1 Samuel 24 - Dupade Uruode

David chaquĩ́ra dajorane ome Saúl to jeta ca ore pota úringárique chuque to

¹ Uje Saúl e ore chajni iji dajocaningai ome filistéogosode ga Saúl chudute uje David ore déji erã́petaréque uñai uje i tu En-gádi.

² Ga Saúl chimáta dasoldádode uje ore chise 3.000 jeta ore chucué David iji uté. Ga isoldádode ore tṍraji israélgosode ore idáyode jnese. Ga ore chojningame Saúl: "David déji cucarãte yoricode udore ójodie uje erámoro quedéjnane irasicho ójodie udire to jeta cho daniri iji." Ga Saúl irógode chicáji uté jeta ore chucué David iji udore.

³ Uje Saúl ore chucué David ore ga ore chise áyasadie atigade iji cucarã́tedó ejode. Ga David ore déji uaté ajei uje ore pógu re iji ajidé. Ga Saúl chacája uaté ajei jeta qué chuchi iji ajei, ga chácariji ajei tuti.

⁴ Ga David jorane ore chojningame: –A Dupade uru casodé quene tocade ome ua jne iji diri tudé jeta tẽra bamajósõri uté ome yoque. Be uté ga be aretigárique ome ua jeta amesẽre.– Mu David chague ga quĩrique chuquéjnai Saúl ga chaquesu uté iguidé pébi. Enga chajnésaru dajõráiso ore jogadi te rĩ.

⁵ Uje David chimo deduguéjnai Saúl iguidé pébi ga jnusiétaque David ome dasocai uté uje chaquesu deduguéjnai iguidé pébi.

⁶ Enga chojningame dajorane ore: –Yipésupú ga Pangarádejnai chátaja yu ga ca yujé yeduguéjnai uté jne ¡jõ! Uje eduguéjna uté ga Pangarádejnai Dupade ichajapite úringai eduguéjna nanique ga que toc ujetiga yi ga yijṍcarome uté.–

⁷ Ga udojo quigade ga David chaquĩ́ra dajorane ome Saúl to jeta ca ore pota úringárique chuque to. Uje Saúl cha dáringai dusa ga jé u uje ore jnome dajesui.

⁸ Enga jĩraque David doi guesi to ga chojningame Saúl: –¡Yeduguéjná, Yeduguéjná!– Saúl chajire daquigade ga chimo David iji jnumi uje chichaga dagataidie aja jnumi iji iquei. Ga imoi u uje chijnóra deduguéjnai uté.

⁹ Enga David chojningame Saúl: –¿Gotique uje bangári ayoré gojñangarane udore ome ua uje chiese yucué ua gu jeta yujé ua? Mu taque ore. Uje yucuegode u bomitigárigo gu.

¹⁰ Mu cajirape to. Uje Pangarádejnai juéga báringárique chuque ome yoque iji cucarã́tedó uaté mu que yipota jeta yujé ua. Jecute yicha ua aja diri que ga yojningame yijorane ore: "Yoqueduguéjnai u uté ga Pangarádejnai ichajapite úringai eduguéjna aja nanique. Ga que yipota jeta yujé uté."–

¹¹ Ga David qué jnopo daruode údi gaté rĩ ome Saúl. Ga chojningame: –Iapá, cajirape udé gotique to iji yijmainie baguidé peque que uje yaquesu iji bachapídi tuque iji cucarã́tedó uaqué que. A jĩraque yujérase ua que, mu yaquesu boidi eruébi sudé. Jecute Yeduguéjná, ajnusinápisa to uje que yajéode u gotique jeta yujé ua jeta yetácapo ua rĩ. Que yajéode upo rĩ jeta yijna báringai eduguéjna iji bari. Mu ua ga bajna yu aja quedéjnane ujetiga ajé yu.

¹² Pangarádejnai Dupade chiraja yocadode jnese, ga uté u jne ujetiga chirota ũrei iji yoque. Ja seca Pangarádejnai chirota yu ga chujé ua ya, uje que yibárique cucha cuse ome ua, uje bapota chui ome yu bisideque. Mu a jé ca uyu u jne jeta yujé ua.

¹³ Badute to uje yocáquirigo júdode uñane chósi te: "Pate gajnaréngone ipesusórone u uje ore ipesute paguté joradie ome dojode ayoré." Mu Yangarádejná, jé ca atodo yu uje que paguté joradie ipesusṍri yu gotique. A jé ca yi jne enga yisa yõráchatique ome ua.

¹⁴ Yeduguéjná, que pisocame israélgosode ore eduguéjna cuchátique jetiga doi ga chajna tamoco godotique iji jnumone jeta chujé. Jeoga tamoco ujosẽ́raque. Bamo yu arĩa uje que yujñapegome cuchárique mu jé bajna yu iji jnumone jeta ajé yu to.

¹⁵ Yeduguéjná, yicoi ga yichago yógaja Pangarádejnai Dupade iquei ga chiraja ũrénique iji yoque ome cucha dacadode udore. Mu ujetiga Pangarádejnai Dupade uté jé ca chise yibárique jne enga a obiréjna jne uje uté chirota yu ome basocade udore ome yu.–

¹⁶ Uje David cha dara ga jé u uje Saúl chajnai uruode ga chojningame: –¿Jec ũré ga yababi David u ua ya uje bacatecã́ri yu iji de?– Ga jé u uje Saúl po ga popise.

¹⁷ Ga Saúl chojninga: –Jé ũrepise ua uje jecucha yadode gajnarécho ome ua, mu que arate yu gotique ga que ajuseque yu gotique.

¹⁸ Jecute iji deréjnai tudé ga bango yarétigárique aja yu ome cuchade udore. Obiréjnapise gu uje Pangarádejnai Dupade juéga yúringárique chuque ome ua, mu que apota jeta ajé yu.

¹⁹ Uje que pisoca basocai uté ome yocujórique ayoré iji erámi údode gu. Jeta gosi umajósonique chapídome damajósonique uje gosi umajósõri déji gosi jmainie. Enga a jecucha Dupade chatire bacaniratiguéode udore babai jne ome yu enga a ca Pangarádejnai Dupade chuseque ua ome bacaniratiguéode udore jne.

²⁰ Uje quene pijoguipísome yu to iji deréjnai tudé uje a ua u jne iji dirode uñeque jetiga israélgosode ore eduguéjna cuchábi tu ua iji ore uniri tudé údode. Ujetiga e abasája báringárique eduguéjna jne ga a quene ujnomerãque israélgosode ore jne ome dojode ayoré ore.

²¹ David á, asi ome baru iyiejnáringo ome yu iji Pangarádejnai Dupade iquei, jeta abasája báringárique eduguéjna jne enga ca o bajocaningame yabode ore to jne. Chamáña gu uje ujetiga ejna yabode ore jne enga a ca pujúdapo yi to jne rĩ iji yiquigáningo.–

²² Ga David chojningame Saúl: –A jé ca yo yijocaningame babode ore gotique jne. Ga yuruode udojo pijogúsõri upúsu Pangarádejnai Dupade.– Ga Saúl chajni aja daguíjna cuchábi. Jé basa ga David, jorane ore chajnésaru dajogapié cucarã́tedó.