgosode ore iji dajeque pajei ga ore sué ore gai. Ga israélgosode uñane chayója darengúi ome dáringane bayácho. Filistéogosode ore yugode jiei iji israélgosode ore isoldádode ga chise 30.000 ore nanique.

¹¹ Filistéogosode ore chijna Dupade uruode pi cajo iji israélgosode ore gari ga ore jno údi aja dedai. Ga ore chujépo Elí ujnacarode ore to rĩ iji dajocaningai uje ore íode u Ofni, Finees ore.

¹² Mu soldate chojmarai uje benjamíngose chayome filistéogosode ga quítequiguíji ore idai uje i tu Sílo. Chayome ore iji pocaningai ga dirájnai jé u uje chise ore idai uté Sílo. Enga soldádi uté e chajningarase daguidé iji dabai enga chicosapója gatei rĩ ga jnumío gatoi. Imoi tu uje jnusiétaguipíse ome cucha dacadode uje tocade ome urasade uje ore umajosórone ore sué ore gai que.

^13-14 Uje di ga chise Elí iji charidi uje chácariji dayaripi gai iji ore idai piagoi ga tangári dajei garani uje cho dáyugu gu uje ore jno Dupade uruode pi cajo údi diríca. Jecute chirote Dupade uruode pi uté yui jeta ore diapo údi to rĩ. Uje jnani bayai di pujnomei údi iji ore idai Sílo ga Elí chudute cutejmane ore ichora ga chojninga: –¿Jé ore ichorai chimo jóroque re gajiné a?– Ga jnani bayai iji ore jocaningai quítequiguíji Elí to jeta chatata pujnomei ome to.

¹⁵ Elí guejnanie siquerei e chise 98 años nanique ga que qué chimopo dajiritique rĩ.

¹⁶ Jnani chojningame Elí: –Elí á, uyu ga yijnime yu ome yoquijocaningai tuqué que ga yiquítequiguíji uáguiji de ome yúringai bayaque ujeta yatata pujnomei ome uaque.– Enga Elí chojningame: –Yujnacari á, ¿jé oyo ringome filistéogosode ore que a?–

¹⁷ Enga jnani di uté iji ore jocaningai chatata dojñane ome Elí ga chojninga: –Israélgosode ore yayógome filistéogosode ore que. Enga ore chejna yocurasade uñane ga ore yugode jiei iji yoque. Ga ore chujé bajnacare gárode ore to uje ore íode u Ófni, Finees ore. Enga ore jnopo Dupade uruode pi casé cajo údi to rĩ ga ore cho dajnéngu uté.–

¹⁸ Uje jnani bayai uté chatata dojñane ome Elí uje filistéogosode jno Dupade uruode pi cajo údi ga Elí e choquíjnapise ga que tiógarapo danomi rĩ, jecute chudute jnani uté ojña quigode ga basíji dapácapi gai ga cṍraja ore idai piagoi ejoi, enga etabícoro péro iji jnumi uje pénu Elí gu. Ga Elí cachodi jé u to uje topísi ome dajnusiétigai nanique. Enga siqueredie chejna ayoré gáredie nanique uje Elí uté chajire darasade israélgose ore adode aja quigode.

¹⁹ Elí dacaria uje Finees acoté u uaté, ga abi déji ajei ga e idógosi jeta base to. Mu uje uaté chudute to uje ore jno Dupade uruode pi cajo údi enga ore chujé abai to rĩ, enga iyoquíjnai Elí topoi to rĩ, ga ica jĩraque tagu iji. Enga jé u uje uaté chipatigase raja quedéjnane ome dabi achaminone uje abi tagúji gu, enga base uaté abi.

²⁰ Chequedíe uñanie uje ore chirote uaté iji abi, ore chimo uje a uaté toi jne ga udire ore chojninga: "Jé ca atodópo rĩ, uje babi e base que ga diyoqui." Mu uaté que tangári ore gotique enga que chajnai ore uruode.

^21-22 Uje uaté cáma toi mu narare ga chojninga: "A yipésabu yabi uté írique jne, ga a i u Icabod. Ga disi i qui u uje Dupade ingoningájnai e poidíji israélgosode ore yocari." Uaté ojningai u uje filistéogosode ore chijna Dupade uruode pi cajo iji israélgosode ore gari nanique, enga ore angarádejnai Elí cho darába uté to nanique iji dáringai toque, jé aja chequé uaté abai to nanique.