1 Reyes 6 - Dupade Uruode

Quene chise deréjnai uté ome Pangarádejnai Dupade iguı́jna puyai úringárique poraque nanique

¹ Uje e siqueredie gagájni iji yui nanique uje Salomón basája dáringai israélgosode ore eduguéjna cuchape, ga jé u uje Salomón uté quene chiro Pangarádejnai Dupade iguı́jna puyai aja gaté. Guedosı́ode e gare nanique iji siqueré uaté uje Salomón pésu Pangarádejnai Dupade iguı́jnai ga guedosi uté i tu Zif ome ore nanique. Ga siqueredie e chise 480 iji yui uje israélgosode ore jnoji Egı́pto nanique ga quene Salomón, irógode ore chiro Pangarádejnai Dupade iguı́jnai aja gaté iji uté.

² Uje Salomón, ore chiro Pangarádejnai Dupade iguı́jnai nanique, ga querújna, ga umarejna. Enga isocade u udojo: métrode iji umaningai chise 27; jé basa ga métrode iji pajei chise 9; jé basa ga umaningai iji gaté yui chise 13 métros y médio, uje ore pésu aja gaté nanique.

³ Pangarádejnai Dupade iguı́jnai imeñéraque cuse to iji iquei. Ga imeñé iji iquei umaningai batigai chise 9 métrode. Ga umaningai iji arubajei métrode chise 4 y médio nanique.

⁴ Ga ore pésu bocadode iji Pangarádejnai Dupade iguı́jnai gai jnese iji gaté yui uje cho ñane ga popéguiji jnumi eruéode. Ga bocadode udore que jorı́deraque cuse mu jorı́dedie u udire uje ore chiramı́sara táblade iji ñane uje ore chajója ñane, ga emi chise ajei nanique.

⁵ Enga ore pésu guiguı́jna gatéode iji Pangarádejnai Dupade iguı́jna puyai ejode iji guesi ga ore déji jnumi ga ajéode chise ñane iji jnumi. Udore chujé rágaja Pangarádejnai Dupade iguı́jnai dosadode bisideque jnese. Gusu Pangarádejnai Dupade iguı́jnai piagoi yui uje que ore pésu guiguı́jna gatériguiji to.

⁶ Ga ore chajnerapome dapesudode guiguı́jna gatéo rı̃ iji Pangarádejnai Dupade iguı́jnai dosadode. Ga sóñime bajai abubı́e ga ajéode cuse to iji gaté yui, uje ore chujé udore aja ñane gáyode. Ga guiguı́jna gatéode udore iji jnumi udore ore pajei chiságui gateminórone ore pajei métrode batigai. Uje udiminórone pajei déji métro gárode iquei garósi. Ga guiguı́jna gatéode uñane uje pipesute udore iji bajade ore gai, ga ore pajei chise 2 métros y médio iquéode garósi. Jé basa ga guiguı́jna gatéode uñane uje pipesute udore iji gatócorominórone gai ga ore pajei chise métro gadiógode iquei garósi to nanique.

⁷ Ga ore pésu Pangarádejnai Dupade iguı́jnai ome cucarãte uejade nanique. Mu que chuque cucaranone udore iji Pangarádejnai Dupade iguı́jnai jogadi uté go. Gusu uje ore chijnime iji cucarani jogadi uté iji toniñeque ga ore chujé eruéode jeta jé tiroque. Ga quene ore chijnóngaja uté, Pangarádejnai Dupade iguı́jnai, jeta ore chiro uté aja gaté. Jecute que pududique erásonique jocarãtique nanique uje pipesucho udore iji guebéode ga que ore chinguı́ra erásorone aja ñane nanique iji Pangarádejnai Dupade iguı́jnai ejoi.

⁸ Enga ore pésu piagoi iji ore ipesudi guiguı́jna gaté eruei chojmarai. Enga ore chicha dapesudi piago aja dãrachua qui. Uje ore chacája piagoi uté ajei nanique ga jé u uje ore chimo ore uchiejnane uje cho quiyı́guiyı́gui aja gaté. Ga jé u uje ore choru ore uchiejnai tuté aja guiguı́jna gatéode ujaminóri ajei, jé aja erueminóri gaté ajei te rı̃.

