1 Samuel 17 - Dupade Uruode

David chujé filistéogosode uñai nanique uje i tu Goliat, ga chujépise ome dachogarani

¹ Filistéogosode ore chimáta rágaja ñane jeta ore doi pocaningai ome israélgosode. Ga ore chicha darengúi aja judágosode idáyode ujai uje ore íode u Sóco, Azéca ore iji ore ajmini uje i tu Efes-damim.

² Uje Saúl chudute filistéogosode ore ujnomei uje e dimane ore ome dajocaningai yui jeta ore cho dajocaningame israélgosode ore, enga chimáta dasoldádode ore aja ñane to ga ore chicha darengúi aja turéjnai uje i tu Éla. Ga ore chirote filistéogosode ore yui iji uté.

³ Ga filistéogosode ore chácariji cucarãte uñai edúdi iji turéjnai uéchamitó. Jé basa israélgosode ore chácariji cucarãte uñai edúdi iji turéjnai uéchamitó uña.

⁴ Mu israélgosode ore chuniname eti filistéogosode ore asuté jõcaratáguebei chicáji ore yui uje ayoré yoríco uté ga abubíe chise 3 métros. Ga uté i tu Goliat uje idai tu filistéogosode ore idai uje i tu Gat.

⁵ Uté chaco datoi gai ome ore gatoje uje ore ipesudé iji guebeque sárei uje i tu bronce, ga cho nánga, nánga iji gai. Ga uté chigui daguidé to uje ore ipesudé uaté to iji guebéode uje i tu bronce. Gaidi tu gu jeta jé ca asṍreraque chacája uté iguidé uje e déji dajocaningai gai. Ga iménu uté iguidé ga imenuringuei chise 55 kílos.

⁶ Ga uté chichapo detarútepiédie guebecho aja detarúdode gai to rĩ jeta ca cuchárique chósi ti iji uté aróbuchaque iquénique. Ga uté chijnapo cutejma dasõre yorícojna to rĩ ga chijnónguiji dorotadi. Ga etarútepiédie, asõre udire pipesudei iji guebei uté to uje i tu bronce.

⁷ Ga uté asõre poté querúpise, ga cho asõre asi uje iménu ga imenuringuei chise 6 kílos. Ga uté iroi jé jogate iquei jeta chicha doidi guebeque peque aja uté iquéode jeta jé ca pichoque uté ome docojóraque.

^8-9 Goliat doi turéjnai gatócoro ga tibite israélgosode ore gai iji daquei. Enga chojninga: –¿Gotique gu a uje uacacásoi yoque ga uacabeyoi yoquiquei ome uacapetígajnai? Saúl irógode uaque á, filistéogose yu ga yi tu Goliat ga gusu yu iji de. Ga arócho uacuñeque aja yi jeta uté gosi cási yu ga doi yiquei ga yujégo ñane iji de. Ga a jé ca yujégo uacarasade to gajiné jeta yujnué uacuñeque gai. Mu a yoco yoquiróguiji uacuñeque urasade ore jnese gajiné jeta yujé uaque gosi. Mu jé basa a uaque gosi sué yibai gajiné ga israélgosode a oyo uacaróguiji yurasade udore bisideque jne iji uacajade.

¹⁰ Saúl irógode, israélgose uaque, amesẽcho yuru quigode udojo, ¡ga arócho uacuñeque aja yi iji de ga jĩraque yoco yoquijocaningame ñane!–

¹¹ Uje Saúl, urasade ore chudute Goliat pijnane ga ore dosóñime Goliat uté arúbuchaque ajesui, ga que picasite ome israélgosode ore gotique.

¹² Beléngosi Isaí e choquíjna nanique ga uté ujnacarode gadioque ore iji ti, ga udore ore ejópisi i tu David nanique.

^13-14 Uté ape urejane ore nóna ore eduguéjnai Saúl aja ore jocaningai to uje ore íode u: Eliab, Abinadab, Samai ore.

¹⁵ Uje ore déji Saúl jogadi uté, ore desábabi David chajníja Belén iji ujade jeta chirote dai gachidedie áyasai iji ore idai ejode, jé basa ga déji Saúl jogadi iji ujade to.

¹⁶ Jecucha Goliat uté tṍraji filistéogosode ore irengúi ga basája guesáringai ome israélgosode gatuaque iji durasedie, jé aja guedéjnoringáne ore gatuaque. Ga dirode e chejna ayoré gáredie uje Goliat basája guesáringai ome israélgosode ore mu que picasite ome ore gotique.

