1 Reyes 7 - Dupade Uruode

E chisápo diri to nanique rı̃ uje Salomón chiro daguı́jna cuchábi to

¹ Ga jé u nanique uje Salomón pésu daguı́jna cuchábi to. Ga guejnanie siquerei 13 uje chiro daguı́jnai nanique ga quene chimate.

² Ga Salomón pésu daguı́jnai i nanique ga chojningame uté Yiguı́jnai Abué uje Tṍraji Lı́bano. Enga métrode 45 iji Salomón iguı́jnai umaningai nanique. Jé basa ga 22 métros y médio iji pajei nanique. Enga umaningai iji iguı́jnai ójo chise 13 métros y médio rı̃. Ga uté iguı́jna cutádedie tṍraji pórechoquı́die nanique uje chicáji teiii, ga querújna acháidode ga ore chujé eruéode aja ñane to. Ga pésu cutádedie udire ga popeque ga gagájni jochade aja dajesúode.

³ Ga acháidode batigai chise 45 ga cuchadatéo acháidode udore nanique. Enga acháidode udore jochade gadioque. Enga udore jogadode chise 15 to nanique, ga chichai dore, chichai dore acháidode, cutádode udore aja dajesui uje pésu iji gaté. Ga ore chujé acháitedatéode udore aja cutádedie eruéode. Ga ore pésu cutádedie, acháidode ore iji poria nanique uje i tu cédro. Ga e ore doi táblade ga ore chicháji acháidode gáyode uje ore pésu guiguı́jnai ójo nanique. Ga ore pésu táblade ome poridie to nanique uje udire i tu cédro.

⁴ Enga ore pésu bocadode iji Salomón iguı́jna cuchábi ga gadioc, gadióguiji dajogadode aja dajesui iji dosate chojmarai. Ga ore pésapo bocadode iji uécha uñai rı̃. Ga gadioc, gadióguiji dajogadode ore ipesudode bocacho to aja dajesui iji dosate uñai uté. Ga bocadode udore chachapı́si ñane iji uécha gárode udore jnese.

⁵ Ga isocai jé upome piagode iji Salomón iguı́jnai uté to. Enga gadioc, gadióguiji uécha uñai te rı̃ enga piagode cáputapı́siji uñane quigode. Ore pésu ga tiroque gu. Ga pidode iji iguı́jnai piagoi cáputapı́siji jnumi nanique. Ga piagode iji uécha uñai chachapı́si uñane iji uécha uñai nanique.

⁶ Salomón pésu daguı́jna cuchábi ajé uñai nanique uje cuchadaté, ga ore chı̃́care Cutade Umarenie Jogadi taja uté nanique. Enga métrode chise 22 y médio iji iguı́jnai ajé uñai uté nanique. Jé basa ga métrode iji pajei chise 13 y médio nanique rı̃. Enga imeñé déji uté iquei gatei ga querúpise ajei uté to. Ga ore pésu cutádedatédie iji imeñé uaté eruéode to.

⁷ Enga Salomón pésu daguı́jnai ajé uñai gaté rı̃ jeta chajire darasade ore adode aja quigode iji uté. Ga charipı́datéi déji uté ajei nanique ome Salomón. Enga táblade ueque iguı́jnai ajei uté nanique, jé aja údi to rı̃. Ga ore pésu táblade udore iji poria uaté nanique uje i tu cédro.

⁸ Enga Salomón pésapo daguı́jna uñai te rı̃ iji udore quigade, jeta iguı́jnapı́si u jne. Ga pésapo daguı́jna uñai te rı̃ ome dacoté uje egı́ptogoto uaté ga eduguéjna cuchábi Faraón uro uaté nanique. Ga isocai chojmára ome uté ipesudode daguı́jna jnese, uje ore chopise ñane ome dáringane ueracho.

⁹ Ga ore chinguı́ra cucarãte uejade aja dapesudode daguı́jna jnese uje ore chirója dosadode jé aja údi, ga oreranguipı́so cucarãte uejade udore. Ga ore chaquesu cucarãte uejade eruéode ome serrúcho, jeta tiroque, uje e ore chatingara ome métroi bajaque. Ore gaidi tu ujetiga cucarãte uejade chopise jogadode gu. Ga ore chirópo cucarãte uejade iji iguı́jnai guesi to rı̃, jé aja charidébei uté to.

