1 Samuel 14 - Dupade Uruode

Iji Jonatán ore jocaninga bajai ga ore yugode chise 20 iji filistéogosode ore nanique

¹ Iji dirode uñai ga Jonatán, Saúl abi, chojningame daroguipísi uté: –Yicoi ga yicagóji yote quedéjnai uéchamitó jetiga yoco yoquijocaningame filistéogosode isoldádode ore idai uje udore ore irodi tu daniri eruei.– Mu Jonatán que chingo udore aja dayé gotique, ga cãra dáyipiedie ome dayé.

² Saúl, jorane soldácho ore uje 600 u ore, ore chicha darengúi taja oroné gaté. Saúl iguíjnai déji pore querua údi uje ore tagu uaté adie to, ga idógosiji ore urasade ore inasupídi ejoi uje ore chinasu dacade trígo iji uté.

³ Enga sacerdote nóna Saúl ore aja quedéjnane to nanique ga uté tujúna efod uje jnani bajai Aarón ujũte to nanique. Ahitob ujnacari tu sacerdote uté uje i tu Ahías. Ga udore ore gãrapi tu jnani bajai Elí nanique. Chamáñaje Elí uté ujnacari Finees ape gaté Icabod, jé basa ga Icabod ájnape Ahitob uté nanique. Saúl, jorane ore que ore chiraja uje Jonatán, jõrai ore jnoji ore ujade.

⁴ Uje Jonatán e ore chimate raja yote quedéjnai uéchai ga ore jnome filistéogosode ore yui, ga ore chicáji cucaranone ujai uje ore pésu cucaranone udore íode to. Ore chojningame uñai Bosés, jé basa ore chojningame jõrai Sene.

⁵ Uñai déji casaque garani yui iji ore idai uje i tu Micmás tiógarei. Jé basa uñai déji umusoi garani iji ore idai Guibeá iquei.

⁶ Jonatán chojningame dajõrai: –Bo yico, ga jé yucuegoi dupa quedéjnane anguresórone udore ore irengúrique ga yejnángo ore jne jeta Pangarádejnai Dupade ajéo ome yoque. Que cucha gotique gu ome Dupade jetiga jiei ayorérigo, jeoga garósi ore uje a chisi ome ore úringane pujnuéngaisṍre ome gosode ga gosode sué dajocaningai gajnéone ore gai gu Dupade.–

⁷ Jonatán jõrai chojningame: –Jonatán, jé be báyipie quitic ome yoque. Uje dimane yu gu ome baruode jeta yi quitígo. Bo, ga yico.–

⁸ Jonatán chojninga: –Yico ga yicagóji filistéogosode udore ore jogapié oroné yui iji uécha uñai. Ga jé dóji ga a ore pañaji yoque aja dei.

^9-10 Ujeta ore chimo yoque jne ga a ore chojningame yoque jne, "Ácayoji uáguiji te jeta yibájoi uáguiji uacayaridi uté." Ga a yiroco ore iji uté. Ujeta ore chojningame yoque jne, 'Ocho to ga abáchoi yoque,' ga jé u jne jeta yibájoi ore ga ja seca Dupade tẽra yocúringáringo pujnuéngaisóño ome yoque jne.–

¹¹ Ga Jonatán ore jno ga que ore pógu re ome filistéogosode gotique. Ga filistéogosode ore chujñieta ore ga ore chojningame ñane: "Cajicho israélgosi casodé ore to uje quene ore doi guesi iji dacoyapídode uje ore todo yoquíode diríca."

¹² Ga jĩraque ore tibite Jonatán, jõrai ore gai ga ore chojninga: –Ocho to ga abáchoi yóguiji de. Ga yingongo cuchárigaja uaque jne.– Ga Jonatán chojningame dajõrai: –Jé bajogate yiquigade jne uje a Pangarádejnai tẽra filistéogose pajnotágode udore ome yoque gajiné.–

¹³ Jonatán ore choru oroné uaté to ga ore tecu aja gaté. Uje e ore chise gaté ga Jonatán jĩraque chisa filistéogosode ga chinguíra ore aja jnumi, ga jõrai chigota filistéogosode iji quigade.

¹⁴ Ga Jonatán ore jocaninga bajai u uté ome filistéogosode. Jonatán, jõrai que ore chejna deréjnarique ome dajocaningai mu jé ore yugode chise 20 iji filistéogosode ore.

