1 Samuel 30 - Dupade Uruode

David ore cho dajocaningame amaléquegosode ga ore chejnápise ore

¹ David, jorane ore chejna dire gadiógode iji dajei ga quene ore chise dapusiédi filistéogosode ore idai Síclag iji uté. Uje ore di, mu ore chimo uje jõcaratade e ore chajnose ore ome cuchade ga ore chãrupo ore iguíjnane gáyode rĩ. Enga amaléquegosode ore u, uje ore tṍraji umusoi garani yui diríca ome ore, ga ore chajnose guidáyode iji ore uniri Neguev údode ga jé ore chuságaja filistéogosode ore idáyode uñane to.

² Ga ore chijna síclag-gosode ore jnese; chequedíe, disiode, jnacarode ore. Mu que ore chujé ayorérique iji ore idai tuté.

^3-4 Uje David ore chudute dacotedie, dabode, dabidie ore ujnoméone uje amaléquegosode ore jno ore údi, ga ore popise enga ore jnusiétigade chejna ore etotiguéode.

⁵ Ga amaléquegosode ore jnopo David acoté gáredie údi to rĩ uje ore íode u udojo: jezreélgoto Ahinoam, carmélgoto Abigail uje uaté abai bajai toi ica uje i tu Nabal.

⁶ Ga David jorane ore pojna uté uje jno ore údi aja pocaningai diríca, ga que pirodé ore acotedie, jé aja ore abode, abidie ore gotique. Ga ore pota chui ome David ga ore chisarase cucaranenie ome David jeta ore chujé. Mu David áyuguhebátaguipíse marínga, áyipie déji dangureni Dupade, enga Pangarádejnai chisíome petotiguei ome uté iji dáyuguhebátigade jmainie.

^7-8 Ga David tibidi Dupade iroi Abiatar uje jnani bajai Ahimelec ujnacari u uté ga chojningame: –Be bajúni efod ga asi ome yu ga yicatecã́ri Pangarádejnai Dupade jne ga a yirajágo áyipie quitique jne.– Uje sacerdote Abiatar uté di efod údi ga jé u uje David catecã́ri Pangarádejnai Dupade ga chojninga: –¿Ama yajnángo oriechoquíode udore ore a? ¿Ga jé yicórase ore a? Enga Dupade chojningame David: –Ajnáño ore. A esínaño ore jne, ga a ajéyo uacacotedie orisórone udore jnani jne, enga a atireyópo uacacotedie, uacabode ore jne rĩ.–

⁹ Jecute David, jorane jnani uje 600 u ore, ore chajna ore ga ore chise ore gajmini uje idógosiji jómioi, uje ore gajmini uté i tu Besor.

¹⁰ Mu David jorane jnani uje 200 u ore, ore chácariji jómioi uéchai, uje e eyuguipise ore gu. Ga 400 u David jorane uje jé ore chejna raja dacotedie quigade.

^11-12 Ga David ore chise garáijnai ga David jorane chimo jnani doi iji uté uje egíptogose. Enga eyuguipise egíptogosi uté uje jé ca tagápo dabotique rĩ iji dire gadiógode údode. Ga David jorane ore chisi ome tórtade ome uté uje pipesudíji hígodie, úva cajnorenie ore. Ga jé u uje David jorane ore jno egíptogosi údi aja David iquei ujetiga David catecã́ri uté.

¹³ David chojningame egíptogosi: –¿Ṍraji rique? ¿Barósonique írique?– Egíptogosi chojninga: –Egíptogosipise yu, mu yirósõri amaléquegose diríca, mu uté u uje ipesute yu aja gaté ica. Mu cha yu diríca uje yejnáreque yu.

¹⁴ Mu uyoque jé u diríca uje yajnóco ceretéogosode ore idáyode, jé aja judágosode ore idáyode rĩ, jé aja jnani bajai Caleb idai to, jé aja ore idai Síclag. Ga yãco ore idai Síclag uté gai diríca.–

¹⁵ Ga David chojningame: –¿Ama araja oriechoquíode udore ore jogatique jeta ajñaque yógaja?– Ga egíptogosi chojningame David uruode: –Jetiga jé ũré uágome uacaruode udore iji Dupade iquei ujetiga jé ca ajéyo yu jne, jé aja ujetiga ca ẽchópo yu ome yipesusṍri casé rĩ, enga a yijína uágaja ore jogadi jne.–

¹⁶ Egíptogosi nóna David ore aja oriechoquíode udore ore jogadi ga ore chise ore iji ore gaidi jobeyé gai uje ore chachietai ñane ome doridode cucha uje ore toria iji judágosode ore idáyode diríca, jé aja filistéogosode ore idáyode to. Ga ore chayóji darengúi údode ga ore chóji dajódode yote piocho aja dajesúode, ga ore tagu dabosode iji ñane gari to.

