1 Samuel 22 - Dupade Uruode

¹ David e chayópo rĩ iji ore idai Gat tuté ga chicáji cucarã́tedó uje pajmite uté ga i u 'Jnani Bajai Adulam Pié Cucarã́tedó.' Ga David uyade ore chudute to uje David déji cucarã́tedó tuaté ga ore tibágui desai iji uté. Jé aja David ore iguiosode uñane ore to.

² Jé aja israélgosode ore urasade uñane uje que ore chise ore unétique iji dajade. Jé chopo uñane rĩ uje que ore chiraja dasocáringome dajnose carubode iji dojode ayoré gari jeta ore chimate. Jé aja udore ore uje que ore chise deduguéjna bajade ore unétique. Udojo ore chise David jnese ga ore cho dasuté iji David. David jorane udore ore batigai chise 400 uje ore nóna David aja ajesúode, ga ore irasiguipise deduguéjna ichai uté jnese.

³ David jnopo iji uté rĩ ga chicáji moábgosode ore idai Mízpa. Enga catecã́ri ore eduguéjnai iji uté to. Ga chojningame ore eduguéjnai iji uté: –Ajuéga ga iapade, ore jogasúode chácariji uaquedai udé to, jé aja jeta yiraja Dupade ajequitígome yu.–

⁴ Ore eduguéjnai irasique David uruode ga juéga dedai ome David dayé ore, ga jé u nanique uje David jno dayé, daté ore údi aja moábgosode ore eduguéjnai uté iquei, ga jogate ore iji uté idai jé iji dirode jnese uje David, isoldádode qué ore déji cucarã́tedó uaté nanique.

⁵ Mu chise diri uje Dupade uruode júsorone uñai chise David iji cucarã́tedó ga chojningame David: –Jé ca ácariji udé to jne mu acáji judágosode uniri jne ga ácariji ore uniri uté jne.– Ga David jno ga chicha darengúi aja ore gajmini uje i tu 'Jnani Bajai Haret Gajnei Pórechoquíbu' iji judágosode ore uniri uté.

Saúl chiroque Doeg aja ore idai Nob nanique ujetiga chimate Dupade irógode sacerdóteo aja jnumi jnese iji uté

⁶ Saúl déji ore idai Guibeá ga chácariji poria uburúdi iji Dupade iguíjna cuchábi ejoi uje poria uaté i tu tamarísco. Ga iroque eduguéjna gatéode chicha Saúl aja dajã́ro. Ga chácariji ore ajã́ro ga chugutána dasõre iji uté. Ga ore chatata cuchade ome ñane iji uté ga ore chatata David jogadi ome Saúl uje e déji ore gajmini uté uje i tu 'Haret Gajnei Pórechoquíbu.'

⁷ Uje Saúl chudute udore ga jĩraque cho tire ga chojningame darasade iji dejode: –Benjamíngosode uaque á, ¡angáchobí yu! ¿Ama ajoso ati Isaí abi uté chisírasome uacajnetígo jnumome uaque jne é, ome uacacatígo úvai? ¿Jeoga uacajéode u jeta pésu uacáringáringo eduguéjna jeta átayo uágaja uté iji pocaningáringo?

⁸ ¿Ajoso ati jé ca yiraja uaque? Uje uacapótayo uacoyo yijõra iji uaque, mu uacagaidi u ujeta aguhétayo cuchade yibai ga a ajéyo yu jne. Que uacuñeque déji jeta chatata yabi Jonatán uru quitígome yu ica ome Isaí abi tuté uje ore chisi ome daru iyiejájnane ome ñane ica. Uje uacarajáyo jnese, mu que uacuñeque chatatame yu ica. Que uacuñeque chatatame yu diríca uje yabi Jonatán cho quique yiroi David ome yu jeta pógu rome yu ga chujé yu. ¡Que uacuñeque déji jeta áyipieraque doi yu!–

⁹ Jé u uje edómgosi Doeg uje cháguena Saúl irógode ore ejode narare ga chojningame daruode iji Saúl ejoi: –Yimo Isaí ujnacari uté diríca uje catecã́ri Dupade iroi Ahitob ujnacari Ahimelec diríca iji ore idai Nob.

