1 Samuel 13 - Dupade Uruode

Filistéogosode, israélgosode ore doi pocaningane ome ñane nanique

^1-2 Saúl e chise dáringai jnacare urẽjapise ga úringai eduguéjna quene pijoguipísiji ome israélgosode ore. Saúl guejnanie siquerei qué garósi ome dáringai eduguéjna nanique ga chucué dajegaidode iji israélgosode ujetiga soldácho ore, ga ajegaidode chise 3.000. Jé basa chiroque amirone iji jnanione udore aja ore iguíjnane jeta ore chajni to. Ajegaidode uñane uje ore chise 2.000 ga ore chácariji Saúl gari iji ore idai Micmás uje idógosi ore idai uté iji cucarani uje i tu Betel. Jé basa chiroque uñane aja dabi Jonatán quigade uje 1.000 u ore, ga ore chácariji ore idai uñai uje i tu Guibeá uje uté déji benjamíngosode ore uniri ajei.

³ Uje Jonatán, jorane soldácho ore chise Guibeá ga ore quítequigája filistéogosode ore isoldádode idai uje ore chirote daniri eruéode gu. Ga ore chejna filistéogosode ore jnese iji uté. Uje filistéogosode uñane chudute udore ujnomei ga jĩraque ájningarãque ore. Enga Saúl chiroque darógode ore aja dabuchugode jeta ore chubúchu iji darasade idáyode jnese. Ga ore naráraja dabuchugode udore jocarane ga unirisórone ore chiraja uje filistéogosode ore u ore júdode.

⁴ Israélgosode ore chudute jnese uje ájningaránguipíse filistéogosode ome israélgosode gu uje Saúl ore chejna ore isoldádode iji ore idai Guibeá ejode, ga jé u uje soldádode iji israélgosode ore ujade jĩraque ore chimáta raque enga ore jnome ore idai uje i tu Gilgal jeta ore cháta raja deduguéjna cuchábi Saúl iji ore idai uté.

⁵ Mu que gusu israélgosode uje ore chimáta ñane, mu filistéogosode ore chimáta ñane to ga ore pésu dadode ome pocaningai yui. Ga filistéogosode ore chimáta guebéquedaté pocaningai gajnéone ga chise 30.000. Buricade orusórone ore chise 6.000. Jé basa diguijnutíode soldácho jiépisi ore ga que pirajaque ore batigai ga ore chopise yote quedéjnai ãri uné dipesábidie. Filistéogosode ore jnome israélgosode ore yui iji ore uniri ga ore chicha darengúi aja ore idai Micmás ejoi. Ga ore irengúi déji guedé garani yui iji ore idai uñai uje i tu Bet-avén.

⁶ Uje israélgosode ore chimo dagaisórone udore ore betígajnai ga jĩraque ore chajuque re iji ñane iji ore iquei ga ore chayome damajosórone udore ore. Uñane chacája jnup edodie, jé basa ga uñane choru cucaranone ga ore chácariji udore ójo, jé basa uñane chijócha erugode ga ore chacája erugode ajéode, ga ore pógu ráguiji udore ajéode.

⁷ Jé uñane chicáji yote quedéjnai Jordán uéchamitó ga ore chijna dagajñunie aja gádgosode ore idáyode, jé basa uñane chicáji ore uniri uñai uje i tu Galaad. Mu Saúl qué chácariji dedai uje i tu Gilgal ga nóna darógode soldácho iji uté, mu ore agutedie cho túcutúgome dasadodéringane ome filistéogosode ore yui.

⁸ Samuel chimate dáyipiedie ome Saúl jetiga ore chirote yui iji ore idai Gilgal uté ga chise ore iji uté to jeta dirode gare iji ti. Mu uje e chise Samuel ojningane dire mu Saúl jnátu jórogu Samuel yui jeta chise ore. Uje Samuel qué sase ga Saúl jorane ore jno, jno ga Saúl todo jeta ore chejna raja doi ga íjnoque irotangónique jne ome filistéogosode.

⁹ Uje Samuel que di ga Saúl chaquĩ́ra darása dode ga chojninga: –Samuel que di mu, jé arec jeta beyoi yocachidode uñéngo ga yẽcome Dupade jne, ga a yẽcópo uñéngo ome Dupade rĩ, jeta Dupade yocajei cho sere ome ñane jne.– Ga ore di dachidode údi ga Saúl cho sacerdote iji re ome udore, ga chibore cuchisode ome Dupade.

¹⁰ Uje Saúl quene chimate udore ga jé u uje Samuel quene di to. Ga Saúl chachai Samuel iji garani, ga nína Samuel diringai.

