1 Samuel 26 - Dupade Uruode

David chaquĩ́rapo dajorane ome Saúl rĩ jeta ca ore pota úringárique chuque

¹ Mu jé isoca uje zífgosode uñane ore chicáji Guibeá ga ore cho dojñame Saúl ga ore chojninga: –David pógu re iji garáijnane iji orónenie uje déji ore idai Haquíla ejode. Uje ore idai uté déji erãpetarei iquei.–

² Enga jé u uje Saúl chucuepoi David ga nóna pocaningai imosórone iji israélgosode ujade, ga jorane ore chise 3.000 ore. Ga uté chicáji erãpetarei uje idógosiji ore idai Zif enga chĩro erámi ome David iji uté.

³ Ga Saúl chicha darengúi aja dajere ejoi iji orónenie udire uje ore i tu Haquíla, ga dajere uaté u uje chicáji erãpetarei. Ga David ore déji erãpetarei ajei ga áyipie doi jeta Saúl chucué iji udore.

⁴ Jecute chiroque guidáyode aja dajere jetiga qué idája Saúl ore iji sañeque.

⁵ Uje David chiraja Saúl ore irengúi jogadi ga David tibágui ore iji uté ga chachoque ore iji quedéjnai jetiga chiraja Saúl mochátique iji jorane ujade. Jé aja soldádode ore eduguéjna cuchábi to rĩ uje i tu Abner, jeta chajmita jogadi. Ga Abner uté dayé i tu Ner nanique. Chimo uje Saúl mopísiji darógode soldate ajã́ropise ga irógode chaparu gai.

⁶ Ga David catecã́ri dajorane ga chojninga: –¿Gosode iji uaque jeta cási Saúl ore to enga yicagóji ore irengúi?– Ga catecãrainone u Ahimelec uje hitítagose uté, jé aja Joab desai Abisai uté, uje David nero Sárvia ujnacari u uté. Enga Abisai chojninga: –A yijína ua aja Saúl ore irengúi jne.–

⁷ Iji dejai tuté ga David, Abisai ore chicáji Saúl ore irengúi. Enga Saúl mopísiji darógode ore gatócoro ga chichaga dasõre aja jnumi iji datẽrasui. Soldádode ore eduguéjnai Abner, irógode ore moji Saúl ejode ujetiga ore chirodipise uté ejode.

⁸ Enga jé u uje Abisai chojningame David: –A quene Dupade tẽra bamajósõri uté ome ua gajiné iji dejai tudé. Ga ajuéga uté ga yujé. Ujeta yichagu uté ome uté asõre ga chojmára mu a jĩraque uté toi sere jeta yajo aja jnumi.–

⁹ Mu David chojninga: –Jé dóji. Uje que toc jeta gosi chujé eduguéjnarique jeta Pangarádejnai Dupade ipesute úringai eduguéjna. Mu ujetiga gosi chujérase Pangarádejnai Dupade ajegaidi eduguéjna ga gosi jé ba udore ome Dupade.

¹⁰ Jé ũrepise uje qué eca Pangarádejnai Dupade ga jé ũrepise to uje a Pangarádejnai u to jne jeta guẽrate pitoringai ome uté jne. Ujetiga uté chapúsaja dagachotique jne, jeoga ore chujé iji pocaningai, mu Dupade u ujeta chiraja uté eruénique.

¹¹ Mu jé ca yujé yoqueduguéjnai uté jne. Ga Pangarádejnai Dupade chirajapise yuruode uje jé ũré yu ome udore ga a chatapísaja yu ome dajegaidi uté jne, ujeta jé ca uyu u jeta yujé. Mu yicoi uté asõre ga yijnángo, jé aja uté igobi uje udui déji ajei ga yijnángo jne ga yico.–

¹² David, jõrai ore doi Saúl asõre, uduábi ore ga ore chijna ga jé u uje ore jno. Que uñeque cho cuyúgome ore atique ga que uñeque chimópo David ore rĩ. Uje Pangarádejnai Dupade chisi ome pimoque cuchátique ome soldádode ore gu ga que ore chunina David ore iji dajade.

¹³ Uje David ore jno ga chaquesu turéjnai ga choru oroné iji quedéjnai. Ga David ujai cusome Saúl jorane ore.

