1 Samuel 20 - Dupade Uruode

Jonatán chátaja David jeta chayome eduguéjna cuchábi Saúl

¹ David chayopome Saúl iji ore idai Naiot nanique, uje idai tuté déji ore idai Ramá ejoi. Ga tibágui Jonatán ga chojningame uté: –¿Yibárique cucha ome bayé uje pota chujé yu? Uje que yatique gajnaréngome mu. Ujetiga araja yatique ga atata yate gajnarétique ome yu.–

² Mu Jonatán chojningame David: –¡Úngare! A ca iapade chucué ua gu jeta chujé ua. Jé ũrepise yu gu uje iapade que pógu dáyipiedie quigode ome yu. Que pésu cuchade bajaque jeta ca chingo yu bajac. A jé ca iapade pota báringárique chuque.–

³ Mu David chojningame: –Bayé chiraja uje bajnorapise yu gu jecute pógu dáyipiedie quigode ome ua. Uje que pota jeta aquĩ́ra uté ome yu jecute pógu dájningai ome ua. Yurúo udojo iji Pangarádejnai iquei uje chiraja uje que taque yu ome ua, uje yajníji chuque ejode.–

⁴ Ga Jonatán chojningame David: –¿Bajei quitique jeta yo ringome ua?–

⁵ David chojningame: –A guedoside úringai tocachuque u dirome uje jecucha israélgosode uyoque yoco dire puyáguiji tocachúringai. Ga yajnei tu jeta yacásõrama bayé yoqueduguéjna Saúl dirome iji atigárique. Mu a jé ca yáta yu aja ore to jne, ga a yipógu yu iji garai iji sañeque dirome aja dire uñai.

⁶ Ujetiga bayé chucué yu dirome ga angome jne uje yingo yu aja ua jeta atata yiqui ome uje yicáji iapade ore iji ore idai Belén jeta yáta yu aja ore to iji ore guẽrapáidode dachite cuchiso uje ore jnusina guedoside tocachúringai uté gatuaque.

⁷ Mu ujetiga bayé chojninga: "Jé areque." Ga imoi tu uje que áyipie dépoji yúringárique chuque rĩ. Mu ujetiga bayé ajei dotárome yu ga obiréjna uje pota yúringárique chuque.

⁸ Enga be yuruode udojo quigode ga ango bayé uruode quitígo ome yu dirome uje yoquijõra ñane ga Pangarádejnai Dupade tangaripísi yocuruode udojo nanique ome ñane. Mu que gusu uje yo yijõra iji ua mu barógapo yu rĩ ga yiji bojningane cucha jnese. Mu a araja jetiga yatígo gajnarécho ome bayé, ga jé ca arote bayé yui ome yu ga ajé yu iji de.–

⁹ Mu Jonatán chojningame David: –Jetiga yudute iapade urúrigo ome ua, ga jĩraque yatatame ua jne. Mu ome yajéode ga a ca iapade pota báringárique chuque. Jé ca arosóñime udore yui. Mu jetiga gajnarécho uruode ga a jĩraque yingome ua jne.–

¹⁰ David chojningame Jonatán: –¿Gosi te jetiga arógaja gadoi jeta bayé chetaque yu jeta chatata baru quitígo ome yu gaté?–

¹¹ Jonatán chojninga: –Bo ga ajína yu ga yicagóji garai jnese ga a yingo yáyipiedie quigode aja ua jne.– David ore nóna ñane jnese aja daqui tuté garai.

¹² Ga Jonatán chojninga: –Yipijogúsõri tu Pangarádejnai, israélgosode yocangureni Dupa uté, uje chudute yuru iyiejnane udojo ome ua: uje guedé batigai udé a jé u dirome, jeoga dirome gaté, jeta yibágui iapade ga yicatecã́ri ome ua jeta yiraja ajequitígo. Ujetiga urúrigo ueracho ome ua jne ga a yiroque gosi aja bei tiji de jne ga a chingo iapade uru quitígo ome ua jne.

¹³ Mu ujetiga iapade jmongarája ua jne enga a jé tiógararása ujetiga Pangarádejnai doi yu ga cho dajuñame yu jne jeta ca yi yuruode udojo ome ua iji de. Uje a jé uyu u jne jeta yipógu ua ga que uñeque chimo ua gotique aja bajesúrique. Yajéode u ujetiga Pangarádejnai Dupade chatapísaja ua, David á. Enga badi jé u jne uje uté chátaja iapade nanique.

