1 Reyes 4 - Dupade Uruode

Eduguéjna Cuchábi Salomón iróquegatéode ore isocade u udojo uje ore cháta isagode cucha aja

¹ Enga jé u nanique uje Salomón uté déji dáringai eduguéjna ome israélgosode ore jnese.

² Ga Salomón iróquegatéode ore ı́ode u udojo uje ore cháta isagode cucha aja to: Ga sacerdote Sadoc uté ujnacari u uñai uje i tu Azarı́as.

³ Ga Sisa ujnacarode upo uñane rı̃, uje ore ı́ode u udojo: Elihoref, Ahı́as ore. Ga udore ore gajnepı́di u nanique uje ore churúsãre cucha tocachugode iji daniri, jé aja peduguéjnane adode ore. Ahilud ujnacari u to nanique uje i tu Josafat, enga uté charite Salomón yui enga churúsãre Salomón uru quigode nanique.

⁴ Benaı́a u uñai nanique ga gajnepı́di tu nanique uje chajire pocaningai gaisórone ore yúode ome dáringai pangarate. Enga Joiada ujnacari u Benaı́a uté nanique. Enga Salomón iróquegatéode uñane ore ı́ode u udojo nanique: Sadoc, Abiatar ore. Uje sacerdote udore ore ga ore catecãraite Dupade ome darasade nanique.

⁵ Natán ujnacari Azarı́as u uñai ga Salomón yuminóri tu uté nanique ga gajneque jeta chajnerame Salomón áyipiedie ome dojode iróquegatéo ore gaté. Mu Salomón yuminóripı́si u Natán ujnacari uje uté i tu Zabud, uje eduguéjna cuchábi jorámeque uté. Ga Zabud uté cháta darajatigai aja Salomón uté iji dirode jnese.

⁶ Ga Salomón iróquegatéode uñai i tu Ahisar enga gajnepı́di tu Salomón iguı́jna cuchábi jeta chajire cuchade jnese aja quigode iji uté. Ga Abda ujnacari u Salomón iróquegatéode uñai to uje uté i tu Adoniram. Ga uté gajnepı́di u nanique jeta chajire pirógode udore aja quedéjnane uje piroque ore aja cucha pisaque bisidégode ome eduguéjna cuchábi Salomón uté nanique.

⁷ Enga Salomón iróquegatéode uñane ore déji darasade israélgose jnese ujade to ome dáringane gobernador, ga gare ore iji yirı́dai. Ga iróquegaté chojmara, chojmarane udore ore jnese gajnepı́di u guedosi chojmarai nanique ujeta ore chajire cucha pibosode yui ome Salomón, jogasúode ore jnese jeta jé ca cucha pibotique chona ore nanique. Ga ore chutai cucha pibosode iji darasade iji dajnei guedosi chojmara. Ga jnanione 12 udore ore basája ñane quigade iji dajnepı́dode guedosı́o chojmara, chojmarane nanique iji siqueré chojmara údode.

⁸ Enga gobernador udore ı́ode u udojo nanique: Uñai i tu Ben-hur ga uté gajnepı́di u israélgosode ore achamini Efraı́n uté uje déji cucaranone ujade nanique jeta chutai ore iji uté.

⁹ Enga gobernador udore uñai i tu Ben-déquer ga gajnepı́di u nanique ore idáyode uje ore ı́ode u udojo: Macaz, Saalbim, Bet-semes, Elón, Bet-hanán ore uje chutai ore iji ore idáyode unojo nanique.

¹⁰ Ga Ben-hésed u uñai to nanique, ga uté gajnepı́di u ore idáyode to nanique uje ore ı́ode u udojo: Arubot, Soco ore. (Ga gajnepı́di tupo ore achamini údode nanique rı̃ uje ore achamini uté i tu Héfer.)

¹¹ Ga Ben-Abinadab jé upo gobernador uñai to nanique rı̃ (ga uté acoté i tu Tafat ga eduguéjna cuchábi Salomón uro uaté nanique). Ga uté gajnepı́di u ore idai uje i tu Dor nanique jé aja ore achamini jnese iji jogadi uté. Ga jé u uje chutai ore iji dajnepı́di uté ome uraque deduguéjnai nanique.

¹² Jé basa ga gobernador uñai u Ahilud ujnacari to nanique uje i tu Baana. Ga gajnepı́di tu ore idáyode nanique uje udore ı́ode u Taanac, Meguı́do ore. Ga gajnecápo ore achamini Bet-seán uté údode jnese rı̃ iji oridai Jezreel uté údi, ga jé chujé raja oridai Saretán uté. Que gusu udore mu gajnepı́di jé upo pijogadode jnese uje tṍraji ore idai Bet-seán uté ga chajna ore idai Abel-meholá, enga jé chuságaja ore idai Jocneam uté uéchai rı̃.

