1 Samuel 2 - Dupade Uruode

Ána chicota Dupade ga chósi tome dacotaquéode udore nanique

¹ Enga jé u uje Ana catecã́ri Dupade to ome cuchade udore enga chósi tome dacatecãraitigade: "Pangarádejná Dupá, yinínapúsu yu iji yáyipie jnese ome bate ueradode udojo jnese. Ua u uje bapésu ga yetotiguei icha. Uje bátaja yu ga quene yiraja yuru quigode to ome yumajosórone, yumajotodie ore, enga yingana ore gáyode. Enga jé yirasépise yu uje baqueta yu gu.

² Enga que uñeque cunguésõri ua ome báringai Dupa pirosobádejna gotique to, Pangarádejná. Jé bangaraque ua, Yocangarádejná Dupá, uje ua u gu uje Yoquirotangóri tu ua ga que uñeque déji jeta cho ua gotique. Dupa timique ua ga jé bangaraque ua ome bapesudode cucha jnese. Ga cucarané timingue gajnujna ua ome yoque, Yocangureni Dupá.

³ Ayoré jóseode uaque á, ajuso uaqueo jeta jé ca ajoso uáguiji gaté ome uacojña gajnetique cucha. Uje Dupa Pangarádejnai u uje chiraja cucha tocachugode jnese uje tocade. Dupade chiraja ayoréode yoquipesudode cucha jnese, ga chajire yocadode jeta chimesẽre, ga chuguhese to jeta oréraque cus. Mu jeta chetaque yocadode ga chicháji ti yui.

⁴ Dupade chimochẽre ayoré dacasuté cuchábedie ore ojigode ga que ore bisitique pijógapo rĩ iji darasade ujade. Jé basa ga Dupade tẽra petotiguei ome ayoré parátagode ore ga ore chimo cutejmane detotigué ome Dupade uté.

⁵ Uje gosi chedugáta dagúcha uásejnane mu chise deréjnai jeta jmáta ga jé u uje chucué darósonique ga chojningame uté: 'Asi yu iji arurétique petique ga yiji baroquéode to jne.' Mu uñane chaguhéode ipatigayaque ore nanique mu ore chise dáringane subudéo gatuaque. Chequéraque jetiga jé ca atique cuse mu patireque uaté abode gai, ga ape basugode gare ore iji ti. Jé basa ga chequé apiérẽraque chise dacutaquei iji dapié uaté quigade ga que tijínapo gotique to rĩ.

⁶ Pangarádejnai Dupade u uje guẽrate pitoringai ome yoque. Upo rĩ uje guẽrate pucuecaringuei ome yoque. Ga uté jé u uje pésu ga pijóchõre yoque iji yocódedie, mu jé upo rĩ uje chorepoi yóguiji gaté rĩ.

⁷ Pangarádejnai Dupade upo rĩ uje pésu ga jmataque yocuñane, jé basa pésu ga ugúcharã́que yocuñane. Dupade jé upo rĩ uje chosi ayoréode uyoque uñane iji gaté, jé basa ga chosi yocuñane iji jnumi.

⁸ Pangarádejnai Dupade chimo uje ayoré poritade ore chase darasade ugúcha ducaranone, enga chosõre ore enga chiringare ore iji jnumi enga pésu ayoré poritade udore ore úringane ujñapetácho, ga udore ujode ayoré que ore chusécapo rĩ. Enga jé u uje dacasutedie ore cho dajorane iji ayoré poritade udore to enga ore chácariji dayaripi ueradode gáyode to ome dáringane ibijócho. Pangarádejnai Dupade u uje gajneque cucha ponai jnese iji erámi tudé, enga uté ipesute jnumi isangurui nanique ga jé u uje chicha jnumi tudé aja uté gai ¡paque!

⁹ Enga Dupade uté chuse ayoré ijnoratade guio uje ore chijnorapise Dupade ome re, jé basa ayoré sijnángone ore chicha dódedie aja ijnangununie ajéode. Que uñeque déji gu jeta jé guẽrate detotiguérique ome re jetiga pésu cuchárique.

