1 Samuel 12 - Dupade Uruode

Samuel cho darasade quique nanique uje chisi ome ore eduguéjna cuchábi ome ore

¹ Samuel chojningame israélgosode ore jnese: –Uacamóño uje yipésu uacojningane cucha udore jnese. Ga uacapótayo uaqueduguéjna cuchátique diríca. Jecute yisi ome uaque.

² Ga uaqueduguéjna cuchábi a u Saúl uté iji yocuniri tudé jeta beyoi uté uru quigode jne. Yujnacarode ore dépoji uacajade to rĩ. Mu uyu ga e choquíjna yu ga yójo cóbi jnumi ome yuchudie. Yugúsiji uacari nanique iji yúringai jnacare, jé aja deréjnai tudé ga yajirique uacadode aja quigode gatuaque. Mu uaqueduguéjna ejoi jé cuse ga e yiya yajire uacadode aja quigode uje uté e gajneque gu.

³ Que pimo jetiga uaquetétigárigo déji ome yu to. Uacuñeque chatata jetiga yijna uacuñeque gachitique buey bisideque diríca, jeoga burica quedéjnape. Jeoga yidosója uacuñeque diríca ga yichietáyipome uaque gosi rĩ, ga gosi chatata iji Dupade iquei udé ga uaqueduguéjna cuchábi tangári uacuñeque urúrigo to. Jeoga yipógu uacuñeque bárique cucha diríca ujeta yigaidi u gu jeta uaque gosi chimate yu ga jé ca yatata udore, ga atata yisocade udore to ome uaqueduguéjnai uté to jne jeta yo yiba udore quigode to. Ujeta yijna gosi atique diríca ga a yo gosi adi oré jne.–

⁴ Ga Samuel urasade ore chojninga jnese: –Samuel a, uerate basocade ome yoque gatuaque arĩa uje que barasade ore yimóngo boritique cucha gotique, enga que adosopója yocuñeque gotique rĩ. Ga ũrépise ua ome bajiritigade yocacho jnese, enga que toque jeta gosi chimate ua ome baringaquérique jeta apógu gosi bai gajnetique cucha.–

⁵ Ga jé u uje Samuel chojninga: –Uacamóño uje Pangarádejnai Dupade tangaripísi uacaruode quigode to que, jé aja uaqueduguéjna cuchábi Saúl to. Enga ore chiraja uje que yibárique cucha cuse ome uaque. Chamáñaje que arajáyo yoritique uacuñeque ugúcha gu.– Ga jé ore chajo raja daruode ome Samuel ga ore chojninga: –Samuel, Pangarádejnai Dupade chiraja uje yocuruode quigode jé u udore arĩa.–

⁶ Samuel edugádode u uje jnusina Dupade adode ome israélgosode uje chijnime ore iji Egípto nanique ga jnusiname ore ga chojninga: –Pangarádejnai Dupade u uje chijnime uacáquiode ore iji Egípto nanique ga edugádode u Moisés, Aarón ore nanique ome uacáquiode udore ore.–

⁷ Samuel chojningame darasade ore: –Oyo parácho iji jnumi iji yiquei ga yatataba udore ome uaque jnese jne. Yojningane u Pangarádejnai Dupade átedatéode ome uaque, jé ome uacáquiode ore to nanique rĩ.

⁸ Uje uacáqui casicaite Jacob jogasúode ore diji Egípto nanique ga chise diri nanique uje egíptogosode que ore chajéngome ore iji dajade gotique nanique. Ga jé u nanique uje uacáquiode udore ore poja daruode nanique ome Pangarádejnai Dupade jeta cháta raja ore iji Egípto. Ga Dupade chutṍri Moisés, Aarón ore ome udore ore nanique. Ga uacáquiode asutedie u Moisés, Aarón ore nanique uje ore jno uacáquiode údi nanique iji Egípto ga ore chorei ore iji erámone udojo nanique ga jé u uje uacáquiode pésu dedáyode iji erámi tudé nanique.