¹⁴ Ujetiga qué yiqueca aja báringárique eduguéjna ga jé be ga caniraque ua ome yu, adi tu Pangarádejnai Dupade jmapié ome ua, ga bajmapié udire ome yu to.

^15-16 Mu ujetiga yitoi bajaque jne ga opise bedójnaru yabode, yijogasui ore to jne. ¡Yipésupú ga Pangarádejnai Dupade cho dajocaningame bamajosórone ore jne jõ, ga chejnápise udore ore jne!– Adi u uté nanique uje Jonatán chisi ome daru iyiejájnane ome David iji garai tuté. Ga David ape disi ejode ore gajneque Jonatán uru iyiejnane udore to iji David quigade.

¹⁷ Jonatán ijnoraquei jiei ome David ga catecã́ri ga chojninga: "David á, be baru iyiejnane ome yu, ga atatapo bajnoraquédatéi ome yu rĩ, jé aja ome yape disi ejode ore to." Jonatán chijnorapise David ga ijnoraquédatéi uté jé cho dajnoraquédatéi ome re nanique.

¹⁸ Jonatán chojningame David: –A dire puyai u dirome uje jecucha yipéjo guedosi úringai tocachuque ga a yacásãcoa ñane dirome iji yocatigai. A ore chimo uje tita bayaripi mu a cáma ore chucué ua dirome.

¹⁹ Mu iji dire gadióguei ga a ore jnusina ua dirome uje que agúsiji to ga jé u dirome jeta ore chucué ua. Mu qué yo baquique bajaque. Bo ga acáji cucaranému casica uje bapógu ua iji udire uéchai ica ga arote yi iji uté jne.

^20-21 Ga a yijína yipesudábi disape jne jetiga yetingare yu ome yichotique cucha yui ome yojodie. Enga yojodie udire gadióguei jne. Mu a yojningame yijorámi disape jne: "Be yojodie ga ajnája ne uje déji cucaranenie usidé yui." Ga a araja jne uje iapade ore áyipiedie omei ome ua. Ga a ca yãrápisa ua jne, uje a Pangarádejnai Dupade cho dajuñame yu jne jeta taque yu ome yuruode. Ga bo jne enga jé u jeta anína ua aja bajesúode uje a ca cuchárique chósi ti iji ua gu.

²² Mu jetiga yojningame yijorámi disape jne: "Yojodie déji cucaranenie usidé uéchai iji ¡ta!" ga a araja jne uje iapade ore jmongarája ua ga jé u jeta bo jne ga apógu ua ome iapade ore jne. Ga a araja jne uje Dupade ajequigode jé u udojo ome ua to.

²³ Mu a jé ca yamuráco yocuru iyiejájnane ome ñane jne iji deréjna pitade. Uje yocuruode pijogúsõri u Pangarádejnai Dupade gu.–

²⁴ David pógu re iji garai. Mu Saúl, jorane ore jnusina dasocabei ome dire puyai ga ore chimáta ñane aja dabose unérone jogadi jeta ore tagu iji uté.

²⁵ Ga Saúl chácariji dayaripi gai uje chujé raja ore iguíjnai dosadi uje jecucha isocabeque gu. Jé basa Jonatán chácariji dayé iquei iji mésa uécha uñai. Jé basa ga Saúl iroi soldate chácariji Saúl ejoi uje i tu Abner, uje uté gajnei u jeta chajire soldádode ore yui. Mu David charipi titame.

²⁶ Iji diri tuté ga Saúl que cho cheme gotique ga chojningame re: "A cuchárique pésu David iñoñaringuei que ga cáma churu dabai to. Jecute que déji to uje cáma chimate dabai gu."

²⁷ Iji dire ejoi ga David charipi jé isoca uje titame. Ga Saúl chojningame dajnacari Jonatán: –¿Gotique uje Isaí ujnacari David que di diríca jeta tagu dabotique to? Ga que di iji diri udé to rĩ.–

²⁸ Jonatán chojningame dayé: –David chingo raja yu diríca jeta qué chicáji Belén to. Uje ore tibidi ga que toc jeta jé ca chicáji ore.

