1 Samuel 16 - Dupade Uruode

Samuel chojne aseque puyai Isaí ujnacari David gatoi gai ujetiga úringai israélgosode eduguéjna cuchape pijoque

¹ Pangarádejnai Dupade chojningame Samuel: –¿Cho rique ujetiga aya báyuguhebátigadatéi ome Saúl uté? Bamo uje que yipota jetiga jé chajnera dáringai eduguéjna údi ome israélgosode. Jecute aya abóji uté ejode. Ga be aseque puyai pié ga ãrate jne ga ajnája ore idai Belén jne ga apúsi Isaí iguíjnai ome jne. Ga a aníraja uté abode uñeque ójo jne jeta israélgosode ore cho deduguéjna cuchábi iji uté.–

² Samuel chojningame Dupade: –¿Jé yorási ringome jeta yicáji uté? Uje Saúl a chududirase uje yanire aseque puyai aja yugúchade, ga a chiraja yibaguiédi gosi, ga chiroque darótigo aja yiquei enga chujé yu iji gosi yui.– Ga Dupade chojningame Samuel: –Be aquirájna ababía jne enga a ojningame ore jne: "Yise de gu jeta yẽcója Dupade iji de."

³ Enga abidi Isaí to jne jetiga chacásõra ua iji bẽrapaidé uaté aquirájna ababía arione gai to jne. Ga a yo baquigome basocárique yúrique jne. Enga anire aceite aja yojningai uté ójo jne jeta jé chopise eduguéjnane ore to.–

⁴ Samuel doi Pangarádejnai Dupade ojningane quigode ga chicáji ore idai Belén. Uje beléngosode ore angaránone jnanío chimo Samuel ga ore chachai iji garani. Ga ore dosóñime Samuel uje di iji ore, ga ore jos eti Samuel chatata ore bárique ome ore. Ga ore chojningame Samuel: –¿Ama cachi di ua ya? ¿Jeta adute pujnomérique ome yoque?–

⁵ Samuel chojninga: –Cachi di yu. Yipota gu jeta yẽcója Pangarádejnai Dupade iji uaquedai tudé. Beyoi israélgosode yoquisocabei to ga arúyo uacabáyode to ome yoquẽrapáidode udore yui. Ga ajínaño yu aja to jeta yẽcója Pangarádejnai Dupade iji uté.– Ga Samuel pusi Isaí iguíjnai. Ga chiroque ore aja jeta ore churu dabáyode to, Isaí, abode, ore jnese. Enga catecã́ri Dupade iji ore gari ga chiroque ore aja dẽrapáidode cucha jogadi jeta ore chacásãra iji uté.

⁶ Uje ore chise Samuel iji guẽrapáidode Dupade gajneque jogadi ga Samuel chajire Isaí abode ore jnese ga chojningame re: "A Pangarádejnai Dupade ajegaidi u Eliab uté ¡jõ! A israélgosode ore eduguéjna cuchape uté jne iji ore uniri tudé."

⁷ Mu Pangarádejnai Dupade chojningame Samuel: "Samuel á, jé ca ajiripise gosi abubíe, jeoga gosi enocha goningai. Uje que bojningai uté déji yajénique jeta israélgosode ore cho deduguéjna iji uté. Uje jnanione uacajirigode u uacojode ayoré ore ao guesíminóri, jé basa ga uyu ga yajiré u ore áyipie ujetiga áyipierãque gosi, jeoga áyipie noñaque gosi. Ga que cucha gosi úringárique ayoré uome gotique ome yu, jé aja gosi úringárique ayoré yoríco."

⁸ Uje que Samuel ajegaite Eliab ga dayé jnopo dajnacarode uñai údi aja Samuel rĩ uje uté i tu Abinadab. Mu Samuel jé isoca ga chojninga: –Que Pangarádejnai Dupade ajegaidi u gotique bajnacari uté.–

⁹ Ga Isaí dopoi dajnacarode uñai rĩ uje i tu Samai. Mu Samuel jé isoca ga chojninga: –Que Pangarádejnai Dupade ajegaidi upo gotique rĩ.–

¹⁰ Isaí chejna dabode aja Samuel uje gare ore iji ti yijmanai uñai. Mu Samuel chojninga: –Cáma Pangarádejnai Dupade ajegaidode u uñeque gotique.–