¹⁰ Pangarádejnai Dupade etesórone ayoré a ore chise dáringárique pusũrurañaque jne ome Dupade uté jne enga a ore chudute gue uru gajnúringo jne iji gatajnoquei ujeta Dupade e tocade ome ore. Pangarádejnai Dupade a chajire erámi unirisórone ore adode aja quigode jnese to iji dire uñeque. Chamáñaje pañaji yocadode jnese gu ujetiga arécho jeoga gajnarécho. Que gusu udore mu a tẽra dacasitigai ome dajegaidi peduguéjna jne, enga a ujnomerãque uté gosi jne ome cutejmai ingoningájna. A erámi unirisórone tangaripísi uté jne ga a uté imenuringuei quérã, quérã jne iji erámi údode jnese."

¹¹ Elcána, ore chajniapója dedai Ramá te rĩ, mu ore ababi que nóna ore to aja ore iguíjnai, mu chácariji Elí gari iji ore idai Sílo. Chácariji gu jeta pésu cuchade iji Dupade iguíjnai ajei to jeta chátaja Dupade iroguipísi Elí.

Dupade irócho Elí ujnacarode, mu gajnarénguipíse ore adode nanique

¹² Mu Elí ape urejane sijnanguipise ore. Que ore chise Pangarádejnai Dupade unétique, enga ore cho cucha bisidéguiji uté iroquéode.

^13-14 Enga que ore ajegaite jeta ore pésu cucha uréone iji darasade ore ujade uje ore gajnei turásu jeta ore catecã́ri Dupade ome darasade ore iji dedai mu. Uje ore chãrei darasade gueranone dachite arione uje ore guẽracho ome Dupade ga ore chojningame daroque dojode jnacare: "Be, ga achagu ome boidode cucha pãtarácho ga ajnime bajegaitígo iji ga yajo to. Apúsaja." Ore chiraja mu uje que sacerdóteode ore gajnecho ore gueranone cuchiso adode jnese. Ga israélgosode uje ore chise Sílo jnese ga Elí ujnacarode jé ore isocai chojmaráji jnumi.

¹⁵ Uje e ore chiborirase íode bajaque iji Dupade gajnei ore aseradéjna gai mu ore iroi jnacare chojningame aquirájnane yusṍri: "Asi ome petígome yu ga yuguhéco iji yocaserani gai iji quedéjnarique uje a jé ca sacerdote pota to jeta e yu uje pãraquecho gu."

¹⁶ Ga aquirájna yusórone ore chojninga: "Cucha bajai tu jeta piborique aquirájna íode bajaque. Ga quigade ga quene yisígome uacapotigátique pégome uaque." Mu Elí ujnacarode ore iroi jnacare chojninga: "Asi ome yu jé iji de. ¡Ja seca yejna yu aja guesi ome uaque!"

¹⁷ Elí ujnacarode udore ore ipesudode udore gajnarénguipíso quigode uje ore cho damitigué ome darasade ore guẽrapáidode cucha arione uje Dupade gajnecho mu.

¹⁸ Mu disi urẽjájnami Samuel jé chajnera dajnoraquei údi uje pésu Pangarádejnai Dupade ajegaidode cucha to iji Dupade iguíjnai ajei. Ga chijnásia doidábi uje ore chicha efod aja arobé gai uje pipesudíji ore acai líno nanique.

¹⁹ Jecucha Ána nóna dabai Elcána aja Sílo iji siqueredie jnese jeta ore tẽrája Dupade iji iguíjnai tuté. Ga Ána chijna doradie borai ome dababi Samuel iguidábidie gatuaque iji siqueredie udire jnese.

²⁰ Elí chacacãre Elcána ore ga chojninga: "Pangarádejnai Dupade a chatapísaja uaque jne enga a chisi ome chequé uaqué atígo ome gaté jne uje Dupade gajneque ape bajai gu. Chamáñaje chequé tuaté jé ajéo ome Dupade ica gu." Uje Elí cha chacacãre ore ga e ore chajniapója dedai to rĩ.