²⁹ Uje jogasui ore pésu dẽrapáitigo cucha diríca gu ome Dupade jecute David uyai tibidi iji udore diríca jeta déji to. Chijócha yajei údi diríca jeta yujuéga doi ome diríca jeta jno ga tibágui dayé, daté ore to. Uje e iyajmaque uje que chimópo dayé ore to rĩ. Jecute que déji batigai udé to Yoqueduguéjná.–

³⁰ Ga Saúl dosója Jonatán ga chojningame dabi Jonatán: –¡Dai uase ua ga que banique chojmára gotique! A bajegaidi tu ome Isaí gotique abi uté jeta chácariji yijogadi ga eduguéjnai tu, uje bajnorapise uté. Mu que ese bayé, baté ore yocunétique. Pajegátigadatéi jogadi tu ome ua gajiné, mu que gusu ome ua, mu banguíraja pajegátigadatéi aja baté to uje jecucha báta ua aja ayoré poritai uté gatuaque.

³¹ Bamo uje bajnei turásu jeta ácariji yiyaridi jne, mu a aminingara ome bajõrai tuté, ayoré poritaque jne. Uje qué uté eca ga a pota jóroga dáringai israélgosode ore eduguéjna jne. Que gusu jeta chijna yúringai eduguéjna iji yari, mu a chijnapo bajnei iji bari to jne rĩ. Ga bo ga acué uté ga ajnája ne ga yujégo jne. Uje jé tiógara dáringárique chuque.–

³² Mu Jonatán chojninga: –¿Gotique gu a uje apota úringai chuque? Atata bárique cucha ome yu. Uje barajapise mu uje que David pésu bajuréraque gotique.–

³³ Saúl chisa dasõre ga chichagúrasu dajnacari Jonatán ome mu tṍra raja ti yui ga dayé chichagu ejoi. Ga que potigayaquérique dépoji Jonatán rĩ uje dayé potapísa chui ome David.

³⁴ E gare dirode iji guedoside uté nanique enga e dimane ore iji datigai ejode mu Jonatán chague jmame ga ájningaránguipíse Jonatán aja dajesui enga que tagúpo dayé, ore posode to rĩ iji ore atigai uje ore jnusinamáni dire puyaque gajnéone u ore posode udore. Jonatán chopise dáyugu dajõrai David uje dayé pota úringai chuque, enga que chise dayé isocade udore unétique.

³⁵ Dire uñai e u ga Jonatán nóna dapesudábi disape ga chãra re iji jeta chetingare re ome dachotique cucha yui. Ga guedé batigai casé u uje chingome David diríca.

³⁶ Jonatán chojningame disabi: –Be yojodie jne jeta yichóngara.– Ga Jonatán chichóngara dojodie ga idája batigai, ga ipesudábi disape chayóji yui jeta chisiapome Jonatán rĩ.

³⁷ Mu uje Jonatán ipesudábi chucué Jonatán ichogarané docojo, ga Jonatán chejnapúsu dabijnane ga chojninga: –¡Yojo déji béchai tuta é!–

³⁸ Jonatán tibidápoi gaté rĩ ga chojninga: –¡Bo é, ayo, ga ca arengu cuchárique é!– Jonatán cho jeta pijnángaidí u dapesudi disi, mu David gajneque pijnane udore jeta David chayo. Jonatán ipesudábi disape doi Jonatán ojo ga chisiapome dapesusṍri to rĩ.

³⁹ Mu que pirajaque Jonatán isocade udojo, mu gusu David uje chiraja Jonatán ajequigode ome ipesudi cucha udore.

⁴⁰ Jonatán chojningame dapesudábi disape: –Bo, ga ajni to, ga ajna yojodie aja guidai uje a qué yácare garósirique jne iji de.–

⁴¹ Uje Jonatán ipesudábi disape chajni, ga David chague jmame iji cucaranenie uéchai ga Jonatán, ore chayója ñane yui. David chanire dacuruté aja jnumi ga gadioque iji Jonatán iquei. Ga David, Jonatán ore chisa ñane pajéode ga ore chucu ñane uredie ga ore poji ñane ejode ga David popise iji Jonatán ejode uje e chiraja gu uje a jé ca paquĩraque Saúl ome re.

⁴² Uje ore cha poji ñane ejode ga Jonatán chojninga: –Yijorámi á, bo yico. Ca o báyugu ua aja bajesui, uje Pangarádejnai chiraja yocuruode quigode gu ome ñane diríca uje yingongo yoquijnoraquéode ome ñane gatuaque iji uté iquei. Ga yisígome yocuru iyiejnane ome ñane iji Pangarádejnai iquei to uje yoquijnoraquéode ome ñane a jé chuságaja yocape disi ejórigo ore jnese jne iji deréjna pitade.– Uje David jno ga jé basa ga Jonatán chajníja dayé ore idai to.