¹⁰ Uje ore chijócha Salomón iguı́jnane eruéode iji taningai nanique ga ore na cucarãte uejade aja derugode ajéode nanique. Ore gaidi tu gu jeta ore cho irı́bidi iji udore. Ga orerãque cucarãte uejade udore, enga uñane ore batigade chise 4 métro y médio nanique. Jé basa ga uñane ore batigade déji 3 métro y médio iquéode garósi nanique.

¹¹ Ga ore pésu Salomón iguı́jnai cutádedie iji poria nanique uje i tu cédro. Ga ore chiro iguı́jnai aja gaté ome cucarãte uejade to ga ueradı́pise cucarãte uejade udore ga oredie jiépisi nanique. Enga cucarãte uejade udore ga ore chaquesu eruéode nanique ome serrúcho, ga tiroguipise eruéode jnese nanique. Ga ore chasingare métrode aja ujetiga abubı́edie chopise ñane nanique.

¹² Enga Salomón uté isocade u unojo ome dayaridébei iji guesi nanique, uje pésu dajuyaquei iji gai jnese. Enga e ore chaquesu cucarãte uejade eruéode ome serrúcho jeta tiroque bajaque. Quigade, enga ore chimere cucarãte uejade aja táblade iji dapesudi dajuyaqué uté. Enga cucarãte uejade udore jochade gadiógaja dajesui iji ujuyaquei uté gai nanique. Jé basa ga chojmara táblade udore jochai iji ujuyaquei uté gai to nanique, uje pipesute táblade udore iji cédro nanique. Ga Salomón ujuyaquéode udore jé chopise ujuyaqué bajai uje chaparu Pangarádejnai Dupade iguı́jnai gai nanique.

Ga Salomón pésapo dáyipie ome Pangarádejnai Dupade iguı́jna puyai nanique rı̃ ujetiga chirópo cucháriguiji gaté rı̃

¹³ Ga jé u nanique uje Salomón tibidi tı́rogosi uje uté i tu Hiram nanique ujetiga pésu cucha uñane ome Pangarádejnai Dupade iguı́jnai.

¹⁴ Enga chequé abai togué Hiram uté daté nanique, ga israélgoto uaté. Uje uaté dayé gãrapi u jnani bajai Israel ujnacarode uñai uje i tu Neftalí nanique. Mu tı́rogose Hiram uté dai nanique. Uje qué eca nanique enga dai tuté chirajapise uje chiro cuchade ome guebei nanique uje guebei uté i tu bronce. Ga ujnacari chirajapise jeta chiro cuchade ome bronce to. Uje Salomón tibidi Hiram uté nanique ga uté jno ga tibágui Salomón pijnane. Ga jé u uje chise Salomón nanique ga dopı́si Salomón ojningane cucha jnese uje pésu.

Hiram uté jé aja irógode ore pésu cutade gáredie iji bronce nanique uje querújnapisei ga ueradépisi ore aja gaté jnese

¹⁵ Ga jé u uje Hiram uté pésu cutádedie nanique, uje gaidi tu gu ujetiga Pangarádejnai Dupade iguı́jna cuchábi gajnei udire jne, jeta garaja gaté cutádedie udire. Ga pésu udire iji guebei uje guebei uté i tu bronce. Enga cutádedie udire umaningane chise 8 métrode iji gaté yui nanique. Ga uje ore chadı́ja métroi aja cutádedie udire pajei ga métrode chise 5.

¹⁶ Ga chiro dajuyaqué gatéode iji udire eruéode nanique ga ueradı́piso ipesudode udore iji cutádedie eruéode nanique. Enga pésu udore ome bronce to. Ga querújnapı́so ga umaningai déji 2 métrode iquei garósi, ga ore cho ñane jnese.

¹⁷ Ore doi ojnaquérodie ga ore pésu ugórodie iji ñane ga ore chadı́ja dajuyaquéode eruépisode ga aparagádipı́so ome ore.

¹⁸ Ore pésu pore a gajnunie iji dapesudedie ojnaquéroi dosadode jnese uje adie udire i tu granáda, ga ore doi ga ore chicháji dajuyaquéode eruéode jnese ga chaparu gai jnese iji cutádedie eruéode iji gaté yui.