⁹ Uje Salomón chiro Pangarádejnai Dupade iguı́jnai aja gaté nanique, enga jé u uje pésu ójo to. Uje ore doi ga ore chimate acháidode jé aja táblade aja ójo nanique. Enga pipesucho táblade udore iji poria nanique uje poria i tu cédro nanique, jé aja acháidode to. Enga jé ore isocai tuté, uje ore chimate Pangarádejnai Dupade iguı́jna cuchábi aja gaté nanique.

¹⁰ Ome Salomón ipesudı́so guiguı́jna gatéo udore, ga ajéode umaningai iji gaté yui chise 2 métros iquéode garósi. Enga Salomón chujépo achaite bisidégode aja dapesudode eruéode iji gaté yui nanique rı̃ ga ore chujé aja Pangarádejnai Dupade iguı́jnai dosadode ga ore mo ñane gai iji uté.

Pangarádejnai Dupade uruode chise Salomón uté, ga ueracho udore quigode nanique

¹¹ Enga chise diri nanique uje Pangarádejnai Dupade uruode chise Salomón uté.

¹² Ga chósi te uruode quigode ome Salomón: –E yidójnangapı́sa basocade udore ome yiguı́jnai uté úringárique poraque. Enga a yugúsipı́siji bamani yiguı́jna ajei jne jeta angoninguite guesaque ua ome yáyipie parénguenie udire quigode, jé aja jeta ajna yuru pirosobádode udore quigode iji jnumone. Jeta be yarecujaidie quigode, jé aja yiroquéode jnese to, enga jé u jne ujetiga yajopo yuja yuru iyiejnane udore ome ua rı̃ uje yichagája bai casicaite David yui nanique.–

¹³ Ga Pangarádejnai chigotápo darúiso rı̃ uje e chingome David bajaque nanique, uje chósi te: –A yugúsiji barasade israélgose uacajade gatuaque jne. Enga a jé ca yijı́ome yurasade uáguiji te jmete jne.– Enga Pangarádejnai Dupade uru iyiejnane u udojo ome Salomón uté nanique.

Ueradéjnapise Salomón uté ipesudi Pangarádejnai Dupade iguı́jna puyai ajei dosadode nanique, ga jé chuságaja pı́soi to

¹⁴ Enga qué Salomón jno dasagode údi jé aja ujetiga e chimanipise Pangarádejnai Dupade iguı́jna puyai jnese nanique.

¹⁵ Enga isocade u udojo uje pésu damani guiguı́jna ajéode: táblade iji ajei uté pipesucho iji poria uje i tu cédro. Ga ore chicha táblade udore aja ajei dosadode jnese, ga e que pimópo cucarãte uejade jne rı̃ iji ajei. Ga jé u nanique uje ore chimate táblade aja gaté ga jé u uje ore pésu pı́soi ga ore chiro pı́soi uté ome táblade to uje pipesucho táblade udore iji poria nanique uje uaté i tu pı́no.

¹⁶ Enga ore pésu ajé uñeque iji Pangarádejnai Dupade iguı́jnai uté ajei, ga déji eruépisi. Mu uje ore pésu ajé uñai uté ga ore chedu táblade ome uje pipesucho iji cédro. Ga métrode chise 9 iji guiguı́jnai ajé uñai uté dosadode jnese. Ga ore pésupúsu cuchade aja quigode iji uté nanique ujetiga ajé puyaguipı́si tu uté jne.

¹⁷ Pangarádejnai Dupade iguı́jnai ajé gosi uté umaningai chise 18 métrode iji, enga déji Pangarádejnai Dupade iguı́jnai ajé puyaguipı́si yui.

¹⁸ Ga ore doi nanique ga ore chica táblade iji Pangarádejnai Dupade iguı́jna puyai ajei ga ore pésu duchúbiedie oredie iji gáyode, jé aja cucha pojnánguenie oredie to. Ga táblade udore u uje pipesuchóji poria nanique uje i tu cédro. Ga gosi a chajı́rirase ajei nanique mu que chimópo cucarãte uejade uje táblade suru cucarãte uejade yui gu.