¹³ Ga cucha pibosode utaisórone jnanı́o udore uñai i tu Ben-guéber. Ga uté gajnepı́di u ore achamini Ramot de Galaad údode, ujeta chutai ore iji to ome uraque deduguéjna cuchábi. (Jnani bajai Jaír gajnéone pidáyo déji ore achamini Galaad uté to, uje Jaír uté dai i tu Manasés nanique. Ga Ben-guéber uté gajnecápo jogadi uté uje i tu Argob to nanique rı̃ uje uté déji ore achamini Basán, jeta chutai ore iji pijogadi uté údode to. Enga 60 ore idáidatéode nanique iji ore achamini uté, ga ore ujuyaquéode chaparúpusu ore idáidatéode udore gáyode. Ga ore pésu ore idáidatéode ujuyaquéode jorı́dedie iji guebéode nanique uje i tu bronce.)

¹⁴ Enga Ido ujnacari upo gobernador uñai nanique rı̃ uje gajnepı́di cuse, ga uté i tu Ahinadab. Ga gajnepı́di tu ore idai uje i tu Mahanaim.

¹⁵ Jnanione udore uñai u Ahimaas. (Enga uté acoté u Salomón urodie uña nanique uje uaté i tu Basemat.) Ga Ahimaas uté gajnepı́di cusapo to nanique rı̃ ga gajnepı́di u ore achamini Neftalí uje chutai ore iji to nanique.

¹⁶ Husai ujnacari gajnepı́di cusapo nanique rı̃ uje uté i tu Baana to. Gajnepı́di u jogadode udore nanique uje ore ı́ode u udojo: Aser, Alot ore. Ga chutai ore iji udore nanique ome uraque deduguéjnai.

¹⁷ Parúah ujnacari gajnepı́di cusapo nanique rı̃ uje uté i tu Josafat. Ga uté gajnepı́di u ore idáyode nanique uje ore déji ore achamini Ísacar ajei.

¹⁸ Ela ujnacari gajnepı́di cusapo nanique rı̃ uje uté i tu Simei, ga uté chutai ore iji ore idáyode jnese iji ore achamini Benjamín nanique.

¹⁹ Uri ujnacari gajnepı́di cusapo to nanique rı̃ uje uté i tu Guéber. Ga gajnepı́di u ore idáyode jnese iji ore achamini Gad údode nanique uje chutai ore iji. Ore achamini Gad uté peque uñai u uje israélgosode ore chijna jnumi tuté iji amorréogosode ore eduguéjna cuchábi gari nanique uje uté i tu Sihón. Jé ore chijna ore achamini Gad uté peque uñai iji basángosode ore eduguéjnai gari to nanique uje uté i tu Og. Ga gusu eduguéjna cuchábi Salomón iróquegaté Guéber uté uje déji dáringai gobernador iji ore achamini Gad uté.

²⁰ Ga israélgosode, judágosode udore ore gajnúone u ungaréjnai unépitabidie ome dáringane ayoré dipeséo. Ga que cucha pibotique chona udore ore nanique iji ore uniri uté, ga que ore jódode cucha chonapo ore rı̃, enga jé u uje pininaquei irágu ore ajéode.

²¹ Enga Salomón úringai eduguéjna jnuéngai eduguéjnane uñane iji daniri uté dosadode jnese nanique. Ga Salomón uté úringa pasuté chise tié nanique uje i tu Éufrates, jé aja filistéogosode ore idáyode to, ga chujé raja egı́ptogosode ore uniri. Ga Salomón ujode eduguéjna iji punire quedéjnane udore ga jé ore ate uje ore cho piróguiji re ga jecucha ore cho doré iji deranone cucha ome Salomón uté uje qué eca nanique.

Que cucha pibotique chona Salomón, urane ore jnese iji dirode jnese

²² Jiépisi Salomón uté urane nanique iji dirode jnese uje ore tagu uté posode. Ga irógode ore chijáro trı́goi nanique ome ore posode yúode, ga ikı́lode batigai chise 6.600 uje ore chijáro jeta urúpiso ga harı́nai tu uté. Jé basa ga ore ijaroque uñane cuse to iji trı́goi uté, mu quenguéra udore, ga ore batigai chise 13.200 ikı́lode to. Ga jé ore isoca iji dirode jnese.

²³ Ga ore yugode iji aquirájna choqui urojnane batigai chise 10, uje ore posode jé cãra rome ore yugode aquirájna choqui uñane uje 20 ore. Uje aquirájna choqui udore uñane uje veinte ore chedupise jnacaraque uecade. Enga ore chujépo áyasadie to rı̃, ga ore yuguedie chise 100 nanique. Mu que gusu ore gachidode nanique uje ore chujé mu ore doi erámoronie to iji erámi ga ore tagu deguedie to, jé aja erámoro quedéjnanie to. Ga ore chujé dachidode chugúpẽre uñane uje urojna udore ga ore tagu degode udore to. Ga ore isocai jé u iji dirode jnese.

²⁴ Salomón u uje sué peduguéjnane ore gáyode jnese iji tié Éufrates uécha uñai iji guedé cacadi yui, ga jé gajneque to. Ga jé uté gajnecápo ore idai to nanique rı̃ uje idai uté i tu Tı́fsa, jé aja ore idai uñai to nanique rı̃ uje i tu Gáza enga jé gajnecápo ore idáyode iji pidáyode udore ujai jnese to nanique rı̃. Ga jé pajesereringai jogadi tu ome ore iji Salomón uté dosadode jnese.

