1 Samuel 19 - Dupade Uruode

David chayome Saúl nanique uje chudute gu uje Saúl pota chutígome

¹ Chise diri uje Saúl chutṍri dajnacari, jorane eduguéjna jeta ore chujé David. Mu Jonatán chijnorapise David.

² Ga Jonatán chucué David ga chojningame: –Iapade pota jeta chujé ua. Ujetiga durasé dirome ga apogupúsu ua iji bajogatique dirome jeta ca pimo ua iji.

³ Ga a yijína iapade jne aja garai jeta chicáji, ga a yicatecã́ri ome etétigárique jne iji ua. Ga a yisápo ua jne rĩ jeta yingopo ua rĩ.–

⁴ Jonatán catecã́ri dayé ga chojninga: –Yeduguéjná, jé ca batique gajnareque aja baroi David. Uje que atique gajnaréngome ua gotique. Uje adode ueracho ome ua gu ga jecucha pésu bojningane cucha.

⁵ Uje baraja uté isoca casodé uje chujé filistéogosi Goliat diríca ga Pangarádejnai Dupade u uje tẽra filistéogosode ome uyoque ga gose David uté diríca. Uje uté chicha raja yoqui diríca ome Goliat uté ga que cuchame jeta Goliat chujé jeoga ca chujé. Yeduguéjná, cachi bachietai uté isocade diríca arĩa, mu bécãre báyipie ga bapota jeta ajé uté uquécasé. Mu ome yu ga que bárique cucha cuse gotique jeta ajé uté.–

⁶ Saúl tangári Jonatán uruode ga chojninga: –Jé ũrépise ua ome baruode. Ga jé ũrepise yuruode udojo ome ua iji Pangarádejna Dupa uecai iquei uje a jé ca yujé David jne.–

⁷ Jonatán tibidi David jeta chatata dayé uru quigode ome David. Quigade enga Jonatán nóna David aja Saúl, ga David dopoi Saúl iroquéode rĩ uje jecucha isocabeque.

⁸ Filistéogosode ore pota doi pocaningai ome israélgosode ore. Ga David cho dajocaningame ore ga chejnápise ore jnese ga amirone chayome David.

⁹ Uje ore cha pocaningai ga David chisiapome pujopié noñangue ome Saúl ga jĩraque áyipie gajnarengue. Ga chácariji dayaripi gai ome dáyuguhebátigai ga chijna dasõre iji dayaridi. David chujé dei árpa iji Saúl dosadi, uje jecucha isocabeque uje chujé dei tuté iji Saúl ejode.

¹⁰ David chuniname eti Saúl e chichagu, mu David tṍra raja ti yui ga Saúl chichagu daguíjnai iji David uéchai. David doi guesi iji dejai iji Saúl iguíjnai ga pógu re ome Saúl ga jno.

¹¹ Mu Saúl que chiraja uje David e jno ga chiroque darógode aja David iguíjnai jeta ore chuquéjnai ga ore chidójnanga David iji dejai jeta ca jnoji daguíjnai, ga ore chujérase iji durasé jne. Mu David acoté Mical chudute dayé uruode ga chojningame dabai: –Ujeta jé ca bo jne iji dejai tudé ga a ore chimate ua aja jnumi dirome.–

¹² Mical chátaja David jeta chajna enuei aja jnumi iji ore iguíjnai bocadi uje que pimo ome ujórique ayoré. Ga jé u uje David jno.

¹³ Ga jé u uje David acoté Mical doi dangureni dupa quedéjna oré ga chicháji David mochápi gai. Ga chanire dacatu gajnui aja dangureni uté gatoi uje pipesudi iji erámoro quedéjnane ojode. Ga chaco gai ome borapeque póroroi ga jé chopise David iji mochápi gai.

¹⁴ Iji durasé ga Saúl chiroque darógode soldácho aja David yui ga chojninga: "Beyoi David ga asáyo jne." Mu uje ore di iji David ore iguíjnai ga Mical chojninga: "Que niji uje ejnarétaguipíse gu."

¹⁵ Ga ore chajníja Saúl iguíjnai ga ore chatatame uje ejnarétaque uté. Mu Saúl chojninga: –Beyoi, ga déji damochádi marínga, aringácho ga ajnáño aja de ga yujégo.–

¹⁶ Saúl irógode ore chacája David iguíjnai, mu ore chise ore ipesudi dupa quedéjna iji uje ore chiro iji dachabei ga ore chimo uje ore chadíja erámoro quedéjnane ojode aja uté gatoi ga cho ayoréode iji damochádi.

¹⁷ Ga Saúl chojningame Mical: –¿Gotique gu a uje bãra yoque ga bapésu udore ga yocumajósõri chayome yoque?– Mu Mical chojningame dayé: –Iapá, jé yuguérase yu gu, jecute yujuéga doi ome que.–

¹⁸ Uje David chayome Saúl ga chicáji Samuel iji idai Ramá ga chatata Saúl adode ome Samuel iji te. Samuel nóna David aja ore idai Naiot ga ore pusi Naiot idaisórone ore iji ore idai uté.

^19-20 Uje Saúl chudute to uje David déji ore idáidatéi Ramá ejominóri idai uje i tu Naiot ga chiroque darógode ore aja yui jeta ore di David údi. Uje Saúl irógode ore di ga ore chimo Dupade uruode atatasórone uñéngo. Samuel jorane u ore ga Samuel pésu ore uague uaté ga déji ore iquei. Saúl irógode ore toji ore isocade gai uje ore nararome cuchade ga que ore u gotique mu Dupade u uje pésu udore ome ore. Uje ore chajire ore mu ore tṍra rome uje Dupade Ujopié irágu ore ajéode to ga ore doi daru iyiejájnane to.

²¹ Saúl chudute uje iroque bajáiso ore cháta rágaja Dupade uruode atatasórone ore to, ga chirógapo uñane aja David yui gaté rĩ. Mu uje ore diji uté ga jé ore isoca uje Dupade Ujopié Espíritu Sánto chinoningase ore ga ore cho Dupade uruode júsõri iji raque to. Ga Saúl jé isoca uje chirógapo uñane aja David yui gaté rĩ, mu Dupade Ujopié chinoningásapo ore to rĩ ga ore cho Dupade uruode júsõri iji raque to.

²² Enga Saúl jno ga chicáji ore idai Ramá yui to ga chise ejopié cucháberaque uje i tu Secu, ga yodi irágu uaté nanique. Ga catecã́ri idaisórone iji uté ome Samuel, David ore jogatique. Ga ore chojningame: "Ore jogadi u ore idai uje i tu Naiot, uje uté déji idáidatéi Ramá ejoi."

²³ Uje Saúl chicáji daqui tuté yui mu Dupade Ujopié chinoningase Saúl uté to iji dajei ga nóña ga Dupade uruode júsõre aja quedéjnane. Uje uté chicáji ore idai Naiot yui ga chatata Dupade uru iyiejnane aja daqui tuté yui.

²⁴ Uje Saúl diji Samuel ga chejñu daguidedie ga terẽtáji jnumi iji deréjnai údode, jé aja dejai ga que cha chicota Dupade iji daterẽtáringai tuté. Ga ore chojningápome Saúl iji uté rĩ: "¿Jé gotíguipié uje a Dupade uruode júsõre Saúl to a?"