Pangarádejnai Dupade iguı́jna puyai uté ajei cho nánga, nánga, nánga iji jnumi nanique gu uje ore chimese ajei jnese ome óro

¹⁹ Ga jé u nanique uje Salomón irógode ore pésu Pangarádejnai Dupade iguı́jnai ajé uña puyaguipı́si ujetiga dimane ome Pangarádejnai Dupade uruode pi cajo ujetiga ore chicháji jne.

²⁰ Ga ajé uñai uté uje pirosobate umaningai chise 9 métrode nanique iji uté dosadode jnese. Ga ore chimese ajé puyaguipı́si uté ajei jnese ome óro uegue iji jnumi. Ga Salomón, ore pésu gaserani ome táblade uje ore chaquesu táblade udore iji poria nanique uje uaté i tu cédro. Ga ore chimate gaserani ga ore chimese gai ome óro uegue. Enga jé u uje ore chicha gaserani uté aja ajé uña puyaguipı́si piagoi yui nanique.

²¹ Ga Salomón irógode ore chimese Pangarádejnai Dupade iguı́jna puyai ajéode ome óro uegue to nanique rı̃, ga chise ajei eruéode jnese. Ga ore pésu ojnaquérodatédie iji óro ga ore chadı́ja ñane nanique ga ore chicháji ajé uñai piagoi yui uje pirosobate ajé uñai uté nanique.

²² Ga jé u uje Salomón irógode ore chimese Pangarádejnai Dupade iguı́jna puyai tuté ajei jnese ome óro nanique, jé aja gaserani uje déji ajé puyaguipı́si uté iquei. Ga ore chimese uté ome óro to.

Salomón qué jno dapesute ueradode údi ome damani Pangarádejna Dupade iguı́jna puyaque uté

²³ Enga Salomón chiroque darógode aja jeta ore pésu gaté unirı́sõre gárode ore orérigui, uje udore i tu querubı́neone. Ga ore chicha ore aja Pangarádejnai Dupade iguı́jna puyai ajé puyaguipı́si uté ajei. Ga pipesute gaté unirı́sõre gárode udore ore oredie iji pore pajéode uje poria uaté i tu olı́vo. Ga ore ipesudode udore gaté unirı́soño ga ore umaningai chise 4 métros y médio to nanique.

²⁴ Ga ipesudode querubı́neo udore ore ujnóngone cuse jnese ga ujnoque chojmarai batigai chise 2 métrode iquéi garósi. Iji gaté unirı́sõre chojmarai uté uje ore chatingara métro aja aramachoquia iji ujnoque uñai, jé aja aramachoqui uña iji ujnoque uñai, ga ujnóngone udore guiyade métro chise 4 métros y médio.

²⁵ Ga Salomón ipesudode gaté unirı́sõre querubı́neo udore uje gare ore, ga ore garode chopise ñane.

²⁶ Ga udore ore abubı́edie jé chopise ñane to ga chise 4 métros y médio to nanique.

²⁷ Enga Salomón chicha dapesudode udore aja Pangarádejnai Dupade iguı́jna puyai ajé uñai ajei nanique uje ore chojningame uté ajé puyaguipı́si. Ga gaté unirı́sõre uñai ujnoi chichaga raja dajõrai ujnoi eruei iji ajé uñai uté gatócoro. Ga udore uñai ujnoque uñai chichaga raja Pangarádejnai Dupade iguı́jnai dosate uñai. Jé basa ga uñai ujnoque uñai chichaga raja dosate uñai iji uécha uñai.

²⁸ Ga ore doi ga ore chimese dapesudode gaté unirı́sõre querubı́neo udore ore gáyode ome óro to.

²⁹ Iji Pangarádejnai Dupade iguı́jna puyai ajei jnese ga ore chica dosadode jnese, jé iji iguı́jnai ajé gosi, ajé puyaguipı́si ore jnese. Uje ore pésu iráradie iji ga iráradie cãra rome ñane ga cucha pojnánguenie déji, jé aja ijnaque quedéjnanie, jé aja gaté unirı́sõre querubı́neo uñane to.

³⁰ Enga ore chimesápo Pangarádejnai Dupade iguı́jnai pı́soi ome óro to nanique rı̃. Enga nanganatapise iguı́jnai uté ajei iji jnumi.