¹⁵ Ga filistéogosode uñane uje qué ore déji darengúi ga ore chudute ujnomei ga jé u uje jõcaratade udore ore todópisa. Ga igasique ga jĩraque jnumi tãrarápo rĩ ga chõre filistéogosode ore úringane tãrarachucho gaté.

¹⁶ Ga jé u uje Saúl chiroque darógode uñane aja ore idai Guibeá yui jeta ore timíninga filistéogosode ore aja quedéjnane. Ore chimo filistéogosode ga ore chacája ñane ome dáringane bayácho.

¹⁷ Ga Saúl chojningame darógode uje ore déji gari: –Ajmita yocurasade ore jeta yugúcoji udojo jnese.– Ore chajire ore ujade mu que ore chimo Jonatán, jõrai ore gotique to.

¹⁸ Uje sacerdote bajai Aarón gajnei efod déji ore jogadi uté nanique ga ore eduguéjna cuchábi Saúl jĩraque catecã́ri sacerdote Ahías iji diri tuté enga chojningame: –Aguito ga be bajúni efod uté ga acatecã́ri Dupade ome yoque jne jeta yirajágo áyipiedie quitígo ome yoque.–

¹⁹ Uje Saúl qué catecã́ri sacerdote ga ore chayója Saúl ome dojñane uje filistéogosode jé isoca uje ore chacája ñane ome dáringane bayácho. Ga Saúl chojningame Ahías: –Qué dóji uje que deréjnarique cusapo gotique rĩ uje filistéogosode e ore chijna dagajñunie aja dajesúode gu ga a yicoi ore jne.–

²⁰ Ga Saúl chimáta dasoldádode aja ñane ga jé u uje ore jnome pocaningai yui to. Uje filistéogosode ore tṍra rome ñane ga jé ore yuque ñane aja dajesúode uje que ore chirajápo dajõrárique iji uñane ujade.

²¹ Israélgosode uñane iyajmaque ore iji filistéogosode ore ujade ga ore nóna ore isoldádode aja quedéjnane to. Mu uje ore chimo uje Dupade e chisi ome israélgosode ore úringane pujnuéngaisóño ome ore ga jĩraque ore cháta raja dojode israélgose to ga jé u uje ore chujé filistéogosode to.

²² Israélgosode uñane uje qué ore déji dacoyapídode iji cucaranone ujade iji efraíngosode uniri ajei, ga ore chudute to uje filistéogosode e ore chayome israélgosode ga ore doi guesode iji dacoyapídode ga jé u uje ore doi ore to jeta ore cho dajocaningame filistéogosode ore to iji te.

²³ Israélgosode ore chose filistéogosode ore iji ore idai Bet-avén uécha uñai. Ga Pangarádejnai Dupade chisi ome israélgosode ore úringane pirosobácho ome ore iji uté.

Saúl chãraque cucha pibotígo ome darasade ore jeta ore tagu jé aja guedéjnoringái

²⁴ Mu uje israélgosode ore cha dajocaningai ga jé u uje ore chiraja peyutiguei ome raque. Ga que uñeque tagu dabotique iji deréjnai údode. Uje Saúl chojningame darasade ore gu: "A yo yurúja uaque gosi gajiné ujetiga cha dajocaningai ga jĩraque gosi chucué dabosode cucha pibose jé aja jeta yiyágo yoquijocaningai ome filistéogosode udore ore iji guedéjnoringái."

²⁵ Uje Saúl jorane ore chise garai ajã́ro ga ore chise cutepei iji uaté edúdi, mu que toc ujetiga ore chipese uje ore todo Saúl yui gu.

²⁶ Uje Saúl jorane chacája ajã́ro uaté mu ore chajire dádi mu ore chimo cutepei uqué iji ga chayója dajesui ga cho yodode aja dajesui mu que ore chajire yúrique ga que uñeque chetingare rĩ uje ore todo Saúl yui gu.

²⁷ Mu Jonatán que déji to uje dayé pésu daruode udore, ga chajire dádi mu chimo cutepei ducudade iji ga chisa dasõre ga chichagu ome jeta tagu dajnimipítique. Ga jé u uje Jonatán chisápo detotiguei rĩ uje chipese cutepei gu.

²⁸ Mu soldádode uñai chimo Jonatán ga chojningame: –Jonatán, bayé chãraque cucha pibosode ome yoque que jeta yajo. Uje a cho darúja yocuñeque jeta gosi tagu dabotique. Jecute eyuque yoque jnese.–

²⁹ Ga Jonatán chojningame soldádode udore uruode: –Ise mu gajnarénguei iapade áyipiedie udire ome yocuniri irodisórone soldácho. Jecute eyuque uágome uacayaguhei, mu uyu ga yipese cutepei que ga uacamóño yu uje ijõre yu.

