1 Samuel 15 - Dupade Uruode

Dupade chijna Saúl úringai eduguéjna cuchape iji gari nanique

^1-2 Chise diri uje Samuel catecã́ri Saúl ga chojningame: –Uyu u nanique uje Pangarádejnai Dupade chiroque yu aja bei nanique jeta yojne aseque puyai aja bójo ome báringai israélgosode eduguéjna cuchape. Ga angarami yuru quigode jne ome ua uje bajnenie Pangarádejnai Dupade áyipie déji jeta qué yingo quigode ome ua. Ga Pangarádejna Dupa pujnuéngaisṍri chósi tome ua que: 'A yo yujuñame amaléquegosode jne uje yujnusinápisa gu uje yijnime israélgosode uacáqui cásodicáite ore iji Egípto nanique ga amalequegosode ore chãraque uacáqui cásodicáite ore uniri yui ome ore nanique jeta ore chajna dajeque ibijógode aja yui nanique.

³ Jecute beyoi ore jne enga ejnáño amaléquegosode udore ore jne enga jé ca amóño posongaquéringome ore jne. Ga ajéyo chequedíe, jnanione, disiode, disi pacucarámone ore jnese jne. Jé aja ore gachidode cucha jnese: aquirájnanie, áyasadie, burica quedéjna caméllode, burica quedéjnane ore jnese.'–

⁴ Saúl tibidi darasade ore ga ore chimáta ñane aja ore idai uje i tu Telaim ga chisecãru ore iji uté. Enga diguijnutíode soldácho ore chise 200.000 uje Saúl chisecãru ore. Jé basa ga judágosode ore chise 10.000 uje ore cháta rágaja Saúl isoldádode ore to.

⁵ Saúl quítequiguíji amaléquegosode ore eduguéjnane idáidatéi. Ga Saúl pésu darógode ore jochai iji tié jochai ejoi ujeta dimane ore ome dajocaningai yui.

⁶ Saúl catecã́ri quenítagosode ore eduguéjnane ga chojningame ore: –Amátayo uacarásarigo ore iji amaléquegosode ore ujade jne ga angaráño uacajogatíguiji ore dosatique jne jeta jé ca yátago uágaja ore to. Uje uacajuso yocáquiode ore guio nanique uje ore jnoji Egípto nanique ga que ãrácho uacaniri ome ore to nanique.– Ga jé u uje quenítagosode ore jnoji amaléquegosode ore ujade nanique.

⁷ Ga jé u uje Saúl ore chachẽre amaléquegosode iji ore unirone udore ga ore chachẽre ore iji ore idai Havíla ga ore chose ore iji ore idai uñai uje i tu Shur. Ga ore idai uté déji egíptogosode ore uniri pijnanai. Ga ore chejnápise amaléquegosode ore iji udore.

⁸ Ga jé u uje Saúl ore chisa amaléquegosode ore eduguéjna cuchábi uje i tu Agag. Jé basa ga ore chujé uté isoldádode jnese ome daqueséode, enga que uñeque chapite gotique.

⁹ Mu Saúl, ore chicha ore eduguéjnai Agag aja diri. Ga adi jé u ome uté ugúcha arégode, ga Saúl ore cho dajnéngu ore ugúcha ujñapetade. Jé aja ore gachidedie aquirájnai, jé aja aquirájna choquíode, jé aja aquirájna pariguéjnane uje urojna. Jé aja áyasa urojnanie to. Jé basa ore chujé cuchisode uñane uje que bisitique pijoque.

¹⁰ Ga jé u nanique uje Pangarádejnai Dupade catecã́ri Samuel.

¹¹ Ga chósi tome nanique: –¡Chimo jóroque re uje yipésu Saúl úringai eduguéjna nanique! ¡Que yipésu iji urasade uñeque nanique! Mu que dopísi yuru quigode gotique.– Pangarádejnai Dupade uruode jé jogate Samuel ajei iji dejai údode. Jecute catecã́ri Dupade ome Saúl iji dejai údode uje cáma chiraja Saúl bárique gu.

¹² Iji durasé ga Samuel chobéri Saúl yui jeta chise. Uje catecã́ri ore ome Saúl jogatique ga ore chojninga: "Ore jnome cucarani que uje i tu Carmel. Uje a pésu dajnetique túnucojna ome re iji uté jne. Mu quigade enga ore jnome ore idai Gilgal yui."

