1 Reyes 8 - Dupade Uruode

Salomón, ore chijna Pangarádejnai Dupade uruode pi cajo aja Pangarádejnai Dupade Iguı́jna Cuchábi Ajé Puyaguipı́si ajei nanique

¹ Enga chise diri nanique uje eduguéjna cuchábi Salomón uté e pota chijnoque Pangarádejnai uruode pi cajo uté aja dorai Dupade iguı́jna cuchape ajei uté. Uje Pangarádejnai uruode pi cajo qué déji Dupade iguı́jnai cárpa ajei gu nanique, iji David idai Jerusalén uécha uñai, uje i uñai tu Sión. Enga Salomón tibidi israélgosode ore angaránipı́sode jnese aja dari, jé aja jnani ibijógode jnese iji dáguedie jetiga ore chicáji pijnane iji ore idáidatéi Jerusalén. Ga tibidápoi disi ejode ore dai bajade iji israélgosode ore ujade rı̃, uje ore pijógome dáringane pangarácho jnese to. Salomón gaidi tu gu ujetiga ore déji jnese ujetiga ore chijna Pangarádejnai uruode pi cajo aja doraque ichai uté.

² Ga jé u nanique uje jnanione iji israélgosode ore ujade jnese ore tṍraji dajñarenie ome Salomón uté. Ga ore di iji Jerusalén, ga ore jnusinamáni dire jé u nanique. Enga ore diringai guedosi i tu Etanim, ga ore isecaranone guedosı́o 7 nanique.

³ Uje e israélgosode ore angaránone ore déji jnese ga quene Dupade iroguipísode Aarón ájnape disi ejo sacerdote ore chisa Pangarádejnai uruode pi cajo ujetiga ore jno údi.

⁴ Ga jé u nanique uje Dupade iroguipísode sacerdóteo ore chijnoque Pangarádejnai uruode pi cajo. Ga sacerdóteode uñane jé aja ore átajasórone levı́gose udore ore, ore gajnepı́di tu ujetiga ore chijnoque Dupade iguı́jna cárpa to. Enga ore chijnocápo jogonórone cucha puyácho udore jnese to rı̃, enga ore chijnája Pangarádejnai uruode pi cajo quigade.

⁵ Ga eduguéjna cuchábi Salomón, jé aja israélgose dipeséode ore jnese iji gari uje ore doi Salomón pijnane nanique, ga ore bası́ji Pangarádejnai Dupade uruode pi cajo iquei nanique. Ga ore tẽra dẽrapáidode cuchiso ome Dupade, ga ore guẽrapáidode u áyasadie, jé aja tórodatéode ore nanique. Enga que toc ujetiga pisecarãcho ore uje jiépisi ore yugode udore nanique gu.

⁶ Ga jé u nanique uje quene Dupade iroguipı́sode sacerdóteo ore jno Pangarádejnai Dupade uruode pi cajo údi aja jogadi uté. Uje charidi uté déji iguı́jna cuchábi eruépisi iji Ajé Puyaguipı́si ajei nanique. Ga jé u nanique uje ore chicha Pangarádejnai Dupade uruode pi cajo aja jnumi iji Salomón orade gaté unirı́sõre querubı́neo ujnóngone údi.

⁷ Ga Salomón orade gaté unirı́sõre querubı́neo udore ujnóngone déji gaté yui ga chãrai gaté dajnóngone. Enga ujnóngone chaco Pangarádejnai Dupade uruode pi cajo eruéode gáyode jnese, jé aja uje chacopo uruode pi cajo isangurúone gáyode jnese to rı̃.

⁸ Ga uruode pi cajo isangurúone udore umaripı́so nanique ga jé jogate dajogadi uté nanique iji Pangarádejnai Dupade uruode pi cajo dosadode iji Ajé Puyaguipı́si ajei, ga pijógome Dupade iroguipı́si sacerdote iji ajé puyai uñai uté nanique, mu a ca pijógome ayorérique jetiga déji Dupade iguı́jnai guesi. Ga que pecãraque Pangarádejnai Dupade uruode pi cajo isangurúone udore jogatique, jé aja dirode udojo to.