¹⁷ Iji dirode uñai ga Isaí chojningame dajnacarabi suté: –David á, arurégode de dojo uje udore chejna yijmanáyone, jé aja yoquiborigode iji trígo uje 20 lítros. Aguito ga bo arurégode udojo údi aja bayade ore iji ore irengúi tuté, ga átaja yoquiborigode iji trígo to jne.

¹⁸ Enga ajnoque quésode to uje chejna yijmanáyone ome soldádode ore asuté tuaté. Ga adójnangapísa bayade udore ore jne, ga ãriápo bojña oníngo údi iji yoque jne rĩ. Uje jecucha yáyipie déji bayade ore gu ujeta jé areque ore iji darengúi tuté.–

¹⁹ Uje David cáma di iji ore irengúi, mu filistéogosode, israélgosode ore socárome ñane iji turéjnai uté gatócoro uje turéjnai uté i tu Éla. Ga David uyade ore déji uté to.

²⁰ Iji dire uñai ga David noñome darodedie áyasai iji te jeta dayé irógode uñeque chirote udire, ga qué jno cucha pibosode údi uje dayé Isaí chirógaja jeta jno údi ome uyade ore iji ore irengúi tuté. Uje David di iji ore irengúi ga israélgosode quene ore jnome filistéogosode yui jeta ore chujé ore. Enga David chudute ore pijnanone ome dajocaningai yui.

²¹ Israélgosode, filistéogosode ore pésu dajochade aja ñane yúode.

²² David noñome dajnúiso ore pose iji te ga noñome iji soldádode uñai gari uje chirote ore ugúchade iji ore irengúi. Ga chayóji ore jochai yui jeta catecã́ri dayade ome ore atígo.

²³ Uje David qué catecã́ri dayade ore ga filistéogosode ore asuté qué dopoi dasocai tuqué rĩ uje i tu Goliat. Ga gátgosi Goliat chejnapúsu daruode ga chojningame israélgosode ore: "Uacuñeque cási yu ga doi yiquei ga yoco yoquijocaningame ñane iji de." Ga David tangári uté pijnane quigode.

²⁴ Uje israélgosode ore chimo uté ga ore agutedie cho jorame yui ga uñane chajuque re iji aróbuchai iquei ga ore chayome.

²⁵ Israélgosode ore chayome Goliat ga ore chojninga: "¿Jé amóño jnani uté gajnúrique jnani to ica ya? Uje que dosóñime israélgosode uyoque gotique. Jecucha uté basája yoquiquei ga chutai yocuñeque jeta cho dajocaningame yoque gosi. Ga Saúl e dimane jeta tẽrája uté yungónique jne ga a chisiapome daro ome gosi jne rĩ jeta chimate jnani yorícoi uté aja jnumi. Enga gosi jogasúrique a ca chopo doré to jne rĩ ome Saúl uté. Mu jé go uje que yocuñeque cási uté gotique."

²⁶ David chojningame dejominórone: –Atatayobu Saúl uru quitígo que ome yu jeta gosi chujé jnani uté jne. ¡Chimo jóroque re uje filistéogose pajnotai uté pota jetiga sué Dupapísi urasade uyoque yoquibai! Uje Dupa uecai urása yoque, mu jé chietáyime yoque. Cachi uté angurenone dupa que bisitique pijoguípie.–

²⁷ Ga ore chatata Saúl ojningáiso cucha ome David jeta gosi chujé Goliat uté, ga a gosi gajneque Saúl ojningane cucha jne.

²⁸ Mu David urẽjai Eliab chimo desai uje catecã́ri soldádode aja dajesúode ga ajei dotárome desai ga chojningame desábabi: –David á, ¿gotique uje bajíñome barodedie áyasai iji erãpetarei ga bese de to? A ãra ua iji yocai áyuguhebátigarigo diríca, mu bagaidi tu jeta amíninga soldádode uyógaja quedéjnane iji yoquijocaningai udé. Bo, ga ajni to aja barodedie áyasai udire.–

²⁹ David chojningame dayai: –¿Gotique gu a uje bagu bejode ome yu? Uje que yurúrique dosója uaque gotique. Cachi yicatecãraite uacojode soldácho ore ome jnani yorícoi tuté.–

³⁰ Uje David jnoji dayai gari ga catecãrápoi soldádode uñai te rĩ, mu ore ojñane qui jé chojmára jnese.

³¹ Soldádode uñane chudute uruode uje cási Goliat uté ga ore chingo Saúl. Ga jé u uje Saúl tibidi David jeta catecã́ri.