¹³ Ga jĩraque Samuel chucué Saúl iji ore ojningai Gilgal uté. Uje diji Saúl ga Saúl chojninga: –Pangarádejnai acacarani dedugate u ua, Samuel á. Unere bei jeta ese yoque iji de. Uje e yimate Pangarádejnai Dupade ojninga casodé cucha jnese jeta yipésu ga achietai yu to.–

¹⁴ Samuel chojninga: –¿Cuchárique u a uje yudute to? Uje cho bee, bee. Uñai uje chopo buu, buu rĩ. Angaripísi udojo, uje a aquirájnanie, áyasadie ore u ¡jõ!–

¹⁵ Saúl chojninga: –Yoquisoldádode ore chejna amaléquegosode diríca mu ore chijna ore gachidé aquirájna urojnanie gu jeta yẽcome Pangarádejnai, bangureni Dupade, jé aja áyasa urojnanie to. Jé basa amirone ga yujégo udore jnese.–

¹⁶ Mu uje Saúl qué déji daruode gai ga Samuel chojninga: –¡Aya dara! A yatata Pangarádejnai Dupade urúiso jne iji dejai tuqué ome ua.– Ga Saúl chojninga: –Be, ga atata quigode ome yu.–

¹⁷ Ga Samuel chojningame: ¿Ama jé ca ajnusina baru casodica to a? uje bojninga ica: 'Que yugúsiji cuchárique mu a jé Dupade ajegaite yu.' Mu Pangarádejnai Dupade ajegaite ua ica jeta israélgosode ore cho dangaráni iji ua jnese iji ore uniri údode jnese. Jecute chiroque yu aja bei ica jeta yojne aseque puyai aja bójo ica ga báringai eduguéjna cuchape pijógome israélgosode ore.

^18-19 Pangarádejnai Dupade uté chiroque daruode aja ua diríca ga chojningame ua: 'Boyo ga ejnáñopise amaléquegosode udore ore jnese jne, jé aja ore gachidode cuchiso udore jnese, uje ore pésu yujuredie gatuaque gu. Ga jé tiógara jeta ore cho daba dasijnaringuéone udore.' Mu ¡chimo jóroque re uje uacajnáño ore gachidé aquirájna urojnanie que, jé aja áyasadie, ga oyo uacajnecho iji udore, ga gajnareque uacadode udore uje uacapéso iji Pangarádejnai Dupade edominone!–

²⁰ Saúl narare dabai ga chojninga: –Cachi yiji Pangarádejnai Dupade uruode jnese uje ojningane u ome yu gu. Ga yejna amaléquegosode ore jnese, mu gusu yiquetai u ore eduguéjnai Agag ga yujuco uté gai iji yoquidai tudé.

²¹ Mu yisoldádode oidedie ore gachidé aquirájna urojnai udire ga que ore chijna gu jeta ore chachia, mu ore gaidi u ujeta yẽcója bangarádejnai Dupade ome udire iji ore idai Gilgal, jé aja áyasa urojnanie ore to.–

²² Jecute Samuel chojninga: "Pangarádejnai Dupade irasique yoqueranone cuchiso to uje yibocome, mu irasi tupúsu jeta angoninguite guesaque yógome gatuaque. Cucha oreranguipísi u gu ome Pangarádejnai Dupade jeta yangácoi uru quigode, jé basa ga Dupade irasique yoquisocade udore ome yoqueranone cucha jnese. Unere yoquigode cuchiso urojnane udore ai ome Pangarádejnai Dupade, mu uneripísi u ome uté uje chimo yocangoninguite guesáringane ome re, ga sué dosipeque urojnane gai ome Pangarádejnai Dupade uté.

²³ Mu yojningame uaque ujetiga gosi chetingare pujopié noñángueraque ga gajnarénguipíse uaque gosi ome Dupade. Mu pisijnaringuédatéi déji uje suépise udore gai jnese. U ujetiga gosi tagu Pangarádejnai Dupade uruode aja, ga cuchadatei tupúsu uté ome Dupade. Gajnareque uje ore cho dupade iji ayoré gajnúone ga ore doi dangurenone udore adode. Mu cuchiyi tupúsu gosi jeta chiraja Pangarádejnai Dupade uruode mu chó gai, ga gosi pésu pisijnaringuédatéi ome Dupade. Saúl á, bayópise Dupade uruode quigode gai ome ua, jecute a Pangarádejnai chijna báringai eduguéjna cuchape iji bari jne."