³⁰ Mu ujeta achórasu uacabotígo enga anguírañorása filistéogosode ore gatoidie aja ñane que ome cutejmai uaquetotiguejna. Uje uacajnáño uaquegode udore ore posode mu que acho gotique uje uacatodóyo iapade uruode gu.–

³¹ Diri uté u nanique uje israélgosode ore socárome filistéogosode iji dedai Micmás ejoi, ga quene ore cha ore iji dedai uñai ejoi uje i tu Ajalón. Uje israélgosode ore cha dajocaningai ga eyuque ore.

³² Uje ore cha dajocaningai ga ore chujé aquirájnanie uje filistéogosode ore gachidei, jé aja áyasadie ga udore ore tagu ore yuguedie udire iyode gai.

^33-34 Ga soldádode uñane jĩraque chingo Saúl ga ore chojninga: –Yocurasade uñane ore adode gajnarécho ome Dupade ga ore chujé filistéogosode gachidode aquirájna ga ore tagu iyode gai, uje que pisoca udore ome israélgosode ore uyoque mu.– Enga Saúl chojninga: –¡A ajnícho Pangarádejnai Dupade ájningane ome yoque jne, enga máraque soldádode uaque ome uté uje uacacho cuchisode udore iyode aja gu! Beyoi cucarané cucháberaque ga ajnáño aja ne jeta yujégo uacasaguedie áyasai udire iji cucarané uaté gai uje a yójnengome udire iyode bajaque jne, jé aja uacasaguedie aquirájnai to. Yigaidi u jeta ca apéso yoquibárique ome Pangarádejnai Dupade uje uacacho aquirájnanie udire iyode aja.– Dejai tuté jé u uje israélgosode ore jno dasagode tóro údi aja cucarané uaté gai jeta ore chujé udore iji cucarané uaté gai.

³⁵ Saúl pésu daseradéjnai ome Pangarádejnai Dupade iji uté, ga ipesute bajai quene u daseradéjnai uté ome Dupade.

³⁶ Enga Saúl chojninga: –Yico gajiné ga yajnángopo filistéogosode jne rĩ jeta yejnángo udore ga jé ca yopo ore amire jne rĩ.– Ga ore chojningame Saúl jnese: Jé be bajequitígo jeta omome ua ga a jé yajnángo baquigade iji uté jne.– Mu sacerdote chaquĩ́ra Saúl ga chojninga: –Cucha bajai tu jetiga yucuegobi Pangarádejnai Dupade áyipie quitígo ome yoque bajaque.–

³⁷ Ga Saúl catecã́ri Dupade ga chojninga: –¿Ama jé omome ua ya jeta qué yico filistéogosode údi iji dejai tudé? ¿Ujeta jé yico ore údi ga ajuégarása ore ome israélgosode ore, uyoque jeta yujnuéngo ore gai?– Mu que Dupade chajnai Saúl catecãraitigade gotique iji dejai tuté.

³⁸ Enga Saúl tibidi darasade ore asutedie ga chojningame ore: –Dacasutedie uaque á, ajoso gadoi ga acueyoi gosi uje a pésu cucha gajnarétique iji diri tudé uje Dupade que chajnai yu gotique.

³⁹ A yujé yocurása márai tuté gosi jne. Ujeta yujnacari Jonatán u marínga, a jé yujé uté jne. Uacamóño uje israélgosode Yoquiquetangóri Dupade e chiqueta yoque que. Enga Pangarádejna Dupa Uecai uté u uje tangári yuru quigode ga que toc jeta jé ca yi yuruode ome gosi jeta yujépise gosi.– Mu soldádode que uñeque chatata gotique, uje ore pógu Jonatán ome dayé gu.

⁴⁰ Jecute Saúl chojningame israélgosode: –Apéso uacajochatígo ga eduyo uáguiji uacajochai uté. Jé basa yabi Jonatán, uyoque yedugo yóguiji yoquiyaridi udé.– Enga soldádode ore chojninga: –Be arétiguiji pisocade udore.–

⁴¹ Enga Saúl catecãrápoi Dupade rĩ ga chojninga: –Pangarádejná, israélgosode Yocangureni Dupá, ¿jé gotique uje que achajnai yuru quigode gotique que? Uje baroque yu mu. Angoma máratíque aja yoque uje a yicoi cucarané puyedie ome ñane jne. Ujeta sacerdote chájĩ udire jne enga a ijnimi u cucarané uje i tu Urim jne ga obiréjnapise jne uje márai tu yabi Jonatán, jeoga uyu. Jé basa ga a ijnimi u cucarané uña jne uje i tu Tumim ga obiréjna ujeta márane u soldádode uñeque iji yocujade.– Uje ore doi cucarané puyedie ga ijnimi u Urim ga jé u uje ore chiraja uje Jonatán, dayé uñeque a u máratíque.