⁹ Ga gusu Dupade uruode jogapı́ode cucarãte uejácho uje déji Pangarádejnai uruode pi cajo ajei nanique, uje gare cucarãte uejade udore, ga que cucha uñeque chimera gotique. Uje israélgosode ore jnoji Egı́pto nanique enga Pangarádejnai chisı́ome daru iyiejnane ome israélgosode ore iji cucarani uté uje i tu Horeb uje purusãracho uruode udore iji cucarãte uejaque gárode udore ore. Enga Moisés u uje na Dupade uru pirosobádode udore aja Pangarádejnai uruode pi cajo ajei iji cucarani uté nanique.

¹⁰ Enga e Dupade irógode sacerdóteo ore jno Pangarádejnai Dupade uruode pi cajo údi aja iguı́jna cuchábi ajé uñai uje puyaguipı́si tu uté nanique. Mu quigade enga ore dopoi guesi tiji Ajé Puyaguipı́si uté nanique rı̃, enga gue abuja chı̃reta iguı́jna cuchábi ajei.

¹¹ Enga gue abuja uaté pésu ga que togome Dupade irógode sacerdóteo ujetiga qué ore chisapo cucha pisatı́guiji Pangarádejnai iguı́jna cuchábi ajei nanique rı̃. Uje Pangarádejnai ingoningájnai e irágupúsu daguı́jna cuchábi uté ajei gu.

¹² Uje Salomón chimo gue abuja uaté uje irágu dorai uté, enga jé u uje chósi tome Pangarádejnai: –Pangarádejná, bojninga nanique: "A yo yijogadı́ji gue abuja utatáraque jne."

¹³ Enga jé ũrepise uje e yimate bagóchocóya ome ua, Pangarádejná, ujetiga agúsi ajei iji deréjna pitade jnese.–

¹⁴ Uje Salomón cha catecã́ri Dupade nanique ga jé u uje chumuchase re ga tajia darasade ore yui. Ga chacacãre gáguedaté uaté ome daru omone uje ore cháguena gaté jnese.

¹⁵ Ga Salomón uruode ome gáguedaté uaté chósi te: –Jé tiógarapı́sa yoquicotaquéode ome Pangarádejnai uté, israélgosode yocangureni Dupa. Uje Pangarádejnai chichaga daru omone aja yai casica David yui nanique, ga e uru quigode udore tocade ome Pangarádejnai etotiguejnai uté.

¹⁶ Uje Pangarádejnai chojningame yai nanique: "Iji diri uté uje yijnime yurasade israélgoso udore ore iji egı́ptogosode ore uniri nanique, jé aja deréjnane udojo, mu que yajegaite pidánique uñeque iji puague uñáraque iji israélgosode uacajade jnese, ga pipesute yiguı́jnarique ome yu iji pidánique jeta yugúsiji ajei. Mu yajegaidi tu ua, David á, ujetiga agúsi báringai eduguéjna uté ome yurasade israélgoso ore jne."–

¹⁷ Enga Salomón jnopo daruode údi aja darasade ore nanique rĩ uje chojninga: –Yai David potapı́sa jóroga ujetiga pésu Pangarádejnai iguı́jnarique nanique ujetiga picotaque israélgosode yocangureni Dupa uté iji ipesutique guiguı́jna nanique.

¹⁸ Mu Pangarádejnai chojningame yai David uté nanique: "Yiraja uje bapotigádi tu ujetiga apésu yiguı́jnarique enga yúringárique picotaque jogadi urásu. Enga ueradéjna báyipiedie udire ome yu.

¹⁹ Mu que ua u jne ujetiga apésu ome yu, David á. Mu bape basui tuté u jne ujetiga chiro yiguı́jnarique aja gaté jne ujetiga picotaque yu iji uté."–

²⁰ Ga Salomón chojninga nanique: –Dupade uru iyiejna casodica ome yai David e tocade uje e yibasája yai casica David charidi ome yúringai eduguéjna iji yocuniri Israel udé. Enga gose Pangarádejnai uté uje chichaga udore aja yai casica David yui nanique. Enga e yimate Pangarádejnai uté iguı́jna cuchábi aja gaté, enga yigaidi tu jeta israélgosode yocangureni Dupa úringárique picotaque jogadi urásu.