¹⁹ Que gusu pore a gajnunie uje aparagate ore ipesudode iji ore ujuyaquéode mu ore pésu cucha pojnánguenie iji eruépisi gaté rı̃. Ga cucha pojnangue uaté i tu lı́rio nanique. Ga cutádedie ueradépisi jnese aja gaté ga chopise ñane ueratigai. Ga cucha pojnánguenie udire iji eruépisi chise 2 métros nanique.

²⁰ Enga pore a gajnunie iji ore ujuyaquei eruéode batigai chise 200 nanique uje pore adie udire i tu granáda.

^21-22 Ga Hiram uté e chimate dapesudedie pojnánguei aja gaté iji cutádedie udire eruéode, ga ueradéjnapisi udire. Ga Hiram chicha dapesudedie cutádei aja jnumi iji piagoi ejode iji Pangarádejnai Dupade iguı́jna puyai imeñé údi. Ga doi nanique ga pésu dapesudedie cutádei ore ı́ode. Chicha uña taja ãrachua qui ga chı̃́care Jaquín aja uaté. Chicha uña taja arasé qui ga chı̃́care Boaz aja uaté. Enga jé u uje Hiram uté chimanipise dasagode ome cutádedie udire.

Quigade enga Hiram, irógode udore pésu bajodaté nañoré cucháberaque, ga cho bajodaté uaté cutádeji ore ipesudode tórodaté gajnúo udore nanique

²³ Hiram uté e doi nanique ga pésu bajodaté cucháberaque nanique. Enga querújnapise ipesudé uaté nanique ga ajei idája iji guesi. Ga pésu ome guebei nanique uje i tu bronce. Enga yodi gajné jne ipesudé bajodaté uaté. Ga ipesudé uaté umaningai chise 4 métros y médio. Ga umaningai iji gaté chise 2 métros iquéode garósi. Ga ore chasingare métrode aja pajei ga métrode chise 13 y médio nanique rı̃.

²⁴ Ga Hiram uté pésu duchúbiedie gajnunie iji bajo cuchabé pijnanai eruei údi ga chaparu eruei údi gai jnese. Ga pésapo jochaque uñai te rı̃ iji bajai tuqué údi gaté rı̃, ga pésu duchúbiedie gajnunie iji eruéode gaté rı̃. Enga duchúbiedie gajnunie ga que chimoque uje chejna yijmanáyone iji centı́metro 45-dı́e gatuaque, jé aja uje chise ñane iji uéchai. Enga ore uruchachade udore iji ore ipesudé uaté gai ga catája guebei uje i tu bronce nanique. Ga que pejñunguı́ji bajo cuchabé uaté gotique, uje chojmarápisiji jnumi.

²⁵ Ga Salomón ajegaidi jnani uté pésapo tórodatéode gajnúone nanique rı̃ jeta cho bajodaté uaté cutádeji tórodaté gajnúone udore. Enga chicha dapesudé bajodaté uaté aja udore gai. Uje gare iji yirı́dai ipesudode tórodatéo. Ga ore pésu tórodatéode udore gajnúone iji guebei nanique uje i tu bronce. Enga ipesudode tórodatéo gadioque ore iji ore jogadode nanique. Ga Hiram uté doi dapesudode tórodaté gadiógode nanique ga chicháji jeta tajia guedé garani yui. Ga dopoi dorade tórodaté gajnúo uñane uje gadiócapo ore nanique rı̃ enga chichapo gadiógode udore aja rı̃ jeta tajia umusoi garani yui. Ga dopoi dorade tórodaté gajnu gadiógode uñane nanique rı̃ ga chichapo gadiógode udore aja jeta tajia guedé cacadi yui rı̃. Ga dopoi dorade tórodaté gajnúo uñane to nanique rı̃ ga chichapo gadiógode udore aja jeta tajia casaque garani yui nanique rı̃. Ga chorei dorade tórodaté gajnúone carigode iji ñane yúode nanique, ga udore gatoidie chicáji guesode yúode jnese.

²⁶ Enga Hiram ora uaté bajodaté dañoré uaté nanique ga dañóraringai batigai chise 8 centı́metrodie nanique. Enga bajodaté uaté pijnani ejode ueradéjnapise to ga chopise cucha pojnánguenie uje udire i tu lı́rio nanique. Enga ore ora bajodaté uaté ajei nanique ga querújnapise ga chimécãre 44 mil lı́tros iji yodi, jeta ore chanı́raja jne.