⁴² Enga Saúl chojningame Ahías: –Be ga apésapo rĩ ome yabi, uyoque jeta edu yoque ome udire.– Enga Ahías doi Saúl uruode ga chijnimápo cucarané uña mu obiréjna uje Jonatán jé u márai.

⁴³ Ga Saúl chojningame dabi: –Atata batígo ome yu, ga ca apógu basijnaringuérique jne.– Mu Jonatán que narare dabai gotique mu jĩraque chatata dasocai ome dayé ga chojninga: –Uje yimo cutepei ducúdai iji jnumi que ga yichagu ome yasõre que ga yetingare que. Ga yugúsi de jeta yitoi jeta yo yiba uté.–

⁴⁴ Ga Saúl chojninga: –¡Dupade doi ga cho dajocaningame yu jne, jeta jé ca yujé ua iji diri tudé, Jonatán!–

⁴⁵ Mu soldádode ore charatáyime Jonatán ome chutique ga ore chojninga: –Cachi yujnuéngo filistéogosode ore gai gu Jonatán uté que, uje jõcarataque bajai u ome filistéogosode ga chinguíra pisadodéringai aja filistéogosode ore que uje ore chayome yoque que. Ga que toque jetiga uté toi, ga a jé ca yujuéjo jetiga pijnimé Jonatán uté gaterero chojmarátaque iji gatui. Uje uté adode iji diri tudé ga yirajágo uje a Dupade guẽracho uté isocade ome uté jé iji diri tudé.– Ga jé u uje soldádode ore chaquĩ́ra Saúl ome dajnacari Jonatán ga Saúl cha dájningai ome uté to.

⁴⁶ Enga Saúl ore cha chajna filistéogosode ore ga filistéogosode ore chajni aja daniri.

⁴⁷ Ga Saúl jé chajnera dáringai dacasuté údi ome israélgosode ore iji daniri. Enga jé isoca uje cho dajocaningame israélgosode ore umajosórone. Ga cho dajocaningame moábgosode, amóngosode ore, jé aja ome edómgosode, jé aja ome sóbagosode ore eduguéjna cuchábi, jé aja ome filistéogosode ore to. Ga Saúl sué damajosórone udore ore gáyode jnese iji dajesúode erámio nanique.

⁴⁸ Saúl chimáta dasoldádode aja ñane ome amaléquegosode ore uague dipesábidie yúode to uje jecucha ore pésu pocaningane ome israélgosode ore gatuaque gu iji udore, udore. Ga israélgosode ore sué jõcaratáguebebóde sudore ore gai ga ore cha cho dajocaningame israélgosode ore.

⁴⁹ Israélgosode ore eduguéjna cuchábi Saúl ujnacarode gadioque ore nanique ga ore íode u udojo Jonatán, Isúi, Malquisúa ore. Jé basa urodie gare ore ga bajé i tu Merab, jé basa ejo i tu Mical.

⁵⁰ Saúl acoté i tu Ahinoam nanique ga jnani bajai Ahimaas uro uaté. Saúl isoldádode eduguéjna cuchábi i tu Abner, ga uté dai i tu Ner nanique. Enga Saúl daquerãpe Abner uté to.

⁵¹ Saúl dayé, Abner dayé jé ore u ñane ga jnani bajai Abiel ujnacare ore jnese. Saúl dayé i tu Cis nanique, jé basa Abner dayé i tu Ner.

⁵² Saúl cho dajocaningame filistéogosode nanique ga jé chuságaja deruénique ome dajocaningai. Uje filistéogosode ayoré dicase ore gu, jecute que ore chibéro rome dajocaningai ome israélgosode ore nanique. Enga jé u uje jecucha Saúl chucué jnacáningo iji darasade ujade uje dicasepise ore enga que ore dosóñime pocaningárique yúrique. Saúl cháta udore ore aja re ome ore úringane soldácho, jeta dimane ore ome filistéogosode ore yúode gatuaque.