¹⁴ Ga David chejnapúsu dabijnane ga tibidi soldádode eduguéjnai uje i tu Abner ga chojningame dabijnane: –Abner é, ¡achajnai yibijnane é!– Ga Abner chojninga: –¿Ua gosi te a? Uje babidi yoqueduguéjna cuchábi ga baringare iji imoi, uje que pisoca u gotique jeta eduguéjnarique urásarique tibidi bisideque.–

¹⁵ Ga David chujñieta soldádode eduguéjnai uté ga chojninga: –¡Que toc jetiga ua u jõcaratáguebei iji barasade israélgose ore yocujade uje chiese jé ca picasite ua! Ujetiga ua u jõcaratáguebei tuté ga ¿jé gotique uje que anína yocujoi ayoré que uje chise beduguéjna cuchábi ejode que iji mochádi? A uté pota ga e chujérase uaqueduguéjna cuchábi uté que.

¹⁶ Uje bajnei tu mu jeta ãriji iji eduguéjnai tuté ejode jeta anína cucha dacatígo jnese. Mu bamopise ga que anína guiyasṍri gosi. Que potigayaquérique déji yu uje máraque ua ome Pangarádejnai Dupade, ga jé tiógara jeta chuque ua uje Pangarádejnai Dupade ajegaidi u beduguéjnai uté mu que ajire yúrique. Be ga acué uaqueduguéjnai asõre, igobi suqué uje désiji gatẽrasui que jeta ese jne.–

¹⁷ Saúl chiraja David uruode uje David u darai ga chojninga: –David á, ¿ama ua u a, yababi a? uje bacatecã́ri yoque á.– Ga David chojninga: –Ejẽ́, Yeduguéjná, David u yu.

¹⁸ ¿Mu gotique uje jecucha bajna baroi uyu aja quedéjnane? Atataba yate gajnarétigo ome yu jeta yatique gajnaréngome ua.

¹⁹ Yijócha bajei údi jeta angarami yuruode to, Yeduguéjná. Ujetiga Pangarádejnai Dupade u uje chiroque ua aja ujetiga o bajocaningame yu ome yatique uñeque uje gajnaréngome uté, enga a yi ga yẽra yachidode cuchiso uñeque ome Dupade ga pajesereringai a dépoji yógome ñane jne rĩ. Mu ujetiga yujode erámi unirísõre u uje pésu bájningane ome yu bisideque ga ¡yipésupú ga Pangarádejnai Dupade cho dajuñame ore jne jõ! Uje ore chijócãre yu iji yunirípisi uje Pangarádejnai gueranome yu mu. Ga yayóji punire quedéjna unirisórone ore ujade iji udojo, ga gose ore uje ore chajna yu aja quedéjnane. A ore ajéode u jórogu jeta yácariji purása quedéjnane ujade ga yangureta ore angurenone dupa quedéjna to.

²⁰ Mu que yipota jeta gosi chujé yu ga chicha yigachotígaja punire quedéjnarique ujeta idája yu iji yuniri tudé uje Pangarádejnai Dupade tẽrame darasade uyoque nanique. Que yiraja gotique uje bo dosipeque pajnánguiji yu ga bajna yu aja quedéjnane iji yibiedie abuei.–

²¹ Saúl chojningame David: –Yabi á, yiraja uje jecucha gajnarécho yadode ome ua. Ga yajnui tu ayoré táyipietique ome ua. Ga jé yopise paraque uje que yajire jnutígome ua ga yajna ua aja quedéjnane. Yababi á, bo ga ajni aja bedai casica ga a jé ca yajnápo ua aja quedéjnai jne rĩ. Uje iji deréjnai tudé ga quene pijógapo rĩ uje bangopísa bajnoraquei aja yu gaté uje bese yu iji yimoi que, mu que apota chutígome yu.–

²² Ga David chojningame: –Yeduguéjná, basõre uaqué de daque. Aroque barógode uñéngaja yu ga doi.

²³ Yajéode u ujetiga Pangarádejnai Dupade uje chiraja cuchade jnese, doi ga chosõre ayoré ate ujñapetade iji yoque, jé aja uréone ore. Pangarádejnai Dupade tẽra ua ome yu que, mu que yipota jeta yujé ua uje yiraja báringai Pangarádejnai Dupade ajegaite gu jeta israélgosode uyoque yoco yoqueduguéjna cuchábiji ua.

²⁴ Pangarádejnai Dupade uté chimo yu uje que yujuseque ua gotique, Yeduguéjná. Jecute uté jé doi yisocai ga que chuseque yu to. Enga a chiqueta yu iji cuchade jmainie to jne.–

²⁵ Saúl e chacacãre David ga chojningame: –Yipésupú ga picotaque ua jne jõ, yababi á. Enga a bapesutígo cucha uásejnaráso jne jeta abasája báringárique eduguéjna. Enga a ueracho udore jnese jne, bapesudode udore.– Ga jé u uje Saúl chajni aja daguíjnai, ga David jorane ore jnome dajesui.