²¹ Ga e yipésu uté ajé uñai ujetiga uruode pi cajo charidi u uté. Enga Pangarádejnai uru pirosobádode déji uruode pi cajo uté ajei, uje yocayode jnani bajácho ore gajneque udore nanique uje uté chijnime ore iji egı́ptogosode ore uniri nanique.–

Salomón e chacãre Pangarádejnai Dupade gai ga chijócha ajei údi ome darasade israélgose udore ore

²² Enga jé u nanique uje Salomón chejna daruode guesi nanique ome darasade ore enga basája Pangarádejnai gaserani uté iquei. Enga jé u uje chãrai dajmanecade iji gaté iji israélgose dipeséode ore edominone jnese.

²³ Enga chejnapúsu daruode enga chojninga: –Pangarádejná, israélgosode yocangureni Dupa upúsu ua. Que dupa uñeque cuse jeta cho ua iji gaté, jnumi ore jnese. Uje ua u uje jecucha baru iyiejna uréone tocade ome barógode udore ore gatuaque. Jé aja uje bangongara bajnoraquédatéi aja ore uje ore chejna raja baroquéode úringáringo pigaicho.

²⁴ Bapésu ga baru cásodicáite e tocade ome baro casicaite yai David. Uje bachaga baru omone aja uté yui nanique ga baruode udore e tocade ¡janipe! iji diri tudé ome báringai etóguejna.–

²⁵ Ga Salomón chojninga: –Pangarádejná, israélgosode yocangureni Dupade á, be ga baru cásodicáite tocade to iji diri udé uje bachaga udore aja baro casicaite yai David uté nanique. Uje baruode chósi tome uté nanique: "David á, jeta bape disi ejode ore chejna raja dáringane añeratácho iji yiquei gatuaque, ga jé ore chajna baquigade jeta ore chañuru deo ome yojningane cucha, enga a jé u jne ujetiga ca ore chimoque dayaridi iji israélgosode ujade ome dáringane eduguéjna iji yedominone gatuaque."–

²⁶ Ga Salomón chojningame Dupade: –Israélgosode yocangureni Dupade á, be ga baru cásodicáite ome baro casicaite David tocade iji diri udé ome dáringane quique ũréo uje bachagája yai uté yui nanique.–

²⁷ Ga Salomón chojninga: –Dupade á, ¿ama jé ũré enga ácarásiji jnumi tudé a? ¡Úngare! Bapédugu jnumi tudé arı̃a. ¡Urénga, bapédugupúsu gaté, gatajnoquei ore jnese to! Jétapũré yimani baguı́jna cuchape udé uje que toc ujetiga ca apédugurásu to.

²⁸ E mu Pangarádejná, Yudupá, adójnangapı́sa yajei jochaquéode udojo ome ua. Be ga angarami baroi tuyu yicatecãraitigade udojo. Osõrape uyu, ga jé be ga achajnai yutoquéode udojo uje yı̃́care ome ua iji benominone iji deréjnai udé.

²⁹ Yipotigádi tu gu ujetiga ajiripise yorai baguı́jna udé yúode, iji deréjnane, dejade ore jnese, uje bajegaite ica ujetiga o bayaridı́ji ome bei úringárique picotaque. Enga jé u jeta baroi tuyu yajı́arása baguı́jna cuchábi yui ome yicatecãraitigade iji de ome ua enga jı̃raque pangarate uyu ome ua.