⁹ Mu uacáquiode jĩraque chicadígui israélgosode yocangureni Dupa. Uje que ore tangári Pangarádejnai Dupade nanique ga uté cho dajuñame ore nanique ga tẽra ore ome ore umajosórone nanique. Ga hazórgosode ore eduguéjna cuchábi Jabín iroguipísi Sísara suépise ore gai nanique iji ore jocaningai. Ga filistéogosode, moábgosode jecucha ga ore pésu pocaningane ome udore ore to nanique.

¹⁰ Mu ore chiraja jóroque nanique uje ore cãra dasocade ome Dupa ueca togójmai ga ore catecã́ri dupa quedéjnane to nanique uje ore íode u Baal, Astarté ore nanique. Ga a ore chojninga: "A yoquibade u yoquicatecãrainone ayoré gajnúo udore uje Pangarádejnai cho dajuñame yógome, ga yocumajosórone ore sué yoquibáyode." Jogadi jé u nanique uje ore chijócha Pangarádejnai Dupade ajei údi ome raque ga ore chojninga: "Ajnime yóguiji ore josipiedie jmainie ga yedugo badode jne."

¹¹ Ga jé u uje Pangarádejnai Dupade chiroque ore adode ajirisórone aja israélgosode ore nanique ujetiga chátaja ore ome ore umajosórone yúode. Yujúdode u Gedeón uje i uñai u Jerobaal, jé aja Barac, Jefté ore. Ga yojningai jé upo yu to rĩ uje uacadode ajirisṍri jé u Samuel uyu to. Ga uacadode ajirisórone udore chátaja uaque ica ga ore chibéro uacamajosórone ore josipiedie iji uacabáyode ga quene uacoyo parácho iji uaquedáyode iji uacaniri udé údode.

¹² Uacuñane chudute uje amóngosode ore eduguéjna cuchábi Nahás dorási pocaningárique ome uaque ga uacuñane chayóji gadoi ga ore chojningame yu: "Samuel, apésu yoqueduguéjna cuchátique to ga yocumajosórone ore basíji yoquíode to jeta ore chudute ujnomérique, ga a jé yoco purása quedéjnane ore iji erámone to jne." Mu gajnareque uje uacatáyoi uaqueduguéjna ayorérique iji yu uje uaqueduguéjnai e cuse mu uje sué eduguéjna uñane ore gáyode jnese. Yojningai u Pangarádejnai Dupade.

¹³ Mu uacataidi uaqueduguéjna cuchape de te uje Dupade tẽrame uaque. Oyo uaqueduguéjna cuchábi iji uté jne.

¹⁴ Ajuso uaqueo jne enga angáchoi Dupade ga a jecucha déji uacari to jne jeta eduyo uté adode. Moisés urusarane Dupade urúo déji uaque jeta beyoi udore quigode jnese. Enga angáchoi udore quigode jnese, ga ca ayóyo uñeque gánique. Átayo uágaja uaqueduguéjna cuchábi jne ome Dupade uru quigode, ga beyoi uté áyipiedie quigode jnese gatuaque jne. Ujeta apéso cuchade udojo jnese jne enga a uerate uacatígo jne, enga tijode cho pujnúringome uáguiji uacaniri udé údode jnese jne.

¹⁵ Mu ujetiga jé ca angáchoi Dupade arecujaidie quigode jne, enga a cho dajuñame uaque jne, ga cháta uágaja uaqueduguéjna cuchábi ome dajuyaquéode to jne.–

¹⁶ Samuel chojninga: –Jé ca boyope jne. Ácayobíji uacayaridode udore. Uje a apáñañomíji cucha datéringome uaque jne uje Pangarádejnai Dupade chingongaráma uaque.

