1 Samuel 23 - Dupade Uruode

David chijna kéilagosode iji filistéogosode ore jmainie iji ore idai Kéila uté nanique

¹ Chise diri uje filistéogosode ore chise kéilagosode ore idai ga ore toria ore ĩrai trígo uje quene ore chinasu. Uje kéilagosode ore chiraja udojo ga jé u uje ore chingome David.

² David catecã́ri Pangarádejnai Dupade ga chojninga: –Dupade á, ¿jé arégome ua ya, ujetiga yiji filistéogosode ga yo yijocaningame ore?– Ga Pangarádejnai Dupade chojningame David: –Ejẽ́. Be ga ajna kéilagosode ore iji filistéogosode jmainie iji ore idai Kéila uté.–

³ David jorane jnani uje que ore déji cuchárique ore dosóñime filistéogosode ore yui uje cáma ore doi pocaningane gotique to gu. Ga ore chojningame David: –Uje yugúcoji yocuniri udé Judá ga yitodógo iji. Jétapũré jeta yicoi pocaningai ome filistéogosode udore iji ore idai Kéila ga paguté joradie jogadi tupúsu ome yoque.–

⁴ Enga David catecãrápoi Pangarádejnai Dupade gaté rĩ. Ga Dupade jé isoca uje chojninga: –Ayágueyo ga boyo ga acayóji Kéila yui, ga a uyu u jne ujetiga yipésu uacáringáringo pujnuéngaisóño ome filistéogosode ore iji te.–

⁵ Ga David, jorane ore cha dasadodéringai ga jé u uje ore jnome Kéila yui. Enga ore cho dajocaningame filistéogosode ore iji uté ga ore chejnápise ore iji uté. Ga ore cho dajnéngu filistéogosode ore gajnenie aquirájna to iji uté. Ga David isocai u uté ome kéilagosode uje chiqueta ore iji filistéogosode ore adode jmainie.

⁶ Uje qué David ore déji ore idai Kéila ga Ahimelec ujnacari Abiatar di iji ore ga chijna doidi efod aja David yui uje pota jeta nóna David aja quedéjnane gu. Chamáñaje chayome Saúl jocaningai diríca uje chujé Dupade irógode iji ore idai Nob.

⁷ Uje Saúl chudute to uje David déji ore idai Kéila ga chojninga: "A jé udé u jne uje Dupade tẽra David ome yu. Ga chacája pidai uje cho jeta e pujurúgai uté ome yu jeta yo yijocaningame iji te ore idai ujuyaquéode ajei."

⁸ Enga jĩraque Saúl tibidi darógode ore jnese jeta ore nóna uté aja ore idai Kéila ga ore chujé David ore iji uté jnese.

⁹ Ga David chudute uje Saúl e ore pésu rome ga tibidi Abiatar ga chojninga: –Be efod ga yicatecã́ri Pangarádejnai Dupade ome yoque ujeta yirajágo áyipie quitígome yoque.–

¹⁰ David chijócha Dupade ajei údi ga chojninga: –Pangarádejná, jé ũré uje israélgosode yocangureni Dupá tu ua. Ga angarami baroi tuyu iji de. Yududipise uje Saúl a cho dajocaningame kéilagosode ore ome yadode uje a ore cho daba yu ga gose yadode jne ome Saúl.

¹¹ ¿Ga jé ũré ore ojñane ome yu to jeta Saúl chucué yu jne iji udé uje chiraja yijogadi? Dupade, ¿kéilagosode ore juéga yu ome Saúl jne a? Israélgosode Yocangaráni á, Dupadé, yicatecã́ri ua gu ujetiga ango yisocáringome yijorane ore uyoque.– Enga Pangarádejnai Dupade chojningame David: –Jé ũré ore ojñane uje a Saúl chicáji de jne.–

¹² Enga David chojningápo rĩ: –¿Ama kéilagosode ore juéga yijorane uyógome Saúl jne a?– Enga Pangarádejnai Dupade chojninga: –A ore tẽra uágome ore jne.–

¹³ Jecute David, jorane jnanío ore jno iji kéilagosode ore ujade ga que pirajaque ore quitique. Enga a David jorane jnanío udore ore chise 600 uje ore nóna David aja quedéjnane. Uje Saúl chudúdapo to rĩ uje David e ore jnoji Kéila ga que toc jetiga qué ore chajna ore iji jnumone ga ore cha ore unerai bu.

David cho darengúji cucarã́tedódie iji cucaranone iji erãpetarei Zif ajei

¹⁴ Ga David cho darengúji cucarã́tedódie iji cucaranone iji erãpetarei ajei uje i tu Zif. Ga Saúl chucué jórogui David iji udore iji deréjnane jnese mu que toc jetiga chise dínique jetiga Dupade juéga David ome Saúl gotique.

