1 Reyes 9 - Dupade Uruode

Pangarádejnai Dupade chisı́ome daru omone ome eduguéjnai Salomón uté, mu aquĩraquéode dépoji rı̃

¹ Uje Salomón quene chimate dorai uté Pangarádejnai iguı́jna cuchape nanique, ga chimánapo daguı́jnapı́si rı̃. Ga que gusu udo mu Salomón cháta cucha uñane aja jnese nanique uje e déji Salomón áyipie nanique ujetiga pésu to.

² Enga cucha dacadode udore quigade jé u nanique uje Pangarádejnai chiquetápo raja Salomón uté rı̃. Ga e gare uje chiqueta raja uté, enga chopise bajai uje chiqueta raja Salomón iji Gabaón uté nanique.

³ Ga Pangarádejnai uru quigode u udojo ome Salomón nanique uje chojninga: –E yichajnai bacatecãraitigade ome yu jé aja bajei jochaquéode udore iji yiquei. Enga jé u uje yipésu borai uté yiguı́jna úringai puyaguipise, uje e yicha yi aja uté jeta yúringai pisı́gai jogadi urásu iji deréjna pitade jnese jne. A jé ca yáyipieraque jnoji bapesudi yiguı́jna puyaque uté jne, ga a jecucha yajire yui jne iji deréjnane jnese gatuaque.–

^4-5 Enga Pangarádejnai chojningame Salomón uté: –Yajéode u ome ua ujetiga jecucha ga ajna yojningane cucha iji jnumone gatuaque iji yedominone. Enga basocai a jé chopı́siráse bai casica David uté uje ujñapetaque uté isocade ome yu. Be ga ũrepise báyipie ome yu, ga angoninguite guesaque ua ome yiroquéode jnese, jé aja jeta ajuse yarecujaidie guio, jé aja yáyipie quigode udore jnese. Jeta bepı́si udore, enga a yipésu ga bape disi ejórigo a jé ca ore chimoque bayaripi udé ome dáringáringo eduguéjna iji israélgosode ujade iji deréjnane jnese. Uje yuru cásodicáite quigode jé u uje yichagája bai casicaite David yui nanique. Uje yojningame uté nanique: "Bayaripi cuchábi a jé ca chimoque bape disi ejórigo jne ujetiga ore chácariji uté ome dáringane israélgosode ore eduguéjna gatuaque."

⁶ –Mu ujetiga ua u, jeoga bape disi ejórique uñeque u jeta cho cutúguiji yúringai pajnanguı́ji jnumone, ujetiga ca ajuso yuru pirosobádode guio jé aja yate arégode udore uje yijı́ome uacari ujetiga apéso; jeoga uacuñeque chichaga dagataidie aja jnumi iji dupa quedéjnarique iquei ome úringárique picotaque, enga a israélgosode ore jnese cho daba uaque gosi ate gajnaréngone jne.

⁷ Ga a yijnime israélgosode udore ore ¡janipe! jne, iji yerani casicaite jnupe uerate uje yeranome ore dayode icaite. Ga a jé chuságaja yiguı́jnai jne uje yipésu úringai puyaguipı́siji ica ome yi úringárique picotaque. Mu a yṍra yiguı́jnai uté aja toniñeque jne, ujetiga jé ca dépoji yedomitique rı̃. Enga a jé u jne ujetiga purása quedéjnane iji erámi údode jnese a ore cana israélgosode uacabáyode jne ga a ore chacãra uágaja dajñiequé gajnetı́go cucha noñánguipı́so jne.–

⁸ Enga Pangarádejnai chojningápome Salomón rı̃: –Bapesudi tuté yiguı́jna a urui jnumi jne enga a ore chacã́riji ñane jne. Mu ore jnese uje ore chicáji yiguı́jnai dosadi jne enga chajı́raja dajesui enga a ore tṍra rángome. Ga a ore chojninga ome dachietabátigade jne: "¿Jé gotique chimo jóroque re uje Pangarádejnai uté pésu cucha dacate gajnaréngone udojo ome puniri udé jé aja daguı́jna cuchábi to?"

⁹ Enga a pichajnaite ore uruode jne enga a ore chojninga: "Cucha tocachugode udore qui u uje ore noñome Pangarádejnai iji te jmete, uje ore angureni Dupade u mu. Uje uté u uje chijnime ore dayode iji egı́ptogosode ore uniri nanique. Mu e ore cho dadupáji purása quedéjnane ore angurenone dupa quedéjna. Uje ore chichaga dagataidie aja jnumi iji ore iquéode ome ore úringárique picotaque. Ga ore chajna dangurenone udore jmapiedie iji jnumone. Jecute Pangarádejnai pésu ga cucha dacate gajnarenguipı́sode udore yore ore gai."– Enga e gare uje Pangarádejnai chiqueta raja Salomón uté, enga uruode u udojo que.