¹⁰ Ga Ahimelec catecã́ri Dupade ome David diríca. Ga chisi ome David posode ome diríca. Ga chisiapome Goliat iquesé casé ome David diríca rĩ.–

¹¹ Ga jé u uje Saúl tibidi Ahimelec iji ore idai Nob. Jé aja Dupade irógode sacerdote uñane jnese to uje Ahimelec iguioso udore ore jnese to. Uje ore di iji eduguéjnai Saúl jnese ga catecã́ri Ahimelec.

¹² Ga chojningame: –Ahitob ujnacari á, angaripísabi yuruode.– Ga Ahimelec chojninga: –Yeduguéjná, yugúsiji de. Be ga acatecã́ri yu.–

¹³ Ga Saúl chojninga: –¿Gotique gu a uje báta ua aja Isaí abi ome yu diríca? Uje bacatecã́ri Dupade ome uté diríca ga basiapome arurégode, quesérique ome uté rĩ. Uje bajegaidi u ome uté ujetiga chijnime yúringai eduguéjna iji yari, ga uté chácariji yijogadi.–

¹⁴ Ga Ahimelec chojningame Saúl: –Cachi que baroque eduguéjna uñeque déji jeta sué David gai jeta chijnóra ua ga dopísi bojningane cucha jnese. Yoqueduguéjná, cachi bãsaraque uté arĩa ga que toc jeta cho dajocaningame ua. Bamo uje soldádode uje ore chusípise baguíjna cuchábi guio ore eduguéjna uté, enga pangaranipise uté ome bajogasúode ore jnese.

¹⁵ Que gusu iji de uje yicatecã́ri Dupade ome uté diríca. Jecucha ga uté chutṍri yu ga jecucha yicatecã́ri gatuaque ome uté to. Ga jecucha yisocade udojo ome uté. Que u ujetiga chutṍri Dupade ome dajocaningárique ome ua diríca. Jecute ca ajos eti yijogasúode uyoque yipéco cucha gajnarétique ome ua diríca, enga jé ca o bajuñame yoque. Ũré yu uje que yirajapise diríca uje chayome ua, ga jé u uje yi uruode diríca.–

¹⁶ Mu Saúl que tangári Ahimelec gotique ga chojninga: –Taque ua, Ahimelec. Jé angarami yu uje a yujégo ua jne, jé aja baguiosode udore ore jnese.–

¹⁷ Enga jĩraque Saúl chojningame dasoldádode iji dejode: –Ajéyo Ahimelec, Pangarádejnai Dupade irógode sacerdote udore ore jnese. Uje ore chiraja David úringai bayaque mu que ore pota chatata jogatique ome yu diríca.– Mu soldádode que ore cási Pangarádejnai Dupade gotique, jecute que ore chujé irógode udore ore.

¹⁸ Uje Saúl e chimo uje que soldádode chujé Dupade irógode ga chojningame edómgosi Doeg: –¡Ajé ore!– Ga Doeg chichagu Dupade irógode udore ore ome dasõre ga ichajugode iji udore ore chise 85 uje ore chijna doidode uje pipesucho iji líno ga efod déji ore aróbedie jnese. Enga que pajegátigárique dépisi Doeg uté ajénique ome Dupade iroguipísode udore ore.

¹⁹ Uje chimate Dupade irógode udore aja jnumi ga doi ore urasade to iji ore idai Nob. Ga chujé jnanione, chequedíe, disiode, jé aja disi caratade ore to. Ga chujépo ore gachidode aquirájna rĩ, jé aja burica quedéjnane, áyasadie ore jnese to rĩ.

²⁰ Enga Ahimelec abode uñai uje i tu Abiatar chayome Doeg jocaningai ga chicáji David iji uté.

²¹ Uté chatatame David uje Saúl chejnápise Pangarádejnai Dupade irógode sacerdote ore jnese iji ore idai Nob uté ga que uñeque chapite.

²² Ga David chojninga: –Uje yimo Doeg uté iji Dupade iguíjna cuchábi ajei diríca ga yiraja uje a chatata cuchade jnese ome Saúl iji idai. Bayé, jorane ore bai tu yu uje yiquítequiguíji ore diríca ome yúringai bayaque. Jecute Saúl chujé ore ga gose yu.–

²³ Ga David chojningame jnacare gatoi uaté: –Yabi á, ácariji yari iji de. Ga jé ca atodo. Jnani uté uje chucué báringárique chuque pota jeta chujé yu to. Mu a yirotapise ua jne, enga a jé ca cuchárique chósi tiji ua jne iji yari.–