¹⁵ Mu David todópisa Saúl yui uje chiraja uje a Saúl chisírase ga chujérase. Jecute que jnoji dacoyapídi uté iji cucarã́tedó uje uaté u uje déji ore ajmini uje i tu Hóres, ga uté dépisi erãpetarei ajei uje i tu Zif.

¹⁶ Mu Saúl ujnacari Jonatán chiraja David jogadi ga tibágui David iji Hóres uté jeta cho quique ga jé ca anguretigai ome Dupade jé ca chicai jnumi.

¹⁷ Uje Jonatán chise David ga chojningame: –Jé ca atodo uje que toc jetiga iapade Saúl chise ua iji de. Ga e eduguéjna cuchape ua jne ome israélgosode ga bátajasṍri uyu jne. Bojo eduguéjna yu jne. Jé iapade Saúl chiraja udojo to, jecute que chajire jnutígome ua.–

¹⁸ Enga Jonatán, David ore chisiapome daru iyiejane ome ñane gaté rĩ ome cucha dacadode udore yui. Ga ore chojningame ñane: "Yocuruode udojo pijogúsõri u Pangarádejnai, israélgosode yocangureni Dupa." Enga Jonatán chajni aja dayé ore iguíjnai. Jé basa ga David chácariji Hores.

¹⁹ Mu chise diri uje zífgosode ore chise Saúl ga ore chatata David ome ga ore chojninga: –David déji dacoyapídi iji cucarã́tedó iji cucarani ójo iji yocuniri Zif. Yocojningai cucarãte uté i tu Haquíla ga déji umusoi garani iji erãpetarei ajei. Ga uté irengúi dépisiji pajmini uje i tu Hóres.–

²⁰ Ga ore chojningame Saúl: –Ujetiga bajéo, Yoqueduguéjná, enga acáji yocuniri ga uyoque u jne ujetiga yisago David uté ga yisígome ua jne.–

²¹ Saúl chojninga: –Pangarádejnai Dupade a chatapísaja uaque gajiné uje uaqueso yu iji de ome David uté. Ga uacáringane yijnorasóño pijógome yu.–

²² Ga Saúl chojninga: –Acatecãchoi uté imosórone jnanío jeta ore chingo atígo ome uaque, enga adójnachopísa uté jogatígo jeta pógu re iji udore. Uje yudute to uje uté chirajapise dasocárique uje aringácachoquí jeta pógu re.

²³ Ga adójnacho quitígo jne jé aja ipoguiépitigo ga ajníñopo yibai iji de rĩ ga a yijína uaque jne iji ejórique jeta arajayopise jogatique. Ujetiga jé ũré ga uté déji judágosode uacaniri uté jne enga a yucuegoi uté jne enga yijoco uté jogadode udore aja yocajesúode jé aja ujetiga yico.–

²⁴ Ga jé u uje Saúl juéga doi ome jnanione udore uje ore idai tu Zif. Ga ore chajni aja dedai uté. Ga David jorane ore cho darengúji pajmite uñane uje déji erãpetarei iji umusoi garani yui. Ga pajmini uté i tu Maón.

²⁵ Ga Saúl, jorane ore chicáji erãpetarei yui jeta ore chucué David ore iji te. Uje David chudute to uje Saúl e chucué iji udore ga jno ga chacose re iji pajmite uñai uje cucaranédatédie déji udore ga David pógu re iji udore ujade. Ga Saúl chiraja uje David chécãre dajogadi iji udore ga jno ga quítequiguíji pajmini uté uje i tu Maón.

^26-27 Uje Saúl, jorane ore chise cucarani uté ga déji uécha uñai, jé basa David ore déji dosate uñai uje jé ore chayome Saúl ore iji te. Uje e idógosirase jeta Saúl chise David mu Saúl irógode uñai di ga chojningame Saúl: –Yoqueduguéjná, ajni to aja yoquidai uje filistéogosode ore socárome yóguiji yocuniri uqué.–

²⁸ Ga jé u uje Saúl cha David unerai ga tibágui darasade ore jeta ore doi filistéogosode ore. Jecute ore pésu cucarané cuchábedie i ga ore chojningame 'Cucarãte Pijmíti, Jmíti.' Chamáñaje cho jetiga Saúl, David ore cho jmíti, jmíti ome ñane iji uté gu.

²⁹ Ga David jnoji uté ga chicha dapáringane aja erã́petaréque uñai uje i tu En-gádi uje que toque gu ujetiga jĩraque gosi chisi ore iji jogadi uté gu.