Uje Salomón chimanipise dasagode udore ga pota chimate dajnose carubode iji tı́rogosode ore eduguéjnai Hiram uté gari

¹⁰ E siqueredie chejna ayoré chojmara nanique ome Salomón ipesudode gare udore. Enga ipesudode udore u Pangarádejnai Dupade iguı́jna cuchábi jé aja Salomón iguı́jna cuchábi to uje pésu ome re nanique.

¹¹ Mu udojo quigade nanique enga Salomón pota cho tı́rogosode ore eduguéjnai Hiram oré ome gueranone cucha. Uje jecucha Hiram uté chisı́ome pore umarenie ome Salomón nanique jeta chirója dapesudode guiguı́jna udore, uje poridie udire ı́ode u cédro, pı́no ore. Que gusu pore umarenie mu cháta óro aja Salomón to ga pésu cucha uñane iji to. Enga ajiré tupúsu Salomón áyipiedie ome cuchade udore jnese. Jecute Salomón tẽrája uté nanique ga chisı́ome pidáyode uñéngo ome Hiram uté nanique uje udore déji pachamini ajei uje i tu Galiléa. Ga pidáyode udore batigai chise 20 nanique.

¹² Mu uje ore eduguéjnai Hiram uté tṍraji daniri Tı́ro uté ujetiga chimo Salomón gueranone pidáyo udore enga chajire nanique mu que pidáyode udore déji ajénique.

¹³ Ga Hiram chojningame Salomón uté: –Yijorámi á, ¿jé go uje bası́ome pidáyode udore ome yu uje que ueracho ome yu gotique?– Ga jé u nanique uje Hiram pésu dedáyode udore i ichai nanique, ga chı̃́care Cabul taja, uje gajnui u duchatique ome Hiram uté gu. Ga jé ore ı̃carai u uté jé aja deréjnane udojo to.

¹⁴ Enga eduguéjnai uté uje i tu Hiram gueranenie óro ikı́lode batigai chise 3.960 ome Salomón nanique uje a uté chaparu ujetiga chiro Pangarádejnai iguı́jnai ome udire nanique.

Uje Salomón chisa dejode ome dajnéone cucha iji daniri uté, enga isocade u udojo ome imaningone cucha uásejna

¹⁵ Enga Salomón isagode jnanı́o udore jiei nanique uje uté chirógaja daroquéode bisideque ome damaningone cucha uásejna. Enga ore isocade u udojo nanique: uñane chiro Pangarádejnai iguı́jna cuchábi, ga ore chátapo Salomón igóchocoijná aja to nanique rı̃. Ga a jé ca gusu udore mu isagode jnanı́o udore uñane chicosája Salomón iguı́jnai yui to uje ore pésu pararinguéone aja gaté, ga cho pac, págaja gatéode nanique iji uté. Enga jé ore ujuyaquéode u to uje ore chiro to ga ujuyaquéode udore chaparu guidáidatéi Jerusalén gai. Ga a jé ca gusu ore ujuyaquéode mu ore pésapo cuchade aja gatéode to iji pidáyode uñane údode to nanique rı̃ enga ore ı́ode u udojo nanique: Hasor, Meguı́do, Guézer ore.

¹⁶ Egı́ptogosode ore eduguéjnai Faraón e doi pocaningai nanique ome guézergosode ga sué ore gai ga chãru ore idai gai nanique. Enga chejnápise cananéogosode ore jnese nanique iji ore idai Guézer uté nanique. Mu iji udojo quigade ga Faraón cho deranı́ji ore idai Guézer uté. Enga e pota chisı́ome daro nanique gu uje quene Salomón cho dacotéji uaté nanique.

¹⁷ Enga jé u uje Salomón chirópo cuchade iji ore idai Guézer uté nanique rı̃ ujetiga ueradápo ore idai tuté nanique rı̃ uje Faraón a chãru gai nanique gu. Enga Salomón chirópo pidai uñai aja gaté nanique rı̃ uje i tu Bet-horón, uje déji jnumi yui iji jogonóri cucarãte dosadi. Enga déji guedé cacadi yui iji uté.

¹⁸ Enga Salomón chirópo ore idáyode uñane aja gaté nanique rı̃ uje ore déji puniri Judá ajei ga idógosi ore iji erãpe tarétigai nanique. Ga udore ı́ode u udojo: Baalat, Tamar ore.

