1 Samuel 11 - Dupade Uruode

Saúl doi pocaningai ome amóngosode nanique ga sué ore gai

¹ Chise diri nanique uje amóngosode ore eduguéjna cuchábi Nahás pota jeta doi pocaningai ome galaádgosode uñane nanique iji ore idai Jabés. Mu idai idaisórone ore chudute uje Nahás dorási pocaningárique ome ore, ga ore chiroque darógode aja uté yui iji garani tuté. Ga ore choningame uté: –Jé ca o bajocaningame yoque jne, mu yicoi ga yisígo yocuruode ome ñane jne. A yiyágo pocaningane ome ñane ga o baróguiji yoque jne iji yoquidai tuté.–

² Mu amóngosode ore asuté Nahás chojninga: –Ejẽ́, jé areque jeta jé ca yejna uaque. Mu cucha chojmarai déji jeta yipésu ome uaque ga u ujetiga ajuécho ga yusaque uaquedodie iji uacãrachudie. Yigaidi tu jeta yinguíra pajegátigai ome israélgosode ore uhuaque jnese. A pududique uacajnoméone jne enga a ore cana israélgosode uacabáyode jne iji erámi údode.–

³ Uje jabésgosode ore dayode chudute Nahás uté uruode ga jĩraque ore chajnai eduguéjnai uruode ga ore chojninga: –Ajuégaba dire gare iji ti ome yoque ga yibicobi yocurasade israélgose uñéngo to jeta ore cháta raja yoque ga ore chirota yoque ome uaque. Mu jetiga jé ca ore chátaja yoque jne enga a yiríngopo jne rĩ jeta dirode gare iji ti ga jé u jeta asaque yoquedodie iji yocãrachudie ga a bopise baróguiji yoque.–

⁴ Jabésgosode ore chise Saúl ore idai Guibeá ga ore chatata dojñane ome darasade iji te, ga inané ore poji darasade ore ejode uje ore chudute gu uje a amóngosode ore chusaque ore edodie jne.

⁵ Uje Saúl tṍraji garai uje di buéyode údi ga chudute ore uyacade ga chojninga: –¿Ga cuchárique tṍraji yocurásaisó ore a? Uje ore po.– Ga Saúl urasade ore chatatame uje ore chudute jabésgosode ore ujnomei gu ga pésupúsu ore áyuguhebátigai.

⁶ Uje Saúl chudute ore ojñane udore ga jĩraque Saúl cho júruru ome pujnomei uté ga Dupade Ujopié Espíritu Sánto yore Saúl uté gai ga ipesute Saúl cutejmai ájninga.

⁷ Saúl jĩraque doi buey gárode ga chujé dachidode udore. Ga chajugája jnumi. Ga chisi ome dajugupéode ome darógode jeta ore jno údi aja israélgosode ore idáyode jnese iji ore uniri údode. Ga Saúl chojninga: "Angoñome ore jnese jne jeta jé ca gosi nóna Samuel, Saúl uyógaja yoquijocaningai to jne enga a jé yoquisocai udé ome gosi gachitígo buey dirome jeta yajujoi jnumi." Ga israélgosode ore dosóñime deduguéjna cuchábi Saúl uje uruode udore quigode chajuque ore agutedie jnese. Ga ore chopise jnani chojmarárique uje ore tṍraji dajñarenie ome dagaidi pocaninga uté, ga ore cháta rágaja deduguéjnai Saúl uté jnese.

⁸ Enga ore chimáta ñane aja ore idai uje i tu Bezec nanique. Enga Saúl chisecãru ore jocaningai gaisórone ga israélgosode uñane ore chise 300.000 nanique, jé basa judágosode ore chise 30.000.

⁹ Ga Saúl chojningame pujnomei júsõriso: –Boyo ga ajníño to aja uaquedai Jabés. A yico uaque dirome iji guedé gatócoro jeta yiquetágo uágome amóngosode udore ore.– Pujnomei júsorone ore chajni ga ore chatata Saúl áyipiedie ome darasade ga ore irasique ore yui.

¹⁰ Jabésgosode ore dayode chiroque datocaidode aja amóngosode ore eduguéjna cuchábi Nahás yui, ga ore chojningame uté: –A jabésgosode uyoque yẽco yógome ua dirome jeta be basocáringome yoque jeta ueradome ua.–

¹¹ Iji dire uñai ga Saúl chajuque darasade ore ajei ga ore péode gadioque jeta ore garanone gadioque ome amóngosode ore iji ore irengúi tuté. Enga ore chachẽre amóngosode ore iji ore irengúi tuté iji direjnímei, ga ore chise guedé gatócoro ome dajocaningai. Ga Saúl ore yugode jiépisi iji amóngosode ore. Jé basa uñane chayome ore mu chojmara, chojmara ore aja dajesúode.

¹² Iji ore jocaningai quigade ga jabésgosode uñane ore chucué Samuel jeta ore catecã́ri. Ga ore chojningame Samuel iji te: –Atataba yoqueduguéjna cuchábi ichietabáisõri casodé ore ome yoque uje ore chojningame uté diríca: "A jé ca Saúl ujñapegome dáringárique yoqueduguéjna cuchape jne." Ga ajnáño udore ore aja de ga yujégo ore.–

¹³ Uje Saúl chudute ore uruode udojo ga jĩraque chaquĩ́ra ore ga chojninga: –A jé ca yocuñeque topoi jne rĩ iji diri udé uje Dupade tẽra israélgosode yocucuecaringuei ome yoque jnese gu iji deréjnai tudé. Uje gajnareque gu jeta yujégo yocurasade israélgose uñeque iji dire ujnomerãi tudé gu.–

¹⁴ Samuel chojninga: –Boyo, ga yicagóji yoquidai Gilgal jnese, ga yipéco yoquininaquédatérique jnese ome yoqueduguéjna cuchábi Saúl uté jne, enga jé u jne jeta pijoque iji dayaridi uté ome israélgosode uyoque jnese.–

¹⁵ Ga jé u uje israélgosode chimáta ñane aja Gilgal uté jnese, ga ore jno Saúl údi aja Dupade iguíjna cuchábi ga jé u uje ore cho deduguéjna cuchábi iji uté jnese. Enga jé u uje ore chibore dẽrapáidode cuchiso ome Dupade iji uté uje ore gaidi tu gu ujeta Dupade, ore ajéode cho sere ome ñane. Enga Saúl, urasade ore ninapúsu raque jnese uje e eduguéjna cuchábi cuse iji ore uniri Israel gu.