³⁰ Angári baroi tuyu yajé jochaquéode udojo, enga angári barasade israélgose ore catecãraitigade ome ua to ujetiga ore tajia baguı́jna cuchábi yui to jne. Ujetiga yicatecãcoi ua ga be ga angári yoque iji bedáidatéi iji gatajnoquei uté. Achajnai yoquicatecãraitigade udore, ga ãro yoquisijnaringuéone to.–

³¹ Enga Salomón qué jnopo dacatecãraitigade údi rı̃, ga chojninga: –Dupade á, ja seca jnanı́rique cho ujórique ayoré báji cuchárique, enga ujórique ayoré uté chotigase jeta bárique cucha déji. Ujetiga poite uté gosi aja baserani iquei iji baguı́jna cuchábi uté, enga uté dorási ga chajo raja úringai ũré iji uté ome daru iyiejnane udore.

³² Mu adójnanga barógode udore uru quigode jne iji bedáidatéi iji gatajnoquei ome báringai padode ajirisõre. Jeta jé ũré gosi uje que pésu cucha gajnarétique, enga be jne enga úringai ũré choqui guesi jne. Jeoga jé ũré uje gosi pésu pisijnaringuéone enga a jé tiógararása ujetiga o bajuñame uté gosi jne uje máraque gu.–

³³ Enga Salomón jnopo dajei jochaquéode udore údi ome Pangarádejnai gaté rı̃, ga chojninga: –Ja seca pujnuéngai barásapı́sode israélgose ore ome damajósoningo jne, ga ore umajósoningo jno ore údi aja danirone, ga gose barasade ore ate gajnaréngone ome ua. Mu ujetiga ore chajni babai jne, enga ore chopo dangureni iji ua jne rı̃, enga ujetiga ore chijóchapo bajei údi ome raque rı̃ iji baguı́jna cuchábi udé, enga be ga osõrápo ore to jne rı̃.

³⁴ Enga be ga angaripı́si ore uru quigode iji bedáidatéi iji gaté. Enga ãro barasade israélgose ore ate gajnaréngone to jne. Enga be ga atirépo ore aja ore dáqui cásodicáite gajnei punire rı̃ uje beranome ore nanique.–

^35-36 Salomón jnusina jeta urasade ate gajnaréngone déji enga Dupade suru guéode yui ome ore, ga jé u uje chojninga: –Pangarádejnai Dupade á, ja seca chise dı́nique jne enga ajuru gaté yui jne, ga ca begapo jne rı̃ ome ore isijnaringuéone ome ua. Mu ujetiga ore tajia baguı́jna cuchábi yui udé uje ore catecã́ri ua, jé aja jeta ore chisiapo babai te rı̃, enga ujetiga ore chicai ti yui ome dasijnaringuéone udore gu basocai uté uje bo bajuñame ore, enga be ga angári ore icatecãraitigade jne iji bedáidatéi iji gaté. Ga ãro barasade israélgose ore isijnaringuéone jne uje barócho udore ore. Enga be ga ango dajeque ueradi taja ore ujetiga ore chajna uté. Ga be ga arócapo guéode aja baniri udé rı̃, uje e bẽrate puniri udé ome barasade jeta ore cho dajnéngu.–

³⁷ Enga Salomón chojninga: –Jeoga chaguhédatérique chise yocuniri udé, jeoga dequejnareque chagúrique u. Jeoga yocacade cucha toi jeta arenie chujé, jeoga yocacade cucha beta ga acarane judúguejna iji jnumone jne, jeoga chuguyúgudie, amuranie ore tagu yocacade cucha jne. Jeoga yocumajósoningo u jne ujetiga ore chaparu yoquidáyode gáyode jeta ore doi pocaningane ome yoque, jeoga dequejnareque ponáyone uje tṍraji paoi gai, jeoga cucha dacate uñéngo chise yoque enga sué yoquibánique jne.

³⁸ Mu ujetiga israélgosode udore uñeque catecã́ri ua uje cho dáyugu re ome daba gajnéone cucha ome ua, jeoga barasade jnese u jeta ore chijócha bajei údi ome raque, mu be ga angári ore icatecãraitigade jnese ome ua jne uje uté gosi tajia baguı́jna cuchábi yui ga chujé dajmanáyone aja baguı́jna cuchábi udé yui.