Hiram ipesudé ejodie u doragadé utugudé dugurenie jeta ipesudedie bajo quedéjna chácariji ore gai jne

²⁷ Enga Hiram uté pésapo doragadé utugudé dugurenie rı̃ iji guebei uje i tu bronce. Ga oragádedie udire chejna yijmanáyone nanique. Ga umaningane cási chise 2 métros. Ga pajei batigai jé aja umaningai batigai ga jé chojmara iji jnumi jnese. Ga umaningai iji gaté yui cási chise métro chojmarai y médio to.

²⁸ Ga Hiram uté chósi tome doragadé utugudé dugurenie udire: Chijami dosadode gáyode jnese ome guebeque dirı́ji uje guebei uté i tu bronce. Ga chujépo uñai taja eruei te rı̃ iji jnumi yui, jé aja gaté yui to, jé aja dosadode eruéode to ga catája orai gosi jnese.

²⁹ Ga pésu cucha oredie iji doragadé utugudé dugurenie udire gáyode jnese ga pésu gaté unirisórone oredie iji to uje ore ı́ode u querubı́neone. Uté pésu tórodatéode oredie rı̃, jé aja caratedie oredie, uje ore chadı́ja udire nanique. Ore pésapo pore acarane oredie rı̃ iji tórodatéode, caratedie ore oredie iji uéchade jnese, ga ipesudode udore cucha déji uéchade jnese.

³⁰ Hiram uté isocade u udore nanique, uje pésu cuchade ome udore. Uté pésu doragadérigui, ga pésapo dugudie gaté rı̃. Ga dugu gagájninie déji oragadé utugudé dugurenie udire chojmara, chojmaranie údode, ga cho dugúji udire. Ga pésu isangurúone to ga nája dugudie ajéode. Pésu dugudie jé aja isangurúone udore ore jnese iji guebei uje i tu bronce. Enga pésapo doragadé utugudé dugurenie udire angoroinie gaté rı̃ iji eruépisode, uje pore acarane oredie déji angoroinie udire dosadode jnese. Enga pésu angoroinie udire, uje gaidi u gu ujetiga chajo bajo quedéjnaringui aja jnumi iji udire gai ujetiga pésu udire jne.

³¹ Uté pésu jeta guesája doragadé utugudé dugurenie ajéode mu pésu chaquı́piedie iji jnumi yui, ga pésu odobe tiji mu guesája gatócoro ga centı́metrodie 45 iji gaté yui. Jé basa ga angoroinie iji odobe eruéode udire umaningai batigai chise 68 centı́metrodie. Ga ore pésu bajo uaté pijnanane nanique ga ore chica pijnanane nanique ga ueradı́pise ore icapı́dode iji pijnanane. Ore oragadé uaté édajidí eruéode chopise ñane nanique, ga odobe déji gatócoropise.

³² Ga dugudie que chimoque doragadé udire uode údode, ga dugudie isangurúone jogadi u oragadé utugudé dugurenie udire údi, ga udire etóguiji dayaridode. Ga dugu chojmara, chojmaranie udire abubı́e chise 68 centı́metrodie jnese.

³³ Ga ore pésu dugudie iji doragadé utugudé dugurenie údi ga adi jé u guebéquedatéode dugudie isocade to. Ore gaidi u gu jeta ore chorei quedéjnane. Ga ore pésu dugudie isangurúone, erásorone uñane iji guebei uje i tu bronce ga bronce ueque ore jnese.

³⁴ Ga pésu isangurúone iji doragadé utugudé dugurenie ajidedie jnese ga gagájni iji doragadé chojmara ajidedie. Ga isangurúone udore cho angoroinie iji ajidedie.

³⁵ Hiram uté pésu doragadé utugudé uaté edo iji gatajidi iji guebei nanique uje chujé guebei ga ejágaja ñane. Ga jé u uje pésu doragadé utugudé angoroinie ome to uje chujé guebei ga ejaque ga angoroinie catapı́saja eruéode. Ga ipesudedie angoronei iji eruéode udire umaningai chise 22 centı́metrodie. Ga uté doi guebeque uejai ga jé chajója ujade ¡tac! Ga catapı́saja édajidí eruépisi iji gaté ¡taque! Ga jé isoca ome dosadode jnese uje chajo guebeque uejai aja édajidí eruépisi ga catápisaja to.