¹⁷ Jé ũré yu uje siqueré eruei e u ga cáma aráño uacajñúmione trígo uchui. Jecute uacajéode u ujeta aráño uacajñúmione udore jeta cajnoripise. Ga que guéode tagúpo jnutique to rĩ. ¿Jec ũré yu a? Mu a qué yutṍri Pangarádejnai Dupa iji deréjnai tudé gajiné ujetiga chiroque guéode uruode aja yoque ga nóna gueyequejnáraque aja jnumi. Ujetiga guérique tagu uacajñúmione ga a ajnusináño jne uje que Dupade ajéode u gotique jeta apéso uaqueduguéjna cuchátique iji uacojórique ayoré. Enga a amóño jne uje Pangarádejnai uté ajei cho júruru ome uaque uje uacatáyoi uaqueduguéjnai iji yu diríca gu.–

¹⁸ Jĩraque Samuel catecã́ri Pangarádejnai Dupade ga que neréjna gotique uje ore chudute guéode uruode ga cho ¡cúruru! Ga gueyequejna yore ore gai. Ga israélgosode ore tãraráji guei uté jmainie ga ore todópisa Pangarádejnai Dupade yui, jé aja Samuel yui to.

¹⁹ Jecute israélgosode ore chojningame Samuel: –Acatecã́ri bangureni Pangarádejnai Dupade ome barasade uyoque to ujetiga jé ca yitogoi jne iji uté jmainie. Ango ga jé ca chujé yoque jne ome cutejmai yoquisijnaringué, uje qué yõco yoquisijnaringuei diríca ga yutágoi yoqueduguéjnaringuiji ua diríca.–

²⁰ Samuel chojningame darasade ore: –Jé ca atodóyo. Jé ũré uac uje uacadode gajnarécho ome Dupade, mu e uacajíoñome cuchade udore, ga beyoi Pangarádejnai uru quigode gatuaque ome uaque iji de gajneri, jeta jé ca angaráñopo uacajesúrigo ome uté rĩ. Asíñome uacáyipiedie ome Pangarádejnai Dupade ga eduyo uté iji uacajéode, ga eduyópo adode úringane pipesucho rĩ.

²¹ Ga jé ca beyopoi dupa guichayade ore isocade to rĩ, uje que ore bisitique pijoque gotique gu. Enga que toc jeta ore cháta cuchárigaja uaque, ga que toc jeta ore chijnime uáguiji uacajnuéngaisónique cucha jmainie. Uje que dupa ore gotique, ga que ore ujñapeque gotique ome cuchade.

²² Jé basa ga uacangureni Dupapísi u uje nejé uacádode jeta eduyo uté adode. Gaidi u gu jeta chopise darása iji israélgosode uaque iji uacojode ayoré ore ujade jnese. Ujeta jé ca ajusécho Pangarádejnai Dupade uté adode ome uaque jne enga a jecucha cho darása iji uaque gatuaque jne, enga a jé ca timiningara uágome cucha dacadode jne.

²³ Mu uyu ga a jé ca yiya yicatecã́ri Pangarádejnai Dupade ome uaque to jne. Uje a cucha gajnarenguirase gu ome Dupade uté jeta yiya yicatecã́ri ome uaque to. Que gusu jeta yijócha uté ajei údi ome uaque gatuaque, mu a yacadápo uaque to rĩ ga a yo uacaquique ome pisoca omone ujetiga ejnáño uágaja uacate ueradode udore gatuaque.

²⁴ Cucha amiri tu jeta jé ca ajñietáyo Pangarádejnai Dupade uje que pujñiete gu ome cuchade. Ga eduyo uté uruode úringane pigaicho ga eduyo uté iji uacáyipiedie. Enga jé ca aramuráso uté isoca omone iji uacajénique gatuaque. Uje jiépisi ate omone ome israélgosode uaque gu.

²⁵ Mu ujeta jé ejnáño uágaja uacate gajnaréngone úringáringo pigaicho jne, enga Pangarádejnai Dupade a cho dajuñame uaque jne ga cháta uágaja uaqueduguéjna cuchábi jne enga a apatíoraño uté to jne.–