³⁹ Enga ua uje bagúsi bedáidatéi iji gaté, be ga angári ore ga anoningase ore isijnaringuéone to. Uje gusu ua uje baraja ayoré chojmara, chojmarane áyipiedie quigode jnese iji ore ajéode gu. Jecute be enga o ayoré chojmara, chojmarane ore oré ome ore, enga bamaningone udore jé chiradı́rase ore ipesutı́go cucha.

⁴⁰ Uje bagaidi turásu gu ujetiga barasade udore ore todo bei ga ore dopórasi bojningane cucha iji dirode jnese rı̃, jé aja deruénique iji puniri udé uje beranome yocayode ore nanique.–

^41-43 Enga Salomón icatecãraitigade jé jno dádi, uje jnusina purása quedéjnane ome Pangarádejnai jeta chosõre ore to, ga chojninga: –Purása quedéjnane a ore chudute bajnomei ome báringai ujopı́erã́quedaté jne, jé aja báringai etotinguerãque to, ga a ore chutṍri ua to ome re jne. A unejángome barasade israélgoso udore ore mu a purása quedéjnarique tṍraji danire idájatique uté ujeta chudute bajnomé ueradi uté, ga tibágui israélgosode yocuniri udé to ujetiga catecã́ri ua iji baguı́jna cuchábi uje bagúsiji uté. Jeta uté gosi tajia baguı́jnai yui to ome dacatecãráitigárigo enga be ga angári icatecãráitigárigo to iji bedáidatéi iji gaté enga be ga ası́ome uté gosi ajegaidode cucha jnese ome to. Enga basocade udore pésurásu ga purása quedéjnane iji erámi údode jnese ore chirajárase bei ueradi uté, enga a jé ore iradigode urásu barasade israélgoso uyoque ujetiga ore tõrorája baquei to jne. Enga a ore chidójnanga to jne uje bo bayaridı́ji yipesudi baguı́jna cuchape udé uje yipésu ome báringárique pisı́gai.–

^44-45 Ga Salomón chojningápome Pangarádejnai rı̃: –Pangarádejná, ujetiga aroque barasade aja pocaningárique yui ujeta ore pésu ome damajósoningo ore enga be enga arota ore ujetiga ore chijócha bajei údi ome raque. Ujetiga ore tajia bedójnari bedáidatéi Jerusalén yui jé aja baguı́jna cuchábi uje yipésu ome báringárique picotaque, enga jı̃raque angári ore ajei jochaquéode udore ome ua iji bedáidatéi iji gaté. Enga be ga apésu jeta basoca uréone tocade ome ore jne.–

⁴⁶ Ga Salomón chojninga: –Jé ũré uje que ayorérique déji jeta ı́jnoque gosi ate gajnarétique. Jecute obiréjna uje a chise dı́nique jne jetiga barasade israélgose ore pésu pisijnaringuéone ome ua. Enga a ore isijnaringuéone ijnimique bájningai jne ome re. Enga a bẽrate ore jne ome ore umajósoningo jne, enga a ore jno ore údi aja danire idájatigo, jeoga ore unire idógosirigo.

⁴⁷ Mu ujetiga ore chidójnangapı́sa dasoca gajnaréngone ome ua iji dasasórone ore uniri uté, enga a jé u jne ujetiga ore doi ga ore chécãre dáyipie quigode ome ua, enga barása pisagode udore ore a chijócha bajei údi ome raque iji punire quedéjnai uté. Enga a ore chatata daba gajnéone cucha ome ua jne, uje a ore chojningame ua: "Máraque yoque, uje yicagóji quedéjnane ome badode, ga yipéco yoquisoca noñángone."

^48-49 A ore déji punire quedéjnai uté, uje ore umajosórone jno ore údi aja uté nanique, mu ujetiga ore chejna dáyipiedie, dáringane ayoré aja ua jnese uje ore chajni babai iji dasasórone ujárigo, mu be enga angári ore. Ujetiga ore tajia daniri casica yui te jne uje beranome ore dayode ica, aja bedójnari pidai Jerusalén uté, ga ore tajia yipesudi baguı́jna yui jne uje yipésu ome bei úringárique pisı́gai, mu be jne ga angári ore icatecãraitigade ome ua jne iji bedáidatéi iji gaté jeta ore chijócha bajei údi ome raque. Enga be ga apésapo basoca uréone quigode ome ore jne rı̃.