³⁶ Enga Hiram uté doi doragadé utugudedie udire nanique ga chica gai, ga jé u uje pésu caratedie oredie iji dacapı́dode nanique. Enga pésapo gaté unirisórone oredie iji gai te rı̃ uje udore ı́ode u querubı́neone, enga pésapo ijnaque quedéjnanie oredie iji gáyode rı̃. Ga jnani uté chı̃retápise doragadé utugudedie gáyode udore ome dapesudode cuchade oré gaté udire jnese.

³⁷ Ga isocai jé u uté nanique uje chimanipise doragadé utugudé dugurenie aja gatéode uje chejna yijmanáyone. Enga jé isocade chopise ñane jnese, enga garode jé chopise ñane jnese.

³⁸ Ga isocai jé u udé nanique uje Hiram pésu bajo quedéjnanie udire ome bronce to nanique, uje ipesudedie udire chejna yijmanáyone to. Ga udire querújnapisei nanique ga umaningai cási chise 2 métros. Enga ore oradie chojmára, chojmaranie udire jnese chimécãre 880 lı́trode iji yodi tiji ore ajéode jne. Ga ore chicha bajodı́e aja doragadé utugudé dugurenie edodie iji édajidóde jnese nanique, ga chojmára, chojmára iji udire ajei jnese.

³⁹ Ga doi doragadé utugudé dugurenie udire nanique uje bajodı́e déji édajidóde enga chicha uñanie aja Dupade iguı́jnai ejoi uje déji casaque garani yui ga chejna yijmanai udire. Enga chichapo uñanie aja Dupade iguı́jnai uécha uñai iji umusoi garani yui ga udire chejna yijmanai to rı̃. Quigade enga doi dapesudé bajodaté gajnua uje yodi gajné uaté to ga chicháji Dupade iguı́jnai ajidé iji umusoi garani, guedé garani ore ujai nanique.

⁴⁰ Mu que gusu udore uje Hiram pésu udore mu pésapo cucha uñane ome Pangarádejnai Dupade iguı́jnai to nanique rı̃. Ga pésapo pı̃racadie to nanique rı̃, jé aja bajo tajégueguedie. Ga pésapo corángarã́que ajámamone to nanique rı̃. Ga jé u uje Hiram chimate dasagode udore jnese ome Pangarádejnai Dupade iguı́jna puyai uje Salomón chirógaja nanique gu, enga Hiram uté imaningone cucha u udojo jnese uje pésu ome Pangarádejnai Dupade iguı́jna puyai uté:

E chise diri nanique uje Hiram chimate dapesute dipeséode udore cucha jnese ome bronce, uje pipesucho udore ome Pangarádejnai Dupade iguı́jna cuchábi uté, enga ueracho udore jnese

⁴¹ Uté imánenie uñanie u cutádedatédie uje gare udire nanique; jé aja ujuyaquéode uje déji cutádedie édajidóde iji gaté. Ga ojnaquérodie jé upo rı̃ uje ore pésu ugórodie iji ñane ga ore chadı́ja dajuyaquéode eruépisode ga aparagádipı́so ome ore.

⁴² Ga ipesudedie cucha a gajnunie upo rı̃ uje gare udire jochade iji ujuyaquéode eruéode, ga cucha adie udire gajnunie batigai chise 400 uje cucha a tuaté i tu granáda.

⁴³ Enga Hiram uté imaningone joranie u doragadé utugudé dugurenie to ga udire chejna yijmanáyone. Ga bajo quedéjnanie déji to uje chejna yijmanáyone to, uje ore chicháji doragádedie ajéode.

⁴⁴ Jõra jé upo bajodaté gajnua te rı̃ uje ore na yodi aja uaté ajei. Jorane jé upo tórodaté gajnúone rı̃ uje udore gajnúone gare ore iji yirı́dai. Ga ore chicha dapesudé bajodaté aja tórodaté gajnúone gáyode.

⁴⁵ Jorane upo pı̃racadie rı̃, jé aja bajo tajégueguedie, jé aja corángarangámone ore to. Ga Hiram imaningone cucha udore garani tu guebei nanique uje i tu bronce. Enga ore charose gai nanique jeta nanganatapise.