²⁴ Jecute Saúl chojningame Samuel: –Jé ũré ua uje yiyó Dupade uruode gai que, ga que yi bojninga casodé quigode gu uje yitodo yurasade ore uje ore nóna yu aja yoquijocaningai que. Ga ore chiroque yu aja cuchade udore. Jecute yipésu ore ojningane cucha udore.

²⁵ Mu yósi tome ua Samuel á: be ga acadígui yate gajnaréngone udore ga ajína yu ga yajníngo yocurasade ore gai, uje yigaidi tu gu ujetiga yicota Pangarádejnai Dupade ga yichaga yigataidie aja jnumi iji uté iquei jne.–

²⁶ Mu Samuel chojninga: –Que toque jeta yijína ua. Uje bagu Dupade uruode aja gu, ga Dupade chijna báringai eduguéjna iji bari ome israélgosode ore, ga que toc jeta yijínapo ua aja quedéjnane rĩ.–

²⁷ Samuel e jnorásome dajesui jeta chajni, mu Saúl chijnorapise ga chigaru Samuel ga chisa oidi eruei iji quigade mu chajnangarase.

²⁸ Ga Samuel chojningame Saúl: –Dupade isocai a jé u to uté ome ua to jne. Uje bajnangarase yoidi pei ga bajna bajnangarañapídi uté, ga imoi jé u ua uje Dupade a chajnangarase báringai eduguéjna jne ga chisi ome barása ujñapetátique jne uje uté suépise babai ome dadode.

²⁹ Uje Dupa Ingoningarãi tu israélgosode yocangureni uté, ga que cho darupatáringa to gu. Ga que chécãrapo dáyipie quitique rĩ. Uje que cho jnanione uyoque gu uje yĩ́caco cuchárique jeta yipéco dirome, ga jĩraque yecãco yocáyipiedie quigode ga yocáyipie bajedie e noñaji. Mu Dupade ga chĩ́care cuchade ga que chécãre dáyipie quitígome cuchárique.–

³⁰ Enga Saúl chojningame Samuel: –Cachi jé ũrépise yu uje yadode gajnarécho que ome Dupade. Mu uje yugúcoi ñane gari iji israélgosode ore yocayode ore iquei iji de, mu yijócha bajei údi jeta jé ca ango yu aja ore jne ga a jé ore cho deduguéjna cuchábiji yu jne. Enga ajína yu aja ore ujetiga yicota Pangarádejnai, bangureni Dupa, iji uté.–

³¹ Ga jé u nanique uje Samuel nóna Saúl ga ore chajni to. Uje ore di, ga Saúl chicota Pangarádejnai Dupade iji uté.

³² Udojo quigade ga Samuel chojningame ore: –Beyoi amaléquegosode ore eduguéjnai Agag enga acháji yiquei.– Ga ore di eduguéjnai Agag údi iji Samuel ga que chuseque re iji Samuel iquei. Jos eti dajnei pitoringa noñaque e bijname uje que ore chujé uté míraque gu ga jé u uje que todo Samuel yui gotique.

³³ Mu Samuel catecã́ri ore eduguéjnai Agag ga chojningame: –Sijnanguipise ua ica, ga jiépisi begode ga jecucha bajna bajnosocoi ome ore ica ga chequedíe jiépisi to uje que ore chimópo datígo rĩ, ga gose ua ica. Ga a jé yicoi basocai to jne ome baté.– Uje Samuel cha catecã́ri Agag uté, enga chisa daquesei ga chichagu amaléquegosode ore eduguéjnai ome. Ga chajugája jnumi iji ore idai uté uje i tu Gilgal iji Pangarádejnai Dupade iquei.

³⁴ Quigade ga Samuel chajníja ore idai Ramá, jé basa Saúl chicáji daguíjnai uje déji dedáidatéi Guibeá.

³⁵ Enga Samuel que tibágapoi Saúl rĩ jeta chidójnanga uté, enga jé chuságaja aja uté itoringai. Mu Samuel chopise dáyugu uje Dupade chijnime Saúl uté iji úringai eduguéjna, enga poji ejode gatuaque. Jé basa ga Pangarádejnai Dupade chopise dáyugu re to uje ipesute Saúl úringai eduguéjna nanique.