²¹ Dupade chátaja Ána nanique enga pésu jeta Ána abode cusapo rĩ; enga ape diyoquíode gadioque, jé basa ga ape diyequedíe gare ore. Ape bajábi Samuel jé quérãsi gatuaque enga jé pésu Dupade adode gatuaque to.

²² Elí e choquíjna mu chiraja dajnacarode ore ipesudode cucha jnese uje ore chutai ore urasade israélgose ore yugode aquirájna péode ga jĩraque ore dosója darasade uje ore tẽra degode ome Dupade nanique. Ga ore mopóji gapudíe gari to rĩ uje ore chariguese Dupade iguíjnai ejode nanique iji piagode dosadode.

²³ Elí chojningame dajnacarode: "Yujode ayoré ore chĩ́care yu ome uacasoca gajnaréngone. ¿Gotique uje uacapéso udore?"

²⁴ Enga chojningápome dabode rĩ: "Yabode uaque, yiraja to uje yocujode ayoré chatata uacadode iji yoquidai tudé údode jnese, enga que ore ojñane ujñapeque gotique ome uaque.

²⁵ Jeta yocujode ayoré uñeque atígo chiese gajnaréngome dojórique ayoré ga Dupade irógode déji jeta ore chajire ore adode aja quigode ga narare ũré gai iji ore. Mu ujetiga ayorérique ipesute gajnaréngone gajnesṍri tupúsu Dupade enga e que qué uñeque déji jeta narare uté gosi gai iji Dupade iquei." Mu Elí abode que ore tangári dai uruode gotique. Chamáñaje Dupade e chimate dáyipie ome ore diríca gu jeta juéga pitoringai ome udore ore.

²⁶ Uje e jnacare gatódape Samuel ga jé ate uje quérã ga quérã to iji Dupade adode. Ga Pangarádejnai Dupade irasique Samuel, jé aja israélgosode ore jnese.

²⁷ Dupade uruode júsorone uñai chise Elí iji dirode udore nanique ga chingo Dupade uruode ome Elí ga chojninga: "Elí á, yĩri pujnomei údi ome ua uje tṍraji Dupade iji gaté. Ga chósi tome daruode: 'Uje uacáqui casodica ore déji egíptogosode ujade nanique ga ore chejnáreque re iji ore eduguéjna cuchábi Faraón jmainie nanique. Ga Dupapísi uyu u uje yingopísa yu aja uacáqui Leví uté nanique.

²⁸ Yajegaite levígosode jeta ore chuse yiguíjnai adode guio nanique iji israélgosode ore uáguedie uñanie ujade. Enga ore gajnei tu jeta ore chipotame darasade gueranone ore gachite cuchiso nanique ome yu. Ga ore chipotapome cucha ai unérone nanique rĩ iji yiguíjnai ajei ga ore u jeta ore tujúna yáyipiedie pijogútodie uje i tu efod nanique uje ore pésu cuchade aja quigode nanique iji yiguíjnai ajei. Ga israélgosode ore tẽra deranone cucha ome yu nanique uje jecucha ore isocai u gu, ga yujuéga jetiga yirógode ore chagutíyame udore ore isocade udore nanique. Ga levígosode ore gajnepídi upo rĩ jeta ore tagu darasade gachidode cuchiso udore arione nanique uje ore chisi ome yu. Uje uacãrapíode u jnani bajai Leví ore to ga jé uacabeyoi ore isoca cásodicáite to iji yiguíjnai tudé.