⁵⁰ Ãro barasade ore ipesute gajnaréngone jnese ome ua, jé aja uje ore tagu baruode aja ica. Enga be ga ajocase ore isasórone áyipiedie ujetiga ore chosõre ore iji dajade.

⁵¹ Bamo arı̃a uje barása bedójnarione u udore ore enga jé bajneque ore. Ua u uje bajnime ore iji Egı́pto, uje chorase jetiga ore déji ejo pipota uje ore chãrei guebéode iji ome egı́ptogosode ore josipiedie nanique.–

⁵² Ga Salomón chojninga: –Be ga adójnangapı́sa baroi tuyu yajei jochaquéode ome ua jne, jé aja barasade israélgose ore ajei jochaquéode udore to, ga be ga angáripı́si ore gatuaque jeta ore tibidi ua ome báringai Pátajasṍre.

⁵³ Chamáñaje bangara israélgosode ore jogadi ome erámi unirisórone ore jnese ujetiga o barása bedójnari iji ore. Uje baro casicaite Moisés ajnerámeone baru quicho u udore ome barasade nanique uje bajnime yocayode ore iji Egı́pto uté, Pangarádejna Dupa Pujnuéngaisṍri á.–

Eduguéjna cuchábi Salomón cho darúja urasade ore jnese ome daru omone

⁵⁴ Uje Salomón catecã́ri Pangarádejnai nanique ga chichaga dagataidie aja jnumi iji Pangarádejnai gaserani uté iquei ga chãrai dajmanecade iji gaté. Mu uje e chimate chingo dajei jochaquéode udore cucha jnese ome Pangarádejnai uté, enga jé u uje chague.

⁵⁵ Ga jé u uje chajirápo israélgose dipeséode iji dayáguesiringai uté rı̃. Enga chejnapúsu daruode ga cho darúja ore jnese ome daru omone.

⁵⁶ Enga Salomón uru ueradode chósi te: –Pangarádejnai uté jé tiógarapı́sa dáringai pisı́gai jõ. Uje uté chichaga pajesereringai aja darasade israélgose yoqui nanique enga ichagájade darúo udore e tocade jnese ome yoque. Uje cucha ueradode jnese uje Dupade chichagája yoqui ome daroi Moisés nanique ga e tocade ome yoque, ga que uruode uñeque toja.–

⁵⁷ Ga Salomón chojninga: –¡Yipésupú ga a Pangarádejnai Dupade dépisiji yocari to jne jõ, uje uté dépisiji yocayode ore ujade nanique! ¡Yipésupú ga a jé ca noñome yóguiji te jmete jne jõ!

⁵⁸ ¡Yipésupú ga a Dupade chatire yocáyipiedie dabai ga pésu yoque ga ueradome yoque ujetiga yejnángo yógaja adode jnese jne jõ! Jé u to ujetiga pésu yocúringane angoninguite guesaque ome daru quigode, jé aja iroqué gajnéone cucha udore, jé aja estatutos udore quigode, uje e chisı́ome yocayode jnani bajácho ore nanique ujetiga ore doi udore quigode.

⁵⁹ ¡Yipésupú ga Pangarádejnai Dupade a jnusinapı́sa yuruode udojo quigode jne jõ, iji dirode, dejade ore jnese, uje yijócha ajei údi iji iquei! Yigaidi u gu ujetiga uté isoca uréone tocade ome daroi uyu, jé upome urasade israélgose uaque jne rı̃. Ga uté doi enga chisı́ome yoquiyóñangone cucha ome yoque iji dirode jnese.

⁶⁰ Enga Pangarádejnai átegoningáne udore ome yoque a jé pésurásu jne ujetiga purása quedéjnane jnese iji erámi údode ore chirajárase uje Pangarádejnai u Dupa ũrei enga que dupa uñeque cuse.