³¹ Ga Salomón pésu piago cuchátique iji ajé puyaguipı́si uté nanique ga pésu cutádedatédie iji piagoi gai nanique ga cuchadatépisi udire ga arubajéode chejna yijmanai. Pésu jorı́dedie uje garaja ga ore catája ñane, ga ore pésu udire iji táblade uje ore chaquesu táblade udore iji poria nanique uje uaté i tu olı́vo.

³² Ga ore chica iráradie iji joride gáredie udire gáyode ga ore pésu uruchachade iji gáyode ga cucha pojnánguenie déji, jé aja ijnaque quedéjnanie, jé aja gaté unirisórone uje ore ı́ode u querubı́neone to. Ga jé u uje ore chimese dapesudode uruchacha ome óro to.

³³ Ga cutádedatédie dépoji piagoi ejode rı̃ iji guesi yui to. Ga ore pésu cutádedie udire iji poria uje i tu olı́vo ga arubajéode gagájni ga ore chopise ñane.

³⁴ Ore pésapo jorı́dedie iji piagoi uté rı̃ iji guesi yui enga ore chujé jorı́dedie eruéode aja ñane enga ore pésu jorı́dedie udire iji poria uje i tu pı́no. Enga ore pésu joride uaté erã́todie nanique uje quı̃rique cho biságra isocai uté. Ga joride uaté chachia re uje ore chuchẽre gai nanique. Ga joride uña jé isocai tu jõra enga ore pésu erã́todie ome to ga jorı́dedie udire garaja piagoi uté ga ore chujé eruéode aja ñane nanique.

³⁵ Ga jé isoca uje ore chica jorı́dedie udire to ga ore pésu uruchachade iji gáyode to nanique. Ga ore pésapo cucha pojnánguenie udire oredie iji to, jé aja ijnaque quedéjnanie oredie to, jé aja gaté unirisórone ore oredie to rı̃ uje udore ore i tu querubı́neone. Ga ore chimese cucha oredie udire gáyode jnese to ome óro nanique, ga nanganatapise.

³⁶ Ga ore pésu dajuyaquei iji Pangarádejnai Dupade iguı́jnai gai jnese iji guesi ga chise ñane iji gai, ga guesája Dupade iguı́jnai ejode iji ore ujuyaquéode, Pangarádejnai Dupade iguı́jnai uté ore ujai. Enga e ore chujé cucarãte uejade eruéode jeta tiroque bajaque. Quigade, enga ore chimere cucarãte uejade aja táblade iji dapesudi dajuyaqué uté. Ga gadioque cucarãte uejade udore jochade aja dajesui; jé basa ga chojmára táblade jochai uté aja dajesui to. Ga táblade udore pipesuchóji poria nanique uje i tu cédro. Ga ore isocade u udore uje ore pésu dajuyaquei uté iji Pangarádejnai Dupade iguı́jnai uté gai nanique.

Eduguéjna cuchábi Salomón quene chimate Pangarádejnai Dupade iguı́jna puyai uté

^37-38 Uje Salomón chiro Pangarádejnai Dupade iguı́jna puyai uté nanique ga guejnanie siquerei 7 iji gai uje chimate. Enga Salomón quene chiro Pangarádejnai Dupade iguı́jna puyai nanique uje guejnanie siquerei 4 ome dáringai israélgosode ore eduguéjna cuchape. Ga guedosi i tu Zif nanique uje quene ore chijócha Pangarádejnai Dupade iguı́jnai eruéode nanique jetiga ore na cucarané querújnanie aja derugode nanique. Ore gaidi tu gu jeta ore cho Pangarádejnai Dupade iguı́jna puyai irı́bidi iji. Mu uje Salomón guejnanie siquerei e 11 nanique ome dáringai eduguéjna ga quene ore chimanipise Pangarádejnai Dupade iguı́jna puyai aja gaté nanique. Enga guedosı́ode e 8 iji siqueré uaté uje ore chimate Pangarádejnai Dupade iguı́jnai aja gaté iji guedosi uté, ga guedosi uté i tu Bul nanique. Ga ore chajna Salomón áyipiedie, uru quigode iji jnumone jnese uje ore pésu cuchade jnese iji ore orai uté ajei, guesi ore jnese.