²⁹ ¿Gotique uje uacoyo cucha bisidéguiji uacarasade ore guẽrapáidode ore gachite cuchiso arione uje uyu u gu uje yiroque ore aja udore jeta ore pésu yojningane cucha udore? ¿Gotique gu a uje bajuéga yajnéone israélgose ore gueranone cuchiso arione ome bajnacarode udore ore to? Uje bajuéga ate ujñapetáringane ome bajnacarode ore, mu basi ome gajnarétigade ome yu. Uje a bajéode u jetiga babode udore ore ío iji dabosode, mu que báyipieraque déji yu gotique to.'"

³⁰ Ga jé u uje Dupade uruode júsõri chojningame Elí: "Israélgosode ore angureni Dupa chósi tome ua: 'Jé yurúo nanique ujetiga bape disi ejode, uaque uacajneque jeta jé ca ajusécho yiguíjnai adode iji deréjna pitade jnese. Mu que toc ujetiga qué yiji yuruode ome uaque uje gajnareque uacapesudode gu. Jecute a jé ca yujuégapo cuchade udojo úringáringo pipesucho jne rĩ iji yiguíjnai dosatic ome uaque. Chamáñaje gosi tangári yu ga gosi chicota yu, ga a jé yi gosi isocai to ome gosi. Jé basa gosi jeta chietáyime yu ga a yichietáyime gosi to jne uje chietáyime yu gu. Dupapísi uyu uje yurúpiso udojo.

³¹ E yiraja uje uacáqui cásodicáite uñane chisinapísa raque nanique, mu a jé ca yujuégapo jne rĩ jeta ore ájnamone uacuñeque qué chisápo dáringárique choquíjna jne rĩ. Uje e idógosi gu jeta yijnime babode, uaque uaquetotiguéode iji uaque uje que ajñapechome yiroquéode gu. Ga jé chuságaja uacape disi ejode jnese to uje a ore toji dáringane jnacare gatuaque to jne rĩ.

³² A amóño yicaniratiguéode ome uacojode israélgose ore, mu a jé ca amoñopo cucháringome uaque to jne rĩ, uacape disi ejórigo uaque. Enga a acueyo jórogui cuchade ome uaque jne enga a ajẽ́cho jórongome uacáringane jmatácho jne rĩ iji uacarasade israélgose ore ujade. Enga bape disi ejórigo a jé ca ore chisápo dáringárique choquíjna to jne rĩ.

³³ Mu a qué bape disi ejórigo uñéngo chapite jne jeta ore chácariji yaseradéjnarique dosadode. Mu cucha dacate gajnaréngone a chise ore, chise ore enga ore áyuguhebátigade na ore aja jnumi jne. Mu bape disi ejode uñane a ore po jóroque datígo ejode to jne jetiga ore ujórigo ayoré ore cho damajo ore enga chimanipise ore aja jnumone gatuaque to jne rĩ uje qué jnacare ore."

³⁴ Enga Dupade uruode júsõri uté qué jno daruode údi ome Elí uté enga chósi tome: "Dupade chósi tome ua: 'A araja yuruode udore úringane ũréo jne uje babode udore a jé ore cachotique dire chojmara jne. Yojningane jé upúsu bajnacaripísode udore uje ore íode u Ófni, Finees ore.

³⁵ Enga jé u jne jeta yicha bojórique sacerdote aja bajogadi jne uje ũrepise uté ome yu. A uté gosi tangári yarecujaidie quigode ga a dopoi yajequigode gatuaque rĩ. Mu a jé ca gusu uté ome yiroquéode jne, mu ape gatérigo a ore chácariji charidi jne ome yiroquéode gatuaque. Uje a yisi ome israélgosode uaqueduguéjna cuchátique ome uaque jne, ga yajegaidi ore eduguéjna a nóna yiroi uté jne uje yiroque ũrepísi u uté.

³⁶ Enga ecade iji bape disi ejórigo ore a ore chichaga dagataidie aja uté iquei jne ga a ore chutai yiroguipísi uté jne ome cucha pibosode enga ore catecã́ri enga ore chojningame jne: 'Asi ome yoquisatígo cucha pisagome yoque to iji sacerdóteode ore ujade jeta yicoi yoquibotique cucha pibose to.'"