1 Samuel 10 - Dupade Uruode

Samuel chojne aseque puyai Saúl gatoi gai ga úringai eduguéjna cuchábi jé u

¹ Samuel chijnime aseque puyai ga chojne Saúl gatoi gai. Quigade enga tagu uté uré ga chojningame: –Pangarádejnai Dupade chacacãre ua iji deréjnai tudé jeta israélgosode eduguéjna cuchape ua jne iji yocuniri tudé údode jnese. A ua u jne jeta ajnué israélgosode yocumajosórone yocujo ayoré ore gáyode jnese jne uje ore déji yoquirosadode jnese iji yocuniri tudé. Yocangarádejnai a qué chetingare daru quigode ome ua jne, jeta jé ca potigayaque ua ome báringai israélgosode ore eduguéjna cuchape.–

² Samuel qué jno daruode údi ome Saúl ga chojningame: –Uje e bo jmíti, jmíti ome yu enga a ese jnani gáningo ore iji ore idai Sélsa iji chequé bajé Raquel ode tiógarei jne iji benjamíngosode uacaniri ajei. Uje udore a ore chimo ua jne ga a ore chojningame ua jne: "Bãri mu e yico uacacueguedie udire burica quedéjnai diríca. Ga que bayé chopo dáyugu re ome dachidedie udire gotique rĩ. Mu jé basa ga áyuguhebátigai gajnéone u uaque uje que aríñopo to rĩ. Jecute bayé cho dáyugu uaque ga chojninga: '¡Chimo jóroque re ga cuchárique tṍraji ore iji sañeque!'"

³ Mu ujetiga jnanione udore cha catecã́ri ua ga a bopome baqui jne rĩ, mu a esápo ore ujórigo jnani gadiócho jne rĩ iji uacajminémei uje i tu Tabor ome uaque uje pore cuchabé déji uté uje i tu encína. Jnani gadiógode udore ore qui tu ore idai yui uje i tu Betel jeta ore tẽrája Dupade iji uté to. Uñai chijna dachidedie áyasa quedéjna gadióguedie, jé basa uñai chijna arureque gadiógode, jé uñai chijna cucha aórique uje ore chanire víno aja.

⁴ Ujeta ore chimo ua jne ga a ore catecã́ri ua jne. Ga a ore chisi ome arureque gáningo ome ua jne ga jĩraque asa ¡saque! jne.

⁵ Mu ujetiga bopo rĩ ga a esápo ore idai Guibeá jne rĩ uje ore chojningame ore idai uté Dupade Jogapié Oroné. Enga filistéogosode ore chirote dajegarani iji uté iquei tuti, ga jiépisi filistéogosode ore isoldádode iji uté ore idai. Ujetiga ese ore idai tuté pijnanai enga a ese jnaníringo ore iji jne jeta ore chĩreta dajéode ome cutejmane dachietaquéo ome Dupade. Ga a quene ore doi guesi iji Dupade iguíjna cuchábi jne enga a ore chujé degode aja dajesúode jne uje ore chirate Dupade iradedie aja dajei gu. Jé uñane chubúchu ore ubuchugode fláuta, jé basa ga uñane chujé dajocayade uje íode u árpa, saltério, panderéta ore.

⁶ Enga a Pangarádejnai Dupade Ujopié Espíritu Sánto basája ua iji uté jne ga a achietai ua jne ujeta arate Dupade uruode júsorone udore ore aja ore isocade to jne ga a acota Dupade to iji ore ujade. Enga a jé ca ua upo gotique jne rĩ uje Dupade a chécãre bajmapié jne gu.

⁷ Iji udojo quigade ga jé ca agutúapo ua ome cucha dacatique jne rĩ. Uje a Dupade pésu báyipie quitígo jne ga a obiréjna cucha dacatígo quitígo ome ua jne. Uje a bátajasṍri u Dupade gatuaque jne ome cuchade jnese.

