Biblia Todo Logo
Bìoball air-loidhne

- Sanasan -

1 Samuel 18 - Dupade Uruode


Jonatán, David ore chisíome daru iyiejnane ome ñane nanique uje ore chijnorapise ñane gu

1 Uje David cha catecã́ri Saúl ga Saúl ujnacari Jonatán chose David yui ga ore catecã́ri ñane. Ga ore cho dajõra iji ñane ga pijnoraquei irágu Jonatán ajei ome dajõrai tuté nanique.

2 Iji udojo quigade ga Saúl chijna David aja daguíjnai ga que juégapo arorai ome David te rĩ jeta chajniápo aja dayé iguíjnai rĩ.

3 Jonatán chojningame David: "Be ga jecucha yijínango ñane ga jé ca yibérogo yijínango ñane uje yijnorapise ua ga jé ca yico ñane ijnoraquei eruénique jne."

4 Jonatán chejñu daguidé ga chisi ome David, jé aja dasõre, jé aja doji, jé aja dagarubi ga Jonatán chojningame uté: "Udojo imoi tu uje yijnorapise báringai pijõra."

5 Uje Saúl chiroque David aja cuchade ga jĩraque pésu Saúl ojningane cucha ueratigade ga jé chuságaja uje Saúl chicháji jeta chajire pocaningai gaisórone ore yúode. Ga Saúl irógode eduguéjna bajaque ore ninapúsu raque uje Saúl chicha David aja úringai eduguéjna to jeta chajire pocaningai gaisórone ore yúode. Ga jé cho soldádode ore to uje ore ninapúsu raque to ome David.


Eduguéjna cuchábi Saúl cho júruru uje chudute chequedíe icotaquéode ome David

6 Uje pocaningai gaisórone ore diji dajocaningai ga chequedíe israélgotodie ore chirote dasuté Saúl iquei ga ore chijna degode cucha ga ore chujé iji dayaridode uje ore chachietai Saúl ore diringai iji pocaningai. Ga ore irasé re to uje David yuque ore eduguéjna cuchábi Goliat iji ore uniri ajei. Ga ore tṍraji dedáyode jnese ga ore chijñecare ome Saúl ore uje ore di iji dajocaningai.

7 "Yoqueduguéjna Saúl yugode soldate chise 1.000 iji filistéogosode. Jé basa ga David yugode soldate chise 10.000 iji filistéogosode ore isoldádode."

8 Uje Saúl chudute ore achachagúgode quigode ga jĩraque Saúl cho júruru enga chojninga: –David yugode jiei iji soldádode ga ore chise 10.000, mu uyu ga yigábode gusu chise 1.000 ome chequedíe udire ore. ¡Ga amiri tu jeta yoco eduguéjna cuchábi iji David uté!–

9 Uje ore chejna daninaquéode udore guesi ga Saúl chajire David namuque. Ga jecucha isoca ome David.

10 Iji dire ejoi ga Saúl jé isoca uje cho ũrusode iji daguíjna cuchábi ajei. Enga Dupade chirógapo datocaidi páyuguhebátiga aja Saúl gaté rĩ enga chopise ũrusode iji dáyuguhebátigade jmainie uje que jé chirajápo dasocáringome re rĩ. David jecucha isoca uje chijocase dajocayai iji Saúl ejode jeta chajuque áyuguhebátigai iji gai, mu Saúl toji David gai ga chisa dasõre iji gaté.

11 Ga Saúl gaidi u ujetiga chichagu David ome dasõre mu David chajo raja jnumi ga Saúl chichagu daguíjnai ome iji David uéchai. Ga jé isoca uje chichagu David ome ga gare mu chichagu David ejode.

12 Saúl chiraja uje Pangarádejnai Dupade cháta cuchade aja David, mu que qué chátapo cuchade aja Saúl gotique rĩ. Jecute Saúl todo David.

13 Enga jé u uje Saúl cha David úringai piroque iji daguíjna ajei ga chisi ome soldádode ome jeta ore cho dasuté iji uté to ome dajocaningai. Ga chiroque ore aja pocaningai yui gatuaque jeta jõcaratade chujé David iji dajocaningai to, mu jecucha David di iji pocaningane gatuaque.

14 Enga Pangarádejnai Dupade jé isoca uje cháta David jocaningane aja ga sué damajosórone gáyode gatuaque.

15 Jecute Saúl dosóñime David uje di gatuaque ome dáringai pujnuéngaisṍre.

16 Mu israélgosode, judágosode jnese ore irasiguipise David uje jecucha jno ore údi gatuaque aja pocaningane mu ore sué damajosórone ore gáyode gatuaque. Ga jé ore úringane pujnuéngaisṍre chajnera dádi gatuaque.