³² Ga David chojningame Saúl: –Yoqueduguéjná, ¿ama jec ũré ga ca picasite jnani yoríco pajnotai uté aróbuchaque ajesúrique a? A yi jne ga yujégo ñane jne.–

³³ Mu Saúl chojningame David: –¿Ama ajérase uje qué jnacare gatódape ua? Jé basa ga pocaningane imósõre uté nanique iji úringane jnacare. Jétapũré uje dacasuté ga que dosóñime cuchárique.–

^34-35 David chajnai Saúl uruode ga chojninga: –Chise yúringa casica disi ica ga yirote iapade gachidedie áyasai ica ga gusu yoidé yogué iji yijmainie, mu caraté chisa yirodedie uña ica ga yijíji caraté gari ica ga yedo yijmainie ome ica ga yayo pijnátuaráinie udire údi ica ga toi ica uje yimánaja jnumi. Uje cuchiso chagúode uñai casapoi yu ica rĩ ga yujépo rĩ uje yedo yijmainie ome udojo mu jé yimánaja jnumone gatuaque.

³⁶ Yisocai udé ome yigué caraté ica, jé aja ujoi cuchiso chagu ore ga a jé yadi tupo rĩ gajiné ome dupa quedéjnane catecãraisṍri filistéogosi uté jeta yimánaja jnumi. Uje uté pota sué Dupa uecai urasade ore yoquibai uje que pujnuéngai Dupapísi urasade ore uyoque mu. Yeduguéjná, baroi tu yu arĩa, ajuéga uté ome uyu ga yi ga yujé ¡sa!

³⁷ Uje caraté pota jóroga jeta chisa yu nanique mu Pangarádejnai Dupade chijna yu iji gari ga yujnué uaté gai, jétapũré uje filistéogosi uté ichietabáidi u Pangarádejnai Dupade ga a jé isocai u yigué caraté isocai gajiné, jé aja yigode uñéngo iji cuchiso chagúode ore isocai to rĩ, ga a chijna yu iji jmainie to gajiné.– Ga Saúl chojninga: –Bo, ga be. ¡Ga yipésupú ga Pangarádejnai nóna ua aja uté yui gajiné, jõ!–

³⁸ Saúl chiroque darógode ore aja daguidedie yui uje porai iji guebéode uje pocaningane gajnei udire. Ga ore chadíja David jeta chigui udore to. Ga ore chadíja gatoje aja David to uje guebeque sare uaté ga nanganatague uaté.

³⁹ David cho dagarubu quesé cuchábi ga jno mu que chimécãre uje que isoca gotique to gu. Jecute David charengu. David chojningame Saúl: –A jé ca yigui baguidedie uje yarengupúsu gu uje que yisoca upúsu gotique to gu.– Enga David chejñu Saúl iguidedie udire iji dabai uje charengu gu ga que chigui.

⁴⁰ Ga David chisa daquesua pore ga chijna. Ga chicáji tié jochai ga chisa cucaranenie uje chejna yijmanai ga nája detébetabi ajei ga chátaja dachogarani ga jnome filistéogosi uté yui.

⁴¹ Uje filistéogosi chimo israélgosi uje chicáji yui ga jé u uje Goliat jnome israélgosi yui to ga ore chachai ñane. Ga Goliat iroi jé jogate dasuté dosadi uje chicha doidi guebeque aja uté iquei jeta ca cõráchatique basája Goliat uté.

⁴² Uje e idógosi David iji filistéogosode ore asuté Goliat ga Goliat chimo uje qué jnacare gatódape iquémitabía ga jose eti cachi ujñiequéo. Enga urábidie caratébi ga que chosi pocaningane gaisónique gotique.

⁴³ Goliat chojningame David: –¿Ama ajose tamocórigaja yu uje bajna pidábi ome yu jeta ajé yu ome boidábi pidape suté?– Goliat jĩraque cho darúja David ome daru noñángone ga cosa dangureni dupa quedéjna gotique ome David.

⁴⁴ Goliat qué jno daruode údi ome David ga chojningame: –Disabi á, be yiquei ga yujési ua ga chugúpẽre chagúode tagu barione jne iji bagachotique jé aja cuchiso chagúode ga ore chamatáta ua iji bagachotique jne ome yu.–

⁴⁵ David chajnai Goliat uruode ga chojninga: –Bangureta jóroque boidode bõráchaque ome yu uje bajna basõre, baquesei, boidi queségodóque ore. Mu uyu ga a yo yõráchaguiji Pangarádejna Pujnuéngaisṍri uté i ome ua. Uje israélgosode Yocangarádejna Dupa togójmai uté, ga a uté u jne gu jeta sué babai gajiné. Uje uté chudute bachietabáitigade ome urasade israélgose uyoque gu.

