1 Samuel 3 - Dupade Uruode

Uje Samuel qué mo iji dejai uñeque mu Dupade chĩ́care i ome darúpisode

¹ Jnacare gatódabia Samuel dopísi dangarádejnai Dupade iroquéode gatuaque nanique, ga jecucha jogate Elí gari gatuaque to jeta doi uru quigode ome cuchade iji Dupade iguíjna cuchábi ajei. Que urénga Dupade catecãrápoi israélgosode gotique rĩ ome darúpisode iji dirode udore nanique, jé aja deranone denomite gajnéone cucha ga que urénga chingopo ayorérique gotique to nanique rĩ.

² Mu chise dejaque uñai enga Dupade iroi Elí uté moji damochádi mu Dupade chĩ́care Samuel i ome darúpisode uje tṍraji pijnani iji dejai tuté. Elí uté e choquíjna ga edodie e deroque ga que nunapóji dajiritique.

³ Samuel mochápi déji Dupade uruode pi cajo piagoi iquei enga ajeminórone ibioque chijñate Samuel gai to uje jecucha tagu iji Dupade iguíjnai ajei gatuaque.

⁴ Uje Samuel qué mo mu chudute pibijnane ga chĩ́care Samuel i, uje chojninga: –¡Samuél!– Samuel chojninga: –Yugúsi de é.–

⁵ Ga Samuel chague jmame ga tibágui Elí ga chojninga: –Yugúsi de á. ¿Gotique uje babidi yu?– Mu Elí chojninga: –Que yibidi ua arĩa. Ajni to ga amo.– Ga jé u uje Samuel chajni to ga mo.

⁶ Ga Dupade tibidápoi Samuel gaté rĩ ga jé isoca uje chojninga: –¡Samuel á!– Ga Samuel jé ate uje tibágui Elí ga chojninga: –Yugúsi de arĩa. ¿Gotique babijnane ome yu?– Mu Elí jé ate uje chojninga: –Yababi á, que yibidi ua arĩa. Bo ga ajni ga amo to.–

⁷ Samuel cáma chiraja gotique uje Dupade chiqueta raja erámi unirisórone iji ujade to, ga cáma chudúdapo urúrique to rĩ. Uje Dupade cáma catecã́ri Samuel to nanique gu ome dojningárique cucha.

⁸ Dupade e tibidápoi Samuel gaté rĩ ga e gadioque uje catecã́ri. Mu jé ate uje tibágui Elí ga chojninga: –Yugúsi de. ¿Babijnane gotígo ome yu a?– Elí chiraja uje Dupade a u ujeta catecã́ri jnacare gatoi Samuel uté.

⁹ Enga Elí chojningame Samuel: –Bo ga ajni ga amo to. Mu jetiga Dupade tibidápoi ua jne rĩ ga ojningame jne: "Be ga ãrarare ga baroi uyu yangári baru quitígo ome yu."– Ga jé u uje Samuel chajni to ga moji damochápi jogadi.

¹⁰ Ga jé u uje Dupade tibidápoi rĩ ga chojninga: –¡Samuel á! ¡Samuel á!– Samuel chojninga: –Acatecã́ri yu ga baroi uyu a yangári baru quitígo.–

¹¹ Ga Dupade chojningame Samuel: –A qué yipésabu cuchárique jne jeta adúcho quigode jne ga jé u jne jeta chajuque uacagutedie israélgosode uaque.

¹² Iji diri tuté enga a quene Elí pañaji yojninga casodé cucha quigode to gajiné ome dajogasui ore.

¹³ Uje e yingome Elí diríca gu uje a yo yujuñame uté jogasui ore jne. Ga ore gajnei uté yujuyaquei a jé ca chaquesu re jne ome Elí ájnape disi ejórigo ore jnese. Enga Elí e chirajapise uraque dabai ome yu. Uje uté abode ore isocade gajnarécho ome yu gu ica, ga ore chietáyime yi diríca, mu Elí uté que cho dabode ore quigome yu diríca.

¹⁴ Enga a jé ca yicadígui Elí jogasui ichietabáitigade ome yu jne. Jeta ore pota tẽra dachitígo cuchiso ome yu jne marínga, a jé ca yicadígui udore ore isijnaringuéone ome udore jne. Jeoga ore guẽrapaite uñéngo u, mu a jé ca yicadígui ore adode udore jne iji deréjnane jnese jne.–

¹⁵ Uje Dupade cha catecã́ri Samuel ga Samuel mo to, ga niji iji dúrasabía uje jecucha isoca ga chuchẽre Dupade iguíjnai gai. Mu Samuel que chatatame Dupade uruode míraque ome Elí uje todo gu jeta chatatame Elí uje quigode gajnarécho ome Elí gu.

¹⁶ Mu Elí tibidi Samuel enga chojninga: –¡Samuel á, yababi á!– Mu Samuel chajnai ga chojninga: –Yugúsi de arĩa.–

¹⁷ Elí catecã́ri Samuel ga chojningame: –¿Dupade jé urúrigo cho ringome ua ya? Jé ca ajéngome ga atata quitígo jnese. Uje Dupade a chopise dajuñame ua jne jeta ajéngome ojningane cucha quigode jeta apógu ome yu.–

¹⁸ Samuel chatata Dupade uru quiso jnese ome Elí, ga que pógu uñeque ome Elí gotique. Enga Elí chojninga: –Pangarádejnai Dupade upúsu bacatecãraisṍri que, ga jé areque jeta jé doi dasocáringome yu.–

¹⁹ Samuel jecucha quérã ga Dupade chátaja Samuel. Uje Samuel narare ga uruode tocade ome cuchade ga úringai Dupade utocaite pijoque ome darasade ore.

²⁰ Israélgosode ore cho dangaráni iji Samuel iji ore uniri údode jnese, jé iji dángosode ore uniri iji casaque garani yui, jé aja beersébagosode ore uniri iji umusoi garani yui to. Ujnomerãque Samuel uté gu ome israélgosode ore jnese uje Dupade uruode júsõripíse gu.

²¹ Ga jé ate uje Pangarádejnai Dupade chiqueta raja Samuel iji ore idai Sílo nanique ga chingo daru quigode ome uté jeta chatatame darasade ore to.