⁶¹ Jecute yósi tome uaque, yurasade uaque á: beyoi ga eduyo Pangarádejnai uté iji uacajéode, uje yocangureni Dupade u. Ejnáño uágaja adode, enga angoninguite guesaque uágome uté iroquéode ome uaque. Uje uacasocade jé u iji diri tudé, mu a jé ejnáño uágaja uacangoninguı́teguesáringane aja uacaquei iji dirode jnese jne.–

E jogadi tu uje eduguéjna cuchábi Salomón, urasade ore chingo Pangarádejnai Dupade iguı́jna cuchábi ome Pangarádejnai uté ujetiga chimesẽre nanique ga gajneque uté

⁶² Uje eduguéjna cuchábi Salomón cha dara ga Salomón, jé aja uté urasade ore jnese, ore tẽra dẽrapáidode cuchiso ome Pangarádejnai nanique.

⁶³ Enga Salomón ore guẽrapáidode tórodatéo ome Pangarádejnai ga batigai chise 22.000 nanique, ga gueranenie áyasai ome uté batigai chise 120.000 nanique iji uté. Enga ore guẽrapáidode imone u nanique ujetiga Pangarádejnai, israélgosode ore ajei cho sere ome ñane gu. Ga eduguéjna cuchábi Salomón jé aja israélgosode ore jnese isocai u uté nanique uje ore chingo Salomón ipesudi Pangarádejnai Dupade iguı́jna cuchape ome uté nanique ujetiga chimesẽre ga cho dajnéngu.

⁶⁴ Iji diri uté Salomón chimo uje ore guẽrapaite uásejnane udore chipédugu Pangarádejnai gajnei gaserãte uje pipesute uté iji bronce. Ga cãra guesáringai gatócoro iji Pangarádejnai iguı́jnai iquei ujetiga ore tẽrája Dupade iji guesáringai uté to. Mu que ore chapúsaja gotique, uje Salomón pésu guesáringai gatócoro uté úringai uerate ome Dupade bajaque. Ga jé u nanique uje ore chãru degode cuchiso ome Pangarádejnai iji jogadi uté. Jé basa ga ore guẽrapáidode cuchiso uje pajesereringai gajnecho udore, ga ore chaquesu udore ı́ode jeta ore chibore iji guesáringai tuté to ome Pangarádejnai nanique. Ga ore chiborápo arroze quedéjnai ubugode iji uté to nanique rı̃ ome Pangarádejnai uté.

⁶⁵ Enga jé u uje israélgosode ore chejnája guesi dẽrapáidode cucha ome Pangarádejnai Dupade nanique, mu que jı̃raque ore jnoji Jerusalén uté. Ga ore guejnane dire 7 nanique uje ore chácariji uté nanique ome cutejmai daninaquéjna uje ore pésu iji Pangarádejnai iquei. Mu ore chise dire gare iji tı́ode eruei nanique ga Salomón qué chaquı̃́rapo ore rı̃ jeta jé qué ore chácarapo rı̃ aja ujórigo 7 dire, ga yátago ore aja ñane ga 14 dirode. Enga gáguedaté uaté tṍraji daniri uté údode jnese. Enga idájapise uñane garanone pidáyo, uje uñane tṍraji Hamat uté iji casaque garani. Jé basa ga uñane tṍraji ore idáyode uje déji yote quedéjnai edógai uje tié uaté déji egı́ptogosode ore uniri tiógarei iji umusoi garani uté.

⁶⁶ Ga e chise dire ejoi nanique ga jé u uje Salomón quene chiroque gáguedaté uaté aja ore idáyode yúode nanique. Ga gáguedaté ore chacacãre deduguéjna cuchábi ome daru omone, enga jé u uje ore jnome daguı́jnane yúode. Ga ore nı́napúsu re aja dajesúode ga gose Pangarádejnai ate ueradode udore uje pésu ome daro casica David jé aja urasade israélgose udore ore.