⁴⁶ Uje a Pangarádejnai tẽra ua ome yu iji diri tudé, ga yujnué babai gajiné ga a yaquesu betabícoro jne iji bagachotique jé iji deréjnai tudé. Ga a chugúpẽre chagúode a ore tagu filistéogosode asuté ua barione iji bagachotique, ga a ore tagúpo barasade ore arione to gajiné iji uacagachotique. Jé aja cuchiso chagúode ore, a ore tagu barasade ore arione to jne. ¡Enga a yocujode ayoré ore iji yoquirosadode ore chiraja jne uje Pangarádejnai Dupade u uje déji israélgosode ore yocujade!

⁴⁷ Dupade jocaningai u udé ome filistéogosode uaque ga a isíome uágome israélgosode uyoque jne. A uacajnuéngaisṍre uté jne, mu a ca chijna dasṍreraque ome uaque jne, enga a ca chijnapo dajnosocóringome uaque, jeoga queségodóque ome uaque jne rĩ.–

⁴⁸ Filistéogosi Goliat jĩraque jnome David yui. Mu David que chuchiéjna ti ome Goliat gotique ga chose raja jnumi iji Goliat iquei.

⁴⁹ David chájĩ detébetai ga chijnime cucarané iji ga chadíja dachogarani ga chachia uté iji dajmainie ga chicho filistéogosode asuté Goliat ome. Ga ichogarané cucarané íjnonguiji Goliat enochai ¡sa! Enga David ichogarané cucarané chacája Goliat enochai ga que chisa gatérique. Ga cṍraja David yui ga chorei dajei iji jnumi.

⁵⁰ David isocai u udé ome filistéogosi uje chijna dachogarãte chojmarai ome, ga chátaja cucarané chojmara, mu jé sué filistéogosi gai ome cucarané chojmarámia nanique.

⁵¹ Uje David que chijna cõráchatique ome Goliat, mu jé chinguíra aja jnumi ga chimo uje Goliat cṍra ga cugujnáji yui ga chijnime Goliat iqueséjnai iji ógoro ga chichagu Goliat iji cachodi, ga chaquesúapo etabi ome iquesei te rĩ. Uje filistéogosode ore chimo dasuté dicasé iji cachodi ga jĩraque ore chayome israélgosode ore.

⁵² Filistéogosode ore chayóji dedáyode yúode uje íode u Gat, Ecrón ore, mu israélgosode, judágosode ore cháta rágaja ñane ome ore ga ore chinguirapísa dabijnanone aja ore yui, ga ore chucajningárome ore ga ore chujé ore aja ore idáyode udore yúode. Ga cachi ayoré chugode irágu dajéode udore jnese iji ore idai Saaraim jé aja filistéogosode idáyode Gat, Ecrón udore yúode to.

⁵³ Uje israélgosode ore cha dajocaningai unerai ome filistéogosode ga ore chajníja filistéogosode ore irengu casica ga ore chijna filistéogosode ore ugúchade jnese iji uté.

⁵⁴ David chijnoque Goliat gatoi aja darasade ore idai uje i tu Jerusalén jeta chingome darasade ore iji uté. Jé basa ga cho dajnéngu Goliat õrachade ga chicháji daguíjna cárpa ajei.

⁵⁵ Uje David quene jnome Goliat yui jeta chujé, ga Saúl catecã́ri soldádode ore eduguéjna cuchábi uje uté i tu Abner, ga chósi tome: "¿Ama jnacari uté danique írique?"

⁵⁶ Enga soldádode ore eduguéjna cuchábi uté chajnai ga chojninga: –Que yiraja danique gotique to, Yeduguéjná.– Saúl chojninga: –Aroque barótigaja soldádode jeta uñeque chiraja uté danique írique.–

⁵⁷ Uje David chujé Goliat ga chaquesu etabi ga chijna gatoi iji dajmainie ga chajni aja israélgosode ore irengúi. Abner chachai David ga chojningame: –Bo yico ga yijína ua aja yoqueduguéjna cuchábi Saúl yui.–

⁵⁸ Uje ore chise Saúl iguíjnai ga Saúl catecã́ri David ga chojningame: –Jnacare gatódabiá, ¿banique írique a?– David chatata dayé i ga chojninga: –Beléngosi Isaí ape yu. Ga dimane uté ome baroquéode to, Yoqueduguéjná.–