¹¹ Ga Samuel chojningame iji uté: –¿Ama jé ca bape uñeque cuse arĩa?– Ga Isaí chojningame Samuel: –Ore desábabi a qué dési siñeque uje jõra yocachidedie áyasai iji daté.– Ga Samuel chojninga: –Aroque ore aja ga ore tibidósi desábabi. Uje a quene yimáco yoquẽrapáidode udore ome Pangarádejnai Dupade jeta suté di to.–

¹² Isaí chiroque dajnacarode aja desábabi yui jeta ore diósi údi. Uje ore diósi údi iji Samuel, ga Samuel chajirósi suté ga uedie caratei ome guedé, mu disi ueradape suté. Ga Samuel jĩraque chichaga ome úringárique pasuté jeta israélgosode ore cho dasuté iji jne iji daniri. Ga Pangarádejnai Dupade chojningame Samuel: –Suté su yajegaidábi ga ayague jmame ga jĩraque ojne aseque puyai aja suté ójo jne. Ga úringai israélgosode eduguéjna pijoque.–

¹³ Samuel chijnime aseque puyai ga chaníraja disabi ójo uje iábi su David. Ga chaníraja iji uyade ore edominone jnese. Iji uté quigade ga Pangarádejnai Dupade Ujopié Espíritu Sánto chĩreta David ajei. Uje Samuel cha catecã́ri Isaí ore, ga chajniapója dedai te rĩ uje i tu Ramá.

David chisa dajocayai árpa nanique ga chijocase iji Saúl ejoi

¹⁴ Pangarádejnai Dupade chijnime Dajopié iji Saúl ga chṹra jmatai aja Saúl, ga chisi ome páyuguhebátigadatéi ome uté. Ga que Saúl tijínapo gotique to rĩ.

¹⁵ Ga Saúl iroguipísode ore cho dáyugu dasuté Saúl ga ore chojningame Saúl uté: –A Dupade u jõ, ujetiga chiroque pujopié noñángueraque aja ua jetiga pésu báyuguhebátigadatéode.

¹⁶ Jecute ajuégame yoque ga yucuegoi jnacánique jeta chiraja jeta chujé ore yugode árpa ga yijnángo aja ua iji de ga a chujé udore uñeque iji bejoi udé ga pujopié noñangue uaté a jnoji báyipie ga jé u jeta tijode chopo jnángome ua jne rĩ.–

¹⁷ Saúl chojninga: –Acueyoi gosi ga ajnáño aja de. Ga yajico jeta chijócãre pujopié noñangue iji yu ujeta chijocase dei tuté árpa iji yejode.–

¹⁸ Saúl irógode udore uñai chojninga: –Yiraja beléngosi Isaí ujnacarode uñai uje chirajapise árpa úringane chucho. Enga uté ujnomerãque ome pocaningárique yúrique uje que dosóñime cuchárique. Ga uje narare ga yirasique uru quigode ome cuchade uje susípise daruode guio ome dojode ayoré ore. Ga jnacare uerate uté. Ga obiréjnapise uje Pangarádejnai Dupade nóna uté aja quedéjnane to.–

¹⁹ Jé u uje Saúl chiroque darógode ore aja Isaí yui jetiga ore chingo Saúl uruode aja uté. Ga ore chojninga: "Saúl ajéode u que jetiga bajnacari David nóna yógaja yoqueduguéjnai iguíjnai ga doi uté iroquéode to. Yocojningai u bajnacare ejoi uje áyasadie irodisõre uté."

²⁰ Enga jé u uje Isaí chiroque David aja Saúl yui ga chisi ome Saúl gajnéone cucha ome. Ga gueranone u burica quedéjnami ga ore chadíja arurégode aja suté guidoboi, ga ore cháta víno pi chojmarai aja, jé aja áyasa quedéjna chocábi.

²¹ Ga David di ga jĩraque chingo raja Saúl ga chojninga: "Dimane yu ome baroquéode to." Uje David guejnane dire e orocoi iji Saúl gari, ga Saúl irasique David ga chojninga: "¡Yátajasórami su á!" Enga pésu ujetiga David nóna uté ga chijnoque Saúl õrachade gatuaque.

²² Enga jé u uje Saúl chiroque daruode aja Isaí ga chojninga: "Babi qué dóji yari iji de. Uje yirasique uté gu."

²³ Enga jecucha ate nanique uje Dupade utocaidi páyuguhebátiga di iji Saúl, ga David chisa dajocayai árpa ga chijocase iji Saúl ejoi enga Saúl áyuguhebátigai jé cho jnángome uté yui jocarane. Ga tijode cho pujnúringome Saúl.