¹⁹ Ga Salomón pésapo jogadode iji dajnéone pidáyo uñane rı̃ ujetiga ore suse cucha pacade guio jé aja cuchade uñane iji udore ajéode nanique. Enga pésapo jogadode uñane ga soldádode ore chañuru buricade guio iji udore; jé basa ga iji jogadode uñane ga ore chañuru guebéquedatéode guio iji jogadode udore. Ga Salomón pésu dajegaidode cucha iji ore idáidatéi Jerusalén údode to nanique, jé iji dajnepı́di to uje i tu Lı́bano. Ga pésapo cuchade iji dajnepı́dode jnupe uñane jnese rı̃, uje doi dajéode ome.

^20-21 Enga purása uñane piéjna ore uniri Israel uté údode uje que ore gãrapı́ode u israélgosode ore gotique. Ga purása quedéjnane udore ı́ode u udojo: ga amorréogosode u uñane, jé aja hitı́tagosode ore, jé aja ferezéogosode ore, jé aja hevéogosode ore, jé aja jebuséogosode ore to nanique. Uje ore dai bajade uniri u nanique, mu Pangarádejnai chijnáji ore gari. Ga pejnanguirase udore dáqui gatéode ome israélgosode ore jocaningai uté nanique. Mu que togome israélgosode ore ujetiga ore chejnápise ore, enga jé u uje ore cho dasaguı́ji uñane nanique. Ga isagode udore ape gatéode u uje Salomón chirógaja daroquéode bisideque, ga ore úringane pisaque uté jé chuságaja dirode udojo to.

²² Mu Salomón que cho dasaguı́ji darasapı́sode israélgose uñeque. Mu e pésu darasade uñane ore gajnepı́dode, ga ore gajnepı́dode bası́ji ñane yúode to. Soldate uñane, uje dimane ore ome pocaningárique yúode, jé basa ga urasade uñane doi uté iroquéode iji iguı́jnai. Enga Salomón pésu eduguéjnane iji darása uñane. Ga Salomón iróquegatéode u uñane uje ore cháta isagode cucha aja. Enga isoldádode ore asutépise uñane, ga uñane ore gajnepı́di u ujetiga ore chajire buricade orusórone yúode nanique. Jé basa ga uñane ore suse uté gachidode guebéquedatéo guio to nanique.

²³ Ga urasade uñane gajnepı́di u nanique jeta ore chajiripise Salomón irógode yúode iji ore isagode cucha gáyode. Ga jnanione udore uje ore chajire irógode yúode ore batigai chise 550 nanique.

²⁴ Ga Faraón uro uaté chácariji David idai Jerusalén uécha uñai iji taningai nanique. Mu uje Salomón e chimate uaté iguı́jna cuchábi uté, enga jé u uje uaté chécãre dajogadi ga cho daguı́jnapı́si iji Salomón orai guiguı́jna icha uté nanique. Udojo quigade u uje quene Salomón chicosája daguı́jnai yui to ga ore pésu pararinguéone aja gaté, ga cho pac, págaja gatéode nanique iji uté.

²⁵ Uje e Salomón chimate dasagode cucha jnese iji Pangarádejnai Dupade iguı́jna cuchábi nanique, enga quene isocai tu ujetiga tẽrája Dupade iji uté uje e chimate cuchade jnese iji gu. Ga gadióguiji siqueré chojmara, chojmaranie jnese nanique uje Salomón jé isocabeque uje chibore dẽrapáidode cuchiso ome Pangarádejnai uté iji dapesudi gaserãte gai. Enga tẽrápo dẽrapáidode uñane ome to rı̃ uje pajesereringai gajnecho udore. Ga chátapo cucha ai unérone aja rı̃ ujetiga Pangarádejnai Dupade irógode sacerdóteo chãru iji Pangarádejnai iquei.

Que gusu Salomón isagode iji daniri uté, mu isagode uñane cuse uje chuságaja punirone uñane to

²⁶ Enga Salomón chiroque darógode ore aja cucode nanique jeta ore pésu udore iji ore idai Esión-guéber uje ore idai uté déji yote quedéjnai edógai uje uté i tu Yote Quedéjna Caratai. Ga ore idai Esión-guéber uté idógosiji ore idai Elat to nanique. Ga jogadi uté déji edómgosode ore uniri ajei nanique uje ore pésu cucode iji uté nanique.

²⁷ Ga tı́rogosode ore eduguéjnai uje i tu Hiram uté chiroque darógode cucode irajasóño aja Salomón yui nanique. Gaidi tu gu ujetiga ore cháta darajatigade aja Salomón irógode udore ome cucode úringane pungurañacho iji yote quedéjnane gáyode. Enga Hiram irógode udore ore nóna Salomón irógode uje ore doi cuchade oredie iji punirone uñane nanique.

²⁸ Ga ore chise ore idai nanique uje i tu Ofir enga ore doi óro iji uté ga batigai idógosiji 14.000 ikı́lode nanique. Enga jé u nanique uje ore di dagaidedie udire údi aja eduguéjnai Salomón uté nanique.