^11-12 Samuel chojninga: –¡Chimo jóroque re uje bo sacerdote iji ua ga bapésu udore!– Mu Saúl chojningame Samuel: –Yipésu que gu uje yocurasade e ore chacho bei que ga e ore jno, jno. Jecute yipésu yoquẽrapáidode ome Dupade ujetiga qué ore chácariji yocari to iji de. Mu cuchade jõrai tupo rĩ uje filistéogosode ore chimate rome yoqui iji ore idai Micmás uté ga e idógosi ore iji yoque iji yoquijogadi udé iji ore idai Gilgal ejode. Yijos eti yigáchogoja deréjnai tudé ome filistéogosode ore que gu uje cáma yingongaco yógaja Dupade. Jecute yojningame yu que: 'Yi ga a uyu u jne jeta yipésu yoquẽrapáidode udore jne ome Dupade uje que Samuel di gu.'–

¹³ Samuel chajnai Saúl uruode ga chojningame: –¡Bapesudode udore que garani tu báyipie omenie gotique, mu garani tu báyipie gajnarénguenie arĩa! Uje bangureni Dupade uruode u diríca jeta arodipise gadoi ome udore mu que be Dupade uruode quitique gotique. Ujetiga bepisirási Dupade uruode quigode diríca, ga a Dupade pesurásu enga jé bajogate báringai eduguéjna gatuaque iji israélgosode ore ujade.

¹⁴ Mu Pangarádejnai Dupade a chicha jnanione uñeque aja bajogadi jne ga báringai eduguéjna cuchape eruei tu. Ga ojningai tuté jnani a Dupade irasiguipise re ome ate oníngo jne. Enga a Dupade chingongara dajegaidi uté jnani aja darasade israélgose ore jne ujetiga ore cho deduguéjnai iji uté iji bajogadi. Pangarádejnai Dupade chetaque gu uje baraja uruode quigode diríca uje e yingo ua diríca, mu que arote gadoi ome gotique.–

¹⁵ Ga jé u uje Saúl, Samuel ore cho jmíti, jmíti ome ñane ga Samuel chajníja dedai. Jé basa ga Saúl, jorane soldácho ore jnome filistéogosode ore yui. Ga ore chise ore idai uje i tu Guibeá uje uté déji benjamíngosode ore uniri ga Saúl chisecãru dajorane soldácho iji uté ga ore chise 600 nanique.

¹⁶ Saúl, ujnacari Jonatán ore chácariji ore idai Guibeá jnese ga ore nóna darógode ore iji uté. Jé basa filistéogosode qué ore déji dapáringai darengu iji ore idai Micmás ejode.

¹⁷ Filistéogosode ore jnome dajocaningai ga ore chajuque re iji jnumi. Ga ore quigode gadioc. Uñane chicáji israélgosode ore idai Ófra yui uje ore idai uté déji ore uniri Sual ajei.

¹⁸ Jé basa uñane ore chicáji israélgosode ore idai uñai uje i tu Bet-horón. Jé basa uñane ore chicáji erãpetarei yui iji puniri tuté eruei, ga ore choru edógai jeta ore chácariji turéjnai edógai tuté iji gaté uje turéjnai tuté i tu Zeboim.

¹⁹ Uje qué israélgosode ore déji filistéogosode ore jmainie nanique ga filistéogosode ore chãraque asõre potedie ome israélgosode ore nanique, jé aja jnosocode úringáringo pipesucho to rĩ. Ore chãrácapo rĩ jeta gosi cho dasaque cucha pisaguíji guebéode udore nanique ga que ore juéga ome ore jeta israélgotique doi ga chata dajorángarãtic, jeoga daquesérique. Ga filistéogosode ore chojninga: "Yãrájo ome ore gu uje a ore chãra re iji dejnane erásorone gu, mu a ore pésu dõrachade iji udore gu."

²⁰ Uje israélgosode ore guejnane erásorone paca ga ore jno údi aja filistéogosode uñai uje isai u guebéode úringane patácho, ga ore chimate uté jeta chatape ore ijnósedie, jeoga jnumi erásorone, jeoga corángarangóne u.

²¹ Ga guebéode atasṍri uté pésu guebeque chojmara oredie. Ujetiga querújna ga oredie orocoi, jé basa jeta ajãpe ga oredie garósi.

²² Jecute Saúl, Jonatán ore isoldádode ore cho dajocaningame filistéogosode ica mu que uñeque chijna dasṍreraque gotique. Jé gusu Saúl, Jonatán ore uje ore chijna dasṍrenie.

²³ Filistéogosode uñane ore chicáji cucaranone ujai uje jecucha ore quiguébeque uté. Ga ore qui tu Saúl, ore irengúi yui iji ore idai Micmás ejoi.