²⁵ Ga jé u uje que cuchárique chósi tiji israélgosode, judágosode udore ore jnese nanique uje Salomón qué eca nanique. Que paguté joráraque chise dángosode gotique nanique. Jé chopome beersébagosode rı̃ ga que paguté joráraque chise ore to, ga jé chopome pidáyode uñane to iji ore ujai rı̃. Ga jé u nanique uje Salomón uáguedie udire que todopo dojórique ayoré rı̃, enga ore chácariji purúdode iji daguı́jnane ejode ga ore tagu dacadie pore adie iji purúdode ga que ore áyipieraque dépoji pocaningárique nanique rı̃.

²⁶ Eduguéjna Cuchábi Salomón pésu dachidode burica iguı́jnane nanique. Enga pésu ajéode iji udore uje jiépisi nanique, enga burica chojmara, chojmara iji dajogadode nanique. Ga ipesudode burica jogacho chise 4.000 nanique. Mu jiépisi gachidode guebéquedatéo to nanique. Ga Salomón irógode cusapo nanique rı̃ uje ore chungurase gachidode guebéquedatéo udore. Ga irógode udore uñane batigai chise 12.000 nanique uje buricade orusórone u ore.

²⁷ Enga Salomón iróquegatéiso udore uje ore déji darasade israélgose ore ujade ome dáringane gobernador, jnani 12 udore ore gajnepı́di u nanique ujetiga ore chutai cucha pibosode iji darasade iji dajnei guedosi chojmara, chojmarane gatuaque iji siqueré chojmara údode. Ore gaidi u nanique jeta ca cucha pibotique chona Salomón, urane ore.

²⁸ Ga ore dopoi cucha pibosode ome Salomón uté gachidode burica jnese to rı̃. Ga cucha pibosode udore u ore aquesugode jnacaraque pajnotácho, jé aja ore acai uje i tu cebáda. Ga jé u uje ore jno dajnepı́dode cucha piboso udore batigade údi aja jogadode udore uje Salomón chı̃́care ome ore.

Salomón uté ujnomei chubu erámi jnese uje cuchadaté uté ome cutejmai darajatı́gadaté

²⁹ Enga jé ca uñeque déji jeta sué Salomón gai, uje Dupade chisı́ome payuquetotiguei, pirajatigai ore ome nanique ga a gosi catecã́ri mu e dimane irajatigai iji iquei nanique. Enga Salomón irajatigai jé chopise ungaréjnai ujnaminie ome dabetı́gajnai nanique.

³⁰ Jé ũré uje ujnomeranguipise egı́ptogosode udore ore jé aja purása quedéjnane uñane iji guedé garani yui ome dáringane irajatácho nanique, mu Salomón irajatigade suépise ore irajatigade gai jnese ome cutejmai darajatı́gadaté nanique.

³¹ Enga que jnanı́rique déji nanique jeta irajatigai sué Salomón irajatigade gai. Jnani bajai uje i tu Zérah ga uté ape disi ejo déji nanique uje irajatáguipı́se uté ga i tu Etán. Mu Salomón irajatigai suépise uté irajatigai gai nanique. Ga irajatade uñane déji nanique uje ore dai i tu Mahol, ga ujnacarode ore ı́ode u udojo: Hemán, Calcol, Darda ore. Mu Salomón irajatı́gadatéi suépise udore ore irajatigade gai to nanique. Enga punirone unirisórone ore chicotápise Salomón ome úringai irajatáquedaté ga ujnomei chise israélgosode ore ejominórone punı́ño jnese nanique.

³² Ga Salomón chatata payuquetotiguei quigode uñane nanique, uje udore i tu provérbios, ga atatagode udore batigai chise 3.000 nanique. Ga pésapo daradedie rı̃ ga udire batigai chise 1.005 nanique.

³³ Que gusu udore nanique, mu Salomón uté chirajapise poridie, cucha pacaque ponáyone udore ore isocade jnese, ga chatata udore. Que gusu irajatigai ome pore umarejnanie udire isocade uje déji ore uniri Lı́bano nanique, uje udire i tu cédro, mu chirajápo ugarabidie isocade to nanique rı̃, uje cachi cuchábabi ugarababidie mu. Chirajápo cuchiso ponáyone isocade rı̃, jé aja chugúperone isocade rı̃, jé aja oyı́dode isocade jnese rı̃, jé aja cuchisode udore uje ore chirajũre dajei tiji jnumi.

³⁴ Enga purása quedéjnane iji erámi údode jnese ore chudute Salomón ujnomei nanique uje irajataque cuchape uté. Ga jé u nanique uje ore tṍraji dajñarenie ome uté jeta ore tangári Salomón uruode quigode to. Chamáñaje ore eduguéjna cuchábode chiroque ore aja uté yui gu.