⁸ Mu iji udojo quigade ga acáji ore idai jne uje i tu Gilgal ga arote gadoi iji uté jne. Ga a yise ua iji uté jne jeta díningo gare iji ti yijmanai uñai ga a yo basocárique quigome ua jne jeta yise ua iji te. Enga a yẽcója Dupade ome yocachidode cuchiso uñéngo jne iji uté uje a yoquigaidi u gu jeta pajesereringai déji Dupade, uyógome ñane.–

⁹ Uje Saúl noñome Samuel iji te ga jĩraque Dupade ojningane cucha irágu Saúl áyipie ga Samuel ojningáiso cucha tocade jnese ome. Enga Dupade chécãripíse Saúl áyipie quigode to.

¹⁰ Uje Saúl, iroi ore chise ore idai Guibeá ga ore tuangóa Dupade uruode júsorone iji dajeque pajei. Enga jĩraque Dupade Ujopié Espíritu Sánto irágu Saúl ajei ga chirate Dupade uruode júsorone ore isocade ga catecã́ri Dupade to, enga achietaquei irágu ajei.

¹¹ Uje Saúl urasapísode ore chimo iji Dupade uruode júsorone ore ujade uje Dupade chécãre jmapié enga ore chojningame ñane: "¡Jé cajicho Saúl to! Saúl uté uje dayé i tu Cis. ¿Ga chise dáringárique Dupade uruode júsõre to a? Uje chachietáji Dupade to iji ore ujade."

¹² Enga Saúl urasade udore uñai chojninga: "Dupade uruode júsorone ¿ore danique e? Ore dai tu uté uje ecãraque ore isocade." Jecucha iji udojo quigade nanique ga israélgosode ore chimo darásarique uje chécãre dasocade ga ore chojningame: "¿Ga Saúl uté chise dáringárique Dupade uruode júsõre to a?" Ore chimo gosi gu uje quene adode chécãre re ga ore chacãra darásarique uté gosi aja jnani bajai Saúl to.

¹³ Uje Saúl e jnoji Dupade uruode júsorone ore ujade ga quene chicáji dai iguíjnai.

¹⁴ Uje Saúl, iroi ore di ga Saúl daquerámi catecã́ri Saúl ga chojningame: –¿Ama acayóji rique diríca ya, uje que aríño míraque?– Saúl chajnai daquerámi uruode ga chojningame: –Yucuego jórogui burica quedéjnamone diríca iji deréjnane údode, mu yiyóñangoji Samuel diríca ga qué yajmitágo to.–

¹⁵ Ga Saúl daquerámi chojningame Saúl: –¿Jec ũré a? ¿Cho ringome uaque diríca ya?–

¹⁶ Ga Saúl chojninga: –Que cho cheme mu gusu uje chatatame yoque uje uaqueso yocucueguedie burica quedéjnami diríca jecute yajníngo to aja de.– Mu Saúl que chatatapo Samuel uru quigode jnese to uje a eduguéjna cuchape Saúl uté jne.

¹⁷ Udojo quigade ga Samuel tibidi israélgosode ore jnese jeta ore chimáta ñane aja ore idai Mízpa jeta ore catecã́ri Dupade iji ñane gari jnese iji ore idai uté.

¹⁸ Uje e ore déji uté jnese ga Samuel chojningame israélgosode ore: –Pangarádejnai Dupade uruode chósi tome israélgosode uyoque que: "Uyu u nanique uje yijna uáguiji egíptogosode ore gari nanique, ga yibéro uacajnenie ore josipiei nanique iji uacabai. Mu que gusu egíptogosode ore, mu yijnapo uáguiji uacamajosórone uñane jmainie to jnese nanique rĩ uje ore pota jeta ore sué uacabáyode to nanique."–

¹⁹ Samuel chojningame ore: –Que potigayaquérique déji Dupade uruode udore quigode gotique, uje jecucha ga cháta uacajuré gajnéone cucha aja uaque, ga chibéro uacajnenie ore josipiei nanique iji uacabai. Enga ¿gotique gu a uje uaquetácho uacátajasṍri uté uje cutejmai etotigué sué cuchade gai jnese? Uje uacapótayo oyo uaqueduguéjnai iji uacojórique jnani uje uté jé chopise uaque to mu. Jecute beyoi ga angaráño uacáguerigui ome ñane uje uacanuchúode jé u uacáqui cásodicáite Jacob ujnacari cásodicáite uje ore íode u udojo: Rubén, Simeón, Leví, Judá, Zabulón, Ísacar, Dan, Gad, Aser, Neftalí, José, Benjamín ore. Ujeta e agúsoji uacague chojmara, chojmaranie udire, enga cucherane eduyo uáguiji uacajogatígo to jne. Ujetiga e amácho uáguiji uacáguedie udire jne, enga a yingo Dupade ajegaidi uaqueduguéjna cuchape aja uaque jne, uje uacacuei u ome uaque gu.–

²⁰ Samuel tibidi israélgosode ore asutedie uje e ore chimáta darasade aja ñane que, ga chojningame ore asutedie: –Dacasutedie uaque iji pachamite chojmara, chojmarane, ajoso gadoi jnese. Ga beyoi ga ajnicho pidode udojo uje gare iji yirídai, ga a gosi ijnimique pite umánique jne enga gosi cho dajnéngu, enga imoi u uje israélgosode uyoque a yoqueduguéjna cuchábi garani tu uté gosi urasade ore jne.– Uje ore doi udojo ome ñane ga qué poite benjamíngosode uñai ome ore ajnamini uté ga yuchome ore. Ga jĩraque ore chiraja uje a benjamíngose ore eduguéjna cuchape gotique jne.

²¹ Samuel tibidápoi cucherãque unejángone ore to rĩ iji benjamíngosode ore ujade jeta ore dopoi pidode ome ñane to rĩ ga cucherane uñai yuchome ore uje úringai cucherãi u Mátri nanique. Ga tibidi dayode ore uje ore úringai cucherãi jé u Mátri to ga ore doi pidode ome ñane to rĩ ga Cis yuchome ore. Ga jé basa ga Cis chijnime pidode ome dabode ore ga chijnime Saúl i iji udore, ga que potigayaquérique déji uje Dupade ajegaidipísi u uté gu. Ga Samuel chojninga: "Ajnáño jnacari Saúl gotique aja de." Ore chucué mu que ore chise gotique.

²² Ga Samuel ore catecã́ri Dupade ome ore eduguéjna acoyatai tuté jeta chatata jogatígome ore. Ga Dupade chojningame Samuel: "Qué déji ti, ga pógu re iji ore ugúchade ujade iji ti."

²³ Enga jé u uje ore doi ga ore chijnimíji poguiépidi ga ore chijnája Samuel ejoi. Uje Samuel chijna Saúl aja israélgosode ore iquei ga israélgosode ore tijapísa uté cutejma abubíejna uje que israélgotique cho uté ome umaningai.

²⁴ Samuel chingo israélgosode ore jnese ga chojninga: –E uacamóño uaqueduguéjna cuchábi iji de. Dupade ajegaite uté ome úringai eduguéjna ga que israélgosode uacuñeque cho uté to ome cutejmai úringai pirosobate.– Israélgosode jĩraque ore chachietáji Saúl ga ore chojninga: –Pachietaquéode gajnesõre yoqueduguéjna cuchábi ome cuchade jnese, ga a jé ca eruénique cusapo jne rĩ.–

²⁵ Ga jĩraque Samuel chatata daru qui casodica uje cho quique eduguéjna cuchábode ore isocade quique diríca ome darasade ore uje qué ore déji ñane gari. Enga churúsãre udore quigode jnese ga chicháji Dupade iguíjna cuchábi iquei. Quigade ga Samuel chiroque ore aja arorade jeta ore chajníja daguíjnane rĩ.

²⁶ Ga Saúl chajníja daguíjnai to rĩ iji ore idai Guibeá to. Enga Dupade chijocase jnacare dicaséode uñane ore áyipiedie jeta ore chirote Saúl ejode, ga ore nóna aja quedéjnane.

²⁷ Mu que israélgosode uñane ore chajire jnutígome Saúl nanique ga ore chojningame ñane: "¿Ga uté ujñapeguírasome yocajnetígo pocaninga jne a, jeta sué yocumajósoningo gánique?" Ga jecucha ore isocame Saúl uje que ore chachietáji gotique uje jecucha ore chietáyime ga ore cana dajñiequéode gáyode ome uté gatuaque. Mu Saúl que chajire dajnéone pichietabátiga udore yúrique.