17 Chise diri uje Saúl catecã́ri David ga chojningame: –David á, a yisi ome yuro urẽja ome ua jne uje i tu Merab jeta o bacoté iji uaté. Uje jecucha bajnué yocumajosórone gáyode ga jé ejna ua aja bajocaningane jne, ga a jecucha Pangarádejnai Dupade chátaja ua jne iji bajocaningane udore. Ujeta bepísi yuru quigode jne ga a jé yisi ome ua jne.– Mu Saúl que ajéode u gotique jeta chisi ome dabia ome David, mu gaidi u jeta David jnusi rome Saúl uru quigode ga chejna raja filistéogosode ore enga úringane chucho ga ore sué David gai iji sañeque.

18 Mu David chojninga: –Que yai uyoque yugúcoji cuchárique iji yocurasade israélgose ore ujade gotique jeta eduguéjna cuchátique cho dasaránguiji yu.–

19 Uje chise Saúl ojningai dire uje chiese chisi ome daro Merab ome David iji uté, mu taque ga chisi ome jnacare uñai uje i tu Adriel uje uté idai tu Meholá.

20 Mu Saúl uro uña uje i tu Mical ajegaidípise David nanique. Uje ore chatatame Saúl uje uro uña potapísa David ga Saúl irasé daro uaté áyipie.

21 Ga e gare uje Saúl chojningame David uté: –A quene yopise yisaránguiji ua jne uje a yisi ome yuro Mical ome ua jne.– Mu Saúl gaidi u jeta chiroque David aja filistéogosode jeta filistéogosode chujé David iji pocaningai uté.

22 Saúl chojningame darógode ore: –Abáchoi David ga acatecãchoi iji quedéjnarique jne ga ojnichome jne: "Yoqueduguéjna cuchábi potapísa jeta cho dasaránguiji ua. Ga chijnorapise ua ga irasiguipise basocade jnese. Mu que gusu uté mu jé cho uté iroguipísode, irógode ore ga ore irasiguipise basocade to jnese."–

23 Ga jĩraque Saúl irógode tibágui David, enga ore chingo Saúl uruode ome David jnese. Mu David chajnai ore uruode ga chojninga: –¿Ama ajoso ati cucha uerate jeta jnani atátique cho dasaránguiji jnani jmatátique uyoque? Uje ataque gosi ga chutai nasarai jeta chimate gosi ome uro uje chóji uaté gari. ¿Ga jé yorási ringome jeta yo uté uro oré uje que yiplátaraque cuse?–

24 Enga Saúl irógode ore tibágapoi rĩ ga ore chatata David uru quigode ome Saúl gaté.

25 Uje Saúl chudute udore ga chojninga: –Boyo, ga angoñome David jne uje a jé ca yi yoquisocabei ome jne uje yutai iplátarigui. Mu yajegaidi u jeta doi filistéogosode ga di ore ujnungunguenie aode údi jeta chise 100 ga a yo yuro oré iji udire jne jeta David chóji uaté gari. Uje cucha omi tu udé ome yu gu jeta yo yujnutabádu udojo ome filistéogosode udore ore.– Mu cachi Saúl uruode uje áyipiedie upúsu ujetiga chuque David iji dajocaningai tuté ome filistéogosode.

26-27 Uje David chudute Saúl irógode ore ojñane udojo ga pota jetiga eduguéjna cuchábi cho dasaránguiji. Ga jĩraque doi uru quigode. Uje cáma chise Saúl ojningai dire jeta di iji, mu David diji dajocaningai ga chisi ome degode ujnungunguenie aode ome Saúl. Mu chãraja Saúl ajegaidé casidé, ga yugode ore ujnungunguenie aode chise 200 nanique. Ga jé u uje Saúl chisi ome daro Mical ome David jeta cho dacoté iji uaté.

28-29 Uje Saúl chisi ome daro ome David ga todópisa David gaté uje chimo gu uje Dupade jecucha chátaja David ga uro chijnorapise uté to. Jecute Saúl cho damajo David gaté ga etétigai que eruénique cusapo rĩ.

30 Uje israélgosode ore doi pocaningane ome filistéogosode ga David u uje jecucha sué ore gáyode jnese ome dáringai pujnuéngaisṍre. Ga sué Saúl isoldádode asutedie uñanie gáyode jnese. Enga udore ore dosóñime David jnese, ga ore tangári David uruode quigode gatuaque.

© 2021 Ethnos360

Global Partners
Lean sinn:



Sanasan