⁴⁶ Uje Hiram di iji taningai iji Salomón nanique ga Salomón chirógaja garai nanique iji tié edógai uje tié uaté i tu Jordán. Ga garai tuté déji ore idáyode ujai nanique uje idáyode udore ı́ode u udojo: Sucot, Saretán ore. Gaidi tu gu nanique jeta chucué dachabei jeta chiro dachabei ajei. Ga pésu ajei enga chãrei guebei nanique ga chanire dãraquei guebeque otadi aja dorai dachabeque ajei nanique. Enga jé u nanique uje cajnore dachabei ga guebei otadi catája ñane iji dachabei ajei nanique enga tarata dachabei nanique uje e uajate guebei. Ga chijnime guebei iji dorai dachabeque ajei ga nóña ga ueradı́pise ipesudi nanique. Ga jé isoca uté ome dapesudode udore jnese.

⁴⁷ Ga Hiram imaningone uje pipesucho udore iji guebei nanique uje i tu bronce jiépisi nanique. Jecute Salomón que chajire ikı́lode batigade.

E chise diri nanique uje Salomón chutṍri darógode ujetiga ore chirópo cuchade ome Pangarádejnai Dupade iguı́jna puyai gaté rı̃

⁴⁸ Enga jé u nanique uje Salomón chiroque darógode ore aja ujetiga ore pésu cuchade ome Pangarádejnai Dupade iguı́jna puyai to. Ga ore ipesudode u udojo jnese nanique: Ore pésu gaserãte cuchátique nanique iji óro uegue. Ore pésu mésa iji óro to ga ore chicha uaté aja Pangarádejnai Dupade iguı́jna puyai ajei to. Ga ore chicha arurégode aja uaté gai uje Pangarádejnai gajnecho udore.

⁴⁹ Ga ore pésapo ibioque quedéjnaringo rı̃ jeta ore chicháji Pangarádejnai Dupade iguı́jna puyai ajei to ga pipesute udore iji óro uéguedie to. Ga ore chicha udore aja ajé uñai uté arubajéode iji ajé puyaguipı́si yui. Ga ore ipesudode ibioque quedéjna chejna yijmanai iji ãrachua qui, jé basa ga ore chicha dapesudode ibioque quedéjna uñane aja arasé qui ga chejna yijmanai to. Ga ueradı́pise ibioque quedéjnane udore ga ore pésu cucha pojnánguenie oredie iji ibioguéjna quedéjnane udore pajéode. Ga ore pésapo ibioque quedéjnane ore erásorone tijéra quedéjna uje uode paca to rı̃. Ga ore pésu cuchade udore jnese iji óro uéguei to.

⁵⁰ Enga ore pésapo bajodı́e to iji óro uéguedie rı̃. Enga ore pésapo ibioque quedéjnane isangurúone to eti tagu ga ore chujnungu ¡sere! ome ga óro uegue to. Ore pésapo bajo ajenenie rı̃ ga óro uéguei udire to. Ore pésapo catı́beode iji óro uéguedie to rı̃. Ore pésapo bajo ajáminie to iji óro uéguedie rı̃ jeta ore chanire pioi gueguerade iji udire ajei. Ga ore pésapo Pangarádejnai Dupade iguı́jna puyai piagoi isatodie uje cho biságradie to rı̃ iji óro uéguedie. Ga ore chadı́ja dapesudode aja Pangarádejnai Dupade iguı́jna puyai jorı́dedie iji ajé puyaguipı́si uté yui nanique. Enga ore pésu isatodie biságra udire iji Pangarádejnai Dupade iguı́jna puyai piagoi jorı́dedie iji guesi yui to.

⁵¹ Enga quene chise diri nanique uje ore chimate cuchade udore jnese uje Salomón chiroque ore aja ujetiga ore pésu ome Pangarádejnai Dupade iguı́jna puyai uté. Enga jé u nanique uje Salomón doi dai David gueranone cucha ome Pangarádejnai Dupade uje pipesucho udore iji óro, pláta ore nanique. Enga chicha dai gueranone udore aja Pangarádejnai Dupade iguı́jna puyai ajé uñai ajei uje cucha orerane jogadi u ajé uñai uté nanique.