¹⁷ Ga David ore cho dajocaningame ore iji durasé, jé aja guedéjnoringái ga jé chuságaja jeta David ore chejnápise ore. Gusu uecábode su jnacarabode uje 24 u ore. Ga ore choru dachidedie burica quedéjna caméllo ga ore chayome David ore iji ore jocaningai.

¹⁸ Ga David chijna dacoté gare casidé ore iji ore orisórone jmainie, ga chijnapo ore oridode dagúcha jnese iji ore gari rĩ.

¹⁹ Que gusu jeta David nonapo dacotedie rĩ, mu jé upo David jorane acotedie, ore abode to rĩ, jé aja guidai casodé idaisórone uñane to. Ga ore chisápo dagúcha casé jnese iji amaléquegosode ore ugúchade ujade jnese rĩ. Ga que ore noñome ore orite cucha ajámatique gotique, ga jé ore chijna dagúchabi casodé iji udore gari jnese.

²⁰ Ga David ore chijna amaléquegosode ore gachidedie aquirájna, jé aja áyasadie, ga ore chijñaque udire aja David iquei. Ga David jorane jnani ore chojningame: "David gajneque bisidégode u udojo, uje chajna oriechoquíode ga chijnapo yocacotedie, yocabi casodé ore iji ore orisórone gari diríca rĩ."

²¹ Uje David ore chise dajõra casodica uje ore chirote ore ugúchade iji jómioi ejoi diríca iji pajmini uje i tu Besor, ga ore chimo David ore ga jé u uje ore chachai David ga ore chachietai David iji uté, ga jĩraque David chatata darasitigai ome dajõra dácareode udore uje eyuque ore diríca ga ore chirote David ore ugúchade iji uté.

²² Mu ate gajnareque David jorane uñane iji pocaningai ga udore ore jnari cuchade ome raque, ga ore jnese chojninga: –Que udore ore nóna yoque to diríca. Asi ome ore acotedie, ore abode ome ore ga ore jno iji yocujade, ga yingarángo yoquisagode amaléquegosode ore ugúcha ome ore jne.–

²³ Mu David chetaque ore uruode ga chojninga: –Yijorane á, jé ca uacarúo udore. Uje caniraque Pangarádejnai Dupade ome yoque ga guẽrate oriechoquíode udore ujeta yujnuéngo ore gai, mu que yocuñeque toi diríca, uje uté chãraque yógaja diri jnese gu. Ga jé ca yãrájo cuchade ome yocujode jnani udore ore.

²⁴ Uje yoquiringuíone udore amaléquegosode ore ugúcha a yajujóji ñane jne, ga yijorane iji pocaningai ore gajnéone jé chopise yocugúchade irodisórone ore to jne.–

²⁵ (Enga israélgosode jecucha ore chirate deduguéjnai David isocade iji uté quigade gatuac. Uje soldádode chirote jõcaratade ugúchade, ga jé ore gajnéone cucha chopise jõcaratade gajnéone cucha to, jé aja deréjnane udojo gatuac.)

²⁶ Uje David e ore diapóji dedai Síclag, ga ore chajuque amaléquegosode ore oridode cucha iji ñane, ga ore chuse pei guio ujetiga ore chisi ome judágosode ore dayode. Ga chiroque dajorane uñane aja judágosode ore yui ga ore jno David ore iquetade amaléquegose ore oridode cucha uñane údi aja ore. Uje ore chise judágosode ore ga ore chojninga: "David guẽracho udore ome uaque. Uje orichóji Pangarádejnai Dupade guetesórone amaléquegose ore gari diríca. Ga chuse uñane guio ome uaque jeta chisi ome uaque to."

²⁷ Isocai jé u ome judágosode ore idai uñane to uje íode u udojo: Betel u uñai; Ramot upo uñai rĩ uje guidai uté déji puniri Neguev ajei; Jatir,

²⁸ Aroer, Sifmot, Estemóa,

^29-31 Racal, Horma, Corasán, Atac, Hebrón ore. Jé aja jerameélgosode, quenítagosode ore idáyode uñane to. Ga que chimoque jeta chiroque daquetade cucha uñane aja ore idáyode udojo gu uje jorane jnani jé garanone u ore idáyode jnese nanique uje qué déji israélgosode ore uniri ajei.