1 Samuel 29 - Dupade Uruode

Soldádode eduguéjnane iji filistéogosode ore chetaque David, ore iji dajade

¹ Filistéogosode ore jnoji darengu bajai ga ore doi darengúi iji afécgosode ore ejoi. Jé basa ga israélgosode chicáji yote uoi uje déji Jezreel ejoi. Ga e dimane ore ome ñane jeta ore chujé ñane.

² Filistéogosode ore pésu dajochade aja israélgosode ore yui ga jiei ore jochade quigode. Ga David, jorane jnani ore chácariji eduguéjna cuchábi Aquis ejode iji ore jochade quigade.

³ Enga soldádode eduguéjnane uñane chojningame ore eduguéjnai Aquis: –¿Hebréogosode udore, gaitíguiji de uje israélgose udore ore jnese mu?– Mu Aquis chojningame ore: –Israélgosode ore eduguéjna cuchábi Saúl iroguipísi u uté nanique. Ga i tu David. Uté e iyajmánguiji yocari ga guejnanie siqueré e jiei. Mu uje chingo raja yu iji taningai nanique ga que pésabu yejóporinguérique nanique, jé aja deréjnai tudé.

⁴ Mu soldádode eduguéjnane udore ore pojna deduguéjnai Aquis. Ga ore chojningame uté: –Aroque udore ore aja bojningárique guidai ome ore diríca, ga ore chácariji uté. Ga jé ca ore nóna yógaja yoquijocaningai to. Jé seca ore nóna yógaja yoquijocaningai gajiné ga a yugúcoji yoquijocaningai gai ga a udore ore chaguhéta yoquibai ga ore chujé yoque. Uje a David ipotigádi u ujetiga chujé yóguiji pocaningai uté gajiné ga chaquesu yocurasade soldate etabídode gajiné ga chisi ome deduguéjnai Saúl gajiné, ga jé u jeta ore chachietápoi ñane jne rĩ.

⁵ David uté jé upúsu uje darásadie chequei ore chicháji dachachagúgode ica ga ore chojningame uté ica: "Saúl yugode iji filistéogosode chise 1.000, jé basa ga David yugode chise 10.000 iji ore."–

⁶ Ga jé u uje Aquis tibidi David ga chojninga: –Jé ũrepise yuruode udojo ome ua iji Pangarádejna Dupa uecai iquei uje yijnorapise ua. Uje bese yu ica ga que batique gajnaréngome yu, jé aja dirode udojo. Mu yujode eduguéjna ore chetaque ua iji yocujade.

⁷ Ga ajníño to ga a jé ca cuchárique chósi tiji ua gajiné aja uacajesúrigo. Que yipota jeta yujode eduguéjna udore ore chejnáreque uacasocade uñeque gu, uje udore e ore jmongarája ua iji yocujade.–

⁸ David chojninga: –Yoqueduguéjná, ¿yipesutígome ua ya uje que ajuéga jeta yujégo bamajosórone udore ore to? Uje baraja uje e iyajmaque yu iji baniri to ga que yipésu bajuréraque gotique.–

⁹ Aquis chojninga: –Yirajapise ua uje jnani paraque ua ga bajnui tu gaté unirísonique ome bapararinguei, mu filistéogosode asutedie uñane que ore pota jeta o batójapása yoque to.

¹⁰ Mu bajorane, uaque boyo dirome iji durasé ga ajnésacho aja yerani casé uaquedai dirome, uje a jé ca ajína yógaja yoquijocaningai to jne.–

¹¹ Ga jé u uje chise durasé ga David, jorane ore chobéri jeta ore chajni aja dapusiédi filistéogosode ore idai. Ga jé u uje filistéogosode ore